Te ’ohura’a pūai ’e te vi’ivi’i ’ore ’o te ha’api’ira’a tumu a te Mesia

Tau matahiti i ma’iri a’enei, ’ua ’āmui atu tā’u vahine ’o Ruth, tā māua tamāhine ’o Ashley ’e ’o vau i tē tahi atu mau touristes i roto i te hō’ē tere hō’ēra’a va’a Kayak i Hawaii. E au te kayak mai te hō’ē va’a ha’eha’a roa, e pārahi te ta’ata hoe ma te hi’o i mua, ’e e fa’a’ohipa ’oia i te hō’ē hoe e piti rapa nō te huti mai mua haere i muri i te tahi pae e i muri iho i te tahi pae. Te fa’anahora’a maori rā, e hoe i ni’a e piti motu na’ina’i i rāpae ia Oahu ’e fa’aho’i mai ai. ’Aita vau i ha’ape’ape’a nō te mea, i tō’u ’āpīra’a ’ua hoe au i te kayak i roto i te mau roto mou’a. ’Aita e ’ohipa maita’i nā roto i te te’ote’o, e ’ere ānei ?

’Ua hōro’a mai tō mātou ta’ata arata’i i te mau arata’ira’a ’e ’ua fa’a’ite mai i te mau kayak tā mātou e fa’a’ohipa. E mea ta’a’ē te reira i te mau kayak tā’u i hoe na. E tītauhia iā’u ’ia pārahi i te pae ni’a o te kayak ’eiaha rā i roto. I tō’u pārahira’a i ni’a i te kayak, e mea teimaha a’e au i tā’u i mātau, ’e e ’ere i te mea pāpū maita’i i ni’a i te pape.

’A ha’amata ai mātou i te hoe, e mea vitiviti a’e tā’u hoera’a i tā Ruth ’e ’o Ashley. Mā’a taime i muri mai, ’ua ātea roa vau i mua ia rāua. ’Ua ha’apeu vau i te reira, ’ua fa’aea vau i te hoe ’e ’ua tīa’i au ’ia piri mai rāua. ’Ua ū mai te hō’ē ’are miti, fātata e 13 tenetimetera i te teitei,¹ i ni’a i tō’u kayak ’e ’ua fa’ata’ahuri iā’u i roto i te pape. I te taime ’a fa’ahuri ai au i te kayak ’e ’a ta’uma ai i ni’a iho, ’ua tere mai ’o Ruth ’e ’o Ashley nā pīha’i iho iā’u, terā rā ’ua rohirohi roa vau nō te hoe fa’ahou. Hou ’a topa ai tō’u rohirohi, ’ua ū fa’ahou mai hō’ē ’are rahi, fātata e 20 tenetimereta i te teitei,² i ni’a i tō’u kayak, ’e ’ua fa’ata’ahuri fa’ahou iā’u. I te taime ’a fa’a’āfaro ai au i te kayak, nō tō’u rohirohi rahi, ’ua ri’ari’a vau ’o te ’ore e ti’a iā’u ’ia ta’uma i ni’a iho.

Nō tōna ’itera’a mai i tō’u huru, ’ua hoe mai te ta’ata arata’i i pīha’i iho iā’u, ’e ’ua tāpe’a i tō’u kayak ’ia ti’a iā’u ’ia ta’uma ’ōhie i ni’a iho. Nō tōna ’itera’a mai ē, tē paupau noa ra tō’u aho nō te hoe, ’ua tā’amu ’oia i te hō’ē taura i ni’a i tō’u kayak ’e ’ua ha’amata i te hoe nō te huti iā’u. ’Aita i maoro i muri iho ’ua ore tō’u aho pau ’e ’ua ha’amata vau i te hoe. ’Ua tātara ’oia i te taura, ’e ’ua tāpae au i ni’a i te motu mātāmua ma te tauturu ’ore. I tō’u taera’a atu, ’ua tārava vau i ni’a i te one, ma te rohirohi.

I muri a’e i tō te pupu fa’afa’aeara’a, ’ua parau maira te ta’ata arata’i iā’u ma te marū, Renlund tāne, mai te mea e tāmau noa ’oe i te hoe ma te tāpe’a noa i te reira itoito, iā’u i mana’o, ’aita e fifi ». ’Ua ha’apa’o vau i tāna parau ’a hoe ai mātou i te piti o te motu ’e fa’aho’i mai ai i te vāhi ha’amatara’a. E piti taime tō te ta’ata arata’i hoera’a mai nā pīha’i iho iā’u ma te parau mai ’e e mea maita’i roa vau. Noa atu ē, ’ua ū mai te mau ’are rarahi a’e i ni’a i tō’u kayak, ’aita vau i ta’ahuri.

’A hoe tāmau noa ai au, ’ua tāpe’a noa vau i tō’u tere ’e te haerera’a i mua ma te tāmarū i te pūai o te mau ’areEn pagayant constamment sur le kayak, j’ai maintenu mon élan et ma progression vers l’avant, atténuant ainsi l’effet des vagues qui me frappaient sur le côté. E au ato’a te reira parau tumu i tō tātou orara’a pae vārua. E paruparu tātou ’ia tāmarū ana’e tātou e mai te mea ihoā rā ē, e fa’aea tatou.³ Mai te mea e tāpe’a noa tātou i tō tātou itoito pae vārua nā roto i te « hoe » tāmaura’a i te Fatu ra, e rahi a’e ïa tō tātou pārurura’a, i te mea ē, tō tātou ora mure ’ore, tei te huru ïa o tō tātou fa’aro’o iāna.⁴

E tupu te itoito pae vārua « i te roara’a o te hō’ē orara’a ’a ha’apa’o tāmau ai tātou i te ha’api’ira’a tumu a te Mesia ».⁵ ’Ua ha’api’i mai te peresideni Russell M. Nelson, ’ia nā reira tātou, e fa’atupu te reira i te hō’ē « ’ohura’a pūai vi’ivi’i ’ore ».⁶ ’Oia mau, te mau tuha’a nō te ha’api’ira’a tumu a te Mesia—mai te fa’aro’o i te Fatu Iesu Mesia, te tātarahapa, te tomora’a i roto i te hō’ē aura’a fafau ’e te Fatu nā roto i te bāpetizora’a, te fāri’ira’a i te hōro’a o te Vārua Maita’i ’e te fa’a’oroma’ira’a e tae noa atu i te hope’a⁷—aita ïa i fa’ata’ahia nō te ha’apa’o nō te hō’ē taime noa. E ’ere « te fa’a’oroma’ira’a e tae noa atu i te hope’a » i te hō’ē ta’ahira’a ta’a ’ē i roto i te ha’api’ira’a tumu a te Mesia—mai te huru ē tē rave ra tātou i nā ta’ahira’a mātāmua e maha, i muri iho e pōpoti tātou ma te ’au’au i te niho ’a tīa’i noa ai ’ia tae mai te pohe. ’Aita, te fa’a’oroma’ira’a e tae noa atu i te hope’a, o te fa’a’ohipa-tāmau-ra’a ïa ’e te rahi atu ā i te tahi atu mau tuha’a o te ha’api’ira’a tumu a te Mesia, ma te fa’atupu i « te ’ohura’a pūai vi’ivi’i ’ore » tā te peresideni Nelson i fa’ata’a mai.⁸

Te aura’a o te parauTāmaura’a ’oia ho’i, e nā ni’a iho noa tātou i te fa’a’ohipa i te mau tuha’a o te ha’api’ira’a tumu a te Mesia i te roara’a o tō tātou orara’a. Te aura’a o te paraurahi atu ā ’oia ho’i, e patu tātou ’e e nā ni’a iho noa i te ha’amaita’i atu ā. Noa atu ē, e nā ni’a iho noa tātou i te fa’a’ohipa i te mau tuha’a, ’eiaha tātou e ha’apa’o noa i te fa’a’ohu-noa-ra’a ma te haerera’a ’ore i mua. E ha’afātata rā tātou ia Iesu Mesia i te mau taime ato’a i roto i te ’ohura’a.

Tei roto i te fa’aitoitora’a te vitiviti ’e te ’avei’a.⁹ ’Āhani au i hō’ē pūai i roto i te ’avei’a hape, e fa’atupu ïa vau i te hō’ē itoito rahi, ’aita rā ïa e tae’ahia iā’u te vāhi tāpaera’a i fa’ata’ahia. ’Oia ato’a i roto i te orara’a nei, e ti’a ia tātou « ’ia hoe » i te Fatu ra nō te haere mai iāna ra.¹⁰

E ti’a i tō tātou fa’aro’o ia Iesu Mesia ’ia fa’a’amuhia i te mau mahana ato’a.¹¹ E fa’a’amuhia te reira ’ia pure ana’e tātou i te mau mahana ato’a, ’ia tuatāpapa ana’e i te mau pāpa’ira’a mo’a i te mau mahana ato’a, ’ia feruri ana’e i te maita’i o te Atua i te mau mahana ato’a, ’ia tātarahapa ana’e i te mau mahana ato’a, ’e ’ia pe’e ana’e i te mau muhumuhu a te vārua maita’i i te mau mahana ato’a. E ’ere i te mea maita’i ’ia fa’anu’u i te ’amura’a i tā tātou mā’a tā’āto’a ’ē tae roa atu i te sābati ’ei reira e ’amu ai i te mā’a o te hepetoma tā’āto’a; e ’ere ato’a i te mea maita’i i te pae vārua ’ia ta’oti’a i tā tātou huru fa’a’amura’a i te ’itera’a pāpū hō’ē mahana i te hepetoma.¹²

’Ia ha’apa’o ana’e tātou i te hopoi’a nō tō tātou ’itera’a pāpū,¹³ e roa’a ia tātou te itoito pae vārua ’e e fa’ahotu marū noa ho’i i te hō’ē fa’aro’o pāpū ia Iesu Mesia, ’e ’ei reira te ha’api’ira’a tumu a te Mesia e riro ai ’ei mea faufa’a roa’e i roto i te ’opuara’a o te orara’a.¹⁴ E tupu ato’a te itoito ’ia tauto’o ana’e tātou i te ha’apa’o i te mau ture a te Atua ’e ’ia tātarahapa. E mea ’oa’oa te tātarahapa ’e e tauturu te reira ia tātou ’ia ha’api’i mai nā roto mai i tā tātou mau hape, e mea nā reira tātou ’ia haere i mua e a muri noa atu. E mea pāpū ē, tē vai ra te mau taime e ta’ahuri tō tātou kayak ’a pe’e atu ai tātou i roto i te pape hōhonu. Nā roto i te tātarahapa, e nehenehe tātou e ho’i fa’ahou mai ’e ’ia haere fa’ahou i mua, noa atu te rahira’a taime a hi’a ai tātou.¹⁵ Te mea faufa’a, ’eiaha tātou e fa’aru’e.

Te tuha’a i muri iho o te ha’api’ira’a tumu a te Mesia ’o te bāpetizora’a ïa, i roto i te reira te bāpetizora’a i te pape ’e, nā roto i te ha’amaura’a, te bāpetizora’a ’o te Vārua Maita’i.¹⁶ Noa atu ē, e ’ohipa hō’ē te bāpetizora’a, e fa’a’āpī tāmau noa tātou i tā tātou fafaura’a nō te bāpetizora’a ’ia rave ana’e tātou i te ’ōro’a mo’a. ’Aita te ’ōro’a mo’a e mono i te bāpetizora’a, terā rā e ta’ai te reira i te mau tuha’a mātāmua i roto i te ha’api’ira’a tumu a te Mesia, te fa’aro’o ’e te tātarahapara’a, i te fāri’ira’a i te vārua maita’i.¹⁷ ’Ia rave maīte ana’e tātou i te ’ōro’a mo’a,¹⁸ tē ani ra ïa tātou i te Vārua Maita’i i roto i tō tātou orara’a, mai te au ato’a i te taime a bāpetizohia ai ’e a ha’amauhia ai tatou.¹⁹ ’Ia ha’apa’o ana’e tātou i te fafaura’a i fa’ata’ahia i roto i te mau pure ’ōro’a, e riro mai te Vārua Maita’i ’ei hoa nō tātou.

’Ia fa’atupu ana’e te Vārua Maita’i i te hō’ē fa’aurura’a rahi a’e i roto i tō tātou orara’a, ’e fa’ahotu marū noa tātou ’e te rahi atu ā i te mau taipe huru Mesia. E taui tō tātou ’ā’au. E iti tō tātou hina’aro ’ia rave i te ino. E rahi tō tātou hina’aro ’ia rave i te maita’i ’e tae roa atu ē, e hina’aro noa tātou « ’ia rave i te maita’i ma te fa’aea ’ore ».²⁰ ’E i reira e nōa’a ai ia tātou te mana nō te ra’i e tītauhia nō te tāpe’a maīte e tae roa atu i te hope’a.²¹ ’Ua mara’a tō tātou fa’aro’o, ’e ’ua ineine tātou nō te nā ni’a iho fa’ahou i te ’ohura’a pūai vi’ivi’i ’ore.

E tūra’i ato’a te hō’ē fa’aitoitora’a i te pae vārua ia tātou ’ia rave i te tahi atu ā mau fafaura’a ’e te Atua i roto i te fare o te Fatu. E ha’afātata te mau fafaura’a rau ia tātou i te Mesia ’e e tā’ai pūai a’e ia tātou i ni’a iāna. Nā roto i teie mau fafaura’a, e nōa’a rahi a’e ia tātou tōna mana. ’Ia pāpū maita’i ē, e ’ere te mau fafaura’a o te bāpetizora’a ’e o te hiero te puna nō te mana. Te puna o te mana, ’o te Fatu ïa ’o Iesu Mesia ’e tō tātou Metua i te ao ra. Te ravera’a ’e te ha’apa’ora’a i te mau fafaura’a, e fa’atupu te reira i te hō’ē tahera’a nō tō rāua mana i roto i tō tātou orara’a. ’Ia ora ana’e tātou mai te au i teie mau fafaura’a, i te pae hope’a e riro mai tātou ’ei fatu ’āi’a nō te mau mea ato’a a te Metua i te ao ra.²² Te itoito e tupu mai nā roto i te orara’a i te ha’api’ira’a tumu a te Mesia, e fa’atupu te reira ’eiaha i te taui-noa-ra’a o tō tātou natura hanahana ’ei hope’ara’a mure ’ore, ’e fa’aitoito ato’a rā te reira ia tātou ’ia tauturu ia vetahi ’ē nā roto i te mau rāve’a tano.

’A feruri na e mea nāhea tō te ta’ata arata’i tauturura’a mai iā’u i muri a’e i te ta’ahurira’a tō’u kayak. ’Aita ’oia tuō mai nā te ātea i te hō’ē uira’a faufa’a ’ore mai teie, « E Renlund tāne, e aha tā ’oe ’ohipa i roto i te pape ? » ’Aita ’oia i ti’a i ni’a nō te fa’ahapa mai iā’u ma te parau mai ē, « E Renlund, ’Āhani ē, e tino maita’i a’e tō ’oe, ’e’ita ïa ’oe e fifi mai te reira » ’Aita ’oia i ha’amata i te tāvere i tō’u kayak a tāmata ai au i te ta’uma i ni’a iho. ’E ’aita ’oia i fa’atītī’aifaro iā’u i mua i te pupu. ’Ua hōro’a mai rā ’oia i te tauturu tā’u i hina’aro i te taime mau i hina’arohia. ’Ua hōro’a mai ’oia i te mau parau a’o i te taime e mea fāri’i maita’i au. ’E ’ua ’imi ’oia i te mau rāve’a ato’a nō te fa’aitoito iā’u.

’Ia aupuru ana’e tātou ia vetahi ’ē, ’aita e tītauhia ia tātou ’ia ui i te mau uira’a faufa’a ’ore ’aore rā ’ia fa’ahiti i te mau mea e tupu mau ihoā. Te rahira’a o te ta’ata i roto i te fifi, ’ua ite rātou ē, tei roto rātou i te fifi. ’Eiaha tātou e ha’avā ; ’e’ita tā tātou ha’avāra’a i te mea faufa’a, ’e’ita ato’a e fāri’i-maita’i-hia, ’e e mea pinepine e ’ere i te mea māramarama.

E nehenehe te fa’aaura’a ia tātou i ni’a ia vetahi ’ē e arata’i ia tātou ’ia rave i te mau hape ’i’ino, mai te mea ihoā rā ē, e fa’aoti tātou ē, e mea hau a’e tātou i te parau ti’a i te feiā e ’aro ra. E au te reira huru fa’aaura’a mai te ha’aparemora’a i roto e toru metera²³ pape ma te ti’aturira’a ’ore, ’e te ’itera’a i te tahi ta’ata ’ia paremo i roto e maha metera²⁴ pape, ma te ha’avā iāna ’ei ta’ata hara rahi a’e, ma te mana’o maita’i nō ni’a ia ’outou iho. E nehenehe e parau ē, tē ’aro nei tātou pau roa mai te au i tā tātou rāve’a. « ’Aore roa te hō’ē ’o tātou e ti’a ’ia fāna’o i te fa’aorara’a.²⁵ E ’ore roa e ti’a ia tātou. ’Ua ha’api’i mai ’o Iakoba i roto i te Buka a Moromona, « ’Ia ha’amana’o [tātou] ē, i muri a’e i tō [tātou] fa’afa’i’ite-ra’a-hia i te Atua, e nā roto ïa i te aroha rahi ’o te Atua e fa’aorahia ai [tātou] ».²⁶ E hina’aro tātou pā’āto’a i te tāra’ehara hope ’ore ’o te Fa’aora, ’eiaha te tahi noa tuha’a o te reira.

E hina’aro mau tātou i te tā’āto’ara’a o tō tātou aroha, te maita’i, ’e te here ’a ’ohipa ai tātou i pīha’i iho i te mau ta’ata ’ati a’e ia tātou.²⁷ Tītauhia i te feiā e ’aro nei, « ’ia ’ite i te here ateate o Iesu Mesia i roto i tā [tātou] mau parau ’e mau ’ohipa ».²⁸ Mai te mea e aupuru tātou, e fa’aitoito pinepine ïa tātou ia vetahi ’ē ’e pūpū ho’i i tā tātou tauturu. Noa atu ē, ’aita te hō’ē ta’ata e fāri’i mai, e tāmau noa tātou i te aupuru ’ia au i tāna e fāri’i mai. ʼUa ha’api’i mai te Faʼaora ē « E tāmau ā hoʼi ʼoutou i te tauturu i taua huru taʼata ra ; ʼaita hoʼi ʼoutou i ʼite ʼo te ʼore ānei rātou e hoʼi mai ’e e tātarahapa, ʼe e haere mai iāʼu ma te ʼāʼau hinaʼaro hōʼē, ʼe nāʼu e faʼaora ia rātou, ʼe ʼua riro ʼoutou ʼei rāveʼa e roaʼai ia rātou te ora ».²⁹ Te ’ohipa a te Fa’aora o te fa’aora ïa i te ma’i. Tā tātou ’ohipa o te herera’a ïa—te herera’a ’e te aupurura’a ’ia ti’a ia vetahi ’ē ’ia hutihia atu ia Iesu Mesia ra. Teie te hō’ē o te mau hotu o te ’ohura’a pūai ’e te vi’ivi’i ’ore ’o te ha’api’ira’a tumu a te Mesia.

Tē ani manihini nei au ia ’outou ’ia ha’apa’o tāmau noa ’e te rahi atu ā, ma te hina’aro mau, i te ha’api’ira’a tumu a te Mesia ’e ’ia tauturu ia vetahi ’ē i ni’a i tō rātou haere’a. Tē fa’a’ite pāpū nei au ē, ’ua riro te ha’api’ira’a tumu a te Mesia ’ei pū nō te fa’anahora’a a te Metua i te ao ra ; nāna ho’i teie ha’api’ira’a tumu. ’Ia fa’a’ohipa ana’e tātou i tō tātou fa’aro’o ia Iesu Mesia ’e i tōna tāra’ehara, e tūra’ihia tātou i ni’a i te ’ē’a nō te fafaura’a ma te hina’aro e tauturu ia vetahi ’ē ’ia riro ’ei mau pipi ha’apa’o nā Iesu Mesia. E nehenehe tātou e riro mai ’ei mau fatu ’āi’a nō te bāsileia ’o tō tātou Metua i te ao ra, ’oia te faito teitei roa o te ha’apa’o-maita’i-ra’a i te ha’api’ira’a tumu a te Mesia. I te i’oa o Iesu Mesia, ’āmene.