E pāpa’a parau nō te ’ohipa tā’u i ’ite mata ’e tā’u i fa’aro’o

I te fa’aotira’a tā’u ha’api’ira’a nō te ture, Marcia, tā’u vahine ’e o vau nei, ’ua mā’iti māua ’ia ’āmui atu i te hō’ē piha tōro’a nō te pāruru ’aravihi i roto i te ture tīvira. ’A ha’amata ai au tā’u ha’api’pi’ira’a ’ohipa, ’ua rave au i te tuha’a rahi o tō’u taime i te fa’aineinera’a i te mau ’ite nō te fa’a’ite pāpū i mua i te tiripuna. ’Oi’oi roa vau i te ha’api’ira’a mai ē, e ha’amauhia te mau ’ohipa i roto i te hō’ē piha ha’avāra’a, ’ia fa’a’ite pāpū ana’e te mau ’ite, i raro a’e te hōreora’a, i te parau mau o te ’ohipa tā rātou i ’ite mata ’e i fa’aro’o. Mai tei fa’a’ite-pāpū-hia e rātou, e pāpa’ihia tā rātou mau parau ’e e fa’ahereherehia. ’Ua riro noa te parau pāpū a te mau ’ite ’ei mea faufa’a rahi roa nā mua roa i roto i tā’u fa’aineinera’a.

’Aita i maoro roa nō’u ’ia ’ite ē, tāua mau parau ra tā’u e fa’a’ohipa nei i te mau mahana ato’a ’ei ti’a pāruru, hō’ē ā ïa, i te mau parau tā’u e fa’a’ohipa nei i roto i te mau tāu’ara’a parau o te ’evanelia. « Te mau ’ite » ’e « te ’itera’a pāpū » e mau parau ïa tā tātou e fa’a’ohipa nei ’ia fa’a’ite ana’e tātou i tō tātou ’ite ’e tō tātou mana’o nō ni’a i te parau mau o te ’evanelia a Iesu Mesia.

I te pāturura’ahia vau ’ei Hitu ’Āhuru area ’āpī, ’ua ’īriti au i te mau pāpa’ira’a mo’a nō ha’api’i mai i tā’u mau hōpoi’a, ’e ’ua tai’o Te Ha’api’ira’a Tumu ’e te mau Fafaura’a 107:25, e parau nei, « ’ua pi’i-ato’a-hia te Hitu ’Ahuru […] ’ia riro ho’i ’ei mau ’ite ta’a ’ē i te mau ’Ētene ’e i roto ho’i i te ao pā’āto’a nei ». Mai tā ’outou e feruri nei, ’ua mau tō’u nā mata i ni’a i te parau, « mau ’ite ta’a ’ē ». ’Ua māramarama roa iā’u ē, e hōpoi’a nā’u ’ia fa’a’ite pāpū, ’ia fa’a’ite pāpū i te i’oa o Iesu Mesia, i te mau vāhi ato’a tā’u e rātere nā te ao nei.

E rave rahi mau hi’ora’a i roto i te mau pāpa’ira’a mo’a nō te feiā tei ’ite mata ’e tei fa’a’ite pāpū i te ’ohipa tā rātou i ’ite mata ’e i fa’aro’o.

Mai te peropheta tahito ’o Moromona tei ha’amata i tāna pāpa’a parau, ’ua pāpa’i ’oia, « ’e i teienei, tē pāpa’i nei au, ’o Moromona, i te hō’ē pāpa’a parau nō te mau mea tā’u i ’ite ’e tā’u ato’a ho’i i fa’aro’o, ’e tē ma’iri nei au i tō te reira i’oa te Buka a Moromona ».¹

Te mau ’āpōsetolo a te Fa’aora ’o Petero ’e ’o Ioane tei fa’aora i te hō’ē ta’ata nā roto i te i’oa o Iesu Mesia nō Nazareta.² I te fa’ahepora’ahia rāua ’eiaha e parau nā roto i te i’oa o Iesu, ’ua pāhono atu rāua :

« E mea ti’a i te Atua ’ia fa’aro’o atu ia ’outou ’eiaha i te Atua, ’a ha’amana’o iho ia ’outou.

« E ’ore ho’i mātou e ti’a ’ia ’ore ’ia parau i tā mātou i hi’o a’enei, ’e tā mātou i fa’aro’o a’enei ».³

Te tahi atu ’itera’a pāpū ha’apāpūra’a nō roto mai ïa i te feiā mo’a o te Buka a Moromona, ’o tei ’ite mau i te tere o te Fa’aora ’o Iesu Mesia. ’A fa’aro’o na i teie fa’ata’ara’a o tō rātou ’itera’a pāpū : « ’E teie te huru o te mau mea tā rātou i fa’a’ite pāpū mai : ’Aita roa te hō’ē mata i hi’o na, ’e ’aita roa ato’a te hō’ē tari’a i fa’aro’o na, i te mātāmua, i te mau mea faufa’a rahi ’e te māere mai teie ’o tā rātou i hi’o ’e i fa’aro’o ia Iesu i te paraura’a atu i te Metua ».⁴

Te mau taea’e ’e te mau tuahine, i teie mahana tē fa’a’ite nei au i tō’u ’itera’a pāpū ’e tē pāpa’i nei i te mau mea tā’u i ’ite mata ’e tā’u i fa’aro’o i roto i tā’u tāvinira’a mo’a ’ei Hitu ’Ahuru nō te Fatu Iesu Mesia. Ma te nā-reira-ra’a, tē fa’a’ite pāpū nei au ia ’outou nō te hō’ē Metua here i te ao ra ’e tāna Tamaiti ’ā’au maita’i, ’o Iesu Mesia, tei māuiui, tei pohe ’e tei ti’afa’ahou mai nō te pūpū i te ora mure ’ore i te mau tamari’i a te Atua. Tē fa’a’ite pāpū nei au nō « te hō’ē ’ohipa māere ’e te ’ūmere »⁵ ’e ’ua fa’atoro fa’ahou mai te Fatu i tōna rima nō te fa’aho’i mai i tāna ’evanelia i ni’a i te fenua nei nā roto mai i tāna mau peropheta ’e mau ’āpōsetolo ora.⁶ Tē fa’a’ite pāpū nei au ē, nā roto i te mea tā’u i ’ite mata ’e i fa’aro’o, ’aita atu e taime maita’i a’e maori ra teie mahana, ’ia riro ’ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei. ’Ua ’ite au i te reira ma tō’u iho ’ite, ta’a ’ē atu i te tahi atu rāve’a tauturu, maoti rā i te mea tā’u i ’ite ’e tā’u i fa’aro’o.

I roto i tā’u matahiti hope’a nō te ha’api’ira’a tuarua, nō te fa’ari’i i tā’u parau ha’afeti’ara’a nō te séminaire, ’ua ti’a iā’u ’ia ’ite mai i nā 15 hiero a te ’Ēkālēsia. ’Ua piahia te hō’ē hōho’a o te mau hiero tāta’itahi i mua i te piha ha’api’ira’a, ’e e ti’a iā’u ’ia ’ite tei hea teie mau hiero i te vaira’a. I teie mahana, i te mau matahiti i muri mai, e riro teie ’ei tītaura’a rahi nō te ’ite tāta’itahi mai ia rātou, nō te mea ho’i ē, tē vai nei e 335 hiero e ’fa’aohipahia nei ’e tei fa’aarahia atu. ’Ua ’ite mata roa vau e rave rahi o teie mau fare o te Fatu ’e tē fa’a’ite pāpū nei au ē, tē pūpū nei te Fatu i tāna mau ha’amaita’ira’a ’e tāna mau ’ōro’a i tāna mau tamari’i e rave rahi mau, nā te ao nei.

’Ua ha’api’i mai tō’u mau hoa o te FamilySearch ē, ’ua hau atu i te hō’ē mirioni i’oa ’āpī tei tu’uhia i roto te FamilySearch i te mahana tāta’itahi. Mai te mea ’aita ’outou i ’ite mai i tō ’outou mau tupuna i nanahi ra, tē ani manihini nei au ia ’outou ’ia ’imi fa’ahou ā ’ananahi. Nō te parau o te ha’aputuputura’a ia ’Īserā’ela i terā pae mai o te pāruru, ’aita atu e taime maita’i a’e i teie mahana ’ia riro ’ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei.

’A ’atu’atu ai māua i tā māua mau tamari’i i Twin Falls, i Idaho, ’ua tā’oti’ahia tō māua hi’ora’a ātea nō te ’Ēkālēsia ’ati a’e te ao nei. I tō’u pi’ira’ahia ’ei huimana fa’atere, ’ua fa’ata’ahia māua Marcia nō te tāvini i roto i te Area nō Patitifa, hō’ē vāhi ’aita roa a’enei māua i haere. ’Ua ’oa’oa māua i te ’itera’a mai i te mau titi mai ni’a mai ia Niu Terani e tae roa i raro, ’e hō’ē hiero tei ha’amo’ahia i te matahiti 1958. Hō’ē o te reira mau hiero i ni’a te 15 ’o tā’u i tāmau i te séminaire. ’Ua ’ite atu māua i te mau hiero i roto i mau ’oire rarahi ato’a nō Auterāria, ’e te mau titi i ni’a i te fenua tā’āto’a. ’Ua fa’ata’ahia māua e ’ohipa i Sāmoa, i reira tē vai ra e 25 titi, ’e i Tona, i reira fāta’a te ’āfara’a o te huira’atira e melo nō te ’Ēkālēsia. ’Ua fa’ata’ahia māua e ’ohipa i te mau motu Kiribati, i reira ’ua ’itehia mai ia māua e piti titi. ’Ua fa’ata’ahia māua e fārerei atu i te mau titi i Ebeye, i te mau motu Marshall ’e i Daru, i Papua Niu Guinea.

I muri a’e tā māua tāvinira’a i te mau motu nō Pātifita, ’ua fa’ata’ahia māua e tāvini i te fenua Firipino. Ma tō’u maere rahi, ’ua hotu te ’Ēkālēsia a Iesu Mesia i te fenua Firipino i te hō’ē fāito rahi ’aita vau i mana’o a’enei. Tē vai nei i reira 125 titi, 23 misiōni ’e 13 hiero e ’ohipa nei ’aore rā tei fa’aarahia. ’Ua riro vau ’ei ’ite nō te hō’ē ’ēkālēsia ’ua hau atu i te 850 000 melo i roto i taua fenua ra. Mea nāhea ho’i tō’u orera’a i ’ite i te fa’ati’ara’ahia i te ’Ēkālēsia a te Mesia nā te ao nei ?

I muri a’e e toru matahiti i te fenua Firipino, ’ua anihia vau ’ia tāvini i roto te Tuha’a fa’atere misiōnare. ’Ua ’āfa’i tā’u mau fa’ata’ara’a ’ohipa ia māua i roto te mau misiōni nā te ao ato’a nei. ’Ua fa’a’ā’ano-rahi-roa-hia tō’u hi’ora’a i te ’Ēkālēsia a te Fa’aora nā te ao ato’a nei. ’Ua fa’ata’ahia māua Marcia e haere e fārerei i te mau misiōni nō Asia. ’Ua ’ite atu māua i te hō’ē fare pū o te titi nehenehe i Singapour, ’e te mau melo fa’ahiahia ’e te ha’apa’o maita’i. ’Ua fārerei atu māua i te mau melo ’e te mau misiōnare i roto i te hō’ē fare purera’a i Kota Kinabalu, i Malaisie. ’Ua fārerei atu māua i te mau misiōnare i Hong Kong, ’e ’ua ’āmui atu i te hō’ē ’āmuira’a titi fa’ahiahia mau ’e te feiā mo’a ha’apa’o maita’i ’e te itoito.

’Ua tāmau noa teie tupura’a ’ohipa i te nā ni’a noa, ’a fārerei ai māua i te mau misiōnare ’e te mau melo nā roto ia Europa, i Amerika Latino, i Caraïbes ’e i ’Āfirita. Tē ’ite nei te ’Ēkālēsia a Iesu Mesia i te hō’ē tupura’a rahi fa’ahiahia i ’Āfirita.

’O vau iho te hō’ē ’ite mata nō te fa’aho’i-fa’ahou-ra’a mai o te ’evanelia a Iesu Mesia e tupu nei ’e te tupura’a o te parau tohu a Iosepha Semita e nā ’ō nei ē, « te parau mau a te Atua ra, e haere tāmau ïa i mua ma te itoito, te hanahana ’e te ti’amā e tae roa atu i roto i te mau fenua ato’a, e fārerei i te mau ’ahureva ato’a, e tāmā i te mau fenua ato’a, ’e e ’atutu i roto i te mau tari’a ato’a ».⁷

Tei ni’a i te nūmera e 74 000 tā tātou mau misiōnare fa’ahiahia e ’ohipa nei nā te ao ato’a nei. Ma te ha’ara’a ’e te mau melo, tē bāpetizo nei rātou 20 000 ta’ata i te ’āva’e hō’ē. ’Aita i maoro a’enei, nā te mau tamāroa ’āpī ’e te mau tamāhine ’āpī mai te 18, 19, ’e 20 matahiti, tei fa’atupu i teie temeio rahi o te ha’aputuputura’a ma te tauturuhia e te Fatu. E ’itehia teie mau tamāhine ’āpī ’e mau tamāroa ’āpī i roto i te mau ’oire na’ina’i nō Vanuatu ’e i roto i te mau ’oire rarahi nō New York, Pari ’e Lonedona. ’Ua hi’o atu vau ia rātou i te ha’api’ira’a i te Fa’aora i roto te mau ’āmuira’a mo’emo’e nō Fiji ’e i roto i te mau putuputura’a rarahi a’e nā te mau vāhi mai ia Texas, California ’e Floride i te fenua Marite.

E ’ite mai ’outou te mau misiōnare i te nā poro e maha o te fenua nei, e parau nei o 60 reo ’e’ē ’e tē fa’atupura’a i te fa’auera’a rahi a te Fa’aora i roto te Mataio 28 : « Haere ’outou e fa’ariro i te mau fenua ato’a ’ei pipi, ’a bāpetizo atu ai ia rātou i roto i te i’oa o te Metua, ’e nō te Tamaiti, ’e nō te Vārua Maita’i ».⁸ Tē fa’ahanahana nei au i te mau misiōnare i ma’iri ’e i teienei a te ’Ēkālēsia ’e tē fa’aha’amana’o nei au i tō tātou u’i ’āpī i te anira’a manihini a te peresideni Russell M. Nelson ’ia haere mai e ha’aputuputu ia ’Īserā’ela.⁹

Tē fa’a’ite pāpū nei au i teie mahana ē, ’ua hi’o atu vau ma tō’u iho mata i teie fa’aho’i-fa’ahou-ra’a mai hōhonu o te ’evanelia a te Fa’aora, ’e ’ua fa’aro’o vau i te reira ma tō’u iho tari’a. ’Ua riro vau ’ei ’ite nō te ’ohipa a te Atua nā te ao nei. ’Aita atu e taime maita’i a’e i teie mahana nō te riro ’ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei.

Te temeio o te fa’aho’i-fa’ahou-ra’a mai fa’auru a’e ’o tā’u i riro ’ei ’ite, ’o ’outou paha, te mau melo ha’apa’o maita’i o te ’Ēkālēsia nō te mau fenua ato’a. ’Outou, te feiā mo’a o te mau mahana hope’a nei, tei fa’ata’ahia mai e Nephi i roto i te Buka a Moromona, ’a hi’o ai ’oia i tō tātou tau ’e ’ua fa’a’ite pāpū : « ’E i muri a’era, ’ua ’ite atu ra vau, ’o Nephi, i te mana o te ’Ārenio a te Atua i te poura’a mai i ni’a iho i te feiā mo’a o te ’ēkālēsia a te ’Ārenio ra, ’e i ni’a iho ho’i i te feiā i fafau atu i te Fatu, ’o tei ha’apurarahia nā roto i te ao ato’a nei ; ’e ’ua fa’a’ahuhia rātou i te parauti’a ’e te mana o te Atua ma te hanahana rahi ».¹⁰

Tē fa’a’ite pāpū nei au ē ’ua ’ite au ma tō’u iho mata i te mea tā Nephi i ’ite mata, ’outou, te feiā mo’a o te fafaura’a nō te mau fenua ato’a, tei ’ahuhia i te parauti’a ’e te mana o te Atua. ’A ti’a ai au i te pūpiti i roto i te hō’ē o teie mau nūna’a rarahi o te ao nei, ’ua nana’o te Fatu i roto i tō’u feruria’a i te hō’ē ’ohipa tā te ari’i Beniamina i ha’api’i i roto te Mosia 2 o te Buka a Moromona. Brent, « hina’aro ho’i au ’ia ha’amana’o ’oe i te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua. Inaha ho’i, ’ua ha’amaita’ihia rātou i roto i te mau mea ato’a, i te pae tino ’e te pae vārua ato’a ho’i ».¹¹

Tē fa’a’ite pāpū nei au ia ’outou ē, ’ua ’ite au ma tō’u iho mata ’e ’ua fa’aro’o vau ma tō’u iho nā tari’a, ’a fārerei atu ai au ia ’outou, te feiā mo’a parauti’a a te Atua nā te fenua ato’a nei ’o tē ha’apa’o nei i te mau fa’auera’a. E mau tamari’i nō te fafaura’a ’outou nā te Metua. E mau pipi ’outou nā Iesu Mesia. ’Ua ’ite ato’a ’outou i te mea tā’u i ’ite nō te mea ’ua fa’ari’i ’outou i tō ’outou iho ’itera’a pāpū nō te parau mau o te ’evanelia a Iesu Mesia. ’Ua ha’api’i te Fa’aora, « ’ua maita’i rā tō ’outou mau mata tē hi’o nei ho’i ïa ’e tō ’outou mau tari’a, tē fa’aro’o nei ho’i ïa ».¹²

I raro a’e i te arata’ira’a a te Fatu ’e te fa’aterera’a a tāna mau peropheta ’e mau ’āpōsetolo, e tāmau noa tātou i te fa’aineine i te mau misiōnare, ’ia rave ’e ’ia ha’apa’o i te mau fafaura’a mo’a, ’ia fa’ati’a i te ’Ēkālēsia a te Mesia nā te ao nei ’e ’ia fa’ari’i i te mau ha’amaita’ira’a ’o tē tae mai ’a ha’apa’o ai tātou i te mau fa’auera’a a te Atua. ’Ua tāhō’ēhia tātou. E mau tamariʼi tātou nā te Atua. ’Ua mātau tātou iāna ’e tē here nei tātou iāna.

Tē ’āmui nei au ia ’outou ato’a, tō’u mau hoa, ’a fa’a’ite pāpū ’āmui ai tātou ē, e parau mau teie mau mea. Tē pāpa’i nei tātou i te mea tā tātou i ’ite mata ’e i fa’aro’o. ’Outou ’e o vau nei ’ua riro tātou ’ei mau ’ite ’o tē fa’a’ite pāpū nei. Mea nā roto i te mana o teie ’itera’a pāpū tāhō’ē e tāmau ai tātou i te haere i mua ma te fa’aro’o i te Fatu ia Iesu Mesia ’e i tāna ’evanelia. Tē fa’a’ite nei au i tō’u ’itera’a pāpū ē, tē ora nei Iesu Mesia. ’O ’oia tō tātou Fa’aora ’e tō tātou Tāra’ehara. I te i’oa o Iesu Mesia, ’āmene.