Singsing mo Fasin blong Talem Stori
Taem oli bin singaotem waef blong mi, Sandra, mo mi blong sev long Saot Afrika Duban Misin, mitufala i stat blong lukaotem wan komuniti seves projek. Mi bin wan memba blong Momon Tabenakol Kwaea blong ova 20 yia, mo waef blong mi, wan help long laebri, i bin kondaktem stori taem long wan praemeri skul. Taem misin presiden blong mitufala i wantem blong openem misinari wok long wan taon kolosap, mitufala i bin save se hemia i janis blong mitufala.
Mitufala i visitim smol taon ia mo faenemaot se i no gat ol laebri long ol skul, be i gat wan smol komuniti laebri nomo long taon. Ol yang elda oli bin mekem mitufala i mitim daerekta blong laebri ia. Mitufala i eksplenem long hem se mitufala i wantem blong holem wan stori taem evri wik blong ol pikinini. Daerekta ia, i wan woman, mo hem i no sua smol, be afta we hemi tingting smol hem i bin agri blong talemaot long ol man mo mitufala i save traem.
Long fas dei faef pikinini oli kam. Sloslo plante moa i stap kam. Afta sam manis mitufala i bin askem help blong wan yang woman, wan niu konvet, we i toktok gud Inglis mo Zulu (wan lanwis blong Afrika). Atendens long stori taem ia i bin kam antap, mo daerekta mo ol papa mo mama oli bin glad long wanem i bin stap hapen.
Ol pipol blong Zulu oli laekem blong singsing, mekem se mifala i ademap sam simpol singsing mo poem long stori taem blong mifala. Long en blong misin blong mitufala, mitufala i stap holem tu o tri sesen blong singsing mo stori taem long wan wik blong mekem se i gat ples blong ova 100 pikinini we oli bin stap kam. Hem i wan blesing blong luk ol pikinini blong ol nara ples, mo bae oli stat blong singim ol singsing mo talem baehat ol poem long mitufala.
Wan narafala blesing i bin kamaot long seves blong mitufala long eria ia. Taem lokol Jos membasip i stap gro mo mitufala i nidim wan ples blong holem ol Sandei miting blong mifala, daerekta blong laebri ia i talem se bae mifala i save yusum laebri, be bae mifala i no pem rum.
Mifala i glad tumas se Lod i bin helpem mitufala blong faenem wan wei blong yusum ol talen blong mitufala, blong givim seves long komuniti, mo blong help blong openem wan eria blong misin.