Te mau semeio, te mau melahi ’e te mana autahu’ara’a

E rave rahi i teie mahana e parau nei ē ’aita fa’ahou te mau semeio, ’e tei roto i te ferurira’a noa te mau melahi ’e ’ua ’ōpani te mau ra’i. Tē parau pāpū nei au ē ’aita te mau semeio i fa’aea, tei rotopū ia tātou te mau melahi ’e ’ua matara mau te mau ra’i.

I te tau tei ni’a tō tātou Fa’aora Iesu Mesia i te fenua nei, ’ua hōro’a ’oia i te mau tāviri nō te autahu’ara’a i te upo’o o te mau ’āpōsetolo, ’o Petero.¹ Nā roto i teie mau tāviri, ’ua fa’atere ’o Petero ’e te tahi atu mau ’āpōsetolo i te ’Ēkālesia a te Fa’aora. Terā rā, i te pohera’a terā mau ’āpōsetolo, ’ua rave-’ē-hia te mau tāviri nō te autahu’ara’a mai ni’a i te fenua nei.

Tē parau pāpū nei au ē, ’ua fa’aho’ihia mai te mau tāviri tahito nō te autahu’ara’a. ’Ua fā mai ’o Petero, Iakobo ’e Ioane, ’e te tahi atu mau peropheta tahito, ’ei ta’ata ti’afa’ahou, nō te hōro’a i te peropheta Iosepha Semita i te mea tā te Fatu i parau « te mau tāviri nō tō’u nei bāsileia, ’e nō te hō’ē tau tu’ura’a ’evanelia nō te mau taime hope’a. »²

’Ua tu’uhia mai teie mau tāviri mai terā peropheta ’e terā peropheta ē tae mai i teie mahana. Tē fa’a’ohipa nei nā ta’ata e 15 tā tātou e pāturu ’ei peropheta, hi’o ’e heheu parau, i te reira nō te fa’atere i te ’Ēkālesia a te Fa’aora. Mai i te tau tahito, tē vai nei hō’ē ’āpōsetolo matahiapo tei mau ’e tei fa’ati’ahia ’ia fa’a’ohipa i te tā’āto’ara’a o te mau tāviri o te autahu’ara’a. ’O te peresideni Russell M. Nelson ïa, te peropheta ’e te Peresideni o te ’Ēkālesia a te Mesia i fa’aho’ihia mai i tō tātou ’anotau : Te ’Ēkālesia a Iesu Mesia i te Feiā Mo’a i te mau Mahana Hope’a nei.

Nā roto i te ’Ēkālesia a te Fa’aora, e fa’ari’i tātou i te mau ha’amaita’ira’a nō te autahu’ara’a—mai te mana o te Atua nō te tauturu ia tātou i roto i te orara’a. I raro a’e i te mau tāviri o te autahu’ara’a i ha’amanahia, e rave tātou i te mau parau fafau i mua i te Atua ma te fa’ari’i i te mau ’ōro’a mo’a e fa’aineine ia tātou ’ia ora i mua i tōna aro. Ha’amata nā ni’a i te bāpetizora’a ’e te ha’amaura’a, ’e i muri iho te hiero, e haere tātou i mua i ni’a i te hō’ē ’ē’a nō te mau fafaura’a ’o tē fa’aho’i ia tātou iāna ra.

Te rima i ni’a i tō tātou upo’o, e fa’ari’i tātou i te mau ha’amaita’ira’a nō te autahu’ara’a, mai te arata’ira’a, te tāmāhanahanara’a, te a’o, te fa’aorara’a māuiui ’e te mana nō te pe’e ia Iesu Mesia. I roto i to’u orara’a ’ua ha’amaita’ihia vau i teie mana rahi. Mai tei heheuhia i roto i te pāpa’ira’a mo’a, tē parau nei tātou i te reira te mana nō te autahu’ara’a mo’a a Melehizedeka.³

I tō’u ’āpīra’a, ’ua noa’a mai tō’u fa’atura rahi i teie mana, i roto iho ā rā i te mau ha’amaita’ira’a autahu’ara’a. I tō’u tāvinira’a ’ei misiōnare taure’are’a i Tīreni, ’ua tāpe’ahia māua tō’u hoa ’e ’ua fa’ata’ahia māua. ’Aita māua i parauhia te tumu. E tau ’ārepurepura’a rahi i te pae poritita. E tauatini ta’ata tei tu’uhia i te fare tāpe’ara’a e te mūto’i fa’ehau ’e ’aita fa’ahou i fa’aro’ohia tō rātou parau.

’Ua uiuihia vau, ’e ’ua tu’uhia i te fare ’āuri ’o vau ana’e, ’aita vau i ’ite e fārerei fa’ahou ānei au i tō’u mau pu’era’a. ’Ua fāriu vau i ni’a i tō’u Metua i te ao ra, ma teie tāparu hōhonu : « E te Metua, ’ua ha’api’i-noa-hia vau ē e hi’o ’oe i tā ’oe mau misiōnare. E te Metua, ’aita tō’u faufa’a ta’a ’ē, ’ua ha’apa’o rā vau ’e ’ua hina’aro vau i tā ’oe tauturu i teie pō. »

E rave rahi matahiti nā mua atu te mau huero nō teie tauturura’a i te tanuhia. I muri a’e i tō’u bāpetizora’a, ’ua ha’amauhia vau ’ei melo nō te ’Ēkālesia ’e ’ua hōro’ahia mai te hōro’a nō te Vārua Maita’i. I te purera’a vau, ’o vau ana’e, i muri i terā mau ’āuri, i reira ra te Vārua Maita’i i te taera’a mai ’e ’ua tāmarū iā’u. ’Ua ha’aputa ’oia i roto i tō’u ferurira’a i te hō’ē vāhi ta’a ’ē o tō’u ha’amaita’ira’a patereareha, ’o te tahi fa’ahou ïa ha’amaita’ira’a nō te autahu’ara’a. ’Ua parau fafau mai te Atua iā’u i roto ē, nā roto i tō’u ha’apa’o maita’i e ti’a ai iā’u ’ia tā’atihia i roto i te hiero nō teie tau ’e nō te tau mure ’ore i te hō’ē vahine tei ’ī i te nehenehe ’e te vi’ivi’i ’ore ’e te here, ’e e metuahia māua nō nā tamaiti ’e nā tamāhine tao’a rahi, ’e e ha’amaita’ihia vau ’e e fa’arahihia ’ei metua i ’Īserā’ela.

’Ī atu ra tō’u vairua i te hau i teie mau parau fa’auru nō ni’a i tō’u ananahi. I ’ite au ē nō ’ō mai te reira i tō’u Metua here i te ao ra, ’o tē ha’apa’o noa i tāna mau parau fafau.⁴ I terā taime, ’ua tae mai tō’u mana’o pāpū e tu’uhia vau ’e e ora vau nō te ’ite i teie mau parau fafau i te tupura’a.

Hō’ē matahiti i muri mai, ’ua ha’amaita’i mai iho ā te Metua i te ao ra iā’u i te hō’ē vahine tei ’ī i te nehenehe ’e te vi’ivi’i ’ore ’e te here. ’Ua tā’atihia māua ’o Lynette i roto i te hiero. ’Ua ha’amaita’ihia māua, e toru tamaiti tao’a rahi ’e e maha tamāhine. ’Ua riro mai au ’ei metua tāne, mai te au i te tā’āto’ara’a o te mau parau fafau a te Atua i roto i tō’u ha’amaita’ira’a patereareha tei fa’ari’ihia i te 17ra’a o tō’u matahiti.

« Nō reira, e tō’u mau taea’e [’e tō’u mau tuahine] here, ’ua fa’a’orehia ānei te mau semeio nō te mea ’ua reva atu te Mesia i ni’a i te ra’i ?

« […] ’Aita roa, ’aita ato’a ho’i te mau melahi i fa’aea i te utuutu mai i te mau tamari’i a te ta’ata nei. »⁵

Tē parau pāpū nei au ē, tē tupu tāmau noa nei te mau semeio ’e te mau utuutura’a i roto i tō tātou orara’a, pinepine ’ei fa’ahope’ara’a ’āfaro o te mana autahu’ara’a. E mau ha’amaita’ira’a autahu’ara’a e tupu i reira ra, ’e ’ua ’ite tātou ’e ’ua māramarama. Tē vai ra e hōhora māite noa mai ’e e’ita e tupu hope i roto i teie orara’a. E ha’apa’o rā te Atua i tāna mau parau fafau ato’a, mai te reira noa, mai tei fa’a’itehia i roto i teie pāpa’a parau o tō mātou ’ā’amu ’utuāfare :

E ta’ata nō te fa’aro’o rahi tō’u pāpā rū’au i te pae o tō’u pāpū, ’o Grant Reese Bowen. Tē ha’amana’o pāpū roa nei au i te fa’aro’ora’a iāna i te fa’ati’ara’a ’ua nāhea ’oia i te fa’ari’ira’a i tōna ha’amaita’ira’a patereareha. I roto i tāna buka ’ā’amu, ’ua pāpa’i ’oia : « ’Ua parau fafau mai te patereareha i te hōro’a nō te fa’aorara’a ma’i. ’Ua parau ’oia : ‘E ora mai tei pohe i te ma’i. ’Oia, e ti’a mai te ta’ata pohe i raro a’e i tō ’oe nā rima.’ »

Tau matahiti i muri a’e, tē ’āpapa ra tō’u pāpā rū’au i te ruru ’aihere, puta mai nei te mana’o e ho’i i te fare. ’Ua ’ite ’oia i tōna metua tāne i te haerera’a mai iāna. « E Grant, ’ua fa’aru’e mai tō ’oe metua vahine », ’ua parau tōna metua tāne.

Teie fa’ahou te mau parau i roto i te buka ’ā’amu a to’u pāpā rū’au : « ’Aita vau i tāpe’a, ’ua horo atu vau i roto i te fare ’e i rāpae i ni’a i te taupe’e, tei reira ’oia i te tāravara’ahia i ni’a i te hō’ē ro’i pūhapa. ’Ua hi’o vau iāna, ’e ’ua ’ite ē ’aita fa’ahou e ora i roto iāna. Ha’amana’o a’era vau i tō’u ha’amaita’ira’a patereareha ’e te parau fafau ē, mai te mea e ha’apa’o maita’i au, nā roto i tō’u fa’aro’o, e ora mai te feiā ma’i ; ’e e ti’a mai te feiā pohe. ’Ua tu’u a’era vau i tō’u nā rima i ni’a i tōna upo’o, ’e ’ua parau i te Fatu ē, mai te mea e parau mau te parau fafau tāna i parau mai iā’u nā roto i te patereareha, ’ia fa’a’ite mai ’oia i te reira i teie taime ’e ’ia ho’i mai tō’u metua vahine i te ora. ’Ua parau fafau atu vau ē, ’ia nā reira ’oia, e’ita roa vau e tūtāperepere te mana’o nō te rave i te mau mea ato’a i roto i tō’u mana nō te patu i tōna bāsileia. I te purera’a vau, ’ara’ara a’era tōna mata ma te parau mai : « E Grant, ’a fa’ati’a mai iā’u. Tei roto vau i te ao vārua, ’ua pi’i mai rā ’oe ’ia ho’i mai. ’Ia vai noa te reira ’ei ’itera’a pāpū nō ’oe ’e nō te toe’a o tō’u ’utuāfare.’ »

’Ua ha’api’i mai te peresideni Russell M. Nelson ’ia tītau ’e ’ia tīa’i i te mau semeio.⁶ Tē parau pāpū nei au ē, maoti te autahu’ara’a i fa’aho’ihia mai, tei ni’a i te fenua nei te mana ’e te ha’amanara’a a te Atua. Nā roto i te mau pi’ira’a ’e te mau ’āpo’ora’a, e ti’a i te mau tāne ’e te mau vahine, te feiā ’āpī ’e te feiā pa’ari, ’ia ’āmui mai i roto i te ’ohipa a te autahu’ara’a. E ’ohipa nō te mau semeio, tauturuhia e te mau melahi. E ’ohipa nō tō te ra’i, ’e tē ha’amaita’i nei i te mau tamari’i ato’a a te Atua.

I te matahiti 1989, tē ho’i ra mātou e hitu mai te hō’ē ’ātivite a te pāroita. E maorora’a pō. ’Ua hapū ’o Lynette i te ono o tā māua tamari’i. ’Ua puta mai te mana’o pūai e tā’amu i tōna hātua, tei mo’ehia iāna i te tā’amu. ’Aita i maoro i muri mai, tē tīpu’u ra te purūmu ; e pere’o’o tei ’amu i ni’a i tō mātou pae. E mea tere mātou, 112 km i te hora, ’ua tāviri au i te pere’o’o ’eiaha mātou ’ia ū i ni’a i terā pere’o’o. ’Ua ta’ahuri tō mātou pere’o’o, ’ua he’e i ni’a i te purūmu ē i te hiti purūmu, te pae ’aita te fa’aterera’a pere’o’o tei raro.

Te mea tā’u i fa’aro’o i muri iho, ’o te reo ïa o Lynette : « E Shayne, e mea nā tō ’oe pae e haere ai i rāpae. » Tē tārere noa ra vau i ni’a i tō’u hātua. Ma’a tetoni tei ma’iri vau i te ta’ara’a. Ha’amata a’era māua i te amo i tā māua tamari’i tāta’itahi i rāpae i te pere’o’o nā tō’u ha’amāramarama, tei ni’a ïa i taua taime ra. E mea ta’i rātou ma te ta’a ’ore e aha tei tupu.

’Āria, ’ite atu ra māua ē, tē toe ra ’o Emily, tā māua tamāhine 10 matahiti. ’Ua tuō māua i tōna i’oa, ’aita rā e pāhonora’a. E mau melo nō te pāroita, tē ho’i ato’a ra, tei horo haere nō te ’imi iāna. E pō pōiri roa. ’Ua hi’o fa’ahou vau i roto i te pere’o’o ma te tahi mōrī, ’ite atu ra vau ma te hōriri i te tino iti o Emily i raro a’e i te pere’o’o. Tuō haere a’era vau : « E fa’ata’ahuri i te pere’o’o, tei raro a’e Emily. » Haru ihora vau i te tāfare ’e huti a’era. E mea iti mātou i te hutira’a, ’ua ta’ahuri mai rā te pere’o’o i ni’a i te huira, teie atu ra te tino pohe o Emily.

’Aita ’o Emily e huti i te aho. ’Ua vare’au-roa-hia tōna hōho’a mata. ’Ua parau vau : « ’Ei hōro’a i te hō’ē ha’amaita’ira’a. » ’Ua tūturi mātou te hō’ē hoa rahi ’e te hō’ē melo o te pāroita ’e ma te ha’amanara’a o te autahu’ara’a a Melehizedeka, nā roto i te i’oa o Iesu Mesia, ’ua fa’aue mātou iāna ’ia ora. ’Ua huti pūai ihora ’o Emily i te aho.

E au ē e tau hora tei ma’iri i te taera’a mai te pere’o’o ma’i. ’Ua fa’ahorohia Emily i te fare ma’i. ’Ua puta tōna māhāhā ’e ’ua ’ino maita’i te hō’ē uaua turi ’āvae. ’Ua pe’ape’a ato’a mātou pēnei a’e ’ua ’ino tōna roro nō te taime roa ’aita e mata’i ora. Tei roto Emily i te moeari hō’ē mahana ’e te ’āfa te maoro. ’Ua tāmau mātou i te pure, ’e ’ua ha’apae i te mā’a nōna. E ha’amaita’ira’a, ’ua ora roa mai ’oia. I teie mahana, e ono tamāhine tō Emily rāua tāna tāne ’o Kevin.

Te mea māere, pauroa tei ora mai. Te pēpe tā Lynette i hapū, ’o Tyson ïa. ’Ua fa’aherehere-ato’a-hia ’oia i te pēpē ’e ’ua fānauhia i te ’āva’e Fepuare nō muri mai. Va’u ’āva’e i muri a’e, i muri iho i te fa’ari’ira’a i tōna tino tāhuti, ’ua ho’i atu Tyson i te fare i te Metua i te ao ra. ’O ’oia tō mātou tamaiti melahi tīa’i. Tē ’ite nei mātou i tāna tauturu i roto i tō mātou ’utuāfare, ’e tē tīa’i maoro nei i te fārerei-fa’ahou-ra’a iāna.⁷

’Ua nā ’ō mai te feiā i tauturu i te fa’ata’ahuri i te pere’o’o mai ni’a mai ia Emily, e au ē ’aita e teiaha. ’Ua ’ite au ē, ’ua ’āmui mai te mau melahi nō te ra’i i te mau melahi i te fenua nei nō te amo i te pere’o’o mai ni’a mai i te tino o Emily. ’Ua ’ite ato’a vau nā te mana o te autahu’ara’a mo’a i fa’aho’i ia Emily i te ora.

’Ua heheu te Fatu i teie parau mau i tōna mau tavini : « E haere au nā mua i tō ’outou mata. E vai au i tō ’outou pae ’atau ’e i tō ’outou pae ’aui, e vai ho’i tō’u Vārua i roto i tō ’outou mau ’ā’au, ’e e fa’a’ati ho’i tā’u mau melahi ia ’outou na, nō te pāturu ia ’outou na. »⁸

Tē parau pāpū nei au ē ’ua fa’aho’ihia mai « te Autahu’ara’a Mo’a, mai te au i te Fa’anahora’a a te Tamaiti a te Atua »⁹—te Autahu’ara’a a Melehizedeka—’e tō te reira mau tāviri, te ha’amanara’a ’e te mana ni’a i te fenua nei i teie mau mahana hope’a nei. ’Ua ’ite au ē, noa atu ā ’aita te mau ’ohipa ato’a e tupu mai tei tīa’ihia ra ’e tei purehia, e tae mai iho ā te mau semeio a te Atua mai te au i tōna hina’aro, tōna taime ’e tāna fa’anahora’a nō tātou.

Mai te mea ’ua hina’aro ’outou i te mau ha’amaita’ira’a nō te autahu’ara’a, mai te mau semeio ’e te utuutura’a a te mau melahi, tē ani nei au ia ’outou ’ia haere nā te ’ē’a nō te fafaura’a tā te Atua i fa’afāna’o ia tātou tāta’itahi. E tauturu mai te mau melo ’e te feiā fa’atere o te ’Ēkālesia, rātou tei here ia ’outou, ’ia haere i te ta’ahira’a nō muri iho.

Tē parau pāpū nei au ē tē ora nei Iesu Mesia, te Tamaiti a te Atua, ’e tē fa’atere nei i tāna ’Ēkālesia nā roto i te mau peropheta ora, rātou e mau nei ’e ’o tē fa’a’ohipa nei i te mau tāviri o te autahu’ara’a. Tē vai pāpū nei te Vārua Maita’i. ’Ua hōro’a te Fa’aora i tōna ora nō te fa’aora i tō tātou māuiui, nō te fa’aoraora ia tātou ’e nō te fa’aho’i ia tātou i te fare.

Tē parau pāpū nei au ē ’aita te mau semeio i fa’aea, tei rotopū ia tātou te mau melahi ’e ’ua matara mau te mau ra’i. ’E ’oia mau ’ua matara te reira ! I te i’oa o Iesu Mesia, ’āmene.