Jemes 1:5–6

Taem Josef Smit i bin ridim ves ia, ves ia i bin mekem hem i go prea long Tabu Grov; mo long ples ia hem i bin gat Fas Visen (luk long Joseph Smith—History 1:11–17). Yu save tingbaot sam eksampol long famle blong yu, o long eksperiens blong yuwan, we wan i bin askem save mo i bin kasem wan ansa long prea blong hem? Raetem abaot hemia long jenol blong yu.

“Hem i spesel janis blong ol pikinini blong God blong save kam long God mo kasem revelesen. … God i no man we i save luk long taetol blong man; yumi evriwan i gat sem spesel janis ia.”

I Fri—oli no pem, wetem glad hat, i kam plante.

Tok Nogud—tokbaot man, tok strong, talem nogud man. Long narafala toktok, God bae i ansa long yu mo bae i no save harem nogud long yu from we yu bin prea long Hem wetem tru hat blong kasem wan ansa long wan kwestin.

Papa long Heven i harem mo i ansarem ol prea blong yumi. Ol ansa blong Hem oli kam long stret taem we Hem i wantem, mo i kam long ol defren wei—eksampol, long ol defren taem blong laef blong yu, tru long ol kaen fasin blong ol narafala long yu, o tru long kwaet, smol voes blong Tabu Spirit. Hemia sam wei we yu save mekem yuwan i rere blong kasem givhan tru long Spirit (i kam long “Revelation,” True to the Faith [2004], 141–43):

• Prea blong kasem givhan.

• Stap revren.

• Gat tingting i stap daon.

• Kipim olgeta komanmen.

• Stap klin inaf blong tekem sakramen.

• Stadi long olgeta skripja evri dei.

• Tekem taem blong stap tingting hevi.

• Taem yu stap lukaot blong kasem wan givhan we i spesel, stadi abaot samting ia long tingting blong yu.

• Wetem tingting blong save wet longtaem, lukaotem wanem God i wantem.

“Profet [Josef Smit] i bin talem se, afta we hem i bin ridim ves ia, hem i bin save stret se hem i mas testem Lod mo askem Hem, o bae ating hem i save jusum blong stap long tudak blong oltaem. … Hem i bin ridim olgeta skripja, hem i bin andastanem skripja ia, mo hem i bin trastem God, Papa blong Hem we I No Save Finis; mo naoia, hem i bin nildaon mo hem i bin prea, mo hem i bin save se God bae i save ia we hem i bin stap lukaotem tru. Profet Josef Smit i bin tijim yumi abaot prinsipol blong fet—tru long eksampol.”