Kakabwaiaki man Nakoau

“Te Uea e a tia ni weteiko bwa kona mwakuri bwa te beretitenti ibukin ara Moanrinan,” te beretitenti n te mwaanga e tuangai. Ai tibwa teuana te ririki man te tai are I kitana te Raurere kiraati ao uoua te ririki man te tai are I a tia ni bwabetitoaki nakon te Ekaretia. I bon aki kakoaua.

“Akea irou te taotaonnano are e kainnanoaki ibukin reireinakiia ataei,” I tuangnga.

“Ko kakoauaa am wewete e roko ma iroun te Atua?” e titiraki. “Ngkana E weteira, E katauraoira ke kakabwaiaira ma konabwai ake a kainanoaki.”¹

Ana taeka a kaonrakeai ma te onimaki, ao te tai ae waekoa I ataia bwa te Uea e na bon kainanoai n te Moanrinan. Akea au iango bwa N na kanga ni kakoroa nanon weteau ae boou, ma I ataia bwa E na kairai.

I tangiria ni karoa te kabanea n tamaroa ni mwakuri ae I kona, ma tabeua te namakaina imwiina tinau e a kuneaki bwa iai irouna te kaentia. N ikotaki ma anne, I kamatebwaia iaon mwakurian te kateitei. I kunea bwa e a rangi ni matoatoa kaitaraakin tabeu ni kabane n te mweenga, n te iuniwetiti (university), ao n te Moanrinan. Ingaingan nanou e moanna ni kekerikaaki, ao teuana te Taabati inanon te taromauri a bane n roko irou, ao te rannimata e a moanna ni bwaro.

Raou temanna ae kaain te uoote e noorai n arou arei ao e anganai tabeua taeka n reirei aika kamiimi: “Judith, te kawai ae te kabanea n tamaroa ae na uotiko rinanon taian kangaanga ko na bon kabuako inanon te euangkerio ao inanon te mwakuri ibukiia tabeman,” e taku. “Ni karaoakina, kona noora te Uea bwa e na kabebetea uotam.”

Ngke I a ira ana taeka n reirei ae kaunganano, aroarou e bitaki, au onimaki e a kakorakoraaki, ao I a kaonaki ma te nano ae e korakora ni beku ibukin te Uea. Kataakiu a reitinako, ma I a katabua rabwatau nakon weteau ao man n ingainga ni kan nooria ataei ni katoa Taabati. A reireinai tabeua bwaai ni katoa wiiki ngke a kaoti aia kakoaua rinanon aia mwakuri. Ngke a nako namakaina, I noora aron te Uea ni kaeta arou ao arona ni karikirakei au konabwai aika onoti ao tarena ae I aki ataia bwa iai irou.

N te ririki are imwiina I kitana Barranquilla, Colombia, n nako Bogotá ibukin tii teuana te namakaina ma tinau bwa e kainanoa bwain aorakian aorakina. Inanon te tai anne ao I tataro n taainako ao I namakina te kaaniaki nakon te Uea. I a baireia ni bita oin au reirei n te iuniwetiti (university), ao rinanon te kairi, I reiakinaki bwa te Uea e tangirai ni kabanea maiu n reireiniia ataei. Ngke I a okira te reirei, I moana au kamatebwai iaon te tikurii (degree) n taekan te reirei ae onoti.

I ataia bwa Tamau are ikarawa e a tia n anganai nakoau n te Moanrinan ni katauraoai. Ngke I a mwakuri, I a kunea au mwakuri ae katauau, ao ngke I a maiuakina te euangkerio ao ni kabuaai inanon au mwakuri, I namakinna bwa I mena inanon bain te Uea.

Te koaua are e reke irou inanon au tai ni mwakuri n te beretitentii n te Moanrinan ao imwiina n te beretitentii n te titeiki n te Moanrinan e a tia n reitanako arou ni kaaina te Ekaretia. I a tia n reireinai bwa N na kanga n reirei ma te tangira, n rinanon te aonaaba n aiaron te ataei, ao ni kakaea ana kairiiri ao kaunganano te Uea.

Ni katooa te bong ngkana I anga reirei n te reirei ae uoua te taeka ae kamanenaaki iai inanon au kaawa ae bubura, I iangoi kekeiaki, kakaewenako, ao kakabwaia n ririki akekei. Ataei ake a mena n te Moanrinan n taai akanne a riki ngkai bwa kairake, ma mataia ae a bon teimatoa n anga te oota ma te tangira ibukin te Tia Kamaiu ao Ana Euangkerio.

I ataia bwa ngkana e weteira te Uea, E reireiniira ao ni kataneiaira ao ni katikuiia taan kairiiri inanon kawaira ni buokiira ni maiuakina ana euangkerio Iesu Kristo ae tamaroa aio.