Laetem Laet blong Hop

Taem ol memba blong Jos long Brasil oli tokbaot Pepetuol Edukesen Fan, oli no save holem taet olgeta be oli yusum ol bigfala toktok nomo: miraculoso (merikel), inspirado (insperesen), maravilhoso (i gudgud tumas). Hemia i from we mane ia i stap mekem wanem we Presiden Godon B. Hinkli (1910–2008) i bin talem finis: “Bae hem i kam wan blesing long laef blong olgeta evriwan we bae oli yusum—long ol yang man mo woman, long fiuja famle blong olgeta, long Jos we bae i blesem olgeta wetem strong lokol lidasip,” mo bae i tekemaot “ol taosen aot long fasin blong stap pua mo tekem olgeta i kam long sanlaet blong save mo gudfala fiuja.”¹

Taem Presiden Hinkli i bin anaonsem program, ol lida blong Jos olsem Paolo R. Gral, eria daerekta blong ol seminari mo institiut blong relijin long brasil, oli bin stap traem faenem rod blong ol problem wetem edukesen mo wok blong ol Lata-dei Sent blong Brasil—speseli blong ol yangfala misinari we oli kambak long misin.

“Be mifala i no bin gat wan ansa kasem taem Lod i bin soemaot long Presiden Hinkli se yumi mas setemap gudfala fan ia,” Brata Gral i talem. “Bifo, plante yangfala pipol we oli kambak long misin, bae oli no save gohed long wan edukesen mo wok. Naoia, oli save se taem oli kambak, mane i stap sapos oli nidim. Hem i wan bigfala blesing mo help long ol yut. Hem i givim hop.”

Samples 10,000 Lata-dei Sent long Brasil oli stap dipen long ol lon long PEF blong bildimap edukesen blong olgeta mo, afta, blong faenem wok. Brasil i gat wan strong ekonomi, mo i gat plante janis i stap blong olgeta we oli skul gud—speseli taem edukesen i kam wetem sam kwaliti we ol yangfala pipol oli developem long taem blong misin.

Elda Pedro Pena, Eria Seventi mo daerekta blong Resife Not institiut blong Relijin, i talem se ol misinari we oli kambak oli gat ol kwalifikesen we ol bos oli stap wantem. Hem i talem se, “ol doa oli open kwiktaem blong kasem wok from se oli gat eksperiens, gud fasin blong stadi, oli klin long dresap mo bodi, oli gat klin fasin. Oli kam antap kwiktaem long wok blong olgeta, mo gud fasin blong olgeta i pulum ol pipol i kam long Jos.”

Afta we hem i finisim seves blong hem long Brasil Sao Paolo Not Misin long 2002, Rikardo Orelio da Silva Fiusa i bin yusum wan PEF lon blong kasem fo yia digri blong hem long saed blong bisnis administresen.

Rikardo i talem: “Mane ia i bin helpem mi blong groap, rere long wok mo mared, mo givim moa gud seves insaed long Jos”. Olsem plante we oli bin kasem help long PEF, hem i bin kasem wok bifo hem i finisim digri blong hem. “Mane ia i bin blesem laef blong mi. Mi talem tangkyu tumas we mi save pembak mane ia we mi lon long hem evri manis blong mekem se ol nara pipol oli save yusum mane ia tu.”

Taem hem i bin stap long misin blong hem, Rikardo i bin lanem blong toktok long ol pipol, blong stadi had, mo blong obei—hemia sam kwaliti we i bin mekem hem i wan gudfala studen mo wokman.

“Plante long ol profesa blong mi oli bin talem se i gat wan samting i defren wetem mi be oli no save eksplenem se hem i wanem,” Rikardo i talem, we naoia hem i lukaotem ol oganasesen wok blong wan kampani long Pot Suape, Saot Resife. “Mi talem long olgeta se hem i from ol prinsipol blong relijin blong mi.” Ansa ia i bin givim janis long Rikardo blong tokabot Jos long ol profesa blong hem mo ol nara pipol.

Morisio A. Araujo, wan long ol fas misinari we i kambak long misin long Brasil we i bin kasem blesing tru long PEF i ademap, “Wetem wok blong mi we i kam antap plante, mi gat moa janis blong lidim ol pipol from eksampol blong mi. Samtaem, ol pipol i talem long mi, “Ei, yu yu defren. Yu fetful long waef blong yu. Yu mekem samting we yu talem.’ Taem yumi tekem help we PEF i givim mo mekem pat blong yumi, yumi kasem ol blesing mo yumi blesem ol narafala.”

Morisio, we i bin sevem misin long Brasil Rio de Ranero Misin long let 1990, i bin kasem plante promosen afta we hem i komplitim program blong kastoma rilesen manejmen program we PEF i bin givim mane from—kos ia i stat long fasin blong salem samting i go long fasin blong lidim wan woktim, i go kasem manejmen blong bod blong ol daerekta blong wan intanasonol taem manejmen trening kampani long Sao Paolo.

Hem i talem se, “Pepetuol Edukesen Fan i wan samting we i kam long God. Mane ia i ki we mi bin nidim blong finisim edukesen mo muv fored wetem wok blong mi.”

Nating we Gabriel Salomao Neta i no wan Lata-dei Sent, hem i bin filim se Pepetuol Edukesen Fan i wan blesing long hem. “Hemia i wan gudfala samting we jos blong yu i stap mekem,” hem i talem hemia taem hem i bin stap toktok long bihaf blong ol bos long Brasil.

Mista Neta, wan maneja mo wan ona blong wan bigfala kampani we i stap salem ol masin blong salem samting long Sao Paolo, i bin gat gud risen blong stap glad. Hem i sapraes tumas wetem ol kwalifikesen blong memba blong Jos Silvia O. H. Para, we i bin winim wan digri long bisnis adminsitresen wetem help blong wan PEF lon, mekem se hem i tekem hem long wok olsem eksekutif sekretari blong hem.

Mista Neto i talem: “Mifala i laekem tumas wok we hem i stap mekem. Hem i wok had mo hem i wok gud. Mifala i biliv long hem mo trastem hem. Investmen we jos blong yufala i mekem long hem i gat frut blong hem—long yufala, long hem, mo long mifala.”

Silvia i glad tumas long Pepetuol Edukesen Fan mo from membasip blong hem insaed long Jos; naoia hem i tijim ol Inglis klas long Sao Paolo wod long olgeta memba blong jos mo tu olgeta we oli no memba. Hem i talem se, “Semmak olsem we mi kasem, mi wantem givim tu.”

Olsem we yumi save luk long sakses blong Silvia, ol yang man oli no olgetawan nomo blong kasem help long Pepetuol Edukesen Fan. From wan gudfala ekonomi, plante Lata-dei Sent woman long Brasil oli mas lukaotem wok tu.

Lorival Viana de Agira, maneja blong wok senta long Kuritiba long Saot Brasil i talem se, “Plante woman long Brasil oli wok i no from se oli wantem wan niufala trak mo sam klos we i sas, be nomo from se oli gat nid. Oli wantem ol famle blong olgeta blong kakae gud mo oli wantem ol pikinini blong olgeta blong gat ol stret klos mo wan gudfala edukesen.”

Keti de Lima A. Amed mo Viviana Tores Nogera i bin traehad blong gat inaf kasem en blong manis nating we ol man blong tufala oli bin wok had from famle blong olgeta. Long tufala, PEF i bin wan blesing.

Ol les aktiv memba blong famle blong Keti i bin wari lelebet taem hem i rejista blong wan program blong sefti teknisen. Be hem i mekem gud long stadi blong hem mo oli bin givim wan fultaem wok long saed blong stadi ia long yia 2007.

“Mane ia i bin mekem moa bitim blong helpem mi nomo blong kasem trening mo wok; hem i bin helpem mi blong filim gud moa abaot miwan mo blong gat tras long ol samting we mi save mekem” Keti i talem, hem i olsem wan long ol fas woman we oli tekem hem blong wok long saed blong ol sefti inspeksen, trening mo tul insaed long wan kampani long Sao Rose dos Pinais, kolosap long Kuritiba. Hem i talem se, “Program ia we i kam long God i bin givim moa hapines mo ol testemoni we oli moa strong insaed long famle blong mifala.

Papa mo mama, mo ol brata mo sista blong Keti oli sapraes long wok blong hem mo long strong tingting blong hem, mo tu, oli sapraes long olsem wanem PEF i bin blesem famle blong olgeta blong gobak aktiv insaed long Jos. Hem i talem, “Oli bin mekem olgeta oli tingbaot se Jos i leftemap ol pipol mo i helpem olgeta blong gro long plante wei—i no long saed blong spirit nomo, be tu, tru long ol impoten wei we i mekem wan laef i fulwan.”

Viviana mo hasban blong hem, Rafael, i bin muv aot long Kolonbia i go long Manaus, wan impoten indastri senta long Not Brasil long 2002 blong lukaotem sam wok. “Prea, famle kaonsel, givhan blong ol prishud lida, mo ol woksop klas oli bin helpem mifala blong save wanem Papa long Heven i wantem mifala blong mekem mo blong mekem stret desisen long stret taem,” Viviana i talem; Viviana i bin filim Spirit i talem long hem blong yusum long PEF lon blong stadi long saed blong intanasonol bisnis.

Long 2007 Viviana i bin go long wok blong lukluk long saed blong ol impot blong wan supamaket long Manaus. Famle blong hem i nidim sam moa mane, be wetem wan bebi we i stap kam, hem i mas risaen long wok blong hem. Afta sam manis we pikinini ia—we i nambafo pikinini—i bon, Viviana i bin kasem wan wok olsem daerekta blong intanasonol bisnis blong wan nara kampani. Nao long taem ia, hem i bin lanem lawnis blong Potugal, mo stret lanwis blong hem, Spanis, i bin givhan plante long hem blong i save mekem bisnis wetem ol neiba blong Brasil we oli toktok Spanis.

“Taem oli bin givim wok long mi, mi talem, ‘Mi gat fo pikinini. Mi no save kam long wok stat long 8 klok moning kasem 6 klok long naet,’” Viviana i talem. “Bos blong mi i talem se hem i gat fulap tras long wanem samting mi save mekem, mo i talem, ‘mi nidim wan we mi save dipen long hem. Wok long hom.’ Mi sapraes long hemia.”

Wetem Intanet mo wan kompiuta, Viviana i bin wok long hom taem ol bigfala pikinini oli go long skul mo bebi blong hem i stap silip. Hem i go long ofis wanwan taem nomo.

Rafael i talem se ol blesing blong famle blong hem oli no ol janis nomo. Hem i talem: “Ol blesing we mifala i kasem i kam from we mifala i bin prea plante blong tekem desisen mo mekem aksen wetem ol tul we Jos i bin givim long mifala.”

Gilma Dias da Silva, PEF daerekta long Brasil i talem se sam Lata-dei Sent long Brasil oli fesem sam jalenj blong faenem wok afta we oli finisim edukesen blong olgeta, “be plante long olgeta we oli tekem PEF oli stap progres long wok blong olgeta mo oli stap mekem laef blong olgeta i kam gud. Mane ia i wan sakses long ples ia.”

Sakses ia, long ol toktok blong Presiden Tomas S. Monson, “i laetem laet blong hop long ol ae blong olgeta we oli bin filim se oli mas stap pua, be naoia oli gat wan janis blong wan fiuja we i moa gud.”²