Mau hiti ’ā’au o te hō’ē auahi huna

Te mau taea’e ’e te mau tuahine, e ha’api’ira’a māuiui mau tā’u i ’apo mai te taime hope’a vau i ti’a ai i teie pūpiti i te ’āva’e ’Ātopa 2022 ra. Teie te ha’api’ira’a : mai te mea ’aita e au maita’i tā ’oe a’ora’a, e riro ’oe i te ti’avaruhia mai te mau ’āmuira’a e rave rahi i muri mai. Tē ’ite ra ’outou ’ua tu’u-’oi’oi-hia vau i roto i te tuha’a purera’a mātāmua nō teie ’āmuira’a. Te mea ’aita ’outou e ’ite ra, tei ni’a vau i te hō’ē tāpo’i ’āpo’o reirei maita’i. Mea au ’ore teie a’ora’a ra, e’ita fa’ahou ïa vau e ’ite iā’u nō te tahi ma’a ’āmuira’a.

Mai te au i te vārua o te hīmene nehenehe a teie pupu hīmene nehenehe, e mau ha’api’ira’a tā’u i ’apo mai ’aita i maoro a’enei, ’e ma te tauturu a te Fatu, tē hina’aro nei au e fa’a’ite ia ’outou i teie mahana. Nō reira e paraparau ri’i au nō’u nei i roto i teie a’ora’a.

Te mea i roto iā’u tā’u i māuiui roa i roto i teie mau ’ohipa nei, ’o te mo’era’a ïa tā’u vahine iti, ’o Pat. ’O ’ōna te vahine fa’ahiahia roa a’e tā’u i ’ite—e vahine fa’aipoipo ’e e metua vahine maita’i roa, ’aita ïa vau i fa’ahiti atu ra i tōna ateate, tāna tārēni nō te fa’ahiti i tāna parau ’e tōna fāito pae vārua. ’Ua hōro’a ’oia i te hō’ē taime i te hō’ē a’ora’a, te upo’o parau : « Fa’a’ī i te fāito o tō ’outou hāmanira’ahia. » Iā’u nei, e au ē, ’ua manuia atu ā tāna fa’a’īra’a i te fāito o tōna hāmanira’ahia i tā te tahi noa atu ta’ata e nehenehe e moemoeā. E tamāhine hope ’oia nā te Atua, e vahine nō te hi’ora’a maita’i ’e nō te Mesia. ’O vau te tāne fāna’o roa a’e i te rātera’a i tō’u orara’a e 60 matahiti te maoro i pīha’i iho iāna. Mai te mea e fa’a’ite au i tō’u ti’a mā, nō tā māua tā’atira’a, e ora atu ïa vau i te tau mure ’ore i pīha’i iho iāna.

’Ua tupu te tahi atu ’ohipa e 48 hora i muri mai i te hunara’a o tā’u vahine. I taua taime ra, ’ua fa’ahoro-rū-hia vau i te fare ma’i, e mea huru ’ino tō’u vaira’a. Nā hepetoma mātāmua e maha o nā ono i’ō, hope’a ’ore ïa te haerera’a mai te utuutura’a rū ē rāpae, mai te turuhe i te vai-ara-ra’a.

Te mau ’ohipa i tupu i roto i te fare ma’i i terā roara’a taime mātāmua, e nehenehe e parau ē ’ua mo’e pauroa i tō’u mēharo. Te mea ’aita i mo’e ’o tō’u ïa ha’amana’ora’a i te hō’ē tere i rāpae i te fare ma’i, mai te huru i te ’ōti’a o te tau mure ’ore. E’ita e nehenehe tā’u e paraparau hope nō te reira i’ō nei, e ti’a rā iā’u ’ia parau ē te hō’ē tuha’a, ’o te a’o ïa ’ia ho’i i ni’a i tā’u tāvinira’a ma te rū rahi a’e, te pūpūra’a rahi a’e, te rōtahira’a rahi a’e i ni’a i te Fa’aora, te fa’aro’o rahi a’e i tāna parau.

’Ua mana’o iho vau tē fa’ari’i ra vau i tā’u iho hōho’a nō te hō’ē heheura’a i hōro’ahia i te Tino ’Ahuru Ma Piti fātata ’a 200 matahiti i teienei :

« ’Ia fa’a’ite pāpū atu ’oe i te parau nō tō’u nei i’oa […] ’e ’ia fa’atae atu ’oe i tā’u parau i te mau hope’a o te ao nei […]

« […] I terā mahana ’e i terā mahana ’a fa’atae atu i tō ’oe reo fa’aara ; ’e ’ia tae i te pō, ’eiaha tō te ao nei ’ia ta’oto, nā roto i tā ’oe parau […]

« ’A ti’a mai i ni’a […] ’a rave i tō ’outou sātauro, [’e] ’a pe’e mai iā’u nei. »¹

E au mau tuahine, e au mau taea’e, mai taua ’ohipa ra, ’ua tāmata māite noa vau i te rave i tā’u sātauro, ma te fa’aotira’a rahi atu ā ’ia hi’o i hea e ti’a ai iā’u ’ia fa’ateitei i te reo ’āpōsetolo nō te tāmarū ’e nō te fa’aarara’a ato’a i te po’ipo’i, i roto i te mahana ’e i te pō.

E arata’i ïa te reira iā’u i te toru o te parau mau i tae mai i roto i taua mau ’āva’e ra nō te mo’era’a ’e te ma’ira’a ’e te ’oto. ’O te ’itera’a fa’a’āpīhia ïa ’e te māuruuru hope’a ’ore nō te mau pure mana’o fati ’ore a teie ’Ēkālesia—tā ’outou mau pure—nō’u nei. E māuruuru a muri noa atu vau nō te tāparura’a a te ta’ata e tauatini, mai te vahine ’ivi onoono ra,² ’ua tītau fa’ahou ’e fa’ahou ā ’ia rave mai tō te ra’i i te hō’ē mea nō’u nei. ’Ua fa’ari’i au i te mau ha’amaita’ira’a o te autahu’ara’a ’e ’ua ’ite au i tō’u piha ha’api’ira’a nō te tuarua tei ha’apae i te mā’a nō’u, mai te tahi atu mau pāroita rau o te ’Ēkālesia. ’E pāpū ē tei ni’a tō’u i’oa i te mau tāpura i’oa nō te pure o te mau hiero ato’a o te ’Ēkālesia.

Nō tō’u māuruuru hōhonu, tē ’āmui nei au i te mau parau a G. K. Chesterton, tei nā ’ō « ē ’o te māuruuru te huru mana’o teitei roa a’e ’e […] te ’ā’au mēhara ’o te ’oa’oa ïa tāpitihia e te māere. »³ Ma « te ’oa’oa tāpitihia e te māere », tē ha’amāuruuru nei au ia ’outou pā’āto’a ’e i tō’u Metua i te ra’i, tei fa’aro’o i tā ’outou mau pure ’e tei ha’amaita’i i tō’u orara’a.

Te mau taea’e ’e te mau tuahine, tē parau pāpū nei au ē, tē fa’aro’o nei te Atua i te mau pure ato’a tā tātou e pūpū, ma te pāhono i te pure tāta’itahi mai te au i te ’ē’a tāna i fa’ata’a nō tō tātou maita’i-roa-ra’a. ’Ua ta’a iā’u ē, fātata i te hō’ē ā taime te ta’ata e rave rahi i te purera’a nō tō’u ea, e ta’ata ’aifāito ato’a—’o vau ato’a nei—tē pure ra nō te ea o tā’u vahine. Tē parau pāpū nei au ē terā e piti pure tei fa’aro’ohia ’e tei pāhonohia e te Metua hanahana ’e te aumihi i te ao ra, noa atu ē ’aita te mau pure nō Pat i pāhonohia mai tā’u i ani atu. E mau tumu iho ā, tā te Atua noa i ’ite, e pāhonohia ai te mau pure i te pāhonora’a e ’ere terā tā tātou e tīa’i ra—terā rā, tē parau fafau nei au ia ’outou ē tē fa’aro’ohia nei te reira ’e tē pāhonohia ra mai te au i tōna here ’āueue ’ore ’e tāna tārena nō te ao teitei.

’Ia ani tātou « ma te hape ’ore »,⁴ ’aita e tā’ōti’ara’a nō te taime, te vāhi ’aore rā te mea tā tātou e pure. ’Ia au i te mau heheura’a, nā tātou e « mau māite ā i te pure. »⁵ Nā tātou e pure, ’ua parau Amuleka, nō « rātou tei pīha’i iho ia ’outou »,⁶ ma te ti’aturi ē « te pure fa’a’ū’ana a te ta’ata parauti’a ra, e mea ti’a-rahi-hia mai ïa. »⁷ ’A fa’ahiti tō tātou reo i te pure mai te mea e nehenehe e nā reira i te vāhi e pure atu tātou.⁸ Mai te mea e mea huru fifi, ’ia ta’ita’ihia te reira ’ei fa’a’itera’a muhu ’ore i roto i tō tātou ’ā’au.⁹ Tē hīmene nei tātou ē, te mau pure e mau « hiti ’ā’au o te hō’ē auahi huna »,¹⁰ ’o tē pūpū-noa-hia, ’ia au i te Fa’aora iho, i te Atua te Metua mure ’ore nā ni’a i te i’oa o tāna Tamaiti fānau tahi.¹¹

E au mau hoa iti, ’o tā tātou mau pure te hora au roa a’e,¹² tō tātou « hia’ai mau »,¹³ tā tātou huru ha’amorira’a ’ōhie roa ’e ’e te ateate roa a’e.¹⁴ ’Ei pure tātou tāta’itahi, i roto i te ’utuāfare ’e i roto i te mau ’āmuira’a, noa atu ā te rahi.¹⁵ ’Ei fa’a’ohipa tātou i te pure ’ei mauha’a pāruru i mua i te fa’ahemara’a,¹⁶ ’e mai te peu e taime ’aita te mana’o i ni’a i te pure, ’ia pāpū maita’i ia tātou ē, e ’ere te ’ōti’ati’ara’a nō ’ō mai i te Atua, ’oia tei hia’ai roa e paraparau i tāna mau tamari’i noa atu te taime ’e i te mau taime ato’a. ’Oia mau, e mau tauto’ora’a nō te tinai i tō tātou hina’aro ’ia pure nā te ’enemi iho.¹⁷ ’Ia ’ore noa atu tātou e ’ite e nāhea ’aore rā e aha mau tē pure atu, e mea tano ’ia ha’amata tātou, ’e ’ia tāmau noa ē tae noa atu te Vārua mo’a e arata’i ia tātou i te pure e pūpū atu.¹⁸ ’O teie paha te arata’ira’a tā tātou e ti’aoro atu i te taime ’a pure ai nō tō tātou mau ’enemi ’e nō rātou e parau ’ino mai ia tātou.¹⁹

I te hope’a roa, e ti’a ia tātou ’ia hi’o i te hi’ora’a o te Fa’aora, tei pure pinepine roa ’ino. I māere noa ana vau i te mea ē, e aha pa’i i tupu ai te hina’aro o Iesu ’ia pure. E ’ere ānei ’oia i te ta’ata maita’i roa ? E aha pa’i tāna e pure atu ? ’Ua huru ’apo mai au ē, ’ua hina’aro ato’a ’oia, ’e tātou, « ’ia ’imi i te mata [o te Metua], ’e ti’aturi i tāna parau ’e ti’aturi i tōna maita’i rahi. »¹⁹ I terā taime ’e terā taime, ’ua ha’apa’i ’oia i te tōtaiete nō te vai ’āta’a hou ’a ha’aputa ai i te ra’i i tāna mau pure.²¹ I te tahi atu mau taime, ’ua pure ’oia i rotopū i te tahi ma’a hoa. I muri iho ’ua tītau ’oia i tō te ra’i nō te naho’a rahi e apiapi roa te purou ’āivi. I te tahi mau taime, ’ua hanahanahia tōna ’ahu i te pure.²² I te tahi mau taime, ’ua hanahanahia tōna mata.²³ I te tahi mau taime ’ua ti’a ’oia nō te pure, i te tahi mau taime ’ua tūturi ’e i te hō’ē a’e taime ’ua tīpapa i raro nō te pure.²⁴

’Ua fa’ati’a Luka i te poura’a Iesu i roto i tāna fa’aho’onara’a mai te hō’ē ’ohipa tei tītauhia te pure « ’ū’ana roa. »²⁵ E nāhea te hō’ē ta’ata maita’i roa i te pure ’ū’ana roa ? E feruri iho ā ïa tātou ē, tāna mau pure ato’a e mau pure ’ū’ana, terā rā, i te ravera’a ’oia i tāna tūsia tāra’ehara ’e nō te māuiui e tū’ati i te tā’ōti’a ’ore o te reira, ’ua tae mai te hina’aro e pure ma te tāparu-rahi-atu-ā-ra’a, ma te teimaha o tāna pūpūra’a tei fa’atahe i te toto i roto i te mau poa ato’a i te hope’a.

I mua i teie hōho’a nō te upo’oti’ara’a te Mesia i te pohe ’e tōna hōro’a a’enei iā’u e ma’a hepetoma atu ā ’aore rā e ma’a ’āva’e i te tāhuti nei, tē hōro’a nei au i tō’u ’ite tura rahi nō te pāpūra’a te ora mure ’ore ’e te tītaura’a ia tātou ’ia feruri māite i tā tātou ’ohipara’a nō te reira.

Tē hōro’a nei au i tō’u ’itera’a pāpū ē ’ia tae mai te Mesia, tītauhia ’ia ’ite ’oia ia tātou—’eiaha ’ei melo ’o te i’oa noa i ni’a i te hō’ē tāpura bāpetizora’a marau, ’ei pipi pūpū pāpū rā, ’e te ti’aturi ’e te ha’apa’o maita’i, ’e te ha’apa’o fafaura’a. E ’ohipa rū teie nō tātou pā’āto’a, ’oi tātou e fa’aro’o noa ai i te parau teimaha mau ē : « ’Aita roa vau i ’ite ia ’outou »,²⁶ ’aore rā mai tā Iosepha Semita i ’īriti, « ’Aita roa [’outou] i ’ite iā’u. »²⁷

’Aua’a a’e, e tauturu nō teie tuha’a ’ohipa—’ua rahi te tauturu. Tītauhia ’ia ti’aturi i te mau melahi ’e te mau semeio, nā reira ato’a te mau parau fafau nō te autahu’ara’a mo’a. Tītauhia ’ia ti’aturi i te hōro’a nō te Vārua maita’i, i te mana o te mau ’utuāfare ’e te mau hoa maitata’i ’e te mana nō te here ateate o te Mesia. Tītauhia ’ia ti’aturi i te heheura’a ’e te mau peropheta, i te mau hi’o ’e te mau heheu parau ’e i te peresideni Russell M. Nelson. Tītauhia ’ia ti’aturi ē, ma te pure ’e te tāparura’a ’e tō tātou iho parauti’a, e ti’a mau ia tātou ’ia ta’uma « i te mou’a ra Ziona […] i te ’oire o te Atua ora, te vāhi mai te ao ra te huru, te vāhi mo’a roa a’e. »²⁸

Te mau taea’e ’e te mau tuahine, ’ia tātarahapa tātou i tā tātou mau hara ’e ’ia haere itoito mau i te « terōno o te aroha mau ra »,²⁹ ma te vaiiho i reira i mua iāna i tā tātou tao’a aroha ’e tā tātou tāparura’a o te ’ā’au, e ’itehia mai ia tātou te hāmani maita’i ’e te aumihi ’e te fa’aorera’a hara i nā rima ’ā’au maita’i o tō tātou Metua mure ’ore, ’e o tāna Tamaiti ha’apa’o ’e te ateate hope roa. ’Ei reira tātou e ’ite ai, nā muri ia Ioba ’e te tā’āto’ara’a o te feiā ha’apa’o maita’i i tāmāhia, i te hō’ē ao « ta’a ’ē »³⁰ roa nō te māramarama atu. I te i’oa o Iesu Mesia, ’āmene.