Te tāhō’ēra’a i nā fa’auera’a rahi e piti

’A rātere ai māua tā’u vahine, ’o Lesa, nā te ao nei nō te hō’ē fa’auera’a ’ohipa, te māuruuru nei māua ’ia fārerei ia ’outou i roto i te mau ’āmuira’a rarahi ’e te mea na’ina’i. ’Ua riro tō ’outou paieti i roto i te ’ohipa a te Fatu ’ei pāturura’a ia māua ’e ’ei ’itera’a pāpū nō te ’evanelia a Iesu Mesia. Te ho’i mai nei māua mai roto mai i tō māua tere ma te uiui ē, ’ua ’aifaito ānei tā māua i hōro’a ia ’outou i tā māua i fa’ari’i mai.

Hōho’a

Te ’ē’aturu Rainbow Bridge.

Hōho’a

Te ’ē’aturu Tsing Ma Bridge.

Hōho’a

Te ’ē’aturu Tower Bridge.

’Ia rātere ana’e māua, e mea iti roa te taime nō te haere e māta’ita’i ri’i. Terā rā, mai te mea e nehenehe, e rave au i te tahi taime nō te hō’ē hia’ai ta’a ’ē. E aura’a ta’a’ē tō’u nō te hāmanira’a ’e te mau hōho’a nō te mau e’aturu. E mea maere nā’u te mau e’aturu fa’atautauhia. Te ’ē’aturu ānei nō Rainbow Bridge i Tokyo, te ’ē’aturu Tsing Ma Bridge i Hong Kong, te ’ē’aturu Tower Bridge i Lonetona, ’aore rā te tahi atu mau ’ē’aturu tā’u i ’ite, tē maere nei au i te māramarama o te mau rāve’a hāmanira’a i teie mau patura’a. Te hōpoi nei te mau ’ē’aturu ia tātou i te mau vāhi ’aita tā tātou e rāve’a nō te haere. (Nā mua roa, mai te taime a fa’aineinehia ai teie parau poro’i, ua tupu te hō’ē ’ati ’ē’aturu i Baltimore. Tē ’oto tātou i te pohera’a o vetahi ’e tē pūpū nei tātou i te tāpa’o aroha i te mau ’utuāfare i roto i te ’ati).

’Aita i maoro a’enei, ’ua tonohia vau i Kalifonia nō te hō’ē ’āmuira’a, ’e ’ua haere fa’ahou vau nā ni’a i te ’ē’aturu Golden Gate Bridge, te hō’ē ïa hāmanira’a māere o te ao nei. Tē ’apiti nei teie patura’a tinitini i te hōho’a nehenehe, te ’ōpuara’a maita’i, ’e te hāmanira’a fa’ahiahia. E ’ē’aturu fa’atautauhia teie ’e nā pare ma te hope’a buka, ma te turuhia e te mau pou rarahi. Nā pare rahi nehenehe e piti e ti’a ra i ni’a a’e i te moana te mau tuha’a mātāmua i hāmanihia. Nā teie nā pare e tāpe’a i te mau niuniu ’āuri fa’atautau ’e te mau niuniu ’āuri fa’ati’ahia e turu ra i te ’ē’a. ’Ua riro te mau-pāpū-ra’a ’e te pa’ari o te pare ’ei maerera’a nō te hāmanira’a o teie ’ē’aturu.

Hōho’a

Te hāmanira’a i te Golden Gate Bridge.

Te mataiena’a nō te Golden Gate Bridge.

Tē fa’a’ite pāpū nei te mau hōho’a mātāmua o te hāmanira’a o te e’aturu i te ravera’a mau o teie ’ohipa. E ’itehia te turu o te tuha’a tāta’itahi o te e’aturu maoti nā pare ’aifaito maita’i tei tā’amuhia te tahi i ni’a i te tahi.

Hōho’a

Te hāmanira’a i te Golden Gate Bridge.

Mau hōho’a nā Getty Images/Underwood

I te otira’a te ’ē’aturu, ’e riro nā pare pa’ari maita’i ’e te mau pou i ha’amauhia i ni’a i te hō’ē niu papa ’ōfa’i ’ei hōho’a nō te pūai ’e nō te nehenehe.

Hōho’a

Te ’ē’aturu Golden Gate Bridge.

I teie mahana, tē ani atu nei au ia ’outou ’ia hi’o i te reira ’ē’aturu rahi, ’e tōna nā pare rahi ha’amauhia i ni’a i te hō’ē niu pa’ari nā roto i te hi’ora’a o te ’evanelia.

I te pae hope’a o te orara’a o Iesu Mesia, i te taime tā tātou e parau nei i teie mahana ē, te hepetoma mo’a, ’ua ui atu te hō’ē ha’api’i ture pharisea¹ i te Fa’aora i te hō’ē uira’a tāna i ’ite ē, fātata e’ita e nehenehe e pāhono :² « E Rabi, tei hea te parau rahi i roto i te ture ? » Nō te « rāmā iāna » ’e te ’imira’a i te pāhonora’a ’eta’eta, ma te mana’o ha’avare, ’ua fāri’i te ha’api’i ture i te hō’ē pāhonora’a pāpū, te mo’a, ’e te hanahana.

« ’Ua parau atura Iesu, Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a.

« ’O te ture mātāmua teie ’e te hau i te rahi ». Ma te fa’aro’o i tā tātou fa’aaura’a i ni’a i te e’aturu, te pare mātāmua !

« E mai te reira ato’a te piti, e aroha atu ’oe i tō ta’ata tupu mai tō aroha ia ’oe iho na ». Teie te piti o te pare !

« Te ture ato’a ’e te mau peropheta, tei teie nei ïa pu’e ture e piti nei ».³ Te mau tuha’a toetoe o te e’aturu !

E hi’opo’a tātou i teie nā fa’auera’a rahi e piti, tei fa’a’itehia ’e tei tai’ohia i roto i te pāhonora’a a Iesu Mesia. A nā reira ai ’outou, ’a hi’o na i te hōho’a o te e’aturu nehenehe fa’atautauhia nā roto i tō ’outou mata vārua.

Te mātāmua, e hina’aro i te Fatu ma tō ’outou ’ā’au ato’a, tō ’outou vārua ato’a, ’e tō ’outou mana’o ato’a.

I roto i teie pāhonora’a, tē ha’apoto nei Iesu Mesia i te mana’o tumu o te ture i tu’uhia i roto i te mau ha’api’ira’a mo’a o te faufa’a tahito. E here i te Fatu, o te fa’atumura’a ïa nā mua i ni’a i tō ’outou ’ā’au—to ’outou nātura mau. Tē ani mai nei te Fatu ia ’outou ’ia here ma tō ’outou vārua ato’a⁴—te tā’āto’ara’a o tō ’outou huru ha’amo’ahia—’e i te pae hope’a, ’ia here ma tō ’outou mana’o ato’a, tō ’outou ïa māramarama ’e te ferurira’a. ’Aita te here i te Atua i tā’ōti’ahia ’aita ato’a e hope’ara’a. E mea hope’a ’ore ’e e mea mure ’ore.

Nō’u nei, e nehenehe te fa’a’ohipara’a i te fa’auera’a rahi mātāmua e riro i te tahi taime ’ei mea ’ite-’ore-hia ’e te teimaha. Ma te māuruuru rahi, ’ia feruri ana’e au i te tahi atu mau parau tā Iesu i fa’ahiti, e rahi atu te māramarama o teie fa’auera’a : « ’Ua hina’ro ’outou iā’u ra, e ha’apa’o i tā’u parau ».⁵ E nehenehe au e rave i te reira. E nehenehe au e here i tō tātou Metua i te ao ra ’e ia Iesu Mesia, ’e e arata’i atu te reira i te pure ra, te tuatāpapara’a i te mau pāpa’ira’a mo’a, ’e te ha’amorira’a i roto i te hiero. Tē here ra tātou i te Metua ’e i te tamaiti nā roto i te ’aufaura’a i te tuha’a ’ahuru, te ha’amo’ara’a i te mahana sābati, te orara’a i te hō’ē orara’a vi’ivi’i ’ore ’e te mā, ’e te ha’apa’ora’a.

Pinepine te herera’a i te Fatu i te fāitohia nā roto i te mau ’ohipa ri’iri’i i te mau mahana ato’a, te ta’ahira’a i ni’a i te ’ē’a nō te fafaura’a : nō te feiā ’āpī, te fa’a’ohipara’a ïa i te rāve’a tūreiara’a sōtiare nō te patu ’eiaha rā nō te ha’amou ; te fa’aru’era’a i te fa’a’oa’oara’a, te teata, ’aore rā te ’ātivite e riro i te ha’afifi i te mau ture ; te fa’a’itera’a i te fa’atura nō te mau mea mo’a.

’A feruri i teie i hi’ora’a au maita’i. E Sābati ha’apaera’a mā’a ’e ’ua pātōtō māua ’o Vance⁶ i te ’ūputa o te hō’ē fare na’ina’i ’e te ha’eha’a. ’Ua tīa’i noa māua ’e te tahi atu mau diakono o te pupu autahu’ara’a i te parau, « ’A tomo mai », tuō-pūai-hia mai nā roto i te ’uputa i roto i te reo purutia. Te tuahine Muellar, hō’ē ïa o te mau vahine ’ivi ta’ata ratere i roto i te pāroita. E’ita tāna e nehenehe e pāhono ’ōhie noa i te ’ūputa, ’ua matapō ’oia. I tō māua tomora’a i roto i te fare ’ua mohimohi ho’i te māramarama, ’ua fāri’i mai ’oia ia māua ma te ani marū mai : « E aha tō ’ōrua i’oa ? ’E aha tō ’ōrua huru ? ’Ua here ānei ’ōrua i te Fatu ? Pāhono atu ra māua ’e fa’a’ite atu ra ē, ’ua haere mai māua nō te fāri’i i tāna ō ha’apaera’a mā. Noa atu tō māua fāito matahiti ’āpī, ’ua ’ite-’ōhie-hia tōna huru orara’a ha’iha’i, ’e ’ua putapū roa tōna pāhonora’a fa’aro’o : « ’Ua tu’u vau i te hō’ē moni i ni’a i te ’iri vaira’a i teie po’ipo’i. ’Ua māuruuru roa vau i te pūpūra’a i tā’u ō ha’apaera’a mā’a. E ti’a ānei ia ’oe ’ia tu’u i te reira i roto i te rata ’e ’ia pāpa’i i tā’u parau ō ha’apa’era’a mā’a ? » ’Ua fa’ateitei tōna here i te Fatu i tō mātou fa’aro’o i te mau taime ato’a a fa’aru’e ai mātou i tōna fare.

’Ua fafau mai te ari’i Beniamina i te pūai fa’ahiahia nō rātou ’o tē pe’e i te fa’auera’a rahi mātāmua. « ’Ua hina’aro ho’i au ’ia ha’amana’o ’outou i te maita’i ’e te ’oa’oa ’o te ta’ata e ha’apa’o i te mau fa’auera’a […] Inaha ho’i, e ha’amaita’ihia rātou i te mau mea ato’a, i te tino ’e o te pae vārua ato’a ho’i ; ’e ’ia ha’apa’o maita’i rātou ē tae noa atu i te hope’a ra, e fāri’ihia ïa rātou i te ra’i ra […] i roto i te ’oa’oa hope ’ore ra ».⁷

E arata’i te herera’a i te Fatu i te ’oa’oa mure ’ore ra !

Nā ’ō a’era Iesu, « ’E mai te reira ato’a te piti, E aroha atu ’oe i tō ta’ata tupu, mai tō aroha ia ’oe iho na ».⁸ Teie te piti o te pare o te e’aturu.

Tē fa’aau nei Iesu i tā tātou hi’ora’a i ni’a i te ra’i, nō te here i te Fatu, i tā tātou hi’ora’a i rāpae i te fenua nei, nō te here i tō tātou ta’ata tupu, te tāne ’e te vahine. ’Ua tā’aihia rāua te tahi i te tahi. ’Aita te here ’o te Fatu e hope roa mai te mea ē, e tau’a ’ore tātou i tō tātou ta’ata tupu. Tei roto i teie here rāpae te mau tamari’i ato’a a te Atua ’aita e hi’ora’a i te huru o te ’āpeni, te ti’ara’a sōtiare, te runa’a, te moni, te matahiti, ’aore rā te ’ōpū fēti’i. E ’imi tātou ia rātou tei pēpē ’e tei ’ati, tei tu’uhia i te hiti, nō te mea, « hō’ē ana’e tō te ta’ata ato’a ti’ara’a i mua i te Atua ».⁹ E au ia tātou ’ia « aupuru i te feiā paruparu, ’ia fa’ateitei i te rima tautau ra i ni’a, ’e ’ia fa’a’eta’eta i te mau turi ’āvae paruparu ra ».¹⁰

Teie te tahi hi’ora’a : ’Ua maere te taea’e Evans¹¹ i te fa’auru-ra’a-hia ’oia ’ia tāpe’a i tōna pere’o’o ’e ’ia pātōtō i te ’ōpani mātau-’ore-hia o te hō’ē ’utuāfare mātau-’ore-hia. I te ’īritira’a mai te hō’ē metua vahine ’ivi i te ’ōpani, ’ua hau i te ’ahuru tamari’i tā’u, ’ite maita’i atura ’oia i tō rātou huru orara’a fifi ’e te mau hina’aro rahi. Te fifi mātāmua, e mea ’ōhie, o te pēnira’a ïa i tō rātou fare, ’e e rave rahi matahiti i muri iho, te aupurura’a i taua ’utuāfare ra i te pae tino ’e i te pae vārua.

I muri a’e, ’ua pāpa’i teie metua vahine māuruuru nō ni’a i tōna hoa tei tonohia mai mai te ra’i mai : « ’Ua hope tō ’oe orara’a i te torora’a i te rima i tei iti roa i rotopū ia tātou. E hina’aro rahi tō’u ’ia fa’aro’o i te mau mea tā te Fatu e parau ia ’oe ’ia fa’a’ite ana’e mai ’oia i tōna māuruuru nō te maita’i tā ’oe i rave i te pae moni ’e i te pae vārua, nō te mau ta’ata o tā ’oe ’e tāna ana’e e ’ite i te hō’ē mahana. Māuruuru i te ha’amaita’ira’a mai ia mātou nā roto i te mau rāve’a e arave rahi […] nō te mau misiōnare tā ’oe i hōro’a mai […] Pinepine au i te uiui ē, ’o ’oe noa ānei tā te Fatu i rave, ’aore rā ’o ’oe noa ānei te ta’ata tei fa’aro’o.

Te herera’a i tōna ta’ata tupu, e tītau te reira i te mau ’ohipa hāmani maita’i ’e te tāvinira’a i te ta’ata tupu mai tā te Mesia i rave. E ti’a ānei ia ’outou ’ia fa’aru’e i tō ’outou ’ino’ino, e fa’a’ore ānei i te hapa a tō ’outou mau ’enemi, e fāri’i ānei ’e e tāvini ānei ’outou i te mau ta’ata tāpiri mai i o ’outou, ’e e tauturu ānei ’outou i te feiā ruhuruhiā ? E fa’auruhia ’outou tāta’itahi ’ia hāmani ana’e ’outou i tō ’outou pare o te here i te ta’ata tupu.

« Te hōro’ara’a i te tauturu ia vetahi ’ē—te tauto’o-pāpū-ra’a nō te ’atu’atu ia vetahi ’ē mai ia tātou e ’atu’atu nei ia tātou iho ’aore rā, hau atu—tō tātou ïa ’oa’oa. Mai te peu iho ā rā ē […] e ’ere te reira i te mea tano roa ia tātou, ’e mai te peu ē, e tītau te reira ’ia fa’aru’e tātou i tō tātou vāhi hau maita’i. Te orara’a i te reira fa’auera’a rahi piti, ’o te tāviri ïa nō te riro mai ’ei pipi mau nā Iesu Mesia ».¹²

I muri a’era ’ua ha’api’i Iesu, « Te mau ture ato’a ’e te mau peropheta, tei teie nei ïa pu’e ture e piti nei ».¹³ E ’ohipa maita’i roa teie. Tē vai ra te hō’ē tā’aira’a faufa’a i rotopū i te herera’a i te Fatu ’e te herera’a i tē tahi ’e tē tahi. ’Ia ti’a ho’i i te Golden Gate Bridge ’ia rave maita’i i tāna ’ohipa, e mea tuea te pa’ari o nā pou e piti ’e tē tuea te pūai nō te pāturu i te teimaha o te mau niuniu fa’atautau, te ’ē’a, ’e te mau pere’o’o ’e tere ra nā ni’a i te ’ē’aturu. ’Āhiri ’aita teie tueara’a, e fifi te e’aturu, ’e e nehenehe e pararī. ’Ia ti’a ho’i i te e’aturu fa’atautauhia ’ia rave maita’i i tāna tuha’a ’ohipa, e mea ti’a i tōna nā pou ’ia rave ’āmui maita’i i tā rāua ’ohipa. ’Oia ato’a, tō tātou aravihi ’ia pe’e ia Iesu Mesia, tei huru ïa ’o tō tātou pūai ’e te mana ’ia ha’apa’o i te fa’auera’a mātāmua ’e te piti ma te tuea.

Hōho’a

Te ’ē’aturu Golden Gate Bridge.

Terā rā, tē fa’a’ite maira te ’u’anara’a te mau mārōra’a i te ao nei ē, i te tahi taime ’aita tātou e ’ite ra ’e ’aore rā e ha’amana’o ra i te reira. Te tahi mau ta’ata, nō tō rātou fa’atumu rahi i ni’a i te ha’apa’ora’a i te mau fa’auera’a, ’aita ïa rātou e fāri’i maita’i roa i te feiā tā rātou e feruri ra ē, e ’ere i te mea parau ti’a roa. Te tahi pae, e mea fifi nā rātou ’ia here i te feiā e mā’iti ’ia ora i rāpae i te fafaura’a ’aore rā ’eiaha e haere i te purera’a.

Tē vai ato’a ra te feiā e ha’apūai nei i te faufa’a o te herera’a ia vetahi ’ē ma te ’ore e ’ite ē, e hopoi’a tā tātou pā’āto’a i mua i te Atua. Tē pāto’i hope nei te tahi pae i te mana’o ē, tē vai ra hō’ē parau mau pāpū, ’aore rā te maita’i ’e te ’ino, ’e tē ti’aturi nei rātou ē, hō’ē ana’e ’ohipa e anihia ia tātou ’oia ho’i, te fāri’i-maita’i-ra’a, ’e te fa’aturara’a i te mau mā’itira’a a vetahi ’ē. E nehenehe te hō’ē ’aore te tahi o teie mau ’aifaito-’ore-ra’a e fa’aturori e ’aore rā ’e fa’atopa roa i tō ’outou iho ’ē’aturu pae vārua.

’Ua fa’ata’a mai te peresideni Dallin H. Oaks i te reira i te nā ’ōra’a ē : « ’Ua fa’auehia ia tātou ’ia here i te mau ta’ata ato’a, i te mea ē, tē ha’api’i ra te parabole nō te ta’ata Sāmāria maita’i ē, e ta’ata tupu nō tātou te ta’ata tāta’itahi. Terā rā, ’eiaha tō tātou ha’apa’o i teie fa’auera’a piti ’ia fa’aha’amo’e ia tātou i te ture mātāmua, ’ia hina’aro i te Atua ma tō tātou ’ā’au, te vārua ’e te mana’o ato’a ».¹⁴

Nō reira, teie ïa te uira’a ia tātou tāta’itahi, nāhea tātou i te patu i tō tātou iho ’ē’aturu o te fa’aro’o ’e te ha’amorira’a, ma te hāmani i te mau pou teitei nō te ’ē’aturu nō te here i te Atua ’e nō te here i tō tātou ta’ata tupu ? A tī’ā ïa, nō ha’amata noa maira tātou. E nehenehe tā tātou mau tauto’ora’a mātāmua e hōho’a i te hō’ē fa’anahora’a i muri i te hō’ē tauera ’amura’a mā’a ’aore rā i te hō’ē fa’anahora’a mātāmua o te e’aturu tā tātou e hina’aro nei e hāmani. E nehenehe ato’a ē, te tahi mau ’opuara’a ’ia hāro’aro’a maita’i a’e i te ’evanelia a te Fatu ’aore rā ’ia fafau e fa’aiti i te ha’avā ia vetahi ’ē. ’Aore e ta’ata ’āpī roa ’aore rā pa’ari roa nō te ha’amata.

Hōho’a

Nino’a o te hō’ē ’ē’aturu.

I te roara’a o te tau, nā roto i te hō’ē fa’anahonahora’a feruri-maīte-hia ’e nā roto i te pure, ’e maita’i mai te mau mana’o huru tano ri’i. E riro te mau ’ohipa ’āpī ’ei mau peu mātaro. E riro te mau pāpa’ira’a mātāmua ’ei mau fa’anahora’a nehenehe. E hāmani tātou i tō tātou iho e’aturu pae vārua ma te ’ā’au ’e te vārua ha’amori i tō tātou Metua i te ao ra ’e i tāna tamaiti hō’ē roa ’e i tō tātou ato’a mau taea’e ’e mau tuahine ’o tē rave ra i te ’ohipa, ’o tē ha’uti ra ’e ’o tē ora ra ’e ’o tatou.

I te mau mahana i muri nei, ’ia haere ana’e ’outou nā ni’a i te hō’ē ’ē’aturu nehenehe fa’atautauhia, ’aore rā ’ia ’ite noa a’e ’outou i te hō’ē hōho’a, ’e tōna mau patu teitei, te ani atu nei au ia ’outou ’ia ha’amana’o i nā fa’auera’a rahi e piti tei fa’ata’ahia e Iesu Mesia i roto i te Faufa’a ’Āpī. ’Ia fa’auru mai te mau ha’api’ira’a a te Fatu ia tātou e ti’a ai. ’Ia fa’ateiteihia tō tātou ’ā’au ’e tō tātou vārua i ni’a, nō te here i te Fatu, ’e ’ia fa’afāriuhia i rāpae nō te here i tō tātou ta’ata tupu.

’Ia ha’apūai mai ho’i te reira i tō tātou fa’aro’o ia Iesu Mesia ’e i tōna tāra’ehara, tā’u ïa e fa’a’ite pāpū nei nā roto i te i’oa o Iesu Mesia, ’āmene.