Ti’aturi i te Fatu

I roto i tō mātou ’utuāfare, e ha’uti mātou i te tahi taime i te ha’uti tā mātou e pi’i « te ti’aturira’a matapō ». ’Ua ha’uti ato’a paha ’outou i te reira. E ti’a e piti nau ta’ata te tahi tenetimētera i te ātea i te tahi ’e te tahi, hō’ē e mea huri tua atu i te tahi. ’Ia fa’aarahia mai e te ta’ata i muri mai, e fa’atopa tua te ta’ata i mua i roto i te rima o tōna hoa e tīa’i noa ra.

E niu te ti’aturira’a nō te mau aura’a ato’a. Te uira’a faufa’a roa i roto te mau aura’a ato’a ’oia ho’i, « e nehenehe ānei au e ti’aturi i terā ta’ata ? » E tupu mai te aura’a i te taime noa ’a ’ineine ai te ta’ata i te ti’aturi i te tahi ’e te tahi. E ’ere i te hō’ē aura’a, mai te peu e ti’aturi tā’āto’a te hō’ē ta’ata ’aita rā te tahi.

E tamaiti ’e e tamāhine vārua herehia tātou tāta’itahi nā te hō’ē metua here i te ra’i.¹ Teie rā, noa atu e hōro’a mai te tuatāpapara’a tupuna i te pae vārua i te hō’ē niu, e’ita te reira e fa’atupu i te hō’ē aura’a pāpū ’e te Atua. E patu-noa-hia te hō’ē aura’a i te taime noa ’a mā’iti ai tātou i te ti’aturi iāna.

Tē hina’aro nei te Metua i te ao ra ’ia patu i te hō’ē aura’a hōhonu ’e te ta’a ’ē ’e tāna mau tamari’i vārua tāta’itahi.² ’Ua fa’ahiti Iesu i teie hina’aro ’a pure ai ’oia, « ’ia riro rātou ato’a ’ei hō’ē ; mai ia ’oe, e tā’u Metua, i roto iā’u nei ra, ’e mai iā’u ho’i i roto ia ’oe na, ’ia hō’ē ato’a rātou i roto ia tāua ».³ Te aura’a tā te Atua e ’imi nei ’e te tamari’i vārua tāta’itahi e mea hōhonu ïa ’e te ta’a ’ē, ’o tāna e nehenehe e ’ōpere i te mau mea ato’a tāna e vai ra ’e te mau mea ato’a tāna i riro mai.⁴ Teie huru aura’a hōhonu ’e te mure ’ore e fa’ananeahia mai te peu e ha’amauhia te reira i ni’a i te ti’aturira’a pāpū ’e te hope roa.

Nōna, ’ua tūtava te Metua i te ao ra mai te ha’amatara’a mai ā nō te fa’a’ite i tōna ti’aturira’a hope i te fāito pūai hanahana o tāna mau tamari’i tāta’itahi. ’Ua riro te ti’aturira’a ’ei niu nō te ’ōpuara’a tāna i ha’amau nō tō tātou tupura’a ’e tō tātou haerera’a i mua, hou tātou ’a haere mai ai i te fenua nei. E ha’api’i mai ’oia ia tātou i te mau ture mure ’ore, e poiete mai i te hō’ē fenua, e hōro’a mai i te tino tāhuti nō tātou, e hōro’a mai ia tātou te hōro’a nō te mā’iti nā roto ia tātou iho, ’e e fa’ati’a ia tātou ’ia ha’api’i mai ’e ’ia tupu i te rahi nā roto i te ravera’a i tā tātou iho mau mā’itira’a. ’Ua hina’aro ’oia ia tātou ’ia mā’iti i te pe’e i tāna mau ture ’e ’ia ’oa’oa i te ora mure ’ore i pīha’i iho iāna ’e i tāna Tamaiti.

Te ’itera’a ē e’ita tātou e rave i te mau mā’itira’a maita’i i te mau taime ato’a, ’ua fa’aineine ato’a ’oia i te hō’ē rāve’a nō tātou ’ia ’ape i te mau hope’ara’a o tā tātou mau mā’itira’a ’ino. ’Ua hōro’a mai ’oia ia tātou i te hō’ē Fa’aora—tāna Tamaiti, o Iesu Mesia—nō te tāra’e i tā tātou mau hara ’e nō te tāmā ia tātou mai te mea e tātarahapa tātou.⁵ Tē ani mai nei ’oia ia tātou ’ia fa’a’ohipa tāmau i te hōro’a tao’a rahi o te tātarahapa.⁶

’Ua ’ite te mau metua ato’a e mea fifi roa ’ia ti’aturi i te hō’ē tamari’i nō te rave i te mau fa’aotira’a, ’ia ’ite iho ā rā te metua e hape te tamari’i ’e e māuiui ’oia i te pae hope’a. Teie rā, tē ti’aturi nei te Metua i te ao ra ia tātou nō te rave i te mau mā’itira’a ’o te tauturu ia tātou ’ia tae i tō tātou fāito pūai hanahana ! Mai tā Elder Dale G. Renlund i ha’api’i, « [tāna] fā ’ei ti’ara’a metua e ’ere i te ravera’a tāna mau tamari’i i te maita’i ; i te vaiihora’a ra i tāna mau tamari’i ’ia mā’iti i te rave i te maita’i ’e ’ia riro mai iāna te huru i te pae hope’a »⁷

Noa atu te ti’aturira’a a te Atua ia tātou, e nehenehe tō tātou aura’a ’e ’ōna e tupu i te rahi e tae roa atu i te taime e hina’aro ai tātou e ti’aturi iāna. Te fifi ’oia ho’i tē ora nei tātou i roto i te hō’ē ao hi’a ’e ’ua ora tātou pā’āto’a i te ’erera’a i te ti’aturira’a nā roto i te parauti’a ’ore, te ha’avare, ’aore rā te fa’ahepora’a a vetahi ’ē. I te taime ’a ha’avarehia ai tātou, e mea fifi nō tātou ’ia ti’aturi fa’ahou. Teie mau ’ohipa ’ino i tupu nō te ti’aturira’a ’e te ta’ata ti’a ’ore o te tāhuti nei, e nehenehe ato’a e tupu i ni’a i tō tātou hina’aro e ti’aturi i te hō’ē Metua i te ao ra parauti’a roa.

E rave rahi matahiti i teienei, ’ua fa’a’ite mai e piti o tō’u mau hoa, ’o Leonid ’e ’o Valentina, i tō rāua hina’aro ’ia riro mai ’ei melo nō te ’Ēkālēsia. ’A ha’amata ai Leonid i te ha’api’i mai i te ’evanelia, ’ua ’ite ’oia i te fifi nō te pure. Nā mua a’e i roto i tōna orara’a, ’ua mamae Leonid i te ha’avarera’a ’e te fa’ahepora’a a tōna feiā fa’atere ’e ’ua fa’atupu i ni’a iāna i te ti’aturi-’ore-ra’a i te mana fa’atere. ’Ua fa’atupu teie mau ’ohipa i tupu i ni’a i tōna ’aravihi ’ia hōhora i tōna ’ā’au ’e ’ia fa’a’ite i tōna iho mau nino’a mana’o i te Metua i te ao ra. I roto i te tau ’e te ’imira’a maita’i, ’ua noa’a ia Leonid i te hāro’aro’a maita’i a’e i te huru o te Atua ’e ’ua putapū i te here o te Atua. I te hōpe’a, ’ua riro te pure ’ei rāve’a mātauhia e āna nō te fa’a’ite i tōna māuruuru ’e te here tāna i putapū nō te Atua. ’Ua hōpoi mai tōna ti’aturira’a tupu rahi i te Atua i te hope’a, iāna ’e ia Valentina, ’ia rave i te mau fafaura’a mo’a nō te ha’apūai i tō rāua aura’a ’e te Atua ’e i te tahi ’e te tahi.

Mai te mea tē ha’afifi ra te mo’era’a te ti’aturira’a tahito ia ’outou ’ia ti’aturi i te Atua, ’a pe’e i te hi’ora’a o Leonid. ’A tāmau noa ma te fa’a’oroma’i i te ha’api’i rahi mai nō ni’a i te Metua i te ao ra, tōna huru, tōna mau ’aravihi ’e tāna mau ’ōpuara’a. ’A ’imi ’e ’a pāpa’i i te mau ’ohipa i tupu i te putapūra’a i tōna here ’e tōna mana i roto i tō ’outou orara’a. ’Ua ha’api’i mai tō tātou peropheta ora, te peresideni Russell M. Nelson, rahi noa atu tātou i te ’apo mai nō ni’a i te Atua, e rahi noa ato’a atu tō tātou ti’aturira’a iāna.⁸

Te tahi mau taime te rāve’a maita’i a’e nō te ha’api’i mai i te ti’aturi i te Atua ’o te ti’aturi-noa-ra’a ïa iāna. Mai « te ti’aturira’a matapō », e hina’aro noa tātou i te tahi taime ’ia ineine i te fa’atopa atu i muri ’e e vaiiho iāna ’ia haru mai ia tātou. E tāmatara’a tō tātou orara’a i te tāhuti nei. Te mau tāmatara’a ’o te tūra’i ia tātou i ni’a a’e i tō tātou iho ’aravihi, e fā pinepine mai. ’Ia ’ore ana’e tō tātou iho ’itera’a ’e te hāro’aro’ara’a e nava’i, e ’imi iho ā tātou i te mau rāve’a faufa’a nō te tauturu ia tātou. I roto i te hō’ē ao tei ’ī i te mau ha’amāramaramara’a, ’aita tātou i ’ere i te mau rāve’a faufa’a nō te fa’a’aimamau i tā rātou mau rāve’a nō tō tātou mau tāmatara’a. Terā rā, tē hōro’a mai nei te a’ora’a ’ōhie ’e te hope ’ore a te Maseli ia tātou i te rāve’a maita’i roa a’e : « E ti’aturi ia Iehova ma tō ’ā’au ato’a ra ».⁹ E fa’a’ite tātou i tō tātou ti’aturira’a i te Atua ma te fāriura’a atu nā mua roa iāna, ’ia fa’aruru ana’e tātou i te mau fifi o te orara’a.

I muri a’e i te hopera’a tā’u ha’api’ira’a nō ni’a i te ture i Utaha, ’ua fa’aruru tō māua ’utuāfare i te fa’aotira’a faufa’a roa nō te ’ite i hea e rave ai i te ’ohipa ’e e fa’aea ai. I muri a’e i te fārereira’a i te tahi ’e te tahi ’e te Fatu, ’ua fa’auru-manihini-hia māua ’ia haere atu tō māua ’utuāfare e fa’aea i te pae hiti’a o te rā nō te fenua Marite, ātea i te mau metua ’e te mau taea’e ’e mau tuahine. I te ha’amatara’a, ’ua tere maita’i te mau ’ohipa, ’e ’ua ha’apāpū-mau-hia māua i roto i tā māua fa’aotira’a. I muri iho rā ’ua taui te mau mea. ’Ua fa’aitihia te piha a te pāruru ’e ’aita fa’ahou tā’u e ’ohipa ’e ’aita e pārurura’a i te taime ’a fānauhia ai tā māua tamāhine ’o Dora, ma te mau fifi rahi nō te ea ’e te mau hina’aro ta’a ’ē tau roa. I roto i te fa’arurura’a i teie mau tāmatara’a, ’ua fa’ari’i au i te hō’ē pi’ira’a ’ia tāvini ’o te ani e rave rahi taime ’e te tītaura’a

’Aita a’enei au i fa’aruru i teie huru tāmatara’a ’e ’ua nā ni’a a’e te reira iā’u. ’Ua ha’amata vau i te uiui nō ni’a i te fa’aotira’a ’o tā māua i rave ’e te ha’apāpūra’a tei ’āpe’e mai. ’Ua ti’aturi māua i te Fatu ’e e ti’a ho’i i te mau mea ato’a ’ia tupu maita’i. ’Ua topa vau i muri ’e e au ra i teienei, ’aita e ta’ata nō te haru mai iā’u.

I te hō’ē mahana, ’ua tae mai te mau parau māramarama maita’i i roto i tō’u ferurira’a ’e tō’u ’ā’au « ’eiaha e ui nō te aha ; ’a ani mai i te mea tā’u e hina’aro ’ia ha’api’i mai ’oe ». I teienei, ’ua rahi atu ā tō’u horuhorura’a. I te taime ā ’a tapitapi ai au nō ni’a i tō’u ti’aturira’a nā mua atu, ’ua ani mai te Atua iā’u ’ia ti’aturi rahi atu ā iāna. I te hi’ora’a i muri, ’ua riro te reira ’ei taime fifi mau i roto i tō’u orara’a—’o te taime teie ’a ’ite ai au ē te rāve’a maita’i a’e nō te ha’api’i mai i te ti’aturi i te Atua, ’o te ti’aturi-noa-ra’a iāna. I roto i te mau hepetoma i muri mai, ’ua ’ite atu vau ma te māere i te Fatu i te hōhorara’a mai ma te temeio tāna ’ōpuara’a nō te ha’amaita’i i tō māua ’utuāfare.

’Ua ’ite te mau ’orometua ha’api’i ’e te mau ta’ata fa’aineine maita’i e nehenehe te tupura’a i te rahi i te pae ferurira’a ’e te pūai i te pae tino e tupu ’ia fa’a’eta’eta noa tātou i te ferurira’a ’e te mau uaua. ’Oia ato’a, tē ani manihini mai nei te Atua ia tātou ’ia tupu i te rahi ma te ti’aturira’a i tāna ha’api’ira’a pae vārua, nā roto i te mau ’itera’a ’o te fa’a’eta’eta i te vaerua. Nō reira, e nehenehe tātou e pāpū ē, noa atu te huru ti’aturira’a ’o tā tātou i fa’a’ite i te Atua nā mua a’e nei, tē tīa’i fa’ahou mai ra te tahi atu ā ’itera’a nō te ha’apūaira’a i te ti’aturi, ia tātou. Tē fa’atumu nei te Atua i ni’a i tō tātou tupura’a ’e tō tātou haerera’a i mua ’O ’oia te ’orometua ha’api’i ’aravihi, te ta’ata fa’aineine hope ’o tē tura’i tāmau nei ia tātou nō te tauturu ia tātou ’ia fa’atupu hau atu i tō tātou fāito pūai hanahana. Tei roto i te reira te hō’ē tītaura’a manihini nō ananahi, ’ia ti’aturi rahi atu ā iāna.

Tē ha’api’i nei te Buka a Moromona i te hōho’a ’o tā te Atua i fa’a’ohipa nō te fa’a’eta’eta ia tātou, ’ia nehenehe e patu i te mau aura’a pāpū ’e tātou. I roto i te Mai, pe’e mai, ’ua tuatāpapa tātou ’aita i maoro a’enei nāhea te ti’aturira’a o Nephi i te Atua i te tāmatara’ahia, ’a fa’auehia ai ’oia ’e tōna mau taea’e ’ia ho’i i Ierusalema nō te ti’i mai i te mau pāpa’a parau veo. I muri a’e i te manuia-’ore-ra’a tā rātou mau tāmatara’a mātāmua, ’ua fa’aru’e tōna mau taea’e ’e ’ua ineine rātou i te ho’i ma te mau pāpa’a parau ’ore. ’Ua mā’iti rā Nephi ’ia tu’u i tōna ti’aturira’a tā’āto’a i te Fatu ’e ’ua manuia ’oia i te noa’ara’a te mau pāpa’a parau.¹⁰ ’Ua ha’apūai mau teie ’itera’a i te ti’aturira’a o Nephi i te Atua, ’a fati ai tāna fana ’e ’a fa’aruru ai te ’utuāfare i te o’e i roto i te mētēpara. ’Ua mā’iti fa’ahou Nephi e ti’aturi i te Atua, ’e ’ua fa’aorahia te ’utuāfare.¹¹ ’Ua hōro’a teie mau ’itera’a tāmau ia Nephi i te hō’ē ti’aturira’a pūai a’e i te Atua nō te ’ohipa rahi ’e te tītauhia nō te hāmanira’a i te hō’ē pahī.¹²

Nā roto i teie mau ’itera’a, ’ua ha’apūai Nephi i tōna aura’a ’e te Atua ma te tūtavara’a ’e te tāmau-noa-ra’a i te ti’aturira’a iāna. Tē fa’a’ohipa nei te Atua i te hō’ē ā hōho’a ’e tātou. Tē fa’atae nei ’oia ia tātou tāta’itahi i te mau anira’a nō te ha’apūai ’e nō te fa’ahōhonu i tō tātou ti’aturira’a iāna.¹³ I te mau taime ato’a ’a fa’ari’i ai ’e ’a pāhono ai tātou i te hō’ē anira’a manihini, e rahi atu ā tō tātou ti’aturira’a i te Atua. ’Ia tāu’a ’ore ana’e tātou ’aore rā ’ia pāto’i tātou i te hō’ē anira’a manihini, e fa’aea tō tātou haerera’a i mua e tae roa i te taime e ineine ai tātou nō te pāhono i te hō’ē anira’a manihini ’āpī.

Te parau ’āpī maita’i ’oia ho’i noa atu te huru ti’aturira’a i te Atua ’o tā tātou i mā’iti ’aore rā ’aita nā mua a’e nei, e nehenehe tātou e mā’iti i te ti’aturi i te Atua i teie mahana ’e i te mau mahana ato’a i muri nei. Tē fafau atu nei au ē, i te mau taime ato’a ’a nā reira ai tātou, tei reira te Atua nō te haru mai ia tātou ’e riro mai tō tātou aura’a o te ti’aturira’a e mea pūai roa atu ā, e tae roa i te mahana e riro ai tātou ’ei hō’ē iāna ’e i tāna Tamaiti. I muri iho, e nehenehe tātou e fa’ahiti mai ia Nephi, « e te Fatu, ’ua ti’aturi au ia ’oe, ’e e ti’aturi au ia ’oe ē a muri noa atu ».¹⁴ I te i’oa o Iesu Mesia, ’āmene.