Mā’iti-ātea-hia nō te tāvini

I teie pō, e paraparau atu vau i te feiā ’āpī o te ’Ēkālēsia, i te u’i ’āpī feiā ’āpī tamāroa ’e te feiā ’āpī tamāhine ’o tei riro ’ei ’āfa’i reva nō te u’i e haere mai nei.

I te ’āva’e ’Ātopa 2013, ’ua parau tō tātou peropheta here, te peresideni Russell M. Nelson ē : « E mea maoro tō tō ’outou Metua i te ao ra mātaura’a ia ’outou. ’Outou, ’ei tamāroa ’aore rā ’ei tamāhine nāna, ’ua mā’itihia ’outou e ’āna nō te haere mai i te fenua nei i teie taime pāpū maita’i, ’ia riro ’ei fa’atere i roto i tāna ’ohipa rahi i ni’a i te fenua ».¹

’A piti matahiti i teienei, ’ua tāmau ā peresideni Nelson i te parau :

« I teie mahana te ha’apāpū fa’ahou nei au ē, ’ua ani mai te Fatu i te feiā ’āpī tamāroa ti’a-mā ato’a, ’o te nehenehe ’ia fa’aineine nō te tāvini i te hō’ē misiōni. Nō te feiā ’āpī tamāroa nō te mau mahana hope’a nei, te tāvinira’a misiōnare e hōpoi’a ïa nā te autahu’ara’a. ’Outou, te feiā ’āpī tamāroa, ’ua fa’ahereherehia ’outou nō teie taime, ’a tupu ai te ha’aputuputura’a o ’Īsera’ela tei fafauhia […]

« Nō ’outou te mau tuahine ’āpī e nehenehe, ’ua riro ato’a te misiōni ’ei rāve’a pūai, e ’ere rā i te mea fa’ahepohia […] ’A pure nō te ’ite e hina’aro ānei te Fatu ’ia tāvini ’outou i te hō’ē misiōni, ’e nā te Vārua Maita’i e pāhono mai i roto i tō ’outou ’ā’au ’e i tō ’outou ferurira’a ».²

Te mau tītaura’a a tō tātou peropheta i te Fatu, te tāpe’ara’a i te feiā ’āpī o tō tātou nei tau i roto i te fa’ahereherera’a nō teie tau o te ha’aputuputura’a o ’Īsera’ela, ’e tāna anira’a ’ia pure nō te ’ite e aha tā te Fatu e hina’aro ’ia rave ’outou ’oia ho’i, te tuha’a rahi ’o te mau tītaura’a ïa o te orara’a tei orahia mai e ’outou ’e i te mau ha’amaita’ira’a ’o tā ’outou i fa’ari’i nō ’ō mai i te Atua ra, hou ’outou ’a fānauhia mai ai i ni’a i teie fenua.³ Tātou pā’āto’a tei fānauhia mai i ni’a i teie fenua, ’ua ora na tātou i pīha’i iho i te Metua i te ao ra ’ei mau tamari’i vārua nāna.⁴ ’Ua parau te Fatu ia Mose, « ’o vau, te Fatu te Atua, ’ua hāmani ho’i au, i te mau mea ato’a tā’u i parau ra, i te pae vārua, hou te reira i vai mai ai i te pae tino i te fenua nei ».⁵

I tōna hāmanira’a ia ’outou i te pae vārua, ’ua here ’oia ia ’outou mai tāna mau tamāroa ’e mau tamāhine vārua ’e ’ua tu’u i roto ia ’outou tāta’itahi i te hō’ē nātura hanahana ’e te hō’ē hōpe’a mure ’ore.⁶

I roto i tō ’outou orara’a hou te tāhuti nei, « ’ua ha’amāvete [’outou] i tō [’outou] ihota’ata ’e ’ua fa’arahi i tō [’outou] ’aravihi pae vārua ».⁷ ’Ua ha’amaita’ihia ’outou ’e te tao’a hōro’a nō te ti’amāra’a, te ’aravihi nō te rave i te mau mā’itira’a nō ’outou iho, ’e ’ua rave ’outou i te mau fa’a’otira’a faufa’a roa, mai te fa’a’otira’a e pe’e i te ’ōpuara’a nō te ’oa’oa a te Metua i te ao ra, ’oia ho’i te « fa’ari’ira’a i te hō’ē tino ’i’o ’e te ivi ’e ’ia roa’a te ’itera’a i te tāhuti nei nō te haerera’a i mua […] ’e i te fa’ahope’ara’a ’ia fa’atupu i tō ’outou hōpe’a hanahana ’ei mau fatu ’āi’a nō te ora mure ’ore ».⁸ ’Ua fa’atupu mai teie fa’a’otira’a i ni’a i tō ’outou orara’a, i roto i tō ’outou orara’a hau te tāhuti nei, ’e e tāmau ā te reira i te fa’atupu mai i ni’a i tō ’outou orara’a i teienei.⁹ ’Ei tamari’i nā te Atua ora i roto i tō ’outou orara’a hou te tāhuti nei, ’ua « tupu rahi ’outou i roto i te māramarama ’e ’ua ha’api’i mai ’outou i te here i te parau mau ».¹⁰

Hou ’outou ’a fānauhia mai ai, ’ua fa’ata’a te Atua ia ’outou tāta’itahi ’ia fa’aoti i te mau misiōni ta’a ’ē i te roara’a o tō ’outou orara’a pae tino i te fenua nei.¹¹ Mai te peu e vai ti’a-mā noa ’outou, e fa’ati’a te mau ha’amaita’ira’a o teie fa’auera’a i te ao vārua ia ’outou ’ia fa’ari’i e rave rau mau rāve’a i roto i teie orara’a, ’oia ato’a te mau rāve’a ’ia tāvini i roto i te ’Ēkālēsia ’e ’ia ’āmui atu i roto i te ’ohipa faufa’a roa a’e ’o tē tupu nei i teie mahana i te fenua nei : Te ha’aputuputura’a ia ’Īsera’ela.¹² Teie mau fafaura’a i te ao vārua ’e te mau ha’amaita’ira’a, ’ua pi’ihia tō ’outou mā’iti-ātea-ra’a-hia. « Te ha’api’ira’a tumu o te mā’iti-ātea-ra’a-hia e tano nō te mau melo ato’a o te ’Ēkālēsia ».¹³ ’Aita te mā’iti-ātea-ra’a-hia e ha’apāpū nei e fa’ari’i ’outou i te tahi mau pi’ira’a ’aore rā mau hōpoi’a. E tae mai teie mau ha’amaita’ira’a ’e mau rāve’a i roto i teie orara’a maoti tā ’outou fa’a’ohipara’a maita’i i tō ’outou ti’amāra’a, mai tō ’outou mā’iti-ātea-ra’a-hia i roto i tō ’outou orara’a i te ao vārua ’ei hope’a o te parauti’a.¹⁴ ’A tāmau noa ai ’outou i te fa’a’ite i tō ’outou ti’a-mā ’e te nu’ura’a i mua i ni’a i te ’ē’a o te fafaura’a, e fa’ari’i ’outou i te mau rāve’a nō te tāvini i roto i tā ’outou piha feiā ’āpī tamāhine ’aore rā pupu autahu’ara’a. E ha’amaita’ihia ’outou nō te tāvini i roto i te hiero, nō te riro mai ’ei taea’e ’aore rā ’ei tuahine aupuru, ’e ’ia tāvini i te hō’ē misiōni mai te hō’ē pipi nā Iesu Mesia.

Nō te aha e mea faufa’a roa ’ia ’imi nō te ’ite ’e nō te māramarama i tō ’outou mā’iti-ātea-ra’a-hia ? I te hō’ē tau ’a rahi roa ai te mau uira’a, i te taime ’a rahi ai te ta’ata i te ’imi i tō rātou ’ihota’ata mau, nō te mea ’ua ’ite pāpū te Atua ’e ’ua ha’amaita’i ia tātou te ta’ata tāta’itahi, ’oia ato’a hou tō tātou fānaura’ahia mai i te fenua nei ma te mau « huru hanahana e tītauhia nō te ihota’ata ’e nō te tumu […] nō te ao nā mua a’e, i te tāhuti nei ’e i te ao a muri atu » ’o te hōpoi mai i te hau marū ’e te ha’apāpūra’a i tō tātou ferurira’a ’e i tō tātou ’ā’au.¹⁵ Tē ’itera’a ’o vai ’outou e ha’amata nā roto i te māramaramara’a i te mau ha’amaita’ira’a tei mā’iti-ātea-hia, ’o tā te Atua i hōro’a mai ia ’outou hou ’outou ’a fānauhia mai ai i te fenua nei. Tē hina’aro nei tō tātou Metua i te ao ra e heheu mai ia ’outou i tō ’outou iho mā’iti-ātea-ra’a-hia, ’e e nā reira ’oia ’a ’imi ai ’outou i te ha’api’i mai ’e i te pe’e i tōna hina’aro.¹⁶

Mea au roa nā’u e tai’o i te ha’apararera’a Instagram a te peresideni Nelson. Hō’ē o tā’u i au roa ’o terā ïa i te 20 nō Tiurai 2022. ’Ua pāpa’i oia :

« Tē ti’aturi nei au ē, mai te mea e parau ’āfaro mai te Fatu ia ’outou, te ’ohipa mātāmua tāna e ha’apāpū mai ’ia māramarama maita’i ’outou, ’o tō ’outou ïa ihota’ata mau. E tō’u mau hoa here ē, e mau tamari’i vārua mau ’outou nā te Atua […]

« … ’Eiaha e hape i te reira : E mea hanahana tō ’outou fāito pūai. Nā roto i tō ’outou ’imi-itoito-ra’a, e hōro’a mai te Atua ia ’outou i te hi’ora’a nō te ta’ata tā ’outou e riro mai ».¹⁷

E nehenehe ānei tā’u e fa’a’ite atu ia ’outou, e mea nāhea tō’u pāpā i te tino nei i te ha’api’ira’a iā’u ’ia ’ite mai i tō’u ihota’ata ’e te ’ōpuara’a a te Atua i roto i tō’u orara’a ?

I te 13ra’a o tō’u matahiti i te hō’ē po’ipo’i mahana mā’a, tē tapu ra vau i te ’aihere ’ei tuha’a nō tā’u ’ohipa i te hepetoma. I te ’otira’a tā’u ’ohipa, ’ua fa’aro’o atu vau i te ’ōpani i te pirira’a i muri mai i tō mātou fare ’e ’ua ’ite atu vau i tō’u pāpā i te pi’ira’a mai iā’u ’ia haere atu e fārerei iāna. ’Ua haere atu vau nā muri i te taupe’e ’e ’ua ani mai oia iā’u ’ia pārahi i pīha’i iho iāna i ni’a i te ’ē’a. E po’ipo’i nehenehe mau te reira. Tē ha’amana’o noa nei ā vau iāna e parahi ra fātata mai iā’u, e ū roa tō māua tāpono. ’Ua ha’amata ’oia ma te parau iā’u, ’ua here ’oia iā’u. ’Ua ui mai ’oia iā’u e aha tā’u ’ōpuara’a i roto i teie orara’a. ’Ua mana’o vau, « ’oia ïa, mea ’ōhie roa ». ’Ua ’ite pāpū vau e piti ’ohipa : ’Ua hina’aro vau ’ia riro ’ei ta’ata roa a’e ’e tē hina’aro ato’a nei au i te haere pinepine i te pūhapara’a fare ’ie. E vaerua tano noa tō’u. ’Ua ’ata’ata ’oia, ’ua fa’aea ri’i hō’ē taime, e ’ua parau mai : « Steve, tē hina’aro nei au e fa’a’ite ia ’oe te tahi ’ohipa faufa’a rahi roa nō’u. ’Ua pure au ’ia nehenehe i te Metua i te ao ra ’ia rave i te mea tā’u e parau atu nei ia ’oe, ’ia nene’ihia ma te tūmā-’ore-hia te reira i roto i tō ’oe ferurira’a ’e tō ’oe vaerua, ’ia ’ore roa ’ia mo’ehia ia ’oe ».

’Ua hōro’a vau i tō’ū ara-maita’i-ra’a tā’āto’a i tō’u metua tāne i taua taime ra. ’Ua fāriu mai ’oia i ni’a iā’u ’e ’ua hi’o mai iā’u i roto i te mata ’e ’ua parau mai, « Tamaiti, ’a pāruru i te mau taime ’ōmo’e o tō ’oe orara’a ». ’Ua tupu te hō’ē taime muhu roa, te reira taime ’ua vaiiho ’oia i te aura’a parau ’ia tomo hōhonu roa i roto i tō’u ’ā’au.

’Ua tāmau ā ’oia i te parau, « ’ua ’ite ’oe, terā mau taime ’o ’oe ana’e e ’aita roa te tahi ta’ata e ’ite ra e aha tā ’oe e rave ra ? Terā mau taime ’a feruri ai ’oe, ‘te mea tā’u e rave i teienei ’aita te reira e fa’atupu i ni’a i te tahi atu ta’ata, i ni’a noa ra iā’u’ ? »

’Ua parau fa’ahou ’oia, « hau atu i te tahi atu ā taime o tō ’oe orara’a, te ’ohipa tā ’oe e rave i roto i te mau taime ’ōmo’e o tō ’oe orara’a e riro i te fa’atupu rahi atu ā i ni’a i te huru ’o tā ’oe e fa’aū atu i te mau tāmatara’a ’e te mau māuiui ’o tā ’oe e fa’aruru atu ; ’e te ’ohipa tā ’oe e rave i roto i tō ’oe mau taime ’ōmo’e o tō ’oe orara’a e riro ato’a i te fa’atupu rahi atu ā i ni’a i te huru o tā ’oe e fa’aruru atu i te manuiara’a ’e te ’oa’oa ’o tā ’oe e ora i te mau taime ’ē atu o tō ’oe orara’a ».

’Ua fa’ari’i tō’u metua tāne i te hina’aro o tōna ’ā’au. Te ta’i ’e te toma o tōna reo, ’oia ato’a te here ’o tā’u i putapū i roto i tāna mau parau, ’ua nene’ihia ïa ma te rāve’a e ’ore e tūmāhia i roto i tō’u ferurira’a ’e tō’u vaerua i taua mahana ra.

’Ua ha’api’i mai au i te roara’a o te mau matahiti ē, te temeio rahi roa a’e i taua mahana ra i ni’a i te ’ē’a o te fare o tō’u tamari’ira’a ’o teie ïa, i roto i te mau taime ’ōmo’e o tō’u orara’a, e nehenehe au e haere i te Atua ra nā roto i te pure nō te fa’ari’i i te heheura’a. ’Ua ha’api’i tō’u metua tāne iā’u nāhea e nehenehe ai iā’u ’ia ’ite i te mau ha’amaita’ira’a mā’iti-ātea-hia a te Atua I roto i taua mau taime ’ōmo’e ra, ’ua ha’api’i mai au te Buka a Moromona ’o te parau ïa a te Atua. ’Ua ha’api’i mai au ’ua mā’iti-ātea-hia vau nō te tāvini i te hō’ē misiōni. ’Ua ha’api’i mai au ē ’ua mātau te Atua iā’u ’e tē fa’aro’o nei ’e tē pahono nei i tā’u mau pure. ’Ua ha’api’i mai au ē ʼo Iesu te Mesia, tō tātou Faʼaora ʼe tō tātou Tāraʼehara.

Noa atu ’ua rave au e rave rahi mau hape mai te reira mai mahana faufa’a roa ’e tō’u pāpā, tā’u mau tauto’ora’a nō te pāruru i te mau taime ’ōmo’e o tō’u orara’a ’ua vai ïa ’ei tūtau i rotopū i te mau mata’i rorofa’i o te orara’a, ’e ’ua tauturu iā’u ’ia ’imi i te hō’ē ha’apūra’a pāpū ’e te mau ha’amaita’ira’a nō te fa’aorara’a ’e te fa’aitoitora’a o te here ’e te tusi tara’ehara a tō tātou Fa’aora.

E tō’u mau taea’e ’e mau tuahine ’āpī ē, ’a pāruru ai ’outou i te mau taime ’ōmo’e o tō ’outou orara’a ma te mau fa’a’ana’anataera’a mā, te fa’aro’ora’a i te pehe fa’auruhia, te tai’ora’a i te mau pāpa’ira’a mo’a, te pure tāmaura’a ’e ma te aura’a pāpū ’e te fa’aitoitora’a nō te fa’ari’i ’e nō te feruri i tō ’outou ha’amaita’ira’a patereāreha, e fa’ari’i ’outou i te heheura’a. I roto i te mau parau a persideni Nelson, e riro tō ’outou mau mata i te « ’ara’ara roa i te parau mau ē, ’ua riro mau teie orara’a ’ei taime i reira ’outou e fa’a’oti ai e aha te huru orara’a tā ’outou e hina’aro i te ora ē a muri noa atu ».¹⁸

E pāhono mai tō tātou Metua i te ao ra i tā ’outou pure, i tā ’outou iho ā ra mau pure e pupuhia i roto i te mau taime ’ōmo’e o tō ’outou orara’a. E heheu mai ’oia ia ’outou tō ’outou mau hōro’a ’e te mau tārēni mā’iti-ātea-hia, ’e e putapū ’outou i tōna here e pū’ohu ra ia ’outou, mai te mea e ani ’outou iāna ma te ’ā’au tae ’e te hina’aro mau ’ia ’ite. ’A pāruru ai ’outou i te mau taime ’ōmo’e o tō ’outou orara’a, e riro tō ’outou ’āmuira’a atu i te mau ’ōro’a ’e i te mau fafaura’a o te ’evanelia ’ei mea faufa’a roa a’e. E tā’amu hau atu ā ’outou ia ’outou i te Atua i roto i te mau fafaura’a ’o tā ’outou e rave ’e ’ōna, ’e e fa’ateiteihia ’outou nō te fa’ari’i i te tīa’ira’a hau atu, te fa’aro’o ’e te ha’apāpūra’a i roto i te mau parau fafau ’o tāna i rave ia ’outou. E hina’aro ānei ’outou e ’ite i te ’ōpuara’a a te Atua nō ’outou ? Tē fa’a’ite pāpū nei au ē, tē hina’aro nei ’oia ’ia ’ite ’outou i te reira, ’e ’ua fa’auru ’oia i tāna peropheta o te ao nei, ’ia ani ia tātou tāta’itahi ’ia pure ’e ’ia ora i teie ’itera’a heheuhia nō ’outou iho.¹⁹ Tē fa’a’ite pāpū nei au i te vai-mau-ra’a ’e i te mana tusia tara’ehara a tō tātou Fa’aora ’o te fa’ati’a ’ia vai i te fāito teitei ’e ’ia poupou i te mau ha’amaita’ira’a ato’a tei mā’iti-ātea-hia a te Atua, i te i’oa o Iesu Mesia, āmene.