’A ’oa’oa i te hōro’a ’o te mau tāviri ’o te autahu’ara’a

E au mau taea’e, e au mau tuahine here, e mahana ta’a’ē roa teie nō peresideni Dallin H. Oaks ’e ’o vau nei. Inaha ho’i, e 40 matahiti i ma’iri a’e nei, i te 7 nō ’Ēperēra 1984, ’ua pi’ihia māua i roto i te Pupu nō te Tino ’Ahuru ma Piti ’āpōsetolo.¹ ’Ua ’oa’oa māua i roto i te ’āmuira’a rahi tāta’itahi mai taua taime ra ē tae roa mai i teie. ’Ua ha’amaita’ihia tātou i te hō’ē nini’ira’a rahi ’o tōna Vārua. Te ti’aturi nei au ē, e tuatāpapa maīte ’outou i te mau parau poro’i o teie ’āmuira’a i te roara’a o te mau ’āva’e i muri nei.

I to’u fānaura’ahia mai,² e ono hiero e ’ohipa ra i roto i te ’Ēkālesia—i te reira taime. George, Logan, Manti, ’e Roto Miti, Utaha; ’oia ato’a i Cardston, Alberta, Canada; ’e Laie, Hawaii. E piti hiero tahito tei ’ohipa poto noa i Kēterani, Ohio, ’e Navu Illinois. ’E ’a fa’anu’u ai te ’Ēkālesia i te pae to’o’a o te rā, ’ua tītauhia i te feiā mo’a ’ia fa’aru’e i teie nā hiero e piti i muri.

’Ua ha’amouhia te hiero nō Nāvu nā te auahi a te hō’ē ta’ata tūtu’i auahi. ’Ua hāmani-fa’ahou-hia te reira i muri a’e, ’e nā te peresideni Gordon B. Hinckley i ha’amo’a i te reira.³ Nā te mau ’enemi o te ’Ēkālesia i ha’avi’ivi’i i te hiero nō Kēterani. I muri a’e, ’ua nōa’a te hiero nō Kēterani i te ’āmui-tahi-ra’a nō te Mesia, tei fatu i te reira e rave rahi matahiti.

I te ’āva’e i ma’iri a’e nei, ’ua fa’aara atu mātou ē, ’ua ho’o mai te ’Ēkālesia a Iesu Mesia i te Feiā Mo’a i te mau mahana hope’a nei i te hiero nō Kēterani, ’e tae noa atu e rave rahi mau vāhi tu’iro’o i Nāvu. Tē māuruuru maita’i nei mātou i te mau ’āparaura’a here ’e te maita’i nō te tahi ’e te tahi tā mātou i fāri’i mai roto mai i te feiā fa’atere nō te ’āmui tahi ra’a nō te Mesia tei fāri’i i teie fa’aaura’a.

Hōho’a

Hiero no Keterani

’E faufa’a maerehia tō te hiero nō Kēterani i roto i te fa’aho’i-fa’ahou-ra’a mai o te ’ēvaneria a Iesu Mesia. E rave rahi mau ’ohipa i tupu i reira tei tohuhia e rave rahi tausani matahiti mai ā, ’e ’ua riro ’ei mea faufa’a nō te ’Ēkālesia a te Fatu tei fa’aho’i-fa’ahou-hia mai, nō te fa’atupu i tāna ’ohipa nō te mau mahana hope’a nei.

Te ’ohipa faufa’a roa a’e i roto i teie mau ’ohipa, ’ua tupu ïa i te sābati pāsa 3 nō ’Ēperēra 1836.⁴ I taua mahana ra, ’ua fāri’i Iosepha Semita ’e ’o Olive Kautere e rave rahi mau fārereira’a fa’ahiahia. A tahi, ’ua fā mai te Fatu ’o Iesu Mesia. ’Ua pāpa’i te peropheta nō ni’a i te Fa’aora « Mai te ura auahi ra tōna nā mata ; te rouru o tōna upo’o ra e mea teatea roa ïa mai te hiona mā roa ra ; ’ua ’ana’ana maira tōna mata ’e ’ua hau a’e i te ’ana’ana o te mahana ; ’e o tōna reo ra mai te tahera’a ïa o te pape rahi ».⁵

I roto i teie fārereira’a, ’ua fa’a’ite pāpū te Fatu i tōna ti’ara’a iho ta’ata. ’Ua parau ’oia, « ’O vau nei te matameha’i ’e te hope’a ra ; ’o vau nei ho’i ’oia ’o tē ora nei, ’o vau nei ’oia ’o tei taparahihia ; ’o vau nei ho’i tō ’outou ārai i te Metua ra ».⁶

’Ua parau a’era Iesu Mesia ē, ’ua fāri’i ’oia i te hiero ’ei fare Nōna ’e ’ua hōro’a ’oia i teie fafaura’a maere : « E fa’a’ite atu vau iā’u iho i tā’u mau ta’ata nā roto i te aroha i roto i teie fare nei ».⁷

E au teie fafaura’a fa’ahiahia nō te mau hiero ato’a i ha’amo’ahia i teie mahana. Te ani atu nei au ia ’outou ’ia feruri e aha te aura’a nō ’outou iho te fafaura’a a te Fatu.

I muri a’e i te tere ’o te Fa’aora, ’ua fā mai ’o Mose. ’Ua hōro’a ’o Mose i ni’a ia Iosepha Semita i te mau tāviri nō te ha’aputuputura’a ’o ’Īserā’ela ’e te ho’ira’a mai nā ’ōpū hō’ē ahuru.⁸

I te ’ōpanira’a teie ’ōrama, « ’Ua fā maira ’o Elia, ’e ’ua hōro’a maira i te tau tu’ura’a nō te ’evaneria a Aberahama » ia Iosepha.⁹

I muri iho ’ua fā maira te peropheta Eliaha. ’Ua fa’atupu tōna fāra’a mai i te fafaura’a a Malaki, ’oia ho’i, hou te tae-piti-ra’a mai, e tono mai te Fatu ia Eliaha, « ’Ia fa’afāriu i te ’ā’au ’o te mau metua ’e te tamari’i, ’e te ’ā’au o te tamari’i ’e tō rātou mau metua ».¹⁰ ’Ua hōro’a maira ’o Eliaha i te mau tāviri nō te mana tā’atira’a i ni’a ia Iosepha Semita.¹¹

’E’ita e nehenehe ’ia fa’aiti i te faufa’a o te fa’aho’ira’a mai o teie mau tāviri i te fenua nei nā roto mai e toru ve’a nō te ra’i mai i raro a’e i te arata’ira’a a te Fatu. Te mau tāviri o te autahu’ara’a ’o te mana ïa ’e te pūai ’o te peresidenira’a. Te fa’atere nei te mau tāviri ’o te autahu’ara’a i te huru e ti’a ai ’ia fa’a’ohipahia te autahu’ara’a ’o te Atua nō te fa’atupu i te mau ’opuara’a a te Fatu ’e nō te ha’amaita’i i te feiā ato’a e fāri’i i te ’evaneria a Iesu Mesia i fa’aho’i-fa’ahou-hia mai.

E mea faufa’a ’ia ’ite ē, hou tē fa’ati’ara’a o te ’Ēkālesia, ’ua hōro’a mai te mau ve’a nō te ra’i mai i te autahu’ara’a a Aarona ’e a Melehizedeka i ni’a i te peropheta Iosepha ’e ’ua hōro’a iāna i te mau tāviri nō taua nā autahu’ara’a ra.¹² ’Ua hōro’a teie nā tāviri ia Iosepha Semita i te mana nō te fa’ati’a i te ’Ēkālesia i te matahiti 1830.¹³

I muri iho, i roto i te hiero nō Kēterani i te matahiti 1836, ’ua riro te hōro’ara’a o teie nau tāviri e toru nō te autahu’ara’a ’ei mea faufa’a, ’oia ho’i, te mau tāviri nō te ha’aputuputura’a i tō ’Īserā’ela, te mau tāviri nō te ’evaneria a Aberahama, ’e te mau tāviri nō te tā’atira’a. Nā teie mau tāviri i fa’ati’a ia Iosepha Semita—’e te mau peresideni ato’a o te ’Ēkālesia a te Fatu i muri mai—’ia ha’aputuputu ia ’Īserā’ela i nā pae e piti o te pāruru, ’ia ha’amaita’i i te mau tamari’i fafau ato’a i te ha’amaita’ira’a a Aberahama, ’ia tu’u i te hō’ē tītiro ha’amanara’a i ni’a i te mau ’ōro’a ’e te mau fafaura’a o te autahu’ara’a, ’e ’ia tā’ati i te mau ’utuāfare e a muri noa atu. E mea hope ’ore ’e te fa’ahiahia teie mau tāviri o te autahu’ara’a.

’A feruri na i te ta’a-’ē-ra’a o tō ’outou orara’a ’āhani ’aita te mau tāviri o te ’autahu’ara’a’a i fa’aho’ihia mai i te fenua nei.¹⁴ ’Aita ana’e te mau tāviri o te autahu’ara’a, ’e’ita ïa ’outou e fāri’i i te mana o te Atua.¹⁵ ’Aita ana’e te mau tāviri o te ’autahu’ara’a, e riro noa ïa te ’Ēkālesia ’ei fa’anahora’a faufa’a nō te ha’api’ira’a ’e nō te tauturu, ’aita rā e hau atu. ’Aita ana’e te mau tāviri o te autahu’ara’a, ’aore roa te hō’ē o tātou e fāri’i i te mau ’ōro’a ’e te mau fafaura’a o tē tā’amu ia tātou i tei herehia e tātou e a muri noa atu ’e ’ia fa’ati’a ia tātou ’ia ora i pīha’i iho i te Atua.

Tē fa’ata’a nei te mau tāviri o te ’autahu’ara’a i te ’Ēkālesia a Iesu Mesia i te Feiā Mo’a i te Mau Mahana Hope’a nei i te tahi atu huru fa’anahonahora’a i ni’a i te fenua nei. E rave rahi mau fa’anahora’a ’ē atu e nehenehe e ha’amaita’i a’e i tō ’outou orara’a i roto i te tāhuti nei, ’e e nā reira mau rātou. E rave rahi mau fa’anahora’a ’ē atu e nehenehe e ha’amaita’i a’e i tō ’outou orara’a i roto i te tāhuti nei, ’e e nā reira mau rātou.¹⁶

E hōro’a mai te mau tāviri ’o te autahu’ara’a ia tātou i te mana nō te fa’atae i te mau ha’amaita’ira’a i fafauhia ’ia Aberahama i te mau tāne ’e te mau vahine ato’a e ha’apa’o i te fafaura’a. Nā roto i te ’ohipa hiero e ti’a ai i te mau tamari’i ato’aa te Atua ’ia fāri’i i teie mau ha’amaita’ira’a faufa’a, noa atu te vāhiaore rā te taimei orahia ’aore rā e orahia nei e ratou. E mata na tātou i te ’oa’oa i te mea ē, tei ni’a fa’ahou te mau tāviri o te ’autahu’ara’a i te fenua nei !

Tē ani manihini atu nei au ia ’outou ’ia feruri maīte i nau fa’ahitira’a parau e toru i muri nei :

1. ’Ua riro te ha’aputuputura’a ia ’Īserā’ela ’ei fa’a’itera’a ē, ’ua here te Atua i tāna mau tamari’i ato’a ’ati a’e te ao nei.

2. Te ’evaneria a Aberahama te tahi atu ïa fa’a’itera’a ē, te here nei te Atua i tāna mau tamari’i ato’a i te mau vāhi ato’a. Tē ani nei ’oia i te mau ta’ata ato’a ’ia haere mai iāna ra—« te ta’ata ’ere’ere ’e te ’uo’uo, te tītī ’e te ti’amā, te tāne ’e te vahine ; … hō’ē ana’e tō te ta’ata ato’a ti’ara’a i mua i te Atua ».¹⁷

3. Te mana nō te tā’atira’a o te hō’ē ïa ha’apāpūra’a hanahananō te here rahi o te Atua i tāna mau tamari’i ato’ae tē hina’aro nei ’oia ’ia mā’iti rātou tāta’itahiia ho’i fa’ahou iāna ra.

E hōro’a te mau tāviri o te autahu’ara’a tei fa’aho’ihia mai nā roto i te peropheta Iosepha Semita i te ti’ara’a i te mau tāne ’e te mau vahine ato’a e ha’apa’o i te fafaura’a ’ia ’oa’oa i te mau ha’amaita’ira’a pae vārua fa’ahiahia nō te ta’ata iho . I reira noa ā, ’ua rau te mau mea e ti’a ’ia ha’api’i mai i roto i te ’ā’amu mo’a o te hiero nō Kēterani.

’Ua riro te pure a Iosepha Semita nō te ha’amo’ara’a i te hiero nō Kēterani, ’ei ha’api’ira’a nō ni’a i te huru e hōro’a mai ai te hiero ia ouou i te mana i te pae vārua nō te pāhono i te mau tāmatara’a o te orara’a i teie mau mahana hope’a nei. Tē fa’aitoito atu nei au ia ’outou ’ia tuatāpapa i te reira pure tei pāpa’ihia i roto i Te Ha’api’ira’a Tumu ’e te mau Fafaura’a tuha’a 109. Tē ha’api’i mai nei te reira pure ha’amo’ara’a, tei fāri’ihia nā roto i te heheura’a, ē te hiero, e fare ïa « nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te ha’api’ira’a, ’ei fare nō te hanahana, ’ei fare nō te ha’apa’o, ’ei fare ho’i nō te Atua ».¹⁸

Teie tāpura nō te mau huru, ’ua hau roa atu ïa i te hō’ē fa’ata’ara’a o te hō’ē hiero. E fafaura’a teie nō ni’a i te mea e nehenehe e tupu i ni’a i te feiā e tāvini ’e e ha’amori i roto i te fare ’o te Fatu. E nehenehe ratou e ti’aturi ’ia fāri’i i te mau pāhonora’a i te pure, te heheura’a nō te ta’ata iho, te fa’aro’o rahi a’e, te pūai, te tāmāhanahana, te ’ite rahi atu, ’e te mana rahi atu.

E tauturu te taime i roto i te hiero ia ’outou ’ia feruri tiretiera ! ’e ’ia fāri’i i te hō’ē ’itera’a ē, ’o vai mau ’outou, e riro mai ’outou mai ia vai, ’e i te huru o te orara’a tā ’outou e fāri’i e a muri noa atu. Te ha’amori-tāmau-ra’a i roto i te hiero, e ha’amaita’i te reira i te huru nō tā ’outou hi’ora’a ia ’outou iho ’e i te huru nō te fa’aora’a ia ’outou i roto i te fa’anahora’a nehenehe a te Atua. Tē fafau atu nei au i te reira ia ’outou.

’Ua fafau-ato’a-hia ia tātou ē, i roto i te hiero e nehenehe tātou « e fāri’i i te ’īra’a nō te Vārua Maita’i ».¹⁹ ’A feruri nā e aha te aura’a nō te reira fafaura’a i roto i te parau nō te matarara’a te mau ra’i i te ta’ata e ’imi ma te tu’utu’u ’ore i te parau mau mure ’ore.

’Ua ha’api’i-ato’a-hia ia tātou ē, te feiā ato’a e ha’amori i roto i te hiero, e haere atu rātou i rāpae ma te mau i te mana o te Atua ’e te mau melahi « ’ia ha’apa’o noa mai ia rātou ra »²⁰ ’Ei vahine ’aore rā ’ei tāne tei fāri’i i te ’ōro’a hiero ma te ha’anahia i te mana ’o te Atua, e aha ïa te huru o te tupura’a rahi ’o tō ’outou ti’aturira’a, ’ia ’ite ana’e ’outou ē,’e’ita ’outou e fa’aruru i te orara’a ’outou ana’e ? Te ’itera’a ē, e tauturu mau te mau melahi ia ’outou, e aha ïa te itoito tā te reira e hōro’a mai ia ’outou ?

I te hope’a, ’ua fafauhia mai ia tātou ē, e « ’ore te hō’ē ’āmuira’a nō te ’ino » e upo’oti’a i ni’a i te feiā e ha’amori i roto i te fare o te Fatu.E fafaura’a teie nō ni’a i te mea e nehenehe e tupu i ni’a i te feiā e tāvini ’e e ha’amori i roto i te fare ’o te Fatu.²¹

Te hāro’aro’ara’a i te mau maita’i pae vārua e roa’a i roto i te hiero, e mea faufa’a rahi te reira nō tātou tāta’itahi i teie mahana.

E au mau taea’e, e au mau tuahine here, teie tā’u parau fafau. ’Aita hō’ē mea e tauturu hau atu ia ’outou ’ia tāpe’a pāpū i ni’a i te ’āuri²² maori rā te ha’amori-tāmau-ra’a i roto i te hiero ’ia ti’a ho’i i te huru o tō ’outou orara’a. ’Aita hō’ē mea e pāruru hau atu ia ’outou ’ia fārerei ana’e ’outou i te mau māhu pōiri o te ao nei. ’Aita hō’ē mea e ha’apūai hau atu i tō ’outou ’itera’a pāpū nō ni’a i te Fatu Iesu Mesia ’e tōna tāra’ehara ’aore rā, e tauturu ia ’outou ’ia hāro’aro’a hau atu i te fa’anahonahora’a nehenehe a te Atua. ’Aita hō’ē mea e tāmarū hau atu i tō ’outou vārua i roto i te mau taime māuiui. ’Aita hō’ē mea e ’īriti hau atu i te mau ra’i. ’Aita hō’ē !

Te hiero te ’ūputa e tae atu ai i te mau ha’amaita’ira’a rarahi a’e a te Atua nō tātou tāta’itahi, nō te mea, te hiero te vāhi hō’ē roa i ni’a i te fenua nei e nehenehe ai ia tātou ’ia fāri’i i te tā’āto’ara’ao te mau ha’amaita’ira’a i fafauhia ia Aberahama.²³ Nō reira tātou e ’imi ai i te mau rāve’a ato’a, i raro a’e i te arata’ira’a a te Fatu, ’ia roa’a ’ōhie te mau ha’amaita’ira’a o te hiero i te mau melo o te ’Ēkālesia. Nō reira, tē ’oa’oa nei mātou ’ia fa’a’ite atu ē, tē fa’anaho nei mātou ’ia patu i te hō’ē hiero ’āpī i roto i teie na vāhi e 15 i muri nei :

• Uturoa, Pōrīnetia farāni

• Chihuahua, Mehiko

• Florianópolis, Peretīria

• Rosario, Rāparata

• Edinburgh, ’Ētōtia

• Brisbane, Auteraria Apato’a

• Victoria, Torombia Peretāne

• Yuma, Arizona

• Houston, Texas Apato’a

• Des Moines, Iowa

• Cincinnati, Ohio

• Honolulu, Vehi

• Jordan Tō’o’a o te rā, Utaha

• Lehi, Utaha

• Maracaibo, Venetuera

Te mau taea’e ’e te mau tuahine here ē, tē fa’a’ite pāpū nei au ē, teie te ’Ēkālesia a Iesu Mesia i te Feiā Mo’a i te Mau Mahana Hope’a nei. Te ti’a nei ’oia i te upo’o o te reira. E mau pipi tātou nāna.

E ’oa’oa ana’e tātou i roto i te fa’aho’i-fa’ahou-ra’a mai ’o te mau tāviri ’o te autahu’ara’a, o tē tauturu ho’i ia ’outou ’e iā’u nei ’ia ’oa’oa i te tā’āto’ara’a o te mau ha’amaita’ira’a pae vārua tā tātou e hina’aro ’e e ti’a ’ia fāri’i. Tē fa’a’ite pāpū nei au i te reira i te i’oa mo’a o Iesu Mesia, ’āmene.