Voes blong Gudfala Man blong Lukaot long Ol Sipsip

Olsem wan fama long Montana plante yia kasem 70 yia blong mi, mi laekem parabol blong gudfala man blong lukaot long ol sipsip, we i stap long Jon 10:1–18, from we mi bin laef folem. Eksperiens we bae mi serem i spesel wetem paoa we i putum tijing blong parabol ia long praktis.

Long ol taem blong Baebol, wanwan man blong lukaot sipsip i stap singaotem grup blong ol sipsip blong hem wetem voes blong hem blong oli kam tugeta long naet taem long fanis blong olgeta (luk long ol ves 3–4). Semmak olsem, taem mi stap muvum ol sipsip blong mi, mi jes singaot nomo, mo oli kam.

Sam yia i pas, strong neiba blong mi, Alis we hem i gat 96 yia nao, hem tu i bin stap lukaot long ol sipsip blong hem, i sik long taem blong ol sipsip i bonem ol bebi sipsip, mekem se mi agri blong lukaot long ol sipsip blong hem we oli stap bonem bebi long naet. Long fas naet we mi “stap long wok,” mi go insaed long ples we ol sipsip blong hem i stap bonem bebi, moa long 100 woman sipsip blong Alis oli slip gud long pis long bed blong olgeta. Be taem mi kamaot, kwiktaem oli filim save se wan strenja i stap long medel blong olgeta. Oli fraet tumas, mo oli lukaotem wan sef ples mo oli go tugeta long grup long wan kona we i longwe (luk long v. 5).

Hemia i bin gohed olsem blong sam naet. Nomata we mi go insaed kwaet, ol sipsip oli stap seksek mo ronwe. Mi stap toktok kwaet long ol niubon sipsip mo ol mama sipsip taem mi stap lukaotem olgeta. Long nambafaef naet oli nomo muf olbaot taem mi wokbaot long medel blong olgeta. Oli kam blong haremsave voes blong mi mo trastem mi.

Samtaem afta, mi bin talem long Alis se bae mi fidim twelef o moa long ol bam sipsip ia wetem ol botel blong olgeta. (Wan bam sipsip i wan sipsip we mama blong hem i ded o i no save givim melek long hem.) Mi tekem voes blong Alis, mo singaotem ol sipsip blong hem, “Kam, BaBa! Kam, BaBa!” Mi ting se ol sipsip bae oli hanggri mo ron spid i kam long mi olsem we oli stap mekem long hem. Be i nogat wan long ol sipsip i lukluk i kam. Afta Alis i kamaot long doa blong kijin blong hem mo singaot. Oli harem voes blong hem, kwiktaem oli ron i go long hem, mo krae from melek blong olgeta.

Mitufala i mekem wan sikret plan. Alis mo mi i traem blong faenemaot risen blong ol aksen blong ol sipsip ia. Alis i stanap long fanis blong sipsip blong mi, i tekem singaot blong mi: “Ia, sipsip, sipsip! Ia, sipsip, sipsip!” mo no kasem wan ansa nating. Be taem mi singaot wetem ol sem toktok, kwiktaem ol sipsip blong mi oli raonem mi. Nomata ol toktok we mitufala i yusum blong singaotem ol sipsip i semmak nomo, ol voes blong mitufala i no bin semmak mo oli no bin folem. Ol sipsip oli tru mo stap harem save nomo tru man we i lukaotem olgeta (luk long v. 4).

Jon 10 i talemaot wanem i defren long wan man blong lukaot sipsip wetem wan wokman we i stap lukaot long ol sipsip Wan man blong lukaot long sipsip, i wan man we ol sipsip oli blong hem, mo hem i laekem olgeta mo stap wari long sefti blong olgeta. Long narasaed, wan wokman we i stap lukaot long ol sipsip i wan man we i mekem wok from oli “pem” hem nomo mo i “no kea” (v. 13). Parabol ia i tijim tu se wokman i save go mo livim ol sipsip oli stap olgetawan (luk long v. 12), be man blong lukaot long sipsip i givim laef blong hem from ol sipsip blong hem (luk long v. 11). Hemia i tru tumas abaot Gudfala Man blong yumi blong Lukaot long Sipsip—Sevya blong yumi, Jisas Kraes—we wetem lav, Hem i givim laef blong Hem from yumi (luk long ol ves 15, 17–18).

Long mi ol eksperiens ia oli givim ol impoten mesej blong parabol ia: traehad blong save Gudfala Man blong yumi blong Lukaot Sipsip yuwan, mo kwik blong no save mestem blong haremsave voes blong Hem blong mekem se yumi no stap folem wokman blong lukaot long sipsip. Taem yumi fetful blong folem voes blong Gudfala Man blong yumi blong Lukaot long Sipsip—mo i no nara man—bae i save lidim yumi i go long sef ples we i no save finis.