Kam Lisin long Voes blong Wan Profet
Gobak Sef long Papa long Heven
Long wan adres blong jeneral konferens blong Epril 2007.
Presiden Ujdof i tijim se from Atonmen, yumi save sakem sin mo gat hop oltaem.
Poen blong Gobak Sef
Long taem blong trening blong kam wan kapten blong plen, mi mas lanem blong stiarem plen long wan longfala ples. Blong flae krosem ol bigfala solwota, krosem ol bigfala deset, mo go long wan kantri i go kasem wan narawan i nidim wan gudfala plan blong mekemsua se plen i sef kasem ples we i stap go from. Sam long ol flaet ia i kasem 14 aoa mo i kavremap klosap 9 000 mael (14 500 kilometa).
I gat wan impoten poen blong mekem desisen long taem blong ol longfala flaet ia we oli save long hem olsem poen blong gobak sef. Kasem long poen ia plen i gat inaf bensin blong tanem raon mo gobak sef long eapot we oli bin kamaot long hem. Taem plen i pasem poen blong gobak sef, kapten i lusum joes blong hem mo i mas gohed nomo i go. Hemia nao from wanem oli singaotem poen ia se poen blong nomo save gobak.
Hem I Neva Let Tumas
Satan i wantem yumi blong tingting se taem yumi sin yumi go pasem wan “poen blong nomo save gobak”—se hem i let blong yumi jenisim rod blong yumi. Atonmen blong Jisas Kraes hem i presen blong God long ol pikinini blong Hem blong stretem mo winim ol risal blong sin. Kraes i kam blong sevem yumi. Sapos yumi tekem wan rong rod, Atonmen blong Jisas Kraes i givim long yumi promes se sin hem i no wan poen blong nomo save gobak. Blong gobak sef i posibol taem yumi folem plan we God i gat blong sevem yumi.
Oltaem I Gat Hop
Taem yu faenem yuwan long rod ia blong laef, wanem ol hadtaem we yu save fesem, i gat oltaem wan poen blong gobak sef; oltaem i gat hop. Yu, yu kapten blong laef blong yu, mo God i bin mekem rere wan plan blong karem yu gobak sef long Hem, long ples we bae yu kasem long heven.
Presen blong Atonmen blong Jisas Kraes i givim long yumi long oltaem mo long evri ples ol blesing blong sakem sin mo fogivnes. From presen ia, janis blong gobak sef aot long ol rabis rod blong sin hem i stap blong yumi evriwan i yusum. Hapines long laef ia mo fasin blong stap glad blong taem we i no save finis long wan laef we i stap kam yet bae i presen blong yumi taem yumi jusum blong akseptem mo yusum presen ia blong Papa blong yumi long Heven. ●
Pikja i kam long Skot Grea