Te ti’aturira’a i roto i te fafaura’a nā roto ia Iesu Mesia

E au mau taea’e e au mau tuahine here, tē pure nei au ’ia fa’a’āpīhia tātou i te pae vārua nā roto i te mau parau poro’i fa’auruhia nā roto mai i tō tātou feiā fa’atere i teie hope’a hepetoma ’e ’ia ’oa’oa tātou i te mea tā’u mea au roa ’ia parau ē, « Te ti’aturira’a i roto i te Fafaura’a nā roto ia Iesu Mesia ». Teie ti’aturira’a o te ha’apāpūra’a hau ïa ’e te pāpū ’ia fāri’i i te mau ha’amaita’ira’a tā te Atua e fafau i te feiā e ha’apa’o i tā rātou mau fafaura’a ’e tei riro ho’i ’ei mea faufa’a i roto i te mau tupura’a fifi o tō tātou nei ’anotau.

Te patura’a o te mau fare ’āpī o te Fatu ’ati a’e te ao nei, i raro a’e i te fa’aterera’a fa’auruhia a te peresideni Russell M. Nelson, ’ua fa’atupu ïa te reira i te ’oa’oa rahi i rotopū i te mau melo o te ’Ēkālesia ’e ’ua riro ho’i ’ei tāpa’o faufa’a nō te pararera’a o te bāsileia o te Fatu.

’A feruri ai au i te ’ohipa fa’ahiahia i tupu i ni’a iā’u i roto i te ’ōro’a ha’amo’ara’a o te hiero nō Feather River i Karifonia i te ’āva’e ’Ātopa i ma’iri a’e nei, ’ua uiui noa vau ē, i te tahi taime ’aita anei tātou e mo’e nei i roto i te ’oa’oa rahi nō te hāmanira’a o te mau hiero ’āpī i roto i tō tātou mau ’oire ’e mau mata’eina’a ’e ’ia tau’a ’ore i te tumu mo’a a’e o te mau fafaura’a mo’a i ravehia i roto i te hiero.

I ni’a i te papa’i mua o te hiero tāta’itahi ’ua pāpa’ihia te hō’ē parau hanahana : « Ha’amo’ahia i te Fatu ».¹ Teie mau parau fa’auruhia, o te hō’ē ïa anira’a manihini ē, ’ia tomo ana’e tātou i roto i te fare ’o te Fatu, tē tomo ra ïa tātou i roto i te hō’ē tere mo’a nō te ha’api’ira’a ’ia riro mai ’ei mau pipi teitei a’e ’e te mo’a a’e nā te Mesia. ’A rave ai tātou i te mau fafaura’a ma te mo’a i mua i te Atua ’e ’a fafau ai e pe’e tātou i te Fa’aora, e fāri’i ïa tātou i te mana nō te taui i tō tātou ’ā’au, nō te fa’a’āpī i tō tātou vārua ’e nō te fa’ahōhonu i tō tātou auta’atira’a iāna. E hōro’a mai teie huru tauto’ora’a i te ha’amo’ara’a i tō tātou vairua ’e e fa’atupu ho’i i te hō’ē tā’amura’a mo’a ’e te Atua ’e ’o Iesu Mesia, o tē fafau mai ē, e nehenehe tātou e fāri’i i te hōro’a o te ora mure ’ore.² Te hope’ara’a o teie tere mo’a o te fāri’ira’a ïa tātou i te hō’ē ti’aturira’a mo’a a’e ’e te teitei a’e nō tō tātou orara’a i te mau mahana ato’a i roto i tā tātou mau fafaura’a i ravehia nā roto ia Iesu Mesia.

Teie huru ti’aturira’a o te faito teitei roa ïa o tō tātou tū’atira’a hanahana i te Atua ’e e nehenehe te reira e tauturu ia tātou ’ia fa’arahi i tō tātou fa’aro’o ’e i tō tātou ’ā’au mēhara ia Iesu Mesia ’e tāna tusia tāra’ehara. E fa’arahi te reira i tō tātou ’aravihi ’ia here ’e ’ia tāvini ia vetahi ’ē, ’e e ha’apūai ho’i i tō tātou vairua nō te ora i roto i te hō’ē ao vi’ivi’i e pōiri noa atura ’e te ha’aparuparu i te mana’o. E tauturu te reira ia tātou ’ia upo’oti’a i ni’a i te mau huero o te mana’o fē’a’a ’e te ’oto, te mata’u ’e te au ’ore, te ’oto ’e te ti’aturi ’ore, tā ’enemi e tāmata i te taumi hōhonu i roto i tō tātou ’ā’au, mai te mea iho ā rā ē, e mea fifi te orara’a, ’e mea roa te mau tāmatara’a, ’aore rā e mea fifi te mau tupura’a. Tē hōro’a mai nei te hō’ē ’īrava bibilia i te hō’ē parau a’o maita’i ’ia tātou tāta’itahi ’a turu’i ai tātou i ni’a i te mata’i pūai o te mau tāmatara’a o te ao i teie mahana : « Nō reira, ’eiaha e fa’aru’e atu i tō ’outou ti’aturira’a ».³

E te mau taea’e ’e te mau tuahine here, te feiā e nōa’a ia rātou te ti’aturira’a mau i roto i te mau fafaura’a i ravehia i roto i te fare o te Fatu nā roto ia Iesu Mesia, e fāri’i rātou i te hō’ē o te mau pūai mana rahi roa a’e e roa’a ia tātou i roto i teie orara’a.

’A tuatāpapa ai tātou i te Buka a Moromona i roto i te Mai, Pe’e mai i teie matahiti, ’ua ’ite tātou i te huru fa’ahōho’ara’a ma te nehenehe a Nephi i te mana o terā huru ti’aturira’a i roto i te fafaura’a nā roto i tōna ha’apa’o maita’i ’a fārerei ai ’oia i te mau pāto’ira’a ’e te mau fifi mai te fāri’ira’a i te mau ’api veo mai tā te Fatu i fa’aue mai. Noa atu tōna pe’ape’a nō te mata’u ’e te iti o te fa’aro’o ’o Lamana ’e ’o Lemuela, ’ua ti’aturi tāmau noa ’o Néphi ē, e hōro’a mai te Fatu i te mau ’api ia rātou. ’Ua parau ’oia i tōna nā taea’e, « Mai te Fatu e ora ra, e mai ia tātou ho’i e ora nei, ’eiaha roa tātou e haere atu i raro i tō tātou metua tāne i te mēdēbara, ē tae noa atu ’ua rave fa’aoti tātou i te mea tā te Fatu i fa’aue mai ia tātou ra ».⁴ Maoti tōna ti’aturi i roto i te mau parau fafau a te Fatu, ’ua ti’a ia Nephi ’ia rave fa’aoti i te mea i fa’auehia iāna ’ia rave.⁵ I muri a’e, i roto i tāna ’ōrama, ’ua ’ite Nephi i te fa’aurura’a o taua huru ti’aturira’a ra, ma te pāpa’i, « ’Ua ’ite atu ra vau, ’o Nephi, i te mana o te ’Ārenio a te Atua i te poura’a mai i ni’a iho i te feiā mo’a o te ’ēkālesia a te ’Ārenio ra, ’e i ni’a iho ho’i i te feiā i fafau atu i te Fatu […] ’e ’ua fa’a’ahuhia rātou i te parauti’a ’e te mana o te Atua ma te hanahana rahi ».⁶

’Ua ’ite roa ’o vau iho i te mau parau fafau nō te here ’e i te mana o te Fatu ’ia tomo i roto i te orara’a ’o te mau tamari’i a te Atua, ma te ha’apūai ia rātou nō te fa’aruru i te mau huru o te orara’a. I te tahi a’e nei mahana, ’ua ho’i mai tā’u vahine i te fare i muri a’e i tāna ha’amorira’a i te hiero ’e ’ua parau mai ’oia iā’u ’ua putapū roa ’oia i te mea tāna i fārerei i i reira. I tōna tomora’a i roto i te fare o te Fatu, ’ua ’ite atu ’oia i te hō’ē tāne i roto i te hō’ē pārahira’a tura’i ma te tere marū noa ’e te hō’ē vahine e haere ra ma te fifi tauturuhia e te hō’ē turu to’oto’o, rāua to’opiti ato’a tē haere ra e ha’amori i te Fatu i roto i tōna fare. ’A tomo ai tā’u vahine i roto i te vāhi horoira’a, ’ua ’ite ’oia i te hō’ē tuahine marū ’aita hō’ē rima, ’e te tahi noa tuha’a o tē tahi atu rima ma te rave nehenehe ’e te huru tiretiera i te mau ’ohipa ato’a e hōro’ahia iāna.

’A paraparau noa ai māua tā’u vahine i ni’a i te reira ’ohipa i tupu, ’ua fa’aoti a’era māua ē, te mea hō’ē roa i fa’aru’e ai teie nā pipi fa’ahiahia a te Mesia i tō rāua fare i taua mahana to’eto’e ra, noa atu te huru ’o tō rāua orara’a, o te hō’ē ïa ti’aturira’a vi’ivi’i ’ore ’e te ’ā’au tae mau i roto i te mau parau fafau mure ’ore tā te Atua e hōro’a mai nā roto i te mau fafaura’a mo’a tei ravehia i mua iāna i roto i tōna fare.

E au mau hoa here, mai te mea ē, tē vai ra hō’ē mea e nōa’a ia tātou, ’e hō’ē mea e nehenehe ia tātou ’ia hōro’a i tā tātou mau tamari’i ’e te mau mo’otua ’e o tē tauturu ia rātou tāta’itahi i roto i te mau tāmatara’a ’e te mau fifi a muri a’e, ’o te ti’aturira’a ïa i roto i te mau fafaura’a i ravehia nā roto ia Iesu Mesia. Te fāri’ira’a i te reira huru tao’a hanahana, e tauturu te reira ia rātou ’ia ora mai tā te Fatu i fafau mai i tāna mau pipi ha’apa’o maita’i : « E ti’a noa tā’u mau pipi i te mau vāhi mo’a, ’e e ’ore roa rātou e fa’anu’u-’ē-hia atu ».⁷

Nāhea e ti’a ai ia tātou ’ia nōa’a te reira huru ti’aturira’a nā roto ia Iesu Mesia ? E tae mai te reira nā roto i te ha’eha’a, nā roto i te fa’atumura’a i tō tātou orara’a i ni’a i te Fa’aora, nā roto i te ha’apa’ora’a i te mau parau tumu o te ’evaneria a Iesu Mesia, nā roto i te fāri’ira’a i te mau ’ōro’a o te fa’aorara’a ’e te fa’ateiteira’a, ’e nā roto i te fa’aturara’a i te mau fafaura’a tā tātou e rave i mua i te Atua i roto i tōna fare mo’a.

I roto i tāna mau parau ’ōpanira’a i te ’āmuira’a rahi nō ’Ātopa 2019, ’ua fa’aha’amana’o mai tō tātou peropheta here ia tātou i te hō’ē ta’ahira’a faufa’a e roa’a ai te ti’aturira’a i roto i te fafaura’a, i te nā ’ōra’a ē : « ’Ia ti’amā te ta’ata ’ia tomo i roto i te fare o te Fatu, tītauhia iāna ’ia fa’aineine rahi i te pae vārua […] ’Ia ti’amā te ta’ata, tītauhia te fa’afāriura’a hope o te ferurira’a ’e te ’ā’au, nō te riro rahi atu ā mai te Fatu, nō te riro ’ei tino huira’atira ha’avare ’ore, nō te riro ’ei hi’ora’a maita’i a’e ’e nō te riro ’ei ta’ata mo’a a’e ».⁸ Nō reira, mai te mea e taui tātou i tō tātou fa’aineinera’a nō te tomo i roto i te hiero, e taui ïa tātou i tō tātou ’itera’a i roto i te hiero, ’ei reira tō tātou orara’a e taui ai i rāpae i te hiero. « Ei reira tō ’outou ti’aturira’a e pūai roa ai i mua i te aro nō te Atua ; ’e e ma’iri mai ai te ha’api’ira’a tumu o te autahu’ara’a i ni‘a i tō ’outou ’ā’au mai te hupe nō te ra’i mai ra ».⁹

Hō’ē ’episekōpo tā’u i ’ite, ’ua parau ’oia nō ni’a i te piha ha’api’ira’a tahito roa a’e nō te paraimere ’eiaha ’ei piha ha’api’ira’a « Paraimere », ’ei piha ha’api’ira’a rā nō te « fa’aineinera’a nō te hiero ». I te ’āva’e Tēnuare, e fa’ahaere mai te ’episekōpo i te mau piahi ’e tō rātou mau ’orometua i roto i tōna piha tōro’a i reira rātou e paraparau ai nāhea rātou i te fa’ata’a i te matahiti tā’āto’a nō te fa’aineine ’ia tomo i roto i te hiero. E rave te ’episekōpo i te taime nō te hi’o i te mau uira’a nō te ’āparaura’a nō te parau fa’ati’a nō te hiero, o tē tu’uhia i muri iho i roto i tā rātou mau ha’api’ira’a paraimere. E ani ’oia i te mau tamari’i ’ia fa’aineine ia rātou, ’ia tae ho’i i te taime e haere mai rātou i roto i te piha tōro’a o te episekōpo i roto hō’ē matahiti, e vai te ti’aturira’a i roto ia rātou, ti’aturi i roto i tā rātou fafaura’a, ma te ineine ’ia fāri’i i te hō’ē parau fa’ati’a nō te hiero ’e ’ia tomo i roto i te fare o te Fatu. I teie matahiti, e maha tamāhine taure’are’a tā te ’episekōpo tei ’oa’oa, tei ineine ’e tei ti’aturi nō te haere i te hiero, i hina’aro ai rātou ’ia nene’i te ’episekōpo i tā rātou parau fa’ati’a i te mahana matahiti ’āpī i te hora 12 ’e 1 minuti ma’iri i te maorora’a pō.

E ’ere te fa’aineinera’a nō te feiā ana’e e haere i te hiero nō te taime mātāmua. E ti’a ia tātou pā’āto’a ’ia fa’aineine tāmau noa nō te haere i te fare ’o te Fatu. ’Ua ’ite au i te hō’ē titi tei fa’a’ohipa i te parau tumu « Fa’atumuhia i ni’a i te ’utuāfare, pāturuhia e te ’Ēkālesia, ’e ru’uru’uhia i te hiero ». Ru’uru’uhia¹⁰, ’o te hō’ē ïa ta’o maita’i nō te mea, tōna aura’a, ’oia ho’i, fa’atumuhia i ni’a i te hō’ē arata’ira’a, terā rā, te tahi ato’a aura’a ’oia ho’i, tā’amuhia ’aore rā, pāruruhia, fa’aotihia, fa’aoti maīte, pāpū. Nō reira, ’ia ru’uru’uhia tātou i te hiero, e tā’amuhia ïa tātou i ni’a i te Fa’aora, e hōro’a mai ho’i i te haere’a ’e te vai pāpūra’a, ma ha’apāpū ē, tē vai ra tō tātou ti’aturira’a nō te fafaura’a nā roto ia Iesu Mesia. Nō reira, e ti’a ia tātou pā’āto’a ’ia ha’amaita’i i taua tā’amura’a ra nā roto i te tāpa’ora’a i tā tātou fārereira’a i te Fatu i roto i tōna fare mo’a, noa atu ē, e mea fātata mai anei te hiero ’aore rā e mea ātea anei.¹¹

Tē fa’aha’amana’o mai nei tō tātou peropheta here, te peresideni Russell M. Nelson, ia tātou nō ni’a i teie mau tumu parau faufa’a i te paraura’a ē : « ’O te hiero te pū nō te ha’apa’ari i tō tātou fa’aro’o ’e tō tātou pūai pae vārua, nō te mea ’o te Fa’aora ’e tāna ha’api’ira’a tumu te māfatu mau o te hiero. Te mau mea ato’a e ha’api’ihia i roto i te hiero, nā roto i te arata’ira’a ’e nā roto i te Vārua, e fa’arahi te reira i tō tātou hāro’aro’ara’a ia Iesu Mesia. E tā’ati tāna mau ’ōro’a faufa’a rahi ia tātou i ni’a iāna nā roto i te mau fafaura’a mo’a o te autahu’ara’a. Nō reira, ’ia ha’apa’o ana’e tātou i tā tātou mau fafaura’a, e hōro’a mai ’oia ia tātou i tōna mana fa’aora ’e te pūai. ’E ’auē ïa ē, e hina’aro rahi mau tātou i tōna mana i te mau mahana i muri nei ».¹³

Tē hina’aro nei te Fa’aora ’ia ineine tātou ia hāro’aro’a maita’i ma te pāpū rahi, e aha te ’ohipa e rave ’ia rave ana’e tātou i te mau fafaura’a i mua i tō tātou Metua i te ao ra i tōna ra i’oa. Hina’aro ’oia ’ia ineine tātou ’ia fa’a’ohipa i tō tātou mau ha’amaita’ira’a, tā tātou mau parau fafau ’e tā tātou mau hopoi’a ; ’ia ineine ’ia fāri’i i te mau mana’o ’e i te mau ’itera’a pae vārua e hina’arohia e tātou i roto i teie orara’a. ’Ua ’ite au ē, ’ia ’ite ana’e te Fatu i te hō’ē noa a’e anapa hina’aro, ’aore rā hō’ē anapa tauto’ora’a ti’a i roto i tō tātou hina’aro ’ia fa’atumu i to tātou orara’a i ni’a iāna ’e i ni’a i te mau ’ōro’a ’e te mau fafaura’a tā tātou e rave i roto i tōna fare, e ha’amaita’i ’oia ia tātou, nā roto i tāna huru ravera’a maita’i roa, ’e te mau temeio ’e te mau aroha here e hina’arohia e tātou.

Te fare ’o te Fatu o te vāhi ïa i reira tātou e tauihia ai i roto i te mau huru teitei a’e ’e te mo’a a’e. Nō reira, ’ia haere mai tātou i rāpae i te hiero ma te tauihia e tō tātou tīa’ira’a i te mau parau fafau o te mau fafaura’a, ma te ’ahuhia i te mana nō ni’a mai, e hōpoi tātou i te hiero i roto i tō tātou fare ’e i roto i tō tātou orara’a. Te ha’apāpū atu nei au ia ’outou ē, ’ia fāri’i tātou i te vārua o te fare o te Fatu i roto ia tātou, e taui hope roa te reira ia tātou.

’Ua ’ite ato’a tātou nā roto i te hiero ē, mai te mea e hina’aro tātou ’ia vai hua noa te vārua o te Fatu i roto i tō tātou orara’a, ’e’ita e ti’a ia tātou ’e ’eiaha tātou e fa’atupu i te mau mana’o ’ino i ni’a i te hō’ē ta’ata. Te hōro’ara’a i te pārahira’a i roto i tō tātou ’ā’au ’aore rā tō tātou vārua nō te mau mana’o ’aore rā nō te mau ferurira’a ’ino, e fa’atupu te reira i te mau parau ’e i te mau ’ohipa ’ino, i ni’a anei i te mau tūreiara’a sōtiare ’aore rā i roto i tō tātou ’utuāfare, ’e e fa’atupu ho’i i te fa’aru’era’a te vārua o te Fatu i tō tātou ’ā’au. Nō reira, e tenā na, ’eiaha e fa’aru’e i tō ’outou ti’aturira’a, ’a vaiiho rā i tō ’outou ti’aturira’a ’ia ha’apūaihia.

E tāmau noa te patura’a vitiviti tāmau o te mau hiero i te fa’a’oa’oa ia tātou, ’ia fa’auru ia tātou ’e ’ia ha’amaita’i ia tātou. Teie rā te mea faufa’a roa atu, mai te mea e taui tātou i tō tātou fa’aineinera’a nō te tomo i roto i te hiero, e taui tātou i tō tātou ’itera’a i roto i te hiero, o tē taui ho’i i tō tātou orara’a i rāpae i te hiero. ’Ia fa’a’ī mai teie tauira’a ia tātou i te ti’aturira’a i roto i tā tātou mau fafaura’a mo’a tei ravehia i mua i te Atua nā roto ia Iesu Mesia. Tē ora nei te Atua, Iesu Mesia tō tātou Fa’aora, ’e teie tāna ’Ēkālesia i fa’aho’i-fa’ahou-hia mai i te fenua nei. Tē parau nei au i teie mau parau mau ma te tura, i te i’oa mo’a ’o tō tātou Fa’aora, ’o Iesu Mesia, ’āmene.