Mekem Moa Bitim we Oli Askem

Taem Sten Ata i gat samples 15 yia, hem i no oktiv tumas insaed long Jos. Mo famle blong hem tu i semmak. Oli bin muv plante taem long ol defren eria blong Nowe. Naoia oli bin stap long Stavenja. Ples ia i nambafo bigfala siti long kantri ia mo i stap long saotwes kost. Sten i bin go wanwan taem long jos long Stavenja mo i bin mitim sam narafala Lata-dei Sent yut long eria ia. Be wan yangfala man nao i bin pulum tingting blong Sten—nem blong hem i Tor Lase Bjerga.

Hem i bin long wan taem we hem i visitim jos we Sten i bin mitim Tor Lase. “Hem i gat tu moa yia bitim mi, mo hem i pulum tingting blong mi,” Sten i talem. “Mi bin filim wan gud spirit taem mi stap raon long hem, mo mi tingting se hem i wan gudfala man.” Ating sapos Tor Lase i no bin pulum tingting blong Sten, bae Sten i no save lisin long Tor taem hem i bin visitim Sten long haos blong hem wetem wan spesel invitesen.

Invitesen ia i bin kam long medel blong ol yia 70, taem oli bin statem seminari program long Nowe, mo oli bin singaotem Tor Lase i kam fas seminari tija. Hem i gat 18 yia nomo long taem ia. Tor Lase i fraet smol blong tekem bigfala responsabiliti ia. “Mi bin prea from plante taem ia,” hem i tingbaot. Be hem i bin save wan samting, hem i we hem i wantem go aot long ol yut long eria blong hem we oli les aktiv. Tor Lase i bin talem, “mi filim wantaem se mi mas go visitim Sten Ata.”

Sten i talem, “ating mi mi wan nem nomo insaed long wan lis. Be long Tor Lase, Sten i moa long wan nem long lis. Tor Lase i tingbaot se hem i bin sapraes long waes blong Sten mo strong kwaet fasin blong Sten. Mekem se Tor Lase i disaed blong visitim Sten blong invaetem hem blong tekem pat long niu seminari program.

Tor Lase i bin ringim papa mo mama blong Sten fastaem mo toktok long tufala blong mekemsua se bae Sten i stap long haos taem bae hem i visitim olgeta. Blong go kasem haos blong sten, Tor Lase i mas ron long bas blong 35 minit blong kasem wan feribot. Afta, ron long feribot blong 45 minit. Mo laswan, wokbaot wan nara 30 minit. Sten i talem “mi tingbaot samting ia oltaem. Wanem we Tor Lase i bin mekem, i moa bitim wanem we oli askem.”

Tufala man ia i tingbaot gud yet spirit we oli bin filim long taem blong miting ia samples 35 yia i pas nao. Taem oli bin sidaon long ples blong kakae, maen blong Sten i stap gotru long evri samting we hem i bin stap tekem pat long hem. “Mi bin bisi tumas wetem ragbi, mo Skaot, mo plei long trampet, mo mi bin stap mekem eni kaen samting. Mi bin bisi tumas.”

“Tor Lase i tanem hem i kam long mi taem hem i tokbaot seminari, mo hem i talem, ‘Sten Ata, bae yu glad blong rejista long seminari program, mo stat blong stadi long olgeta skripja wetem mifala?’ Mi bin stap sidaon kolosap long ples blong faea mo mi bin talem yes. Sapos man i tingting gud, bae mi sud talem no from se mi no gat taem. Be mi bin talem yes. Mo hemia i statem ful patisipesen blong mi long seminari mo jos aktiviti.”

“Ful samting” ia i blong girap long evri moning blong stadi long olgeta skripja mo ol seminari lesen hemwan long hom blong hem. Afta, smol grup blong fo o faef studen bae i mit tugeta long evri wik. “Sloslo mi stat blong filim Spirit long ol eli moning ia, mo mi rid long miwan, mo mi bin girap long evri moning,” Sten i talem. “Afta smol taem mi bin filim se dei ia bae i no go gud sapos mi no stadi long moning. Mo mi stat blong kasem wan testemoni nating we i no gat wan i bin luk se i olsem.”

Sten i eksplenem se “afta smol taem, mi bin andastanem wanem nao ol filing ia. Mi bin filim gud abaot wanem mi bin stap lanem, mo mi bin filim Spirit. Mi bin filim se hemia i stret. Mo mi bin save se hem i wan samting we mi wantem bildim laef blong mi antap long hem.”

Be from wanem Sten i bin talem yes taem hem i bin filim se hem i bisi tumas? “Mi ting se paoa blong Tabu Spirit i bin wok long mi,” hem i talem. “Ating mi bin rere from. Mekem se taem Tor Lase i bin kam wetem fet, hem i bin mekem moa bitim wanem oli askem, mo mi bin rere blong kasem invitesen blong hem. Hemia nao wei we Lod i wok folem.”

Samtaem wan yia afta, Tor Lase i bin mekem tingting blong go long wan misin mo oli bin singaotem hem blong hem i sevem misin blong hem long Nowe. Long taem ia Sten i bin gohed blong mekem testemoni blong hem long saed blong gospel i strong moa. Sten i talem, “taem Tor i bin kambak long misin blong hem, hemia i mekem strong tingting blong mi tu blong go long wan misin. Mi mekem tingting blong mi se bae mi sud go from se mi bin wantem givim seves long Lod, mo mi bin tingting se sapos mi no go, bae mi save harem nogud from long ful laef blong mi.”

Sten i tingbaot se afta we hem i bin toktok wetem ol prishud lida blong hem abaot blong go long wan misin, hem i bin filim se leg blong hem i stap flot taem hem i bin stap gobak hom. Bifo hem i aot blong go long wan misin (long Nowe tu), Sten i bin mitim fiuja waef blong hem, Hilde, long wan yut konfrens long Oslo. Tufala i bin raet long tufala long taem blong misin blong hem, mo afta we hem i kambak hom, tufala i bin mared. Naoia, tufala i gat fo pikinini: tu boe we tufala i mared long tempol, mo tu yangfala gel, we tufala i stap long hom mo stap aktiv long seminari.

“Long naet ia we Tor Lase i bin kam long haos blong mifala—hemia i bin jenisim laef blong mi fulwan,” Sten i talem. Visit ia i mekem hem i stat long rod we hem i mitim waef blong hem, i bin sevem wan misin, mo i bin statem wan famle, evriwan wetem leg blong hem we i stanap strong long graon blong gospel. “Mi bin wan branj presiden, wan distrik presiden, wan bisop—evri samting ia from se Tor Lase i bin kam long haos blong mifala mo mi bin statem seminari program.” Evri samting ia, from se Tor Lase i gat hat blong mekem moa bitim wanem oli askem.