Lukaot Gud Insaed long Olgeta Skripja

Presiden Howod W. Hanta (1907–95): “Mi rekomendem long yufala blong tekem ol revelesen blong God olsem standet we yumi mas laef folem insaed long laef blong yumi, mo standet blong yusum blong skelem evri desisen mo evri aksen blong yumi. Folem hemia, taem yufala i gat ol wari mo ol jalenj, fesem olgeta taem yufala i tanem yufala long olgeta skripja mo ol profet” (“Fear Not, Little Flock,” insaed long 1988–89 Devotional and Fireside Speeches [1989], 112).

President Esra Taf Benson (1899–1994): “Blong gat sakses long stret mo gud fasin, blong gat paoa blong stap longwe long harem nogud mo blong stanap agensem temtesen, blong kasem givhan long laef blong yumi evri dei, blong sol i kam gud bakegen—olgeta samting ia oli sam promes nomo we Lod i givim long olgeta we bae oli kam folem toktok blong Hem. … Sam blesing, bae yumi faenem olgeta nomo insaed long olgeta skripja; taem yumi kam long tok blong Lod nomo bae yumi faenem mo taem yumi holem taet tok blong Lod. …

“… Stretem tingting blong yufala blong stadi bakegen long olgeta skripja. Draonem yufala insaed long olgeta blong yufala i gat paoa blong Spirit i kam long yufala long ol koling blong yufala. Ridim olgeta skripja wetem ol famle blong yufala mo tijim ol pikinini blong yufala blong lavem mo holem taet olgeta skripja” (“The Power of the Word,” Ensign, Mei 1986, 82).

Presiden Spensa W. Kimbol (1895–1985): “Taem yufala i stap kam blong save gud moa ol trutok we oli stap insaed long olgeta skripja, bae yufala i kam moa gud blong kipim nambatu bigfala komanmen, blong lavem neiba blong yufala olsem yufalawan. Kam ol man we oli skul gud long olgeta skripja—i no blong daonem ol narafala, be blong leftemap olgeta! I tru, huia bakegen i gat bigfala nid blong holem taet gud olgeta trutok blong gospel (we oli stap lukaot long ol taem blong nid), be ol woman mo mama nomo we oli stap mekem plante samting blong lukaotem mo tijim ol pikinini blong olgeta?” (“The Role of Righteous Women,” Ensign, Nov. 1979, 102).

2 Nifae 4:15: “From sol blong mi i glad long ol skripja, mo hat blong mi i tingting hevi long olgeta mo mi raetem olgeta samting ia blong ol pikinini blong mi i lanem olgeta mo oli save yusum blong helpem olgeta.”

Juli B. Bek, Rilif Sosaeti jeneral presiden: “Wan gudfala wei blong stat stadi long olgeta skripja i blong ‘putum’ olgeta long yumiwan (luk long 1 Nifae 19:23). Sam pipol oli stat blong jusum wan topik insaed long Topical Guide we oli nidim moa blong save abaot. O oli stat long stat blong wan buk blong skripja mo oli lukaotem sam spesel tijing. …

“Wanem wei we wan i statem stadi long olgeta skripja, ki blong openem doa blong ol impoten save i blong gohed blong stadi. Mi neva taed blong stap faenemaot ol rij trutok insaed long olgeta skripja from se oli tij ‘long klia fasin, hem i klia olsem we ol toktok i save kam klia’ (2 Nifae 32:7). Olgeta skripja oli testifae abaot Kraes (luk long Jon 5:39). Oli talem long yumi evri samting we yumi mas mekem (luk long 2 Nifae 32:3). Oli ‘mekem [yumi] waes mo i save lidim [yumi blong save stanap strong long bilif blong [yumi] long Jisas Kraes, blong God i sevem [yumi]’ (Seken Timoti 3:15).

“Tru long taem we mi stap ridim skripja mo ol prea we i go wetem stadi blong mi, mi bin kasem save we i tekem pis i kam long mi, mo i helpem mi blong kipim paoa blong mi i stap long ol fas samting we i blong taem we i no save finis. From we mi bin stat blong ridim ol skripja evri dei, mi bin lanem abaot Papa blong Mi long Heven, Pikinini blong Hem Jisas Kraes, mo wanem mi nidim blong mekem blong kam olsem Tufala” (“My Soul Delighteth in the Scriptures,” Liahona mo Ensign, Mei 2004, 108–9).

Presiden Tomas S. Monson: “Ol tabu skripja oli flasem ol buksef blong yumi. Mekemsua se oli givim kakae long ol maen blong yumi, mo oli givhan long ol laef blong yumi” (“The Mighty Strength of the Relief Society,” Ensign, Nov. 1997, 95).