Bae I Gud blong Livim Skul blong Go long Wan Misin?

Mi graduet long hae skul long 1992 mo afta mi givim ol pepa blong mi blong sevem wan fultaem misin. Taem we kol blong mi i kam, oli bin akseptem mi blong go long wan gudfala yunivesiti long Naejeria blong stadi long saed blong meresin.

Long Naejeria blong go long wan medikol skul hem i had tumas mo oli no save givim long yu wan seken janis bakegen. Taem mi kasem sam toktok long sam fren mo ol famle memba blong livim misin kol blong mi, mi eksplenem se mi gat wan responsabiliti blong sev mo mi bin stap wet blong mekem samting ia long fas taem finis taem mi bin joenem Jos sikis yia i pas. Mi sua se bae oli save akseptem mi bakegen blong go long medikol skul afta long misin blong mi, be plante oli se bae mi jes filim sore biaen from desisen ia.

Mi mi glad long ol hom tija, ol famle memba, mo ol fren long Jos we oli bin sapotem desisen blong mi blong sev. Atendem seminari, stadi ol skripja, mo laef folem gospel i bin helpem mi blong stanap strong long ol tingting blong mi.

Olsem wan misinari mi setemap ol gol blong miwan mo wokhad from. Twantefo manis i pas mi kasem wan rilis wetem ona. Lod i blesem ol riten misinari be i no promesem olgeta se bae oli no save kasem ol hadtaem. Blong wan riten misinari blong Naejeria, ol hadtaem ia i gat hemia blong no save faenem wok mo no gat mane blong edukesen.

Ol fas tri yia afta long misin blong mi, mi bin tekem mo pasem tri (3) eksam blong save go long skul, be oli no bin akseptem bak mi long medikol skul. Long ol semfala tri (3) yia ia, mi no bin save faenem wan wok. Mi wantem blong bilivim sam long ol fren mo famle memba blong mi se oli bin raet mo hem i bin wan mistek blong lego janis ia blong mi blong go long medikol skul.

Long misin blong mi, mi bin lanem blong livim ol hevi samting blong mi long Lod, mekem se mi letem Hem i daerektem laef blong mi i folem tingting blong Hem. Taem mi livim ol hevi samting ia, ol samting i stat blong wokaot gud blong mi—be i no olsem we mi bin wantem.

Long wan fast Sandei mi tingting blong livim kakae mo prea had from help blong Lod. Long naet ia wan man i noknok long doa blong mi. Taem mi openem doa, mi sek blong luk wan fren we mi bin mitim long wan sekiuriti trening we mi bin atendem sikis manis i pas finis. Hem i talem long mi se i gat wan wok blong sekiuriti we i jes open long wan kampani we bigfala brata blong hem i bin wok long hem mo se kampani ia i nidim wan man hariap blong wok. Mi, mi wan nomo we hem i tingbaot.

Long nekis dei kampani i tekem mi blong wok blong olgeta. Spesel eksperiens ia i konfemem long mi se Papa long Heven i no livim mi mo se mi nidim blong gat tras long Hem. Wok ia i olsem wan wei blong kasem ol narafala wok.

Ol blesing we i kam long God oli no kam nomo tru long ol samting we yumi kasem long wol ia nomo. Mi bin traehad long ol yia afta long misin blong mi blong faenem wan wok long wol ia, be Lod i bin blesem mi long saed blong spirit. Petriakel blesing blong mi i daerektem mi blong mared mo talem long mi se janis blong hae edukesen bae i kam yet. Mo janis ia i bin kam.

Nating we mi neva go long medikol skul, mi bin kasem ol sem digri level ia long akaonting mo matimatik. Lod i bin blesem mi wetem inaf samting blong laef mekem se mi bin save mared.

Sapos yumi sevem wan gudfala misin, Lod, Hem i mas blesem yumi taem yumi lukaotem ol janis blong hae edukesen afta long misin. I no gat samting long laef blong wan yang man o woman i save bitim ol eksperiens, fasin blong lan, mo ol blesing blong wan fultaem misinari seves.