’A ti’a i ni’a ! Tē pi’i mai nei ’oia ia ’oe

’Aita i maoro a’e nei, ’ua ui atu vau i tā’u vahine, « e nehenehe ānei ’oe e parau mai iā’u, nō te aha, te āteara’a ’o tā’u e ha’amana’o nei, ’aita roa atu tāua i fārerei a’e i te mau fifi rarahi i roto i tō tāua orara’a ? »

’Ua hi’o mai ’oia iā’u ’e ’ua parau mai : « ’Oia ïa ! E parau atu vau ia ’oe nō te aha ’aita tāua i fārerei a’e nei i te mau fifi rarahi ; nō te mea e ha’amana’ora’a poto noa tō ’oe ! »

Tāna pāhonora’a vitiviti ’e te māramarama, ’ua ha’aferuri fa’ahou ā iā’u ē, te orara’a i te ’evanelia a Iesu Mesia ’aita te reira e fa’a’ore i te māuiui ’e te mau tāmatara’a, ’o te hina’arohia nō te tupu rahi.

E ’ere te ’evanelia i te hō’ē rāve’a nō te ’ape i te mau tāmatara’a ’e te mau fifi, ’o tē hō’ē rā ’ohipa tano nō te fa’arahi i tō tātou fa’aro’o ’e ’ia ha’api’i mai i te fa’atere i te reira.

Tē vai nei tō’u hō’ē mana’o nō teie parau mau tau ’āva’e i ma’iri a’enei, ’a hāhaere noa ai au i te hō’ē mahana ’e ’oi’oi roa, ’ua ha’amata tō’u mata i te rumaruma, te pōiri ’e te ’are’are. ’Ua mata’u vau. I muri iho, ’ua parau mai te taote iā’u : « ’Ia ’ore ’oe e ha’amata ’oi’oi te rapa’aura’a, e riro ’oe i te matapōhia i roto te tahi tau hepetoma noa ». ’Ua rahi roa atu ā tō’u mata’u.

I muri a’e, ’ua parau mai rātou : « E tītauhia ia oe te pāti’ara’a i te uaua nō te rā’aura’a, te pāti’ara’a i roto i te mata, ma te mata ’ara’ara maita’i, i te mau maha hepetoma ato’a i te toe’a o tō ’oe orara’a.

’Ua riro ’ei tāpa’o fa’a’arara’a au ’ore te reira.

I muri iho, ’ua tae mai te hō’ē ferurira’a mai te hō’ē uira’a. ’Ua ui au iā’u iho : « Nā reira ! E ’ere tō’u mata i te pae tino i te mea maita’i, tera rā, e aha ïa te huru o tō’u mata pae vārua ? E tītauhia ānei iā’u tē rapa’aura’a i te reira ? E aha te auraʼa te parau ’ia noa’a i te hi’ora’a pae vārua aneane ? »

’Ua feruri au i te ’ā’amu nō te ta’ata matapō tei pi’ihia ’o Baretimaio, tei fa’ata’ahia mai i roto i te ’Evanelia a Mareko. Tē fa’ati’a nei te pāpa’ira’a mo’a, « e ’ite a’era ’oia ē, ’o Iesu i Nazareta ra, ’ua pi’i mai ra, nā ō mai ra, E te Tamaiti a Davida ra, e Iesu ē, e aroha mai ’oe iā’u ».¹

Te ti’ara’a mau, i te mata o te rahira’a ta’ata, e tamaiti noa Iesu nā Iosepha, nō te aha pai Baretimaio i pi’i ai iāna « te tamaiti a Davida » ? Nō te mea noa, ’ua ’ite mau ’oia ē ’o Iesu mau iho ā te Mesia, ’o tei tohuhia e fānauhia ’oia mai te hō’ē hua’ai nō Davida.²

E mea faufa’a roa ē, teie ta’ata matapō, ’aita tōna e mata i te pae tino, ’ua ta’a roa iāna ia Iesu. ’Ua hi’o atu ’oia i te pae vārua i te mea tāna i ’ore e hi’o nei i te pae tino, inaha ho’i e rave rahi tei ’ite mata atu ia Iesu i te pae tino, ’ua matapō-roa-hia rā rātou i te pae vārua.

Teie ’ā’amu, tē ha’api’i rahi mai nei ia tātou nō ni’a i te hi’ora’a aneane pae vārua.

Tē taio nei tātou, « e rave rahi tei a’o atu iāna ia māmū ’oia ; rahi roa mai ra tōna pi’i, e te Tamaiti a Davida ē, e aroha mai ’oe iā’u ».³

Te feiā e hā’ati ra iāna tē parau ra ïa iāna ’ia māmū, ’ua rahi roa atu ā rā tāna pi’ira’a nō te mea ’ua ’ite ’oia ’o vai mau ’o Iesu. ’Ua tau’a ’ore ’oia i teie mau reo ’e ’ua fa’ateitei atu ā ’oia i tōna reo.

’Ua ’ohipa ’oia ’aita ra i vaiiho ’ia ’ohipahia i ni’a iāna. Noa atu ā ’ua tā’ōti’ahia tōna mau rāve’a, ’ua fa’a’ohipa ’oia i tōna fa’aro’o nō te nā ni’a a’e i tōna mau tā’oti’ara’a.

Nō reira, te parau tumu mātāmua ’o tā tātou e ha’api’i mai ’oia ho’i e tāpe’a tātou i te hō’ē hi’ora’a pae vārua aneane ’ia rotahi ana’e tātou i ni’a ia Iesu Mesia ’e ’ia vai ha’apa’o noa i te mea tā tātou i ’ite e parau mau.

Te mau taea’e ’e te mau tuahine, nō te tāpe’a pāpū i tō tātou hi’ora’a aneane pae vārua, e ti’a ia tātou e fa’a’oti ’eiaha e fa’aro’o i te mau reo o te ao nei e hā’ati nei ia tātou. I roto i teie ao huehue ’e te hepohepo, e ti’a ia tātou ’ia vai ha’apa’o noa i te mea tā tātou i ’ite, ’ia ha’apa’o maita’i i tā tātou mau fafaura’a, ’ia ha’apa’o maita’i i te mau fa’auera’a ’e ’ia ha’apāpū fa’ahou ā ma te pūai atu, mai tā teie ta’ata i rave. E ti’a ia tātou ’ia tuō ma te pūai atu ā i tō tātou ’itera’a pāpū nō te Fatu i te ao nei. ’Ua matau maita’i teie ta’ata ia Iesu, ’ua vai ha’apa’o maita’i i te mea tāna i ti’aturi, ’e ’aita roa atu ’oia i fa’ahahi-’ē-hia e te mau reo e hā’ati ra iāna.

E rave rahi mau reo pūai i teie mahana e tāmata nei i te tāmarū i tō tātou reo ’ei mau pipi nā Iesu Mesia. Tē tāmata nei te mau reo o te ao nei i te ha’amāmū ia tātou, ’o terā mau rā nō te aha e ti’a ia tātou ’ia fa’a’ite i tō tātou ’itera’a pāpū nō te Fa’aora i ni’a atu ā ’e te pūai atu ā. I rotopū i te mau reo ato’a o te ao nei, tē ti’aturi nei te Fatu i ni’a iā’u ’e i ni’a ia ’outou nō te fa’a’ite i tō tātou ’itera’a pāpū, ’ia fa’ateitei i tō tātou reo ’e ’ia riro ’ei reo nōna. ’Ia ’ore ana’e tātou e nā reira, ’o vai te fa’a’ite pāpū nō Iesu Mesia ? ’O vai te parau atu i tōna i’oa ’e e fa’a’ite i tāna misiōni hanahana ?

E hōpoi’a pae vārua tā tātou nō roto mai i tō tātou ’itera’a ia Iesu Mesia.

E aha rā tā Baretimaio i rave i muri iho ?

I te fa’auera’a a te Fatu ’ia ti’a mai i ni’a, ’ua ’ohipa fa’ahou ā ’oia ma te fa’aro’o.

Tē parau nei te pāpa’ira’a mo’a, « ’ua ha’apae atu ra ’oia i tāna ’ahu, ti’a a’era i ni’a haere mai ra ’ia Iesu ra ».⁴

Teie ta’ata ha’eha’a ’e te ha’apa’o maita’i ’ua māramarama ē, e ti’a iāna ’ia roa’a i te hō’ē orara’a maita’i a’e maoti te fa’auera’a a Iesu. ’Ua ’ite ’oia ē ’ua hau a’e ’oia i te maita’i i tōna iho huru, ’e te ’ohipa mātāmua roa tāna i rave i tōna fa’aro’ora’a ia Iesu i te pi’ira’a mai iāna ’o te fa’aru’era’a ïa i tōna ’ahu ’ōvere.

Fa’ahou ā, ’ua ’ohipa ’oia ’aita rā i vaiiho ’ia ’ohipahia i ni’a iāna.

’Ua nehenehe ’oia e mana’o, « ’aita vau e hina’aro fa’ahou i te reira, i teienei ’ua tomo mai Iesu i roto i tō’u orara’a. E mahana ’apī teie. ’Aita fa’ahou ā iā’u teie orara’a veve. ’Ia Iesu, e nehenehe au e ha’amata i te hō’ē orara’a ’āpī o te poupou ’e te ’oa’oa i roto iāna, ’e iāna, ’e nā roto iāna. ’E ’aita vau e tau’a fa’ahou i te mea tā te ao nei e mana’o nei nō’u. E pi’i mai Iesu iā’u ’e e tauturu mai ’oia iā’u ’ia ora i te hō’ē orara’a ’āpī ».

’Auē ïa tauira’a fa’ahiahia roa !

Ma te fa’aru’era’a i tōna ’ahu ’ōvere, ’ua fa’aru’e ’oia i te mau ’ōtōhera’a ato’a.

’E teie te piti o te parau tumu : E tāpe’a noa tātou i te hō’ē hi’ora’a pae vārua aneane ’ia vaiiho ana’e tātou i muri i te ta’ata o te tino nei, e tātarahapa tātou ’e e ha’amata i te hō’ē orara’a ’āpī i te Mesia.

Te rāve’a nō te rave i te reira ’o te fa’aotira’a ïa ’e te ha’apa’ora’a i te mau fafaura’a nō te fa’ari’i i te hō’ē orara’a maita’i a’e maoti Iesu Mesia.

’A tāmau noa ai tātou i te ’ite mai i te mau ’ōtohera’a nō te fa’ati’a ia tātou iho, tō tātou huru orara’a ’e tō tātou fifi, ’e i ni’a i te mau ’ohipa ’ino ato’a e tae mai i roto i tō tātou orara’a ’e ’oia ato’a i ni’a i te mau ta’ata ’ino ato’a ’o tā tātou e mana’o nei ē, tē ha’amāuiui nei ia tātou, tē tāpe’a noa ra ïa tātou i te ’ahu ’ōvere i ni’a i tō tātou tāpono. E parau mau i te tahi taime e ha’amāuiui mai te ta’ata ia tātou, ma te ’ōpuahia ’aore rā ’aita. E ti’a rā ia tātou e fa’aoti ’ia ’ohipa ma te fa’aro’o i te Mesia ma te ’īriti-’ē-ra’a i te ’ahu i te pae ferurira’a ’e i te pae manava, ’o tā tātou e nehenehe fa’ahou e ’ō’omo nō te huna i te mau ’ōtohera’a ’aore rā te mau hara, ’e te fa’aru’era’a i te reira ma te ’ite ē e nehenehe ’oia e fa’aora mai ia tātou.

’Aita roa atu e ’ōtohera’a maita’i ’ia parau ē, « mai teie iho ā vau nō te mau tupura’a ’ohipa māuiui ’e te aura’a ’ore. ’E e’ita tā’u e nehenehe e taui, ’e ’ua ti’a roa te reira ».

’Ia feruri ana’e tātou mai te reira, e fa’aoti tātou e vaiiho ’ia ’ohipahia i ni’a ia tātou.

E tāpe’a tātou i te ’ahu o te ’ōvere.

Te ’ohipara’a ma te fa’aro’o te aura’a ’o te turu’ira’a ïa i ni’a i tō tātou Fa’aora, te ti’aturira’a ē nā roto i tāna Tāra’ehara, e nehenehe tātou e ti’a mai i ni’a i te mau mea ato’a, mai te au i tāna fa’auera’a.

Te toru o te parau tumu e ’itehia mai i roto i nā e maha parau hōpe’a : « ’Ua haere mai ’oia ia Iesu ra »

Nāhea ’oia e haere ai ia Iesu ra inaha ho’i e matapō ’oia ? Hō’ē ana’e rāve’a ’o te haerera’a ïa ia Iesu ma te fa’aro’ora’a i tōna reo.

’E teie te toru o te parau tumu : E tāpe’a tātou i te hō’ē hi’ora’a pae vārua aneane ’ia fa’aro’o ana’e tātou i te reo o te Fatu ’e ’ia fa’ati’a tātou iāna ’ia arata’i ia tātou.

Mai teie ta’ata tei tuō ma te reo teitei a’e nā ni’a a’e i te mau reo e hā’ati ra iāna, ’ua ti’a roa iāna i te fa’aro’o i te reo o te Fatu i rotopū i te tahi atu ā mau reo.

Hō’ē ā huru fa’aro’o tei fa’ati’a ia Petero ’ia haere nā ni’a i te miti, ’a tāpe’a noa ai ’oia i tōna rotahira’a pae vārua i ni’a i te Fatu ’e ’aita ’oia i fa’atapitapihia e te mata’i e hā’ati ra iāna.

I muri iho, tē fa’aoti nei te ’ā’amu o teie matapō ma te mau parau « ’ora ihora tāna mata i reira ra, e ’ua pe’e mai ra ia Iesu i te arati’a ra ».⁵

Hō’ē o te mau ha’api’ira’a faufa’a roa a’e i roto i teie ’ā’amu ’oia ho’i ’ua fa’a’ohipa teie ta’ata i te fa’aro’o mau ia Iesu Mesia ’e ’ua fa’ari’i i te hō’ē temeio nō te mea ’ua ani ’oia ma te hina’aro mau, te hina’aro mau nō te pe’e atu iāna ra.

’E ’o te tumu mau teie nō te mau ha’amaita’ira’a ’o tā tātou e fa’ari’i nei i roto i tō tātou orara’a, te pe’era’a ia Iesu Mesia. ’Oia ho’i te ’itera’a iāna, te ravera’a ’e te ha’apa’ora’a i te mau fafaura’a ’e te Atua nōna, te tauira’a i tō tātou huru natura nā roto iāna, ’e te tūtavara’a ē tae noa atu i te hōpe’a ma te pe’era’a iāna.

Nō’u nei, te tāpe’ara’a i te hō’ē hi’ora’a pae vārua aneane ’o te rotahira’a ïa i ni’a ia Iesu Mesia.

Nō reira, e mea aneane ānei tō’u hi’ora’a pae vārua, ’ia fa’ari’i ana’e au te pātia i roto i tō’u mata ? ’O vai ho’i au nō te parau atu i te reira ? Tē māuruuru nei au nō te mea tā’u e hi’o nei.

Te hi’o aneane nei au i te rima o te Fatu i roto i teie ’ohipa mo’a ’e i roto i tō’u orara’a.

Tē hi’o nei au i te fa’aro’o o te ta’ata e rave rahi nā te vāhi ato’a tā’u e haere nei, ’o te ha’apūai i tō’u iho fa’aro’o.

Te hi’o nei au i te mau melahi ’ati a’e iā’u.

Te hi’o nei au i te fa’aro’o o te feiā e ’ore nei e ’ite mata i te Fatu i te pae tino, terā rā ’o tē ’ite maita’i iāna i te pae vārua, nō te mea ’ua matau maita’i rātou iāna.

Tē fa’a’ite pāpū nei au teie ’evanelia ’o te pāhonora’a ïa nō te mau mea ato’a, nō te mea ’o Iesu Mesia te pāhonora’a nō tātou pā’āto’a. Tē māuruuru nei au nō te mau mea tā’u e nehenehe e hi’o ’ia pe’e ana’e au i tō’u Fa’aora.

Tē fafau atu nei au ē, mai te mea e fa’aro’o tātou i te reo o te Fatu ’e e fa’ati’a iāna ’ia arata’i ia tātou i ni’a i te ’ē’a nō te fafaura’a a te Fa’aora, e fa’ari’i tātou i te ha’amaita’ira’a nō te hō’ē hi’ora’a aneane, te hō’ē hāro’aro’ara’a pae vārua, ’e te hau o te ’ā’au ’e o te ferurira’a i te roara’a o tō tātou orara’a.

’Ia nehenehe ia tātou ’ia tuō i tō tātou ’itera’a pāpū nōna pūai a’e i te mau reo e hā’ati nei ia tātou, i roto i te hō’ē ao tei tītauhia ’ia fa’aro’o rahi atu ā ia Iesu Mesia ’eiaha ra ’ia ’iti mai. ’Ia tātara ’ē atu tātou i te ’ahu o te ’ōvere ’o tā tātou e neheneh fa’ahou e ’ō’omo, ’e ’ia ti’a i ni’a a’e i te ao nei nō te hō’ē orara’a maita’i a’e i roto ’e nā roto i te Mesia. ’Ia fa’aru’e ’ē atu tātou i te mau ’ōtohera’a ato’a nō te ’orera’a e pe’e ia Iesu Mesia ’e ’ia ’ite mai i te mau rāve’a ato’a nō te pe’e iāna ’ia fa’aro’o ana’e tātou i tōna reo. ’O tā’u ïa pure nā roto i te i’oa o Iesu Mesia, ’āmene.