Fren I Go long Fren
Ol Promes blong Wan Profet
Lod i bin komandem yumi blong lukaotem ol komanmen we i stap insaed long Doctrine and Covenants, from oli tru mo fetful. Ol profesi we i stap long Doctrine and Covenants bae oli kamtru yet (luk long D&C 1:37).
Truaot long laef blong mi, mi bin lanem se taem yumi folem ol tijing blong ol profet blong yumi, yumi kasem ol blesing we oli promesem. Long Epril 1986 jeneral konfrens, Presiden Esra Taf Benson (1899–1994) i bin promesem ol famle se sapos oli ridim ol skripja tugeta evri dei, bae Spirit i fulumap ol hom blong olgeta.1
Mi mo dia waef blong mi i bin wantem blong folem kaonsel ia. Mifala i bin setemap wan gol blong ridim wan japta long Buk blong Momon long wan dei wetem trifala pikinini blong mitufala—Joj, 10; Susi, 9; mo Luis, 3. Mifala i rid evri dei, wanwan long mifala i ridim wanwan ves. Nomata we Luis i no save rid yet, hem i wantem blong tekempat. Hem i sidaon long leg blong mi, fesem mi, wetem Buk blong Momon long medel blong mitufala. Taem hem i taem blong mi blong rid, bae mitufala tugeta i rid folem fingga we mi stap poenem long wanwan toktok, mo Luis bae i ripitim laod evri toktok we mi ridim taem hem i stap lukluk long ol toktok ia we i tanem i go daon.
Bifo hem i kasem faef yia, Luis i askem, “Wetaem nao bae mi save rid?”
Mifala i eksplenem long hem se taem hem i bigwan smol, bae hem i go long skul mo lanem olsem wanem blong rid.
Hem i ansabak, “Be mi save rid finis!”
Mi sapraes long hemia, mi givim long hem wan Buk blong Momon. Hem i openem buk ia mo tanem i go daon, i luk antap, mo i stat blong rid gud. Hem i bin lanem olsem wanem blong rid taem hem i stap folem mifala i stap rid long Buk blong Momon!
Taem Luis i gat sikis yia, samtaem hem i go wetem mi blong visitim ol memba blong Jos. Mi askem hem blong serem testemoni blong hem mo serem wan sot skripja mesej we mi bin tijim hem. Oltaem we hem i stap ridim Buk blong Momon, hem i holem buk ia mo tanem i go daon mo i luk antap long buk ia mo i stat rid antap.
Mi testifae long yu se sapos yu stat blong ridim ol skripja taem yu wan smol pikinini, bae yu save andastanem gud ol promes blong Lod mo bae yu save wanem Hem i wantem yu blong mekem. Sam dei bae yu kam wan papa o mama mo gat smol pikinini blong yuwan. Tijim olgeta blong ridim ol skripja, mo bae yu luk promes ia long Ol Proveb 22:6 i kamtru: “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.”
Naoia Luis i stap finisim ol yunivesiti stadi blong hem mo i wok fultaem. Nomata i let olsem wanem taem hem i kambak long hom long wok, skul, o wan Jos wok, hem i mas ridim wan japta long Buk blong Momon bifo hem i go slip. Promes blong profet i bin fulfil tru: mo olsem wan risal taem mifala i ridim tabu buk ia, famle blong mifala i bin kasem blesing mo mifala i kam kolosap moa.
Mi invaetem yu blong ridim ol skripja evri dei. Sapos i posibol, ridim wetem famle blong yu. Mi leftemap tingting blong yufala ol boe blong rere blong sevem ol misin. Mi invaetem evriwan long yufala blong gat wan gol blong sil long tempol blong ol taem we i no save finis. Mo laswan mi wantem yufala blong tingbaot kaonsel we i kam long God we i kam tru long Presiden Godon B. Hinkli (1910–2008), we i bin talem long yumi: “Yu nidim evri edukesen we yu save kasem. … nomata sapos hem i blong fiksim ol aes bokis, o wok blong wan dokta blong katem man, yu mas trenem yuwan.”2
Ol dia pikinini blong mi, lisin long ol tija blong yufala, stap obei long klasrum, mekem bes blong yu, mo lanem plante samting. Lod i gat ol rij blesing blong yu i stap mo blong famle blong yu. Diuti blong yu hem i blong “folem profet; hem i save rod.”3
Kolosap long taem we hem i gat 16 yia, i no longtaem afta long baptaes blong hem.
Boe blong hem, Luis taem hem i gat 4 yia.
Ol foto oli kam wetem glad blong Elda Oktaviano Tenorio; pikja i kam long Robet A. MaKei