“Papa mo Mama blong mi oli no strong long Jos. Olsem wanem bae mi save stap strong nomata we tufala i no sapotem mi?”

Invaetem papa mo mama blong yu blong gat famle prea. Invaetem tufala blong kam long ol aktiviti blong Jos. Oganaesem ol famle haos naet. Prea plante from tufala, mo traehad blong stap olsem wan gud eksampol. Long wei ia, bae yu mekem famle blong yu i kam strong moa, mo semtaem bae yu mekem testemoni blong yu i kam strong moa, bae yu filim gud moa, mo Lod bae i helpem yu blong stap strong insaed long Jos. Mekem samting ia wetem fet mo strong tingting, mo bae Hem i givim wan ansa long ol prea blong yu.

Papa blong mi i no wan memba blong Jos, mo mama blong mi mo ol sista blong mi oli no strong insaed long Jos. Mi harem nogud blong luk se oli no tingting strong long ol bilif blong mi. Be fet blong mi i stap gro strong taem mi go long seminari, long Jos, mo long Miutuol, mo taem mi prea mo stap ridim olgeta skripja. Gudfala tingting we mi save givim i blong no mas givap.

Mi save wan gudfala gel we i strong gud insaed long Jos nating we papa mo mama blong hem oli no strong tumas. Hem i stap olsem wan insperesen long ol narafala gel from se hem i winim Yang Woman medal blong hem finis. Hem i talem se, sapot blong ol narafala yang woman, stap go long jos oltaem, mo stap toktok wetem Papa long Heven oli ol gudgudfala wei blong helpem hem blong stap aktiv.

Mi dipen long prea mo long skripja stadi blong mekem testemoni blong mi strong, mo mi faenem wan sef ples taem mi tekem pat long Skaot mo program blong ol Yang Man, mo tu taem mi stap wok long ol koling blong mi. Folem kaonsel blong olgeta profet mo jusum ol gudfala fren tu. Tingbaot oltaem blong stap soem wan gudfala eksampol long famle blong yu taem yu soem se yu lavem olgeta tru, yu wari, mo yu gat respek. Sapos yu mekem pat blong yu, Lod bae i mekem pat blong Hem.

Mama blong mi i no strong tumas long Jos, mo ol narafala memba blong famle oli no memba blong Jos. Wanem mi mekem i blong mi trastem ol lida mo fren blong mi; oltaem oli helpem mi. Oli kam impoten long laef blong mi from se oli givhan long wei we mi stap laef long hem, mo tu long tingting blong mi blong go long misin. Oli stap givim strong paoa long tingting blong mi tru long ol eksampol blong olgeta. Yu nidim blong stap glad long frensip blong olgeta pipol ia we oli givhan long yu blong mekem yu yu strong olsem wan memba mo go spendem moa taem wetem olgeta, from se i tru we bambae yu gat samting blong lanem evri taem.

Gohed blong toktok wetem papa mo mama blong yu, mo traem blong kasem sapot blong tufala. Talemaot lav blong yu mo glad hat blong yu long tufala, mo talem long tufala olsem wanem i impoten long yu blong stap go long jos. Askem ol lida blong yu blong oli provaedem transpot, mo traem askem bisop sapos bae hem i glad blong toktok wetem tufala. Prea mo askem Papa long Heven blong Hem i givhan long yu, mo prea se bae papa mo mama blong yu bae oli traem luk se blong stap strong long Jos i impoten long yu. Bae tu, yu save kam moa strong taem yu ridim Buk blong Momon evri dei mo taem yu kipim olgeta komanmen.

Mi luk kaen samting ia plante long misin blong mi, mo ol pikinini we oli fesem, oli ol pikinini we oli gat strong paoa long tingting. Nao, olsem wanem nao oli save fesem samting ia? Taem oli developem wan sapot sistem insaed long Jos tru long ol fren mo ol lida, mo taem oli developem wan sapot sistem wetem Lod tru long prea, ridim skripja evri dei, mo go oltaem long Jos. Yu save stap strong sapos yu mekem olgeta samting ia!