E tu’u ’outou i tā te Fatu ra tā Iesu Mesia i ni’a iho ia ’outou

’A pa’ari ai tā’u nā tamari’i hōpe’a, ’ua ’itehia mai iā’u te mau buka fa’a’ana’anataera’a ’e te tītaura’a, ’o tē fa’a’ohipa ato’a nei rā i te mau taipe i roto i tā rātou ’ā’amu. ’A tai’o ’āmui ai mātou i te pō, ’ua au roa vau i te tauturu atu i tā’u nā tamari’i ’ia ta’a i te taipe ’o tā te ta’ata pāpa’i buka e fa’a’ohipa nei nō te ha’api’i i te mau parau tumu hōhonu a’e, ’oia ato’a te mau parau tumu o te ’evanelia.

’Ua ’ite au e tupu mai te reira i te hō’ē mahana, ’ia tae ana’e i te ’ōmuara’a ’o te taure’are’ara’a o tā’u tāmaiti hōpe’a. ’Ua ha’amata ’oia i te hō’ē buka ’āpī ’e ’ua hina’aro noa ’oia e fana’o i te ’ā’amu, ’ua tāmau noa rā tōna vaerua i te tāmata i te ’imi i te aura’a hōhonu a’e o te mau mea ato’a tāna e tai’o ra. ’Ua fifi ri’i tōna mana’o, i roto rā iā’u ’ua ’ata’ata vau.

’Ua ha’api’i Iesu nā roto i te mau ’ā’amu ’e te mau taipe,¹—hō’ē huero sinapi nō te ha’api’i i te mana o te fa’aro’o,² te māmo’e i mo’e ra nō te ha’api’i i te faufa’a o te mau vaerua ta’ata,³ te tamaiti pūhura nō te ha’api’i i te huru o te Atua.⁴ Tāna mau parabole e mau taipe ïa nā roto i te reira ’oia e nehenehe ai e ha’api’i i te mau ha’api’ira’a hōhonu a’e i te feiā « e tāri’a ’ei fa’aro’ora’a ra, e fa’aro’o ïa ».⁵ ’Āre’a rā, te feiā ’o tē ’ore e ’imi i te aura’a hōhonu a’e e’ita ïa rātou e hāro’aro’a,⁶ ’oia ato’a nō te feiā e rave rahi e tai’o nei i teie ā mau buka ’o tā’u e tai’o nei i tā’u mau tamari’i, ’aita roa i ’ite tē vai nei te mau aura’a hōhonu a’e ’e hau atu ā e ha’api’i mai nā roto mai i teie mau ’ā’amu.

I tō te Atua te Metua pupura’a i tāna Tamaiti Fānau Tahi ’ei tūsia nō tātou, ’ua riro mai Iesu Mesia iho ’ei taipe teitei roa a’e nō te here mure ’ore ’o tō tātou Metua i te ao ra nō tātou tāta’itahi.⁷ ’Ua riro mai Iesu Mesia ’ei ’Ārenio nā te Atua.⁸

E fana’ora’a ’e e ha’amaita’ira’a nō tātou ’ia tītau-manihini-hia i roto i te hō’ē tā’amura’a o te fafaura’a ’e te Atua, i roto i te reira e nehenehe tō tātou iho orara’a e riro mai ’ei taipe nō taua fafaura’a ra. E fa’atupu te mau fafaura’a i te huru tā’amura’a ’o te fa’ati’a i te Atua ’ia tarai ’e ’a taui ia tātou i te roara’a o te tau ’e ’ia fa’ateitei ia tātou nō te riro hau atu ā mai te Fa’aora, ma te tāmau noa i te ha’afātata atu iāna ’e i tō tātou Metua i te ao ra⁹ ’e ma te fa’aineinera’a ia tātou i te hōpe’a nō te tomo atu i mua i tōna aro.

Te ta’ata tāta’itahi i ni’a i te fenua nei, e tamaiti ’e e tamāhine herehia nā te Atua.¹⁰ ’Ia mā’iti ana’e tātou ’ia riro ’ei tuha’a nō te hō’ē fafaura’a, e ha’amaita’i ’e e fa’ahōhonu te reira i tō tātou tā’amura’a e ’ōna. ’Ua ha’api’i te peresideni Russell M. Nelson ē ’ia mā’iti ana’e tātou i te rave i te mau fafaura’a ’e te Atua, e nehenehe tō tātou tā’amura’a ’e ’ōna e riro mai ’ei mea fātata roa atu ā i nā mua a’e nei i tā tātou fafaura’a, ’e e fa’ati’a te reira iāna ’ia ha’amaita’i ia tātou i te hō’ē fāito hau atu ā nō tōna aroha ’e tōna here, te here nō te fafaura’a tei pi’ihia hesed nō roto mai i te reo Hebera.¹¹ Te ’ē’a nō te fafaura’a ’oia ho’i tō tātou ïa tā’amura’a ’e te Atua—tō tātou tā’amura’a hesed e ’ōna.¹²

Tē hina’aro nei tō tātou Metua i te hō’ē tā’amura’a hōhonu ’e tāna mau tamaiti ’e tāna mau tamāhine,¹³ tei ia tātou rā te mā’itira’a. ’Ia mā’iti ana’e tātou i te ha’afātata atu iāna nā roto i te hō’ē tā’amura’a o te fafaura’a, e fa’ati’a te reira iāna ’ia ha’afātata mai ia tātou¹⁴ ’e ’ia ha’amaita’i rahi atu ā ia tātou.

Nā te Atua e ha’amau i te mau tītaura’a ’e te mau fa’ahepora’a o te mau fafaura’a tā tātou e rave.¹⁵ ’Ia mā’iti ana’e tātou i te tomo i roto i taua tā’amura’a ra, tē fa’a’ite pāpū nei tātou iāna nā roto i te mau ravera’a taipe o te fafaura’a tāta’itahi ē, ’ua ineine tātou i te ha’apa’o ma te ’ā’au tae i te mau tītaura’a ’o tāna i ha’amau.¹⁶ Nā roto i te ha’apa’ora’a i tā tātou mau fafaura’a, e fa’ati’a tātou i te Atua ’ia nīni’i mai i te mau ha’ama’ita’ira’a e rave rahi i parau-fafau-hia, e tū’ati i teie mau fafaura’a,¹⁷ e tae noa atu i te hō’ē mana rahi nō te tāui ’e nō te riro hau atu ā mai tō tātou Fa’aora. ’O Iesu Mesia te pū nō te mau fafaura’a ato’a ’o tā tātou e rave nei, ’e nehenehe e roa’a te mau ha’amaita’ira’a o te fafaura’a maoti tāna tūsia tāra’ehara.¹⁸

Te bāpetizo-utuhi-ra’a ’o te ’ūputa o te taipe ïa nā roto i te reira tātou e tomo ai i roto i te hō’ē tā’amura’a o te fafaura’a ’e te Atua. ’Ia utuhihia ’outou i raro i te pape ’e ’ia fa’ati’a-fa’ahou-hia mai, e taipe te reira nō te pohera’a ’e te ti’afa’ahoura’a mai o te Fa’aora i roto i te hō’ē orara’a ’āpī.¹⁹ ’A bāpetizohia ai tātou, ma te fa’a’itera’a taipe e pohe tātou ’e e fānau-fa’ahou-hia mai tātou i roto i te ’utuāfare o te Mesia ’e e fa’a’ite tātou ē ’ua ineine tātou nō te rave i tōna i’oa i ni’a iho ia tātou.²⁰ ’O tātou iho te taipe nō te reira fafaura’a I roto i te Faufa’a ’Āpī, tē tai’o nei tātou : « ’O ’outou ato’a ho’i i bāpetizohia i roto i te Mesia ra, ’ua ’ahuhia ïa i tā te Mesia ra ».²¹ Nā roto i tō tātou bāpetizora’a, ’ua ’ahuhia tātou ma te taipe i te Mesia.

E fa’a’ite ato’a te ’ōro’a mo’a i te Fa’aora. Te pane ’e te pape e taipe ïa nō te tino ’e te toto o te Mesia i nīni’ihia mai nō tātou.²² Te hōro’a o tāna tāra’ehara, ’ua pūpū-taipe-hia mai te reira ia tātou i te mau hepetoma ato’a, ’ia mono ana’e te tāne tei mau i te autahu’ara’a i te Fa’aora iho ’o tē hōro’a nei i te faraoa ’e te pape. ’Ia ’amu ’e ’ia inu ana’e tātou i te mau tāpa’o ’o tōna tino ’e ’o tōna toto, e riro mai te Mesia mai te taipe ’ei tuha’a nō tātou.²³ E ’ahu fa’ahou tātou i te Mesia ’a rave ai tātou i te hō’ē fafaura’a ’āpī i te hepetoma tāta’itahi.²⁴

’A rave ai tātou i te mau fafaura’a ’e te Atua i roto i te fare o te Fatu, e fa’ahōhonu atu ā tātou i tō tātou tā’amura’a e ’ōna.²⁵ Te mau mea ato’a tā tātou e rave nei i roto i te hiero, tē fa’a’ite pāpū nei i te fa’anahora’a a te Metua nō tātou, i rōpū i te reira tē ti’a nei te Fa’aora ’e tāna tusia tāra’ehara.²⁶ E ha’api’i mai te Fatu ia tātou ma te rēni i ni’a i te rēni²⁷ nā roto i te taipe o te mau ’ōro’a ’e te mau fafaura’a, ’a ’īriti ai tātou i tō tātou ’ā’au ’e ’a ’imi ai nā roto i te pure ’ia hāro’aro’a i te mau aura’a hōhonu a’e.

’Ei tūha’a nō te ’ōro’a o te hiero, ’ua fa’ati’ahia tātou ’ia ’ahu i te ’ahu o te autahu’ara’a mo’a. E fa’ahepora’a mo’a te reira ’e e fāna’ora’a moʼa ato’a.

I roto i te mau peu e rave rahi a te mau ha’apa’ora’a fa’aro’o, e ’ō’omohia te mau ’ahu tāpo’i ta’a ’ē ’ei taipe nō te mau ti’aturira’a ’e nō te mau tītaura’a a te hō’ē ta’ata i te Atua,²⁸ ’e e mea pinepine te mau ’ahu ’ōro’a i te ’ahuhia e te feiā e fa’atere nei i te mau ’ōro’a ha’amorira’a. E aura’a hōhonu tō teie mau ’ahu mo’a nō te feiā e ’ahu nei i te reira. Tē tai’o nei tātou i roto i te mau pāpa’ira’a mo’a ē, i tahito ra, e ’ahu-ato’a-hia te mau ’ahu o te ’ōro’a mo’a i te mau ’ōro’a o te hiero.²⁹

’Ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei, te feiā i rotopū ia tātou ’o tei mā’iti i te rave i te mau fafaura’a ’e te Atua i roto i te fare o te Fatu, e ’ahu nei rātou i te mau ’ahu ’ōroto o te ’ōro’a mo’a i te taime nō te ’ōro’a i roto i te hiero, e taipe ïa nō te mau ’ahu i ’ahuhia na i roto i te mau ’ōro’a i tahito ra i roto i te hiero. Tē ’ō’omo ato’a nei tātou i te ’ahu o te autahu’ara’a mo’a, i te taime ānei o te ha’amorira’a i roto i te hiero ’e i te mau mahana ato’a o tō tātou orara’a.³⁰

Te ’ahu o te autahu’ara’a mo’a e taipe hōhonu ïa ’e e fa’a’itera’a ato’a nō te Fa’aora. I tō Adamu ’e ’o Eva ’amura’a i te hotu ’e ’a fa’aru’e atu ai i te ’ō i Edene, ’ua hōro’ahia ia rāua te ’ahu ’iri nō te tāpo’i ia rāua.³¹ Mea pāpū paha ’ua fa’atusiahia te hō’ē animara nō te hāmani i taua nā perēue ’iri ra—taipe nō te tūsia a te Fa’aora iho nō tātou. Kaphar ’o te ta’o tumu Hebera ïa nō te tāra’ehara, ’e te hō’ē ’o tōna mau tātarara’a ’o te « tāpo’i » ïa.³² Tē fa’aha’amana’o mai nei tō tātou ’ahu o te hiero ia tātou ē, e tāpo’i te Fa’aora ’e te mau ha’amaita’ira’a o tāna tāra’ehara ia tātou i te roara’a o tō tātou orara’a. ’A ’ahu ai tātou i te mau mahana ato’a i te ’ahu o te autahu’ara’a mo’a, e riro mai teie taipe nehenehe ’ei tuha’a nō tātou.

I roto i te buka a Roma nō te Faufa’a ’Āpī, tē tai’o nei tātou : « ’Ua poto roa te ru’i, ’ua fātata roa te ao : E teie nei e ha’apae atu tātou i te mau ’ohipa o te pōuri, e ahu tātou i te ’ahu o te ao […] E tu’u ’outou i tā te Fatu ra tā Iesu Mesia i ni’a iho ia ’outou ».³³

Tē māuruuru nei au i te fana’ora’a ’ia ’ahu i te ’ahu o te autahu’ara’a mo’a nō te fa’aha’amana’o iā’u ē, te tāpo’i tāmau nei te Fa’aora ’e te mau ha’amaita’ira’a o tāna tāra’ehara mure ’ore iā’u i te roara’a ’o tō’u tere i te tahuti nei. Tē fa’aha’amana’o ato’a mai nei te reira iā’u ē, ’ia ha’apa’o ana’e au i te mau fafaura’a tā’u i rave ’e te Atua i roto i te fare o te Fatu, ’ua tu’u ato’a vau ma te taipe i ni’a i te Mesia, ’o ’oia iho te ha’ana nō te māramarama. E pāruru ’oia iā’u i te ’ino,³⁴ e hōro’a mai iā’u i te mana ’e te ’aravihi rahi atu ā,³⁵ ’e e riro ’ei māramarama ’e ’ei arata’i nō’u³⁶ nā roto i te pōiri ’e te mau fifi o teie nei ao.

Tē vai nei te aura’a taipe hōhonu ’e te nehenehe i roto i te ’ahu o te autahu’ara’a mo’a ’e tōna tā’amura’a i te Mesia. Tē ti’aturi nei au ē, tō’u hina’aro³⁷ ’ia ’ō’omo i te ’ahu mo’a, e riro mai ’ei taipe nō’uiāna.³⁸ E tāpa’o teie nō’u iho i te Atua, e’ita i te tāpa’o nō vetahi ’ē.³⁹

Tē māuruuru roa nei au nō tō’u Fa’aora, ’o Iesu Mesia.⁴⁰ ’Ua riro tāna tūsia tāra’ehara ’ei taipe rahi roa a’e nō tōna here hope ’ore ’e nō tō tātou Metua i te ra’i, nō tātou tāta’itahi,⁴¹ te mau taipe e fāfahia nō teie here ’e teie tūsia—te mau tāpa’o i roto i nā rima, te ’āvae ’e te ’ao’ao o te Fa’aora—e vai noa ïa i muri a’e i tōna ti’afa’ahoura’a.⁴²

’A ha’apa’o ai au i tā’u mau fafaura’a ’e mau fa’ahepora’a ’e te Atua, ’oia ho’i i te ’ahura’a i te ’ahu o te autahu’ara’a mo’a, e riro mai tō’u iho orara’a ’ei taipe nō tō’u here ’e tō’u ’ā’au mehara hōhonu i tō’u Fa’aora ’o Iesu Mesia ’e tō’u hia’ai ’ia pārahi noa mai ’oia i pīha’iho iā’u.

Mai te mea ’aita ā ’outou i nā reira, tē ani atu nei au ia ’outou ’ia mā’iti i te hō’ē tā’amura’a hōhonu a’e ’e te Atua, ma te ravera’a i te mau fafaura’a ’e ’ōna i roto i te fare o te Fatu. ’A tuatāpapa i te mau a’ora’a a tō tātou peropheta (tae noa atu i te mau ha’api’ira’a nehenehe e vai ra i roto i te mau fa’ata’ara’a i raro o teie mau a’ora’a ’e te rahira’a o te mau a’ora’a o te ’āmuira’a). ’Ua parau tāmau noa ’oia nō ni’a i te mau fafaura’a e rave rahi matahiti, ’e mai te taime iho ā rā ’a riro mai ai ’oia ’ei peresideni nō te ’Ēkālēsia. ’A ’apo mai nā roto mai i tāna mau ha’api’ira’a nō ni’a i te mau ha’amaita’ira’a nehenehe ’e te mana ’e te ’aravihi rahi atu ā ’o tā ’outou e nehenehe e fa’ari’i ma te ravera’a ’e te ha’apa’ora’a i te mau fafaura’a ’e te Atua.⁴³

Tē fa’ahiti nei te Buka arata’i rahi ē, ’aita e tītauhia ’ia fa’ari’i i te hō’ē pi’ira’a misiōni ’aore rā ’ia momo’ahia nō te rave i te mau fafaura’a o te hiero.⁴⁴ Tītauhia i te hō’ē ta’ata ’ia ti’a i te 18 matahiti, ’aita e haere fa’ahou nei i te ha’api’ira’a tuarua ’aore rā hō’ē ā fāito ha’api’ira’a, ’e ’ia riro ’ei melo nō te ’Ēkālēsia hō’ē a’e matahiti te maoro. Tē vai ato’a nei te mau fa’aturera’a nō te mo’ara’a o te ta’ata iho.⁴⁵ Mai te mea e hina’aro ’outou e fa’ahōhonu i tō ’outou tā’amura’a ’e tō ’outou Metua i te ao ra ’e ia Iesu Mesia, nā roto i te ravera’a i te mau fafaura’a mo’a i roto i te fare o te Fatu, tē ani manihini nei au ia ’outou ’ia paraparau i tō ’outou ’episekōpo ’aore rā te peresideni ’āma’a ’e ’a fa’a’ite atu iāna i tō ’outou hina’aro. E tauturu ’oia ia ’outou ’ia ’ite nāhea ’ia fa’aineine nō te fa’ari’i ’e nō te fa’atura i te reira mau fafaura’a.

Nā roto i te tā’amura’a o te fafaura’a ’e te Atua, e nehenehe tō tātou iho orara’a e riro mai ’ei taipe ora nō tā tātou tītaura’a ’e tō tātou here hōhonu nō tō tātou Metua i te ao ra, tō tātou hesednōna,⁴⁶ ’e nō tō tātou hina’aro ’ia haere i mua ’e ’oia ato’a ’ia riro mai mai tō tātou Fa’aora, ma te ineine i te hō’ē mahana nō te tomo atu i mua i tō rāua aro. Tē fa’a’ite pāpū nei au ē, e ho’onara’a mau te mau ha’amaita’ira’a rahi o taua tā’amura’a ra o te fafaura’a. I te i’oa o Iesu Mesia, ’āmene.