Te pararera’a te mau hiero, te mau fare o te Fatu nā te fenua nei

’Ua fa’aara mai te Fatu ē i te mau mahana hōpe’a nei, e tupu te ahoaho i rotopū i te mau nūna’a,⁴ ē e riro te mau ta’ata « ’ei mi’imi’i »,⁵ ē « e ’ārepurepu te mau mea ato’a »,⁶ ē e rahi roa te ’āhuehuera’a,⁷ ē « e ’āhuehue te ’ā’au o te ta’ata nei ».⁸ ’Ua ’ite maita’i iho ā tātou i te ’ā’au o te mau tāne ’e o te mau vahine i te ’āhuehuera’a : te ’umera’a a tō te ao nei, te fa’anevanevara’a a te mau reo fa’ahema, te ha’apa’o-’ore-ra’a i te mā’a pae vārua, te ta’ahoara’a i te mau tītaura’a o te ti’ara’a pipi.⁹ Penei a’e ’ua fa’a’otohia ’outou i te hi’ora’a i te hō’ē ta’ata tei herehia, ’o tei parau i te hō’ē taime i tōna fa’aro’o mau ia Iesu Mesia, tei fa’a’ite pāpū nō ni’a i te Buka a Moromona ’e tei itoito ma te ’ana’anatae ’ia patu i te bāsileia o te Atua, ’ua hahi ’ē tā’ue noa, nō teie noa paha taime, ātea ra i tōna mau ti’aturira’a ’e tei vaiiho i te hiti te ’Ēkālēsia. Tā’u parau a’o ’eiaha e tapineva. E maita’i mai te mau mea ato’a. I te Atua, ’aore roa ho’i e mea e ’ore e ti’a.¹⁰

Ma teie tohura’a nō te ’āhuehuera’a ’e te ti’aturi-’ore-ra’a nā te ao nei, ’ua fafau mai te Fatu ē tē vai ra te hō’ē nūna’a o te fafaura’a, hō’ē nūna’a e tīa’i ra ma te fa’aoroma’i i tōna ho’ira’a mai, hō’ē nūna’a e ti’a nei i te mau vāhi mo’a ’e e ’ore roa e fa’anu’u ’ē i tō rātou pārahira’a.¹¹ ’Ua parau ’oia nō te hō’ē nūna’a ti’a e pāto’i nei i te mau ha’avarera’a a te ’enemi, ma te ha’avīra’a i tō rātou fa’aro’o, te ferurira’a tiretiera, ’e te ti’aturi-hope-roa-ra’a i te Fa’aora ia Iesu Mesia.

Nō te aha te Fatu i ha’afatata mai ai ia tātou teie mau hānere hiero i teienei ? Hō’ē o te mau tumu, ’oia ho’i i rōpū i te ’ārepurepura’a ’e te mau fa’ahemara’a a tō te ao nei, ’ua fafau ’oia e ha’apūai ’e e ha’amaita’i i tōna feiā mo’a o te fafaura’a ’e e tupu mau tāna mau fafaura’a !

Nāhea teie mau fare mo’a i te ha’apūai, i te tāmāhanahana ’e i te pāruru ia tātou ? E ’ite mai tātou i te pāhonora’a i roto i te mau tāparura’a a te peropheta Iosepha Semita, i te taime ha’amo’ara’a i te hiero nō Ketelani. Nō roto i teie hiero ’a hīmene ai te feiā mo’a, « e hīmene tātou e ’ārue iāna, hosana, hosana i te Metua ».¹² ’Ua fā tino mai te Fa’aora iho ’e ’ua ho’i mai te mau peropheta tāhito, ma te hōro’ara’a mai i te tahi atu mau tāviri o te autahu’ara’a i te ’evanelia i fa’aho’i-fa’ahou-hia mai.¹³

I te reira taime mo’a i roto i te hiero nō Ketelani, ’ua pure te peropheta ē i roto i te fare mo’a o te Fatu, ’ia ha’anahia te feiā mo’a i te mana o te Atua, ’ia vai mai te i’oa o Iesu Mesia i ni’a ia rātou, ’ia tīa’i mai tāna mau melahi i ni’a ia rātou, ’e ’ia tupu rātou i te rahi i roto i te Fatu ’e « ’ia fa’ari’i rātou i te ’īra’a o te Vārua Maita’i ».¹⁴ Tē tupu nei teie mau tāparura’a mana i roto i tō tātou mau orara’a ’a ha’amori ai tātou ma te ha’apa’o maita’i i roto i te fare o te Fatu.

I roto i tōna fare, ’ua fa’a’ahu-mau-hia tātou i te mana o te ra’i.¹⁵ Tō tātou fa’aro’o ia Iesu Mesia ’e tō tātou here iāna ’ua ha’apāpūhia ’e ’ua ha’apūaihia. ’Ua ha’apāpūhia tātou i te pae vārua nō ni’a tō tātou ihota’ata mau ’e te mau ’ōpuara’a o te orara’a.¹⁶ ’A vai ha’apa’o maita’i ai tātou, e ha’amaita’ihia tātou ma te pāruruhia i mua i te mau fa’ahemara’a ’e te mau fa’anevanevara’a. E putapū tātou i te here o tō tātou Fa’aora ’a tātara mai ai ’oia ia tātou i tō tātou mau fifi ’e mau ’oto. ’Ua ha’anahia tātou ’e te mana o te Atua.

I roto i tōna fare mo’a, ’ua rave hope roa tātou i tōna i’oa i ni’a iho ia tātou. ’Ia bāpetizo-ana’e-hia tātou, e fa’a’ite tātou i tō tātou ti’aturira’a ’iana ’e tō tātou hina’aro ’ia ha’apa’o i tāna mau fa’auera’a. I roto i te hiero, e parau fafau mo’a tātou, nā roto i tā tātou mau fafaura’a, e pe’e iāna e a muri noa atu.

Hōho’a

’Īritira’a o te hiero nō Heber Valley i Utaha.

E mea fa’ahiahia mau te feiā ’āpī nō teie ’Ēkālēsia. I roto i te hō’ē ao fifi, tē rave nei rātou i te i’oa o te Mesia i ni’a iho ia rātou. I Heber City i Utaha, ’ua fa’atupuhia te hō’ē rurura’a huira’atira nō te tau’aparau i te mau parau hu’ahu’a o te hō’ē hiero e ’ōpuahia ra e patu. ’Ua fa’a’ī e toru hānere feiā ’āpī i te ’āua ha’utira’a i pīha’i iho mai, nō te fa’a’ite i tō rātou turu nō te hiero i ’ōpuahia. ’Ua fa’a’ite itoito te hō’ē tamaiti ’āpi ma te paraura’a i te feiā fa’atere o te hau fenua i te rurura’a ē, « te tīa’i nei au ’ia fa’aipoipohia vau i roto i teie hiero. [E tauturu te hiero] iā’u ’ia vai mā noa ’e te vi’ivi’i ’ore ». ’Ua fa’ata’a te hō’ē atu feiā ’āpī, te hiero mai te hō’ē ïa taipe o te māramarama ’e te tīa’ira’a. Tē tauahi nei te feiā ’āpi tamāroa ’e te feiā ’āpi tamāhine o te ’Ēkālēsia nā te ao nei i te i’oa o Iesu Mesia.¹⁷

Hōho’a

Te ’āua ha’utira’a nō Heber City tei ’ī i te feiā ’āpī.

I roto i te hiero nō Ketelani, ’ua pure te peropheta Iosepha ē « [’ia ti’a i te] mau melahi e tīa’i mai [i tāna feiā mo’a] ».¹⁸ E hōpoi mai te rave-tāmau-ra’a i te mau ’ōro’a nō tō tātou mau tupuna i roto i te hiero i te ha’apāpūra’a marū ’e te pāpū ē, e tāmau noa te orara’a i tera pae mai o te pāruru.

Noa atu ā e mea mo’a roa tō tātou mau ’itera’a i roto i te fare o te Fatu nō te fa’a’ite atu i te ta’ata, e nehenehe tātou e fa’a’ite i te tahi. ’A ora ai māua Kathy i Florida, ’a maha ’ahuru matahiti i teienei, ’ua haere atu māua i te hiero nō Atlanta, i Georgia. I te pō mahana toru 9 nō Mē 1984, ’a fa’aoti noa mai ai māua i te hō’ē ’ōro’a o te hiero, ’ua ha’afātata mai te hō’ē rave ’ohipa iā’u ’e ’ua ani mai e taime ānei tō’u nō te rave i te hō’ē noa ’ōro’a o te fa’aineinera’a. Te i’oa o te ta’ata tā’u e mono atu e mea matau-’ore-hia. ’O Eleazer Cercy tōna i’oa.

I te mahana i muri iho, ’ua ’ī roa te hiero i te feiā mo’a. ’A fa’aineine ai au nō te rave i tā’u ’ōro’a piti o te hiero i te mahana, ’ua hōro’ahia mai te i’oa o te hō’ē ta’ata tā’u e mono. I tō’u māere rahi, te i’oa hō’ē ā ïa nō te ta’ata i te pō nā mua atu, Eleazar Cercy. ’Ua putapū vau i te Vārua o te Fatu ’a rave fa’aoti ai au i te ’ōro’a. I te avatea i muri iho, i te hiero noa ā, ’ua fārerei atu Kathy i te hō’ē hoa matahiti pa’ari o te ’utuāfare, te tuahine Dolly Fernandez, e ora nei i Atlanta. Nō te mea ’aita e melo tāne nō tōna ’utuāfare nā muri mai iāna, ’ua ani mai ’oia iā’u e nehenehe ānei tā’u e tauturu iāna ’ia tā’ati i tōna metua tāne i te mau metua o tōna metua tāne. ’Ua ’oa’oa roa ïa vau i te rave te reira.

’A tūturi ai au i te fata nō teie ’ōro’a mo’a, ’ua fa’aro’o fa’ahou vau te i’oa tei tītiro-roa-hia i roto i tō’u ferurira’a, te i’oa o tōna metua tāne, Eleazer Cercy. Tē ti’aturi hope roa nei au ē i muri a’e teie orara’a, e fārerei atu vau ’e e tauahi atu i te hō’ē ta’ata tei matauhia i roto i teie ao ’o Eleazer Cercy te i’oa.

E hōpoi mai te rahira’a o tō tātou mau ’itera’a i roto i te fare o te Fatu i te ’oa’oa hau ’e te heheura’a ’aihau, hau atu i te tomora’a fifi. Mea pāpū rā : e tīa’i maita’i mai te mau melahi i ni’a ia tātou !

’Ua hōro’ahia mai te Vārua Maita’i ia tātou ’a ha’amauhia ai tātou ’ei melo nō te Ēkālēsia. ’A rave ti’a-mā ai tātou i te pāne ’e te pape i te mau hepetoma ato’a ’ei ha’amana’ora’a i tō tātou Fa’aora, ’ua fafauhia mai ia tātou ē e vai noa mai tōna Vārua i roto ia tātou.¹⁹ ’A haere mai ai tātou ma te ’ā’au tae i te fare o te Fatu, te vāhi mo’a roa a’e i ni’a i te fenua nei, e tupu tātou i te rahi i roto i te Fatu ’e e nehenehe tātou « e fa’ari’i i te mana [’īra’a] o te Vārua Maita’i ».²⁰ Nā roto i te mana o te Vārua maita’i, e fa’a’īhia tātou i te hau ’e te ’oa’oa ’e te ti’aturira’a fāito ’ore.²¹ E fa’ari’i tātou i te pūai ’ia fa’aea noa ’ei pipi nāna noa atu tei rāpae’au tātou i te mau vāhi mo’a.

’Ua parau te peresideni Russell M. Nelson : « E rave fa’aoti tō tātou Fa’aora ’e tō tātou Tāra’ehara ’o Iesu Mesia i te tahi mau ’ohipa rahi roa a’e tāna, mai teienei i te taime e ho’i fa’ahou mai ai ’oia. E ’ite tātou i te mau fa’a’itera’a temeio ē, e peresideni te Atua te Metua ’e tāna Tamaiti Iesu Mesia i ni’a i teie ’Ēkālēsia ma te hanahana ari’i ’e te rahi ».²² Te ha’apararera’a i ni’a i te fenua te mau fare o te Fatu ’o te hō’ē ïa ’ohipa pūai rahi ’e te fa’a’itera’a temeio.²³

E au mau hoa here ē, mai te peu e ti’a ia tātou ’e ’aita ā tātou i fa’arahi atu ra i tō tātou haerera’a pinepine i te hiero, ’a ’imi noa hau atu i te taime nō te ha’amori i roto i te fare o te Fatu. E pure ana’e nō te mau hiero tei fa’aarahia mai, ’ia ti’a i te mau tuha’a fenua ’ia roa’a mai, ’ia fa’ati’a mai te mau hau fenua i te mau ’ōpuara’a, ’ia fa’arahihia te mau tāleni o te feiā rave ’ohipa ’e ’ia hi’o rātou i tā rātou mau ō fa’ahanahanahia ’e ’ia hōpoi mai te mau ha’amaita’ira’a mo’a i te fa’ati’ara’a a te ra’i ’e te fārereira’a a te mau melahi.

Te hiero ’o te fare mau ïa o te Fatu. Tē fafau atu nei au ia ’outou ē, ’a haere ti’a-mā mai ai ’outou ’e nā roto i te pure i tōna fare mo’a, e ha’anahia ’outou i tōna pūai, tei ni’a iho ia ’outou tōna i’oa, e tīa’i mai tāna mau melahi ia ’outou, ’e e tupu rahi atu ’outou i roto i te ha’amaita’ira’a a te Vārua Maita’i.

’Ua fafau mai te Fatu : « ’O te mau vārua ato’a ’o tē fa’aru’e i tāna mau hara ra ’e ’o tē haere mai iā’u nei, ’e ’o tē pi’i mai i tō’u nei i’oa, ’e ’o tē ha’apa’o i tō’u nei reo, ’e ’o tē ha’apa’o ho’i i tā’u mau fa’auera’a, e ’ite mai ïa i tō’u nei mata ’e e ’ite mai ho’i ē tē vai nei au ».²⁴ E rave rahi rāve’a e vai nei nō te hi’o atu i te hōho’a mata o te Mesia, ’e ’aita atu e vāhi maita’i a’e i roto i tōna fare mo’a.²⁵

I roto i teie mahana hepohepo ’e te ’ārepurepu, tē fa’a’ite pāpū nei au ē te hiero ’o tōna ïa fare mo’a ’e e tauturu mai te reira ’ia fa’aherehere noa ia tātou, ’ia pāruru ia tātou, ’e ’ia fa’aineine ia tātou nō te mahana hanahana i reira tō tātou Fa’aora e ho’i mai ai mai te ari’i, te pūai ’e te hanahana rahi ’e tāna mau melahi mo’a. I te i’oa o Iesu Mesia, ’āmene.