No Stap Let long Naet blong Wok

Iven taem mi bin wan yang woman, plante long ol koling blong mi i blong mi tijim ol pikinini long Praemeri, mo hemia i lidim tingting blong mi blong mi mas skul from wan digri long saed blong praemeri edukesen. Be joes blong mi long topik ia i no wan wei ia nomo we ol tijing blong Jos i bin lidim edukesen blong mi. Hemia i bin kam klia long mi taem mi bin rere blong mi graduet.

Las projek we mi mas finisim i wan las pepa we bae mi difendem long wan eksam we oli toktok long hem nomo, long fored blong trifala jaj. Ol jaj ia oli sam tija we oli bin tijim ol klas long mi.

Mi finisim pepa blong mi, mo mi bin spendem pat blong naet bifo long eksam wetem famle blong boefren blong mi. Taem mi bin aot blong gobak hom, mama blong hem i bin talem se hem i hop se evri samting bae i go gud mo i talem toktok ia se sapos yumi rere, nao yumi no save fraet (luk long D&C 38:30).

Nekis dei i bin kam. Plante memori i pas tru long maen blong mi. Mi bin tingbaot olsem wanem mi bin disaed blong mi aot long taon we mi bin groap long hem blong gohed long edukesen blong mi; mi bin tingbaot evri sakrifaes we famle blong mi i bin mekem blong pem skul blong mi. Mi no save mekem nogud long olgeta. Las eksam blong mi i kam wan sakses.

Ol fren blong klas blong mi oli bin stap rere tu blong gohed long eksam blong olgeta. Mifala evriwan i bin wari long ol kwestin we oli jaj oli save askem, be mi bin filim gud se mi bin prea blong kasem help mo from se mi bin save se God i save evri hadwok we mi bin mekem blong oganaesem, lukaotem, mo raetem pepa blong mi.

Taem blong mi i kam. Afta we mi eksplenem pepa blong mi long olgeta we oli stap, mi stat blong ansa long ol kwestin blong olgeta. Afta we oli askem sam kwestin abaot topik we mi tokbaot, wan long ol jaj i bin askem, “Hamas wok nao yu putum long pepa blong yu ia?”

“Plante,” mi ansa. “Mi givim evri samting we mi gat from se mi wantem se bae hem i givim sam niu aedia.”

“Yu bin stap let long naet blong wok?”

“No, mi no wekap let long naet blong mekem ol wok blong skul,” mi talem. “Mi oganaesem dei blong mi blong mekem se mi save mekem wok blong mi.”

Ol fes blong ol jaj oli soem se oli sapraes. Sem jaj ia i talem bakegen, “Mi faenem se i strenj se yu talem se i tru se yu no stap let long naet. Mifala i save se ol fren blong klas blong yu oli bin stap let, moa long wan naet.”

Wan narafala jaj i bin talem, “Bae mi tokbaot wan studen ia. Gel ia i gat taem blong evri samting. Mi save talem hemia from we mi save hem. Hem i gat taem blong stadi, fren blong hem, famle blong hem, mo hem i save go long jos.”

“Tru?” narafala jaj i sapraes bakegen. “Yu stap go long wanem jos?”

“Mi wan memba blong Jos blong Jisas Kraes blong Ol Lata-dei Sent.”

“O, yes, mi save wanem jos ia,” wan i talem.

“Mo oli tijim mifala blong go long bed eli blong mekem se tingting blong mifala i fres gud long nekis dei.”

Mi bin filim kwaet mo sef blong tokbaot gospel, iven we mi bin sapraes we oli bin askem mi abaot relijin long taem blong wan profesonol eksam.

“Pepa blong yu, yu bin raetem wetem plante bigfala filing. Hem i gud tumas. Mi ting se hem i from ol gudfala fasin we i stap insaed long yu we jos blong yu i tijim.”

Mi talem, “Yes, long jos, oli bin tijim mi olsem wanem blong tijim ol pikinini, mo i bin helpem mi wetem digri blong mi.”

“Yu bin mekem gud semmak olsem wan fis insaed long wota,” wan long ol jaj ia i talem blong tok plei. “Mifala i hop se bae yu no stop blong go long jos, from se yu bin kasem plante samting we i bin helpem yu tedei.”

I no longtaem oli bin askem mi blong aot blong olgeta jaj oli mekem desisen blong olgeta. Tu minit afta, oli bin singaotem mi bakegen.

“I no bin had blong mifala i agri long wan samting. Wetem lukluk long eksampol blong fasin blong yu, ol gudfala mak blong yu, mo pepa we yu bin difendem tedei, desisen blong mifala i semmak evriwan mo mifala i agri blong yu graduet, wetem hae ona. Kongratulesen!”

Taem mi talem long famle blong mi, oli bin krae from oli glad tumas.

Mi testifae se taem Papa long Heven i komandem yumi blong go slip eli, blong yumi no save taed; blong girap eli blong bodi mo maen blong yumi i fulap long paoa (luk long D&C 88:124), Hem i bin mekem wetem lukluk blong Hem i blesem yumi. Mi mi glad tumas long Hem blong Hem i letem gospel blong i tekem hapines long evri eria blong laef blong yumi.