Hotu e vai mai

I tō’u tamaiti ’āpīra’a, e mea au roa nā’u te mau pēti ’āpī ’e te mea para. I teie ā mahana, te mana’o-noa-ra’a e ’amu i te hō’ē pēti papepape ’e te mea para ’e tōna ’ava’ava e fa’atahe i tō’u hā’ae. ’Ia pōfa’i-ana’e-hia te mau pēti tei para maita’i, e vai te reira e piti e tae roa e maha mahana, hou ’a ’ino ai. E mau ha’amana’ora’a maita’i tō’u i te ’āmuira’a atu i tō’u māmā ’e tō’u mau taea’e ’e mau tuahine i roto i tō mātou fare tūtu, nō te mea e fa’aherehere mātou i te mau pēti i pōfa’ihia mai nō te tau to’eto’e e tae mai ra, ma te tāpo’i-maita’i-ra’a i roto i te mau mōhina. Mai te peu e fa’aherehere maita’i mātou i te mau pēti, e vai maoro e rave rahi matahiti teie mā’a monamona, ’eiaha noa ra e piti e tae atu e maha mahana. Mai te peu e fa’aineine ’e e tunu-maita’i-hia, e vai maita’i noa te mā’a e tae roa i te taime e parari ai te vāhi i tā’atihia.

’Ua fa’aue mai te Mesia ia tātou ’ia « haere ’e ’ia hotu i te huero, ’ei huero vai taiata ».¹ ’Aita rā ’oia e parau nei nō ni’a i te mau pēti. Tē parau nei ’oia nō ni’a i te mau ha’amaita’ira’a a te Atua nō tāna mau tamari’i. Mai te mea e rave tātou ’e e ha’apa’o i te mau fafaura’a ’e te Atua, e nehenehe te mau ha’amaita’ira’a i ’āpitihia i tā tātou mau fafaura’a e toro atu i’ō atu i teie orara’a ’e ’ia tā’atihia i ni’a ia tātou, ’aore rā e fa’ahereherehia e a muri noa atu, te rirora’a ’ei hotu e vai mai nō te tau mure ’ore ato’a.

Te Vārua Maita’i, i roto i tōna ti’ara’a hanahana ’ei Vārua Maita’i nō te parau fafau, e tā’ati i te mau ’ōro’a ato’a i ni’a i te feiā ha’apa’o maita’i i tā rātou fafaura’a, ’ia ti’a i te reira ’ia vai mana noa i muri a’e i te tāhuti nei.² E mea faufa’a roa ’ia tā’ati te Vārua Maita’i i tō tātou mau ’ōro’a mai te peu e hina’aro tātou e fa’ari’i i te mau ha’amaita’ira’a i fafauhia mai nō te tau e a muri noa atu, te rirora’a ’ei hotu e vai mai.

E mea faufa’a roa iho ā te reira mai te mea e hina’aro tātou ’ia fa’ateiteihia.³ Mai tā te peresideni Nelson i ha’api’i, e ti’a ia tātou « ’ia ha’amata ma te ha’amana’o i te hope’a […] E mea pāpū maita’i, nō tātou tāta’itahi, te ‘hope’a’ tā tātou e hina’aro roa e fa’aoti ’o te orara’a ïa e a muri noa atu ’e tō tātou ’utuāfare i roto i te hō’ē fāito fa’ateitei, i reira tātou e vai ai i mua i te aro o te Atua, tō tātou Metua i te ao ra, ’e i tāna Tamaiti ’o Iesu Mesia ».⁴ ’Ua parau ato’a te peresideni Nelson : « ’Ua riro te fa’aipoipora’a tiretiera ’ei tuha’a faufa’a rahi nō te fa’aineinera’a nō te ora mure ’ore. E tītau te reira ’ia fa’aipoipohia i te ta’ata tano maita’i, i te vāhi tano maita’i, e te mana tano maita’i, ’e ’ia ha’apa’o maita’i noa i taua fafaura’a mo’a ra. I reira, tātou e pāpū ai i te fa’ateiteira’a i roto i te bāsileia tiretiera o te Atua ».⁵

E aha te mau ha’amaita’ira’a o te fa’ateiteira’a ? Tei roto i te reira, te pārahira’a i mua i te aro o te Atua e a muri noa atu ’ei tāne ’e ’ei vahine fa’aipoipo, ’ia noa’a te « mau terōno, te mau bāsileia, te mau hau hui ari’i, ’e te mau mana […] ’e te fa’atupu-noa-ra’a i te mau hua’ai ē a muri ē a muri noa atu »,⁶ e ’ia fa’ari’i i te mau mea ato’a tā te Atua te Metua e vai ra.⁷

’Ua heheu mai te Fatu nā roto ia Iosepha Semita :

« I roto i te hanahana tiretiera, tē vai nei e toru ao ’aore rā e toru tuha’a ;

« ’E nō te fa’ari’i i te fāito teitei roa a’e, e mea ti’a ïa i te ta’ata ’ia tomo i roto i teie fa’anahora’a nō te autahu’ara’a [’oia ho’i te fafaura’a ’āpī ’e te mure ’ore nō te fa’aipoipora’a] ;

« E ’ia ’ore ’oia ’ia nā reira, e ’ore roa ïa e noa’a te reira iāna.

« E ti’a iāna ’ia tomo atu i roto i te tahi atu, terā rā ’o te hope’a te reira nō tōna bāsileia ; e ’ore roa ho’i e ti’a iāna ’ia fa’ari’i i te fa’arahira’a ».⁸

Tē ha’api’i mai nei tātou i’ō nei e nehenehe i te hō’ē ta’ata e pārahi ’ōtahi noa i roto i te bāsileia tiretiera, ’aore rā i mua i te aro o te Atua. ’Ia fa’ateiteihia rā i te fāito teitei roa a’e o te bāsileia tiretiera, e ti’a ’ia tomo atu nā roto i te fa’aipoipora’a e te mana ti’a mau ’e i muri iho ’ia vai ha’apa’o noa i te mau fafaura’a i ravehia i roto i taua fa’aipoipora’a ra. ’A vai ha’apa’o maita’i ai tātou i teie mau fafaura’a, e nehenehe te Vārua Mo’a o te fafaura’a e tā’ati i tā tātou fafaura’a o te fa’aipoipora’a.⁹ E riro teie mau ha’amaita’ira’a i tā’atihia ’ei « hotu e vai mai ».

E aha tē tītauhia nō te vai ha’apa’o maita’i noa i te faufa’ara’a ’āpī ’e te mure ’ore o te fa’aipoipora’a ?

’Ua ha’api’i mai te peresideni Russell M. Nelson ē, tē vai nei e piti huru tā’amura’a ’ia tomo ana’e tātou i roto i teie fafaura’a o te fa’aipoipora’a mure ’ore : hō’ē tā’amura’a ti’ahiti i rotopū i te tāne ’e te vahine fa’aipoipo ’e hō’ē tā’amura’a māti’a ’e te Atua.¹⁰ Nō te fa’ari’i i te mau ha’amaita’ira’a o te fa’ateiteira’a ’ia tā’atihia i ni’a ia tātou ’e ’ia vai noa i’ō mai i teie orara’a, e ti’a ia tātou ’ia vai ha’apa’o noa i te mau tā’amura’a ti’ahiti ’e māti’a o te fafaura’a.

Nō te tāpe’a i te tā’amura’a ti’ahiti ’e tō ’outou hoa fa’aipoipo, ’ua a’o mai te Atua ia tātou ’ia « here i tā [’oe] vahine [’aore rā tāne] fa’aipoipo ma [tō] ’ā’au ato’a, ’e […] e ’ati atu ho’i iāna ’e ’eiaha i te hō’ē ’ē atu ».¹¹ Nō te feiā i fa’aipoipohia, te aura’a e ’ati atu ho’i iāna ’e ’eiaha i te hō’ē ’ē atu ’oia ho’i, e ’āparau ’āmui ’ōrua nā roto i te here, ’ia here ’ōrua ia ’ōrua ’e e aupuru i te tahi ’e te tahi, e hōro’a nā mua roa i te taime i tō ’outou hoa fa’aipoipo ’eiaha ra i te mau fa’a’ana’anataera’a i rāpae, ’e ’ia ti’aoro atu i te Atua ’ia tauturu mai ia ’ōrua ’ia upo’oti’a i ni’a i tō ’ōrua mau paruparu.¹² Te aura’a ato’a o te reira, ’aita e tā’amura’a i te pae ’āehuehu ’aore rā e aura’a i te pae ’āpeni i rāpae i tō ’outou fa’aipoipora’a, ’oia ato’a te arapaera’a ’aore rā te fārereira’a, ’e ’aita e hōho’a faufau ’o tē fa’atupu i te hina’aro vi’ivi’i.¹³

Nō te tāpe’a i te tā’amura’a ti’ahiti i roto i te fafaura’a, e ti’a i nā hoa fa’aipoipo tāta’itahi ’ia hina’aro e fa’aea i roto i te fa’aipoipora’a. ’Ua ha’api’i mai te peresideni Dallin H. Oaks ’aita i maoro a’enei : « ’Ua ’ite ato’a tātou e’ita ’oia [te Atua] e fa’ahepo i te ta’ata e tomo i roto i te hō’ē aura’a tā’atira’a hina’aro-’ore-hia. Mea pāpū te mau ha’amaita’ira’a o te hō’ē aura’a tā’atihia nō te feiā ato’a e ha’apa’o i tā rātou mau fafaura’a ’eiaha rā nā roto i te fa’ahepora’a i te hō’ē aura’a tā’atihia i te hō’ē ta’ata ti’amā ’ore ’aore rā hina’aro ’ore ».¹⁴

E aha te tā’amura’a māti’a i fa’ahitihia e te peresideni Nelson ? Te tā’amura’a māti’a ’o tā tātou ïa e rave ’e te Atua.

Nō te fa’aherehere i te tā’amura’a māti’a ’e te Atua, ’ia vai ha’apa’o maita’i noa tātou i te mau fafaura’a o te hiero ’o tā tātou i rave nō ni’a i te mau ture o te ha’apa’ora’a, te tūsia, te ’evanelia, te vi’ivi’i ’ore ’e te ha’amo’ara’a. E fafau ato’a tātou i te Atua ’ia fa’ari’i i tō tātou hoa mure ’ore ’e ’ia riro ’ei hoa fa’aipoipo ’e ’ei metua parauti’a. ’A ha’apa’o ai tātou i te tā’amura’a māti’a, e fa’ari’i ïa tātou i te mau ha’amaita’ira’a ’ia riro ’ei melo nō te ’utuāfare o te Atua nā roto i te fafaura’a a Aberahama, ’oia ato’a te mau ha’amaita’ira’a o te hua’ai, te ’evanelia, ’e te autahu’ara’a.¹⁵ ’Ua riro ato’a teie mau ha’amaita’ira’a ’ei hotu e vai mai.

Noa atu tē ti’aturi nei tātou ē, te feiā ato’a e tomo i roto i te fafaura’a ’āpī ’e te mure ’ore e vai ha’apa’o maita’i noa ’e e tā’atihia te mau ha’amaita’ira’a nō te tau mure ’ore, i te tahi taime e au ra teie ti’ara’a mau ’aita e roa’a ia tātou. I te roara’a o tā’u tāvinira’a, ’ua fārerei atu vau i te mau melo tei rave ’e tei ha’apa’o i te mau fafaura’a, ’aita rā tō rātou hoa fa’aipoipo. Tē vai ato’a rā te feiā e fa’aea ’ōtahi nei, ’aita roa i fa’ari’i i te rāve’a nō te fa’aipoipo i roto i te tāhuti nei. ’E tē vai ra te feiā te ’ore i vai ha’apa’o maita’i i roto i tā rātou mau fafaura’a o te fa’aipoipora’a. E aha te ’ohipa e tupu nō te feiā i roto i teie mau huru vaira’a ?

1. Mai te mea e vai ha’apa’o noa ’outou i te mau fafaura’a tā ’outou i rave i te taime ’a fa’ari’i ai ’outou i tō ’outou ’ōro’a hiero, e fa’ari’i ’outou i te mau ha’amaita’ira’a o te ta’ata iho i fafauhia ia ’outou i roto i te ’ōro’a hiero noa atu ’ua ’ōfati tō ’outou hoa fa’aipoipo i tāna mau fafaura’a ’aore rā ’ua haere ’ē i te fa’aipoipora’a. Mai te peu ’ua tā’atihia ’outou ’e i muri iho ’ua fa’ata’ahia, ’e mai te mea ’aita tō ’outou tā’atira’a i fa’a’orehia, e vai mana noa te mau ha’amaita’ira’a o te ta’ata iho nō taua tā’atira’a ra nō ’outou, mai te mea e vai ha’apa’o noa ’outou.¹⁶

   I te tahi taime, nō te mau nino’a mana’o ha’avare ’e te māuiui mau, e hina’aro te hō’ē hoa fa’aipoipo ha’apa’o maita’i e fa’a’ore i tōna tā’atira’a ’e tōna hoa fa’aipoipo ha’apa’o ’ore, nō te fa’aātea roa iāna, i te fenua nei ’e a muri noa atu. Mai te mea tē ha’ape’ape’a nei ’outou i te tā’amuhia i te hō’ē hoa fa’aipoipo tahito tātarahapa ’ore, ’a ha’amana’o e, e’ita ’outou e nā-reira-hia ! E’ita te Atua e tītau i te hō’ē ta’ata ’ia vai noa i roto i te hō’ē aura’a tā’atihia e a muri noa atu mai te mea ’aita ’oia e hina’aro. E ara maita’i te Metua i te ao ra ’ia fa’ari’i tātou i te mau ha’amaita’ira’a ato’a, ’o tā tō tātou mau hina’aro ’e mau mā’itira’a e fa’ati’a.¹⁷

   Teie rā, mai te mea e hina’arohia ’ia fa’a’ore i te tā’atira’a, e fa’aturahia te ti’amāra’a. E nehenehe te tahi mau fa’anahora’a e hi’ohia. ’Aita rā te reira e rave-ha’apa’o-’ore-noa-hia ! Tē mau nei te Peresidenira’a Mātāmua i te mau tāviri nō te tā’ati i ni’a i te fenua nei ’e i ni’a i te ra’i. Te taime e ha’amanahia ai te fa’a’orera’a i te hō’ē tā’atira’a e te Peresidenira’a Mātāmua, ’aita te mau ha’amaita’ira’a nō teie tā’atira’a e mana fa’ahou, e fa’a’orehia te reira ma te ti’ahiti ’e te māti’a. E mea faufa’a roa ’ia māramarama ē, nō te fa’ari’i i te mau ha’amaita’ira’a o te fa’ateiteira’a, e ti’a ia tātou ’ia fa’a’ite ’ua hina’aro mau tātou ’ia tomo i roto ’e ’ia vai ha’apa’o maita’i noa i teie fafaura’a ’āpī ’e te mure ’ore, i roto ānei i teie orara’a ’aore rā i te orara’a a muri a’e.

2. Nō te mau melo ’ōtahi o te ’Ēkālēsia, ’a ha’amana’o ē « i roto i te rāve’a ’e te taime a te Fatu iho, ’aore hō’ē ha’amaita’ira’a e pāto’ihia i tōna Feiā Mo’a ha’apa’o maita’i. E ha’avā ’e e fa’autu’a te Fatu i te ta’ata tāta’itahi ’ia au i tōna hina’aro mau ’e tāna mau ’ohipa ».¹⁸

3. Mai te mea ’aita ’outou i vai ha’apa’o maita’i i te mau fafaura’a o te hiero, tē vai ra ānei te tīa’ira’a ? ’Ē ! Te ’evanelia a Iesu Mesia ’o te ’evanelia ïa o te tīa’ira’a. Nō roto mai teie tīa’ira’a ia Iesu Mesia ma te tātarahapara’a mau ’e te pe’era’a ma te ha’apa’ora’a i te mau ha’api’ira’a a te Mesia. ’Ua ’ite au i te mau ta’ata i te ravera’a i te mau hara teimaha, te ’ōfatira’a i te mau fafaura’a mo’a. Tē ’ite tāmau nei au i te mau ta’ata ’o tē tātarahapa mau nei, ’o tei fa’a’orehia tā rātou hara, ’e ’o tē ho’i mai i ni’a i te ’ē’a o te fafaura’a. Mai te peu ’ua ’ōfati ’outou i tā ’outou mau fafaura’a nō te hiero, tē a’o atu nei au ia ’outou ’ia fāriu atu i ni’a ia Iesu Mesia, ’a fārerei atu i tō ’outou ’episekōpo, ’a tātarahapa ’e ’a ’īriti i tō ’outou vaerua i te mana fa’aora pūai e vai ra maoti te Tāra’ehara a Iesu Mesia.

Te mau taea’e ’e te mau tuahine, ’ua hōro’a mai tō tātou Metua here i te ao ra i te mau fafaura’a ia tātou, ’ia ti’a ia tātou ’ia fāna’o i te mau mea ato’a tāna i fa’aherehere nō tātou. E mea monamona a’e teie mau ha’amaita’ira’a mo’a a te Atua i te tahi atu hotu o te fenua nei. E nehenehe te reira e fa’ahereherehia nō tātou e a muri noa atu, te rirora’a ’ei hotu e vai mai, ’a vai ha’apa’o noa ai tātou i tā tātou mau fafaura’a o te hiero.

Tē fa’a’ite pāpū nei au ē, ’ua fa’aho’i mai te Atua i te ha’amanara’a nō te tā’ati i ni’a i te fenua nei ’e i ni’a i te ra’i. E ’itehia teie ha’amanara’a i roto i Te ’Ēkālēsia a Iesu Mesia i te Feiā Mo’a i te mau Mahana Hope’a nei. Tē mauhia nei te reira e te Peresidenira’a Mātāmua ’e te Pupu nō te Tino ’Ahuru ma Piti ’āpōsetolo ’e tē fa’a’ohipahia nei i raro a’e i te arata’ira’a a te peresideni Russell M. Nelson. Te feiā e tomo i roto i te fafaura’a ’āpī ’e te mure ’ore o te fa’aipoipora’a ’e e ha’apa’o i taua fafaura’a ra, e nehenehe e riro mai ’ei mea maita’i roa ’e ’oia ato’a e fa’ari’i i te ’īra’a o te hanahana o te Metua noa atu te mau tupura’a e ’ore e vī ia rātou.¹⁹

E nehenehe teie mau ha’amaita’ira’a i fafauhia e tū’ati i tā tātou mau fa’afaura’a e tā’atihia i ni’a ia tātou nā roto i te Vārua Maita’i o te parau fa’afau ’e ’ia riro mai ’ei hotu e vai mai a muri ’e a muri noa atu. Tē fa’a’ite pāpū nei au i te reira i te i’oa o Iesu Mesia, ’āmene.