Stap Tijim Tru Doktrin

Toktok blong God i doktrin we Jisas Kraes mo ol profet blong Hem i bin tijim. Alma i bin save se ol toktok blong doktrin i gat bigfala paoa. Oli save openem ol tingting blong ol pipol blong luk ol samting long saed blong spirit we stret ae blong yumi i no save luk. Mo oli save openem ol hat long ol filing blong lav blong God mo lav blong trutok. Sevya i bin yusum tufala paoa ia, blong openem ol ae blong yumi mo openem ol hat blong yumi long seksen 18 blong Doctrine and Covenants taem we Hem i bin stap tijim doktrin blong Hem long olgeta we Hem i wantem olgeta blong givim seves long Hem olsem ol misinari. Taem yu lisin, tingbaot yangfala man ia long famle blong yu we i stap rere hemwan blong go long wan misin. Hemia olsem wanem Masta i bin tijim tu long ol wokman blong Hem mo olsem wanem yu save tijim doktrin blong Hem long yangfala man we yu lavem:

Hem i toktok long Oliva Kowdri mo Deved Witma long wan wei blong givim komanmen (from Hem i komandem evri man long evri ples blong sakem sin, mo Hem i toktok long olgeta semmak olsem we Hem i mekem wetem aposol blong Hem Pol, from oli kasem sem koling we Pol i bin kasem).

Hem i talem long tufala blong tingbaot se wan praes blong wan sol i bigwan tumas long ae blong God (luk long D&C 18:9–10).

Hem i stat blong talem hamas Hem i trastem tufala. Afta Hem i pulum ol hat blong tufala long Hem taem Hem i talem hamas Papa blong Hem mo Hem, Tufala i lavem evri sol. Nekis samting, Hem i gobak long stamba blong doktrin blong Hem. Hem i tokbaot hamas samting i stap we i mekem se bae yumi lavem Hem:

Hem i talem se Lod Ridima blong yumi i fesem ded long bodi mo i filim sobodi blong evri pipol blong mekem se evri pipol i save sakem sin mo kam long Hem.

Hem i girap bakegen long ded blong mekem se Hem i save karem evri pipol i kam long Hem sapos oli sakem sin.

Hem i talem se Hem i glad bigwan taem wan man i sakem sin (luk long D&C 18:11–13).

Wetem we Hem i tokbaot doktrin blong misin blong Hem blong openem ol hat blong olgeta, Hem i givim olgeta komanmen blong Hem, blong Hem i givim koling long olgeta blong oli singaotem ol pipol ia blong sakem sin (luk long D&C 18:14).

Long en, Hem i openem ol ae blong olgeta blong luk i go ova long laef long wol ia. Hem i tekem olgeta mo yumi long fiuja ples we i stap, olsem we oli tokbaot long bigfala plan blong sevem man, we bae yumi save kasem yet. Hem i talem long yumi from ol gudfala asosiesen, we oli gud inaf blong yumi givim evri samting we yumi gat blong stap glad:

Sevya i bin talem se sapos yumi wokhad long evri dei we yumi gat blong tijim fasin blong sakem sin long ol nara man mo karem wan man nomo i kam long Hem, bae yumi kasem bigfala glad wetem man ia long kingdom blong Papa.

Mo sapos yumi glad bigwan from wan man we yumi karem i kam long Sevya long kingdom blong Papa, nao, bae i olsem wanem sapos yumi karem plante man i kam long Hem! (luk long D&C 18:15–16).

Long sam long ol stori, Hem i tijim doktrin blong openem ol hat blong yumi long lav blong Hem. Mo Hem i tijim doktrin blong openem ol ae blong yumi blong luk ol tru samting long saed blong spirit, we oli no klia long tingting blong man we i no fulap long Spirit blong Trutok.

Nid blong openem ol ae mo ol hat i talem long yumi olsem wanem yumi mas tijim doktrin. Paoa blong doktrin i kam taem Tabu Spirit i konfemem se hemia i tru. Yumi traem evri samting we yumi save mekem blong mekem rere olgeta we yumi tijim, blong kasem kwaet, smol voes ia. Hemia i nidim sam fet long Jisas Kraes. I nidim sam tingting we i stap daon, fasin blong wantem folem tingting we Sevya i gat from yumi. Man we bae yu helpem i save gat smosmol long wan long tufala samting ia, be yu save mekem hem blong gat wan hat blong wantem biliv. Moa long hemia, yu save gat tras aot long wan nara paoa blong doktrin. Trutok i save mekem rere rod blong hemwan. Blong lisin long ol toktok blong doktrin long wan simpol wei i save planem sid blong fet long hat. Mo iven wan smol sid blong fet long Jisas Kraes i invaetem Spirit.

Yumi gat moa kontrol ova long wanem yumi rere long hem yumiwan. Yumi stadi long toktok blong God we i stap long ol skripja mo stadi long ol toktok blong ol profet we oli laef. Yumi livim kakae mo prea blong invaetem Spirit blong yumiwan mo man we bae yumi tijim.

From se yumi nidim Tabu Spirit, yumi mas lukaot gud blong no go aotsaed tumas be yumi mas tijim tru doktrin nomo. Tabu Spirit hem i Spirit blong Trutok. Konfemesen blong Hem i kam taem yumi blokem ol tingting olbaot o tingting blong yumiwan. Hemia bae i had blong mekem. Yu lavem man we yu stap traem blong helpem hem. Hem i save fogetem doktrin we hem i bin harem fastaem. I wan temtesen blong traem wan samting we i niu o we i gat intres long hem. Be yumi invaetem Tabu Spirit olsem kompanion blong yumi taem yumi lukaot gud blong tijim nomo tru doktrin.

Wan long ol wei blong blokem yumi blong go kolosap long ol giaman doktrin, i blong jusum blong stap simpol long tijing blong yumi. Sefti i save kam long simpol wei olsem, mo yumi no lusum tumas mining. Yumi save hemia from se Sevya i bin talem long yumi blong tijim doktrin we i moa impoten long ol smol pikinini. Lisin long komanmen blong Hem: Hem i talem se sapos ol papa mo mama oli gat ol pikinini long Saeon, o long wan long ol stek we i oganaes, sin bae i stap antap long ol hed blong ol papa mo mama sapos oli no tijim ol pikinini blong olgeta blong andastanem ol doktrin blong sakem sin, fet long Kraes, Pikinini blong God we i laef, baptaes, mo presen we i Tabu Spirit taem putum ol han antap long hed taem oli gat eit yia (luk long D&C 68:25).

Yumi save tijim wan pikinini tu blong andastanem doktrin blong Jisas Kraes. Nao hem i posibol, wetem help blong God, blong tijim doktrin blong stap sef long wan simpol wei.

Yumi gat bigfala janis wetem ol yangfala. Gudfala taem blong tij hem i taem yu stat eli, long taem we ol temtesen blong ol enemi blong ol pikinini long wol i no save spolem olgeta yet mo bifo i save kam moa had long olgeta blong harem ol toktok blong trutok long medel blong ol hadtaem we oli fesem wanwan.

Wan waes papa o mama bae i neva save mestem wan janis blong karem ol pikinini blong hem i kam tugeta blong lanem doktrin blong Jisas Kraes. Ol kaen taem olsem i no hapen tumas taem yumi komperem wetem ol traehad blong enemi. Blong evri aoa we wan pikinini i kasem paoa blong doktrin long laef blong hem, i save gat handred aoa blong ol mesej mo pikja blong giaman o blong pusum man blong no wantem save long ol trutok we i save sevem olgeta.

Kwestin bae i no se, yumi taed tumas blong mekem rere blong tijim doktrin, o bae i moa gud blong mekem wan pikinini i kam moa kolosap long yumi taem yumi pleplei, o bae pikinini i stat blong tingting se yumi prij tumas. Kwestin i mas olsem se, “Wetem smol taem mo smol janis nomo, wanem nao ol toktok long doktrin we bae mi givim bae i mekem olgeta oli strong blong stanap agensem ol atak, we i tru se bae oli kam, agensem fet blong olgeta?” Ol toktok yu talem tedei bae i wanem we oli save tingbaot. Mo dei ia tedei bae i go nao.

Ol yia i pas, yumi tijim doktrin long wan moa gud wei we yumi save faenem, mo i gat sam we oli no ansa yet. I gat harem nogud long hemia. Be i gat hop long rekod blong ol famle long saed blong skripja. Tingbaot Yangfala Alma mo Inos. Long taem we tufala i fesem hadtaem, tufala i tingbaot ol toktok blong ol papa blong tufala, ol toktok blong doktrin blong Jisas Kraes (luk long Inos 1:1–4; Alma 36:16–19). Ol toktok ia i bin sevem tufala. Tijing blong yu abaot tabu doktrin ia bae oli no save fogetem.

Tu samting we yu no sua long hem i save kam long tingting blong yu. Bae yu save askem sapos yu save doktrin gud inaf blong tijim. Mo sapos yu bin traem finis blong tijim, ating bae yu save askem from wanem yu no save luk plante gud risal.

Long famle blong mi i gat wan stori blong wan yang woman we i bin gat strong paoa long tingting blong stat tijim doktrin taem hem i bin wan niu konvet we i no skul gud. I tru we ol risal blong tijing blong hem i no kam long en yet, be i givim mi tingting blong save wet longtaem from ol risal blong ol hadwok blong miwan.

Meri Bomeli i bin bubu blong bubuwoman blong mi. Mi neva mitim hem. Apugel blong hem i bin harem hem i talem stori blong hem mo hemi bin raetem daon.

Meri i bon long 1830. Ol misinari i bin tijim famle blong hem long Switsilan taem hem i bin gat 24 yia. Hem i stap laef yet long hom, i stap wivim mo salem klos blong help blong sapotem famle blong hem long wan smol fam blong olgeta. Taem famle i bin harem doktrin blong gospel blong Jisas Kraes we i kambak, oli bin save se i tru. Oli bin kasem baptaes. Ol brata blong Meri oli bin kasem koling blong go long misin, mo no karem paos blong mane o basket blong travel. Ol famle we i stap i bin salem evri samting we oli gat blong go long Amerika blong go mit wetem ol Sent.

I no bin gat inaf mane blong evriwan i go. Meri i bin agri blong stap from hem i bin filim se hem i save winim inaf mane tru long ol samting we hem i stap wivim blong sapotem hemwan mo sevem mane blong rod blong hem. Hem i faenem rod blong hem i go long Belin mo go long hom blong wan woman we i bin pem hem blong wivim klos blong famle ia. Hem i stap long wan rum blong ol wokman mo putum masin blong somap long living rum blong hom.

Long taem ia, hem i bin agensem loa blong tijim doktrin blong Jos blong Jisas Kraes blong Ol Lata-dei Sent long Belin. Be Meri i no save kipim gudfala nius we hem i bin kasem blong hemwan. Woman blong haos ia mo ol fren blong hem i kam raon long masin blong Somap ia blong harem gel Switsilan ia i tij. Hem i tokbaot taem Papa long Heven mo Jisas Kraes i kamaot long Josef Smit, abaot visit blong ol enjel, mo abaot Buk blong Momon. Taem we hem i kam long ol stori blong Alma, hem i bin tijim doktrin blong Laef Bakegen long Ded.

Hemia i mekem sam problem wetem wok blong hem wetem ol samting we hem i stap wivim. Long ol dei ia plante pikinini i bin ded taem oli smol. Ol woman we oli bin raonem masin blong somap ia oli bin lusum ol pikinini we oli ded, sam long olgeta oli lusum moa long wan pikinini. Taem Meri i bin tijim trutok se ol smol pikinini oli ol king mo kwin blong selestial kingdom mo we ol woman ia oli save stap wetem olgeta bakegen mo wetem Sevya mo Papa blong yumi long Heven, ol wota blong ae i ron long ol fes blong ol woman ia. Meri tu i bin krae. Evri wota blong ae we i ron ia i mekem klos blong Meri we i bin wivim i wetwet.

Tijing blong Meri i krietem wan problem we i moa bigwan. Nomata Meri i bin plis bigwan long ol woman blong no tokbaot wanem hem i bin talem long olgeta, be ol woman ia oli bin talem long nara pipol. Oli bin serem doktrin we i givim glad long olgeta wetem ol fren blong olgeta. Mekem se wan naet, wan man i noknok long doa. Hem i wan polis. Oli bin tekem Meri i go long kalabus. Long rod blong olgeta hem i bin askem polis nem blong jaj we bae hem i mitim long nekis moning. Hem i bin askem sapos hem i gat wan famle. Hem i bin askem sapos hem i wan gudfala papa mo wan gudfala hasban. Polisman ia i smael taem hem i stap tokbaot jaj ia olsem wan man blong wol.

Long kalabus, Meri i bin askem wan pensel mo sam pepa. Hem i raetem wan leta i go long jaj. Hem i bin raetem abaot Taem Jisas Kraes i bin laef bakegen long ded olsem we oli tokbaot long Buk blong Momon, abaot spirit blong wol, mo abaot hamas taem jaj i gat blong tingbaot mo luksave laef blong hem bifo hem i fesem las jajmen. Hem i bin raetem se hem i bin save se jaj i gat plante sin blong sakem we bae i mekem hat blong famle blong hem i harem nogud mo mekem hem i harem nogud. Hem i bin raet truaot long naet. Long moning hem i bin askem polisman blong tekem leta blong hem i go long jaj. Polisman i bin mekem.

Let afta, jaj i odarem polisman blong mitim hem long ofis blong hem. Leta we Meri i bin raetem i soem tru se hem i bin tijim gospel mo hemia i brekem loa. Nomata long hemia, polisman ia i gobak luk Meri long kalabus. Hem i talem long Meri se evri samting we oli putum se bae hem i pas long kot from oli bin karemaot, mo hem i fri blong go. Tijing blong hem abaot doktrin blong gospel blong Jisas Kraes we i kambak i bin openem ol ae mo ol hat i bin inaf blong mekem hem i go long kalabus. Mo afta we hem i talemaot doktrin blong sakem sin long jaj i mekem hem i kamaot long kalabus.¹

Tijing blong Meri Bomeli i no bin tajem ol woman raon long masin blong somap ia nomo wetem jaj. Papa blong mi, apuboe blong hem, tufala i bin toktok long mi truaot ol naet kolosap long taem blong ded blong hem. Hem i bin tokbaot glad taem blong kam tugeta we bae i tekem ples i no longtaem long spirit wol. Kolosap mi save luk wan laet blong san we i klia mo ol smael long ples blong paradaes ia taem hem i stap tokbaot wetem strong tingting se ol samting ia oli tru.

Long wan ples long storian mi bin askem hem sapos hem i gat sam sin yet blong hem i mas sakem. Hem i smael. Hem i laf smol mo talem, “No, Hal, mi stap sakem sin semtaem we mi stap gohed long laef blong mi.” Doktrin blong paradaes we Meri Bomeli i bin tijim olgeta woman ia i bin wan tru samting long apuboe blong hem. Mo tu, doktrin we Meri i bin tijim long jaj i bin lidim laef blong papa blong mi blong mekem gud. Hemia bae i no en blong tijing blong Meri Bomeli. Rekod i soem se toktok blong hem bae i sendem tru doktrin i go long plante jeneresen long famle blong hem we oli no bon yet. From se hem i bin biliv se iven wan niu konvet i bin save inaf doktrin blong tijim doktrin, nao ol tingting mo hat blong ol laen blong hem bae oli open, mo bae oli save kam strong moa long faet ia.

Ol laen blong yu bae oli tijim doktrin long wanwan long olgeta from yu bin tijim. Doktrin i save mekem moa bitim openem ol tingting long ol samting long saed blong spirit mo ol hat long lav blong God. Taem doktrin ia i givim glad mo pis, hem i gat paoa tu blong openem ol maot. Semmak olsem ol woman ia long Belin, ol laen blong yu bae oli no save kipim ol gud nius ia blong olgetawan nomo.

Mi glad tumas blong laef long wan taem we yumi mo ol famle blong yumi i gat fulnes blong gospel we i kambak. Mi glad from misin blong Sevya blong givim lav long yumi, mo from ol toktok blong laef we Hem i bin givim long yumi. Mi prea se yumi save serem olgeta toktok ia wetem olgeta we yumi lavem. Mi testifae se God Papa blong yumi i laef mo Hem i lavem evri pikinini blong Hem. Jisas Kraes i Stret Pikinini blong God we i gat bodi mo Sevya blong yumi. Mi save se Hem i bin girap bakegen long ded, mo mi save se yumi save kam klin tru long fasin blong obei ol loa mo ol odinens blong gospel blong Jisas Kraes.