Presen blong Litresi

Fas boe blong mitufala i lavem tumas kindagaden mo i stap mekem gud long skul. Long klas wan, i kamaot klia long mitufala se hem i no save rid. Hem i save ridim sam toktok long ples ia mo longwe be hem i stap gat hadtaem iven wetem ol homwok blong stat rid. Ol manis i pas, mo ol riding skil blong boe blong mitufala i no bin progres nating. Mi mo hasban blong mi i bin wari bigwan.

Wan dei mi tingbaot wan samting we misin presiden i bin tijim mifala long ol yia we i bin pas. Oli bin singaotem mi i go long wan misin we i toktok wan nara lanwis. Blong lanem lanwis blong Rasia hem i wan jalenj long ol defren level blong wanwan misinari, mo misin presiden blong mifala i kaonselem mifala blong ridim Buk blong Momon long lanwis blong Rasia evri dei. Hem i bin promesem mifala se paoa blong Buk blong Momon bae i helpem mifala long save blong mifala blong toktok long lanwis Rasia. Mo hem i talem tru. Afta samtaem mi stat blong kam gud blong toktok mo andastanem lanwis, mo testemoni blong mi i bin gro.

Sam yia afta long misin blong mi, mi stap tingting long miwan se, “Sapos hemia i bin wok blong mi long lanwis blong Rasia, from wanem bae i no save wok blong boe blong mi long Inglis?” Afta we mi tokbaot hadwok blong mi blong lanem lanwis blong Rasia long boe blong mi mo advaes blong misin presiden blong mi, mi mo hasban blong mi i bin jalenjem boe blong mitufala blong rid hemwan long Buk blong Momon evri dei. Bae hem i spendem taem blong makem ol toktok ia God mo Lod taem hem i faenem olgeta long ol pej. I no longtaem hem i bin muv i go long toktok ia Jisas. Afta hemia bae hem i pikimap ol toktok we hem i bin luk mo bae i askem ol mining blong ol toktok ia. Hem i wok had oltaem long riding blong hem evri dei, mo long en blong yia level blong rid blong hem i bin kam antap bitim wanem we mifala i ting se bae hem i save kasem.

Naoia boe blong mitufala i stap long klas sikis. Hem i wan gudfala boe blong rid mo hem i help blong tijim ol faef yangfala brata blong hem abaot presen we hem i bin kasem taem hem i stap ridim Buk blong Momon. Wanwan long ol pikinini blong mitufala i bin developem ol strong skil blong rid mo wan fasin blong ridim Buk blong Momon. Oli stat blong filim paoa blong spirit blong trutok taem ol testemoni blong olgeta i bin stap gro.