Te mau fafaura’a ’e te mau hōpoi’a
’Ua ’itehia te ’Ēkālesia a Iesu Mesia ’ei ’Ēkālesia ’o tē ha’apāpū nei i te faufa’a ’ia rave i te mau fafaura’a ’e te Atua.
Mea nāfea tā ’outou ’Ēkālesia i ta’a ’ē ai i te tahi atu mau fa’aro’o ? ’Ua tauiui tā’u pahonora’a i teie uira’a faufa’a roa ’ia au i tō’u pa’arira’a ’e ’ia au i te tupura’a rahi o te ’Ēkālesia. I tō’u fanaura’a i ’Utaha i te matahiti 1932, e 700 000 noa melo i roto i te ’Ēkālesia, tei ’ahuehia i ’Utaha ’e i te mau fenua fa’a’ati. I te reira tau, e 7 ana’e hiero e vai ra. I teie mahana, ’ua tā’uma te mau nūmera o te ’Ēkālesia a Iesu Mesia i te Feiā Mo’a i te Mau Mahana Hope’a Nei i te fāito hau i te 17 milioni i roto i nā fenua 170. I teie 1 nō ’Ēperēra, ’ua ha’amo’a mātou 189 hiero i roto i nā fenua e rave rahi ’e tē vai nei ā 146 i roto i te fa’aineinera’a ’e te patura’a. ’Ua tae mai te mana’o i roto iā’u ’ia paraparau nō ni’a i te fā o teie mau hiero ’e te ’ā’amu ’e te ti’ara’a o te mau fafaura’a i roto i tā tātou ha’amorira’a. E tauturu te reira i te mau ha’api’ira’a fa’auruhia a te feiā a’o nā mua atu iā’u.
I.
Te fafaura’a, ’o te hō’ē ïa tauto’ora’a nō te fa’atupu i te tahi mau hopoi’a. E mea faufa’a te mau tauto’ora’a a te ta’ata iho nō te fa’atanora’a i tō tātou orara’a tāta’itahi ’e nō te tupura’a tanō nō te tōtaiete. Tē ’aro-pinepine-hia nei teie mana’o i teie mahana. Tē pato’i nei te hō’ē reo nō te pae iti i te mana i fa’atumuhia ’e tē ononō nei ē, e mea ti’a i te mau ta’ata ’ia fa’ati’amahia i te mau tāpe’ara’a rau o tē fa’ataupupu nei i tō rātou ti’amāra’a. ’Ua ’ite rā tātou nā roto i te mau ’itera’a e rave rahi ē, e fa’aru’e te mau ta’ata i te tahi mau ti’amāra’a ’ia roa’a te mau faufa’a nō roto mai i te orara’a i roto i te mau pupu ta’ata i fa’anahohia. ’Ua niuhia taua mau fa’aitira’a i te ti’amāra’a tāta’itahi i ni’a i te mau tauto’ora’a ’aore rā fafaura’a i parauhia ’aore rā i fa’ari’ihia.
Teie te tahi mau hi’ora’a nō te mau hōpoi’a i tā’atihia i te fafaura’a i roto i tō tātou tōtaiete : (1) te mau ha’ava, (2) te nu’u fa’ehau, (3) te mau rave ’ohipa nō te ea ’e te feiā tūpohe auahi. E rave teie nau feiā tei ō i roto i teie mau ’ohipa mātauhia i te hō’ē tauto’ora’a nō te fa’aoti i ta rātou mau tavinira’a i tu’uhia mai ’e tei ha’apāpūhia nā roto i te hō’ē hōreo ’aore rā fafaura’a. ’Oia ato’a nō tā tātou mau misiōnare rave tāmau. ’Ua ha’apa’ohia tō rātou ’ahu ’e mau tapa’o i’oa ta’a ’ē nō te fa’a’ite ē, tei raro a’e te reira ta’ata i te fafaura’a ’e nō reira, e ’ohipa tāna nō te ha’api’i ’e nō te tavini ’e ’ia pāturuhia rātou i roto i teie ’ohipa tāvinira’a e ti’a ai. Te hō’ē tumu atu ā nō te reira, ’o te fa’aha’amana’ora’a ïa i te ta’ata e mau nei i te reira i tā rātou mau hopoi’a. ’Aita e tahutahu e vai ra i roto i tō rātou ’ahura’a ’aore rā mau tapa’o ta’a ’ē, e fa’aha’amana’ora’a au noa rā i te mau hopoi’a ta’a ’ē tei ravehia e te feiā e mau nei i te reira. E parau mau ato’a te reira nō te mau tāpe’a rima mōmo’ara’a ’e fa’aipoipora’a ’e tō rātou ti’ara’a i te fa’a’itera’a ia vetahi i taua ’ohipa ra ’ē ’aore rā i te fa’aha’amana’ora’a i te ta’ata ’ō’omo i te mau hōpoi’a nō te fafaura’a.
II.
E au roa te mea ’o tā’u i parau nō ni’a i te rirora’a te mau fafaura’a ’ei niu nō te fa’atanora’a i te mau orara’a tāta’itahi ’e te orara’a tōtaiete i te mau fafaura’a pae fa’aro’o iho ā rā. ’Ua niuhia te ha’amaura’a ’e te ’ā’amu nō te mau pupu ’e mau titaura’a fa’aro’o i ni’a i te mau fafaura’a. ’Ei hi’ora’a, e mea faufa’a rahi te fafaura’a Aberahama nō te mau fa’aro’o tumu rave rahi. Tē fa’a’ite nei te reira i te mo’ara’a o te mau parau fafau a te Atua ’e tāna mau tamari’i. E fa’a’ite-pinepine-hia te fafaura’a a te Atua ’e te hua’ai o Aberahama i roto i te Faufa’a Tahito.1
Tē fa’a’ite mātaratara nei te tuha’a mātāmua nō te Buka a Moromona, tei pāpa’ihia i te tau nō te Faufa’a Tahito, i te ti’ara’a o te mau fafaura’a i roto i te ’ā’ai ’e te ha’amorira’a a te nūna’a ’Īserā’era. ’Ua parauhia ia Nephi ē, ’ua riro te mau pāpa’i nō taua ’anotau ra ’ei « pāpa’a parau o te mau ’āti Iuda, i roto i reira te mau fafaura’a a te Fatu, ’o tāna i rave ’e te ’utuāfare o ’Īserā’era ».2 Tē fa’ahoro pinepine ato’a nei te buka 1 Nephi i te fafaura’a a Aberahama3 ’e ia ’Īserā’ela ’ei « feiā i fafau atu i te Fatu».4 ’Ua pāpa’i-ato’a-hia te ’ohipa fafaura’a ’e te Atua i roto i te Buka a Moromona nō ni’a ia Nephi, Iosepha nō ’Aiphiti, te Ari’i Beniamina, Alama, ’e te tāpena Moroni. 5
III.
I te taera’a mai te taime nō te fa’aho’i-fa’ahou-ra’a mai nō te ’īra’a o te ’evanelia a Iesu Mesia, ’ua pi’i te Atua i te hō’ē peropheta, ’o Iosepha Semita. ’Aita tātou i ’ite i te hope-roa-ra’a nō te mau parau a’o a te melahi, ’o Moroni, i teie peropheta ’apī. ’Ua ’ite rā tātou ē ’ua parau ’oia ia Iosepha ē, « e ’ohipa tā te Atua i fa’ata’a [nāna] nō te rave » ’e e mea ti’a ’ia fa’a’itehia te ’īra’a o te ’Evanelia mure ’ore ’e i roto i reira « te mau fafaura’a i fa’aauhia i tō rātou metua ».6 ’Ua ’ite ato’a tātou ē, te mau pāpa’ira’a mo’a tā te tamaiti ra ’o Iosepha i tāi’o hōhonu atu, hau ’oia a arata’ihia ai nō te ha’amau i te hō’ē ’Ēkālesia, ’o te mau ha’api’ira’a ïa e rave rahi nō ni’a i te mau fafaura’a tāna e tātara ra i roto i te Buka a Moromona. ’Ua riro taua buka ra ’ei puna rahi nō te fa’aho’i-fa’ahou-ra’a mai nō te ’īra’a o te ’evanelia, ’oia ato’a te fa’anahoraa a te Atua nō tāna mau tamari’i, ’e ’ua ’ī te Buka a Moromona i te mau fa’ahorora’a o te mau fafaura’a.
Nō tōna tai’o-tāmau-ra’a i te Bibilia, ’ua ’ite ’o Iosepha i te fa’ahorora’a a te buka a Hebera nō ni’a i te hina’aro o te Fa’aora ’ia « fa’aau i te faufa’a ’apī i te utuāfare nō Iseraela ’e te ’utuāfare nō Iuda ».7 Tē fa’aau ato’a nei te reira ia Iesu ’ei « arai nō te faufa’a ’āpī ».8 Ma te fa’ahiahia, ’ua parauhia te ’ā’amu nō te orara’a tāhuti nō te Fa’aora o te ao nei, « Te Faufa’a ’Āpī », ’oia ho’i « Te Fa’aaura’a ’āpī ».
E vaira’a rahi roa tō te mau fafaura’a i roto i te fa’aho’i-fa’ahou-ra’a o te ’evanelia. E mea pāpū roa te reira ’ia hi’o ana’e i te mau ta’āhira’a mātamua roa i fa’auehia mai e te Fatu i te peropheta ia rave nō te fa’ati’ara’a i t āna ’Ēkālesia. I muri iho noa i te piara’ahia te Buka a Moromona, ’ua arata’i te Fatu i te fa’ati’ara’a o tāna ’Ēkālesia i fa’aho’ihia mai, ’o tei topahia i te iʼoa Te ʼĒkālesia a Iesu Mesia i te Feiā Moʼa i te mau Mahana Hopeʼa nei.9 Tē heheura’a pāpa’ihia i te ’āva’e ’Ēperēra 1830 ē, e « fa’ariʼihia [te mau ta’ata] nā roto i te bapetizoraʼa i roto i tāna ʼēkālesia » ’ia « fa’a’ite ana’e » (’oia ho’i ’ia fa’a’ite pāpū) rātou « ’ua tātarahapa mau rātou i tā rātou ra mau hara ato’a, ’e tē hina’aro nei rātou ’ia rave i te i’oa o Iesu Mesia i ni’a iho ia rātou ra, ma te hina’aro mau ’ia tāvini iāna ē tae noa atu i te hope’a ra ».10
Tē parau ato’a nei teie heheura’a ē, e mea ti’a i tō te ’Ēkālesia « ’ia ta’iruru pinepine mai nō te rave i te pāne ’e te uaina [pape] ’ei ha’amana’ora’a i te Fatu ra ia Iesu ». ’E mea maramarama roa te faufa’a nō teie ’ōro’a i roto i te mau ta’o nō te fafaura’a tei fa’ata’ahia nō te peresibutero ’aore rā te tahu’a e pure nei. E ha’amaita’i ’oia i te tapa’o nō te faraoa nā te « mau vārua o te feiā ato’a ’o tē rave mai nei […] ’ia fa’a’ite rātou ia ’oe, e te Atua, te Metua mure ’ore, e ti’a ia rātou i te rave i te i’oa o tō Tamaiti i ni’a iho ia rātou, ’e i te ha’amana’o ā iāna ē a muri noa atu, ma te ha’apa’o maita’i i tāna mau fa’aue tāna i hōro’a mai ia rātou ra ».11
’Ua fa’a’ite-fa’ahou-hia mai te faufa’a rahi nō te mau fafaura’a i roto i te ’Ekālesia tei fa’aho’i-fa’ahou-hia mai i roto i te parau ’ōmuara’a tā te Fatu i tu’u mai nō te piara’a mātāmua o tāna mau heheura’a. Tē parau nei te Fatu i reira ē, ’ua pi’i ’oia ia Iotepha Semita nō te mea « ’ua fāriu ’ē atu [te mau nō te fenua nei] i tā’u mau ’ōro’a, ’e ’ua ’ōfati ho’i i tā’u fafaura’a mure ’ore ».12 Tē fa’ata’a nei te heheura’a ē, ’ua tu’uhia mai tāna mau fa’auera’a « ’ia fa’ati’ahia tā’u fafaura’a mure ’ore ».13
I teie mahana, tē hāro’aro’a nei tātou i te ti’ara’a o te mau fafaura’a i roto i te ’Ēkālesia tei fa’aho’i-fa’ahou-hia mai ’e te ha’amorira’a a tāna mau melo. ’Ua hōro’a te peresideni Gordon B. Hinckley i teie ha’apotora’a nō te huru o tō tātou bāpetizora’a ’e tō tātou ravera’a i te ’ōro’a mo’a i te mau hepetoma ato’a : « ’Ua riro te mau melo ato’a o teie ’ēkālesia tei tomo i roto i te pape nō te bāpetizora’a ’ei pūpūra’a nō te hō’ē fafaura’a mo’a. I te mau taime ato’a e rave tātou i te ’ōro’a mo’a nō te tāmā’ara’a a te Fatu, e fa’a’āpī ïa tātou i te reira fafaura’a ».14
’Ua fa’aha’amana’ohia mai ia tātou e rave rahi feiā a’o i teie ’āmuira’a ē, pinepine tō te peresideni Russell M. Nelson fa’ahitira’a i te fa’anahora’a nō te fa’aorara’a mai te « ’ē’a nō te fafaura’a » ’o tē « arata’i ia tātou i [te Atua] » ’e « nō tō tātou ato’a aura’a ’e te Atua ».15 Tē ha’api’i nei ’oia nō ni’a i te aura’a o te mau fafaura’a i roto i tā tātou mau ’ōro’a o te hiero ’e tē fa’aitoito nei ’oia ia tātou ’ia ’ite i te hope’a mai te ha’amatara’a mai ’e ’ia « feruri tiretiera ».16
IV.
I teie nei, e parau atu vau nō ni’a i te mau fafaura’a o te hiero. Nō te rave i tāna hopoi’a ’ia fa’aho’i-fa’ahou mai i te ’īra’a nō te ’evanelia a Iesu Mesia, ’ua arata’i te peropheta Iosepha Semita i te patura’a o te hiero i Nauvoo, Illinois i na matahiti hope’a nō tōna orara’a. Nā roto iāna ’ua heheu mai te Fatu i te mau ha’api’ira’a, tre parau ha’api’ira’a ’e te mau fafaura’a i tōna feiā monō i muri mai nō te fa’atere i roto i te mau hiero. I reira te feiā i fari’i i tō rātou ’ōro’a e ha’api’ihia ai i te fa’anahora’a a te Atua nō te fa’aora ’e, e anihia ai ’ia rave i te mau fafaura’a mo’a. ’Ua parauhia te feiā i ha’apa’o i te reira mau fafaura’a, e roa’a ia rātou i te ora mure ’ore, ’e « nā rātou te mau mea ato’a » ’e « e pārahi ho’i rātou i mua i te aro o te Atua ’e tōna ra Mesia ē a muri ē a muri noa atu ».18
’Ua fa’aterehia te ’ōro’a hiero i roto i te hiero nō Nauvoo i roto i te hō’ē taime poto roa hou te feiā ’ōmua mātamua i ti’avaruhia ai nō te fanō atu i tō rātou tere rahi ē tae atu ai i te mau mou’a ātea nō Tō’o’a o te rā. Tē vai nei te mau ’itera’a pāpū nō te feiā ’ōmua ’e nā te pūai ’o tā rātou i fa’ari’i nā roto i tō rātou tā’atira’ahia i te Mesia i roto i tā rātou mau ’ōro’a hiero i roto i te hiero nō Nauvoo i tura’i puai ia rātou ’ia fanō atu ’e ’ia ha’amau ia rātou iho i te pae Tō’o’a o te rā.19
Tei te feiā tei fa’ari’i i te ’ōro’a hiero te titaura’a ’ia ’ō’omo i te ’ahu hiero, e tao’a-’ite-’ore-hia nō te mea e ’ō’omohia te reira i raro a’e i te ’ahu na rapae atu. E fa’aha’amana’o te reira i te mau melo haere hiero i te mau fafaura’a mo’a tā rātou i rave ’e i te mau ha’amaita’ira’a i fafauhia ia rātou i roto i te hiero mo’a. Nō te fa’aoti i taua mau titaura’a mo’a, ’ua ha’api’ihia tātou ’ia ’ahu tāmau noa i te ’ahu hiero, ta’a ’ē noa atu i te mau vāhi e hina’arohia. Nō te mea ho’i ’aita te mau fafaura’a e « fa’aea hō’ē noa a’e mahana », e fa’arirohia te tātarara’a i tō tātou ’ahu hiero ’ei fa’a’itera’a ē, te ha’apae nei ïa i te reira mau titaura’a ’e mau ha’amaita’ira’a tei tā’amuhia i te reira. ’Āre’a i te tahi atu pae, tē fa’a’ite nei te feiā e ’ō’omo nei i te ’ahu hiero ma te fa’aro’o ’e ’o tē ha’apa’o nei i te mau fafaura’a o te hiero i tō rātou rirora’a ’ei pipi nā te Fatu ’o Iesu Mesia.
Tē patu nei te ’Ēkālesia a Iesu Mesia i te Feiā Mo’a i te mau Mahana Hope’a nei i te mau hiero e ’ati a’e te ao nei. Tā rātou fā, ’o te ha’amaita’ira’a ïa i te mau tamari’i a te Atua i parauhia i roto i te ha’amorira’a i roto i te hiero ’e i te mau titaura’a mo’a ’e te mau ha’amaita’ira’a tā rātou i fari’i nā roto i te fafaura’a.
’Ua ’itehia te ’Ēkālesia a Iesu Mesia ’ei ’Ēkālesia ’o tē ha’apāpū nei i te faufa’a ’ia rave i te mau fafaura’a ’e te Atua. Tei roto te mau fafaura’a i te mau ’ōro’a tāta’itahi o te fa’aorara’a ’e te fa’ateiteira’a tā teie ’Ēkālesia i fa’aho’i-fa’ahou-hia mai e fa’atere nei. E tītauhia te ’ōro’a nō te bāpetizora’a ’e tō te reira mau fafaura’a nō te tomo i roto i te bāsileia tiretiera. E mau titaura’a te mau ’ōro’a hiero ’e te mau fafaura’a o te reira nō te fa’ate’iteira’a i roto i te bāsileia tiretiera, ’oia ho’i te ora mure ’ore, te hōro’a rahi a’e i te mau hōro’a ato’a a te Atua.19 ’O terā te rōtahira’a a te’Ēkālesia a Iesu Mesia i te Feia Mo‘a i te Mau Mahana Hopea Nei.
Tē fa’a’ite pāpū nei au nō Iesu Mesia, ’o ’oia te upo’o o taua ’Ēkālesia ra, ’e tē ti’aoro nei au i tāna mau ha’amaita’ira’a i ni’a i te mau ta’ata ato’a e ‘imi nei ’ia ha’apa’o i tā rātou mau fafaura’a mo’a I te i’oa o Iesu Mesia, ’āmene.