Plis Sevem Papa blong Mi
Papa blong mi ia nao i bin stap lukaotem trutok mo i bin faenem ol misinari. Oli bin tijim gospel long mifala, mo i no longtaem afta, mifala— mama mo papa blong mi mo ol faef brata mo sista—i bin baptaes. Ol testemoni blong mifala i bin gro strong. Mifala i bin lanem plante samting, speseli abaot Sevya mo abaot ol famle.
Long 1992, taem mi sev olsem wan bisop long wod blong mifala long Filipin, papa blong mi i gat wan hat atak. Oli bin tekem hem kwiktaem aot long ofis blong hem i go long hospital. Taem nius i kam se hem i stap long ples we man i sik tumas, famle blong mi i sek bigwan. Fraet i kam long ol hat blong mifala. Ol janis blong papa i laef hem i smol tumas. Mama i bin krae mo askem mifala evriwan blong prea.
Mi lusum trak blong taem afta long hemia—plante memori oli bin kambak. Wetem ol wota long fes blong mi, mi bin nildaon blong prea. Hat blong mi i bin hevi tumas, mo jes blong mi i wantem bosta nomo. Mi wantem blong singaot strong blong mekem soa blong mi i kam daon mo karemaot fraet we i stap long mi long dei ia. Be afta, mi bin prea nomo se, “Plis sevem papa blong mi.” Hem i wan prea we mi givim wetem wan tru hat, we mi bin wantem blong Hem i mas harem.
Long naet ia oli bin letem mi go insaed long yunit we papa i stap long hem. Papa blong mi i bin stap long koma (i laef, i slip be i nomo save toktok), mi mo mama blong mi mo ol brata mo sista i rere from nogud nius we bae i kam. Hem i wan nogud eksperiens blong famle blong mi. Fiuja blong mifala i no klia gud naoia. Taem mi stap talem sloslo gudbae long hem, mi tingbaot fas famle haos naet blong mifala. Mifala i bin lukluk wan muvi blong Jos, Families Are Forever.
Bifo mi go long bed long naet ia, papa blong mi long wol ia i gobak kwaet long Papa blong hem long Heven.
Ded blong papa blong mi, taem mi gat 22 yia, i makem stat blong plante jenis long laef blong mi. Taem papa blong mi i ded, mi bin lanem se mi gat ol paoa we mi no bin save bifo. Mi bin mekem moa long laef blong mi from mi bin fesem wantaem ol jenis mo janis blong kam antap; sapos i no hemia, bae mi no save mekem moa long laef blong mi.
Taem Papa long Heven i no mekem wanem mi bin prea from, yet mi bin save se Hem i bin harem mi. Mi save se Hem i stap lisin. Hem i save gud wanem mi stap go tru long hem. Hem i save gud wanem famle blong mi i nidim long taem ia, mo mekem se Hem i givim long mifala—paoa blong winim ol hadtaem blong laef, paoa blong fesem wanem we i stap. Hem i bin tijim mifala olsem wanem blong fesem ol hadtaem blong mifala wetem fet.
Moa long 15 yia i bin pas afta long dei ia blong harem nogud. Be mi stap lan yet, mo mi stap gro yet long gospel. Naoia mi gat famle blong miwan, mo mi glad se mifala i bin sil long tempol. Mi neva save kamaot long rod blong gospel we papa blong mi i bin tijim mifala long hem.
Tru long Atonmen mo Laef Bakegen long Ded blong Jisas Kraes, mi save se wan dei bae famle blong mi bae i stap tugeta bakegen. Mi gat yet wan longfala rod blong go, be mi glad blong gat tingting ia se bae mi save luk papa blong mi long en blong rod ia.