Aia Kiaba Bwaeoniia
“Ma te tangira ae kororaoi bon ana tangira Kristo ae itiaki, ao e teimatoa n uaa te toki” (Moronaai 7:47).
Sarah! Sarah, teirake!” Christiana Larsen ae nimaua ana ririki e taetae nakon tarina ae uarereke. “E a boo te tai n nako.”
Sarah ae teniua ana ririki e kainnano ni kaurei matana.
“Ma e bon teimatoa n roo tinaniku,” e ngurengure ma tenimatutu.
“I ataia,ma e taku Mama bwa ti na riai ni moantaai ni mwananga. Te kaibuke nako America iaon kawaina ni mwananga.”
Te Utu ae Larsen a tia ni kaaina te Ekaretia i Denmark. Ngkai ao a nang bon karaoa te mwananga ae abwabwaki n iria Aomata aika Itiaki n te Salt Lake Valley.
Christiana e buoka Sarah ni karina kunikaina. Ao ngkanne imwiina ataeinnaine aika a uarereke aikai a karaoa kabanean taraakin aia tabo ni matu ae rangin kamweengaraoi. Ataia bwa e na bon rangin maan te tai imwaain ae a manga matu iaon aia kainiwene.
“Tai mwaninga am kiaba, Sarah,” e taetae Christiana ngke e tabeka oin ana kiaba ae e burabura ae e tirika. “E taku Mama bwa e na uotii ma bwai ni matu.”
A taku Mama ao Papa bwa aki kona n uoti bwaai tabeua irarikin baika a kainnanoaki n te mwananga nako America. I mwiin karinakin taian bwai ni matu, kunikai, ao bwai ni mwakuri, akea riki te ruu ae tau ibukin nnen te bwai teuana. Ma Christiana ao Sarah a bon bubuti bwa a na teuana te bwai ae mamate nanoia iai nakon mweengaia ae e boou. Ao n tokina ao a katikui imwiia aia taoree booki ao aia bwai n takakaro. Temanna n tatabemaniia bon te rinea ana kiaba ae bon rangin tikiraoi.
Ngke e a oti taai, Christiana ao ana utu a toka iaon te kaibuke are e na mwananga nako America. A rangin kukurei n nako Tion, e ngae ngke a nang tiku raoraoia imwiia, aia utu, ao mweengaia.
Te mwananga inanon marawa e bon ananau ao e kakua. N tain te kabuebue n te bwakantaai iaon te kaibuke, ataeinnaine aika uoman aikai a bon kabongana aia kiaba ni katani atuia man te riringa. Ngke e kare te ang man te angatai, e na teimatoa ni buti nako te kaibuke. Ma ngkana e ibitaki ana kooti, e na manga buti rikaaki butin te kaibuke, angin te tai n te raroa are e moan roko mai iai.
Ngke te utu ae Larsen a roko i America, a uota te waekon ao te kao ao a moana mwanangaia ae moan te abwabwaki nakon te Mwarua nako Salt Lake. Te toka iaon te waekon e toutourake ao e kabuebue, ai ngaia are Christiana ao Sarah a manga rianna.
N aiaroia utu tabeman aika bwaeoniia, ana utu Christiana a tia n rinanon taian kanganga ao kabuanibwai inanon mwanangaia. Mwaanen Christiana ae a tibwa bungiaki e mate inanon te mwananga ao e taunaki n te tabo ae aoraoi.
Imwiin rokoia te utu ae Larsen n te Marua i Salt Lake 1857, Christiana e tangiria ni kan nako n taromauri ma ataei ake tabeman aika bon rorona. Christiana ao Sarah a kukurei n uota aia kiaba nakon te taromauri ni katoa Taabati koraki ni katanii ubuia man te riringa ae rangin kabuebue.
Ngke a tabe ni waaki nako boong ao wiiki, ana mwane ma kanaia te utu aei a moanna n aki tau. Te tairiki teuana ao Christiana e a ongo aia maroro ana karo ibukin te kanganga aei. E taekinna tamana bwa e kinaa temanna te utu are e kakabwaiaki n uaan ana kurein. Te utu ae Larsens a kona n raira aia bwai ibukin boon te burawa. Ma tera ae iai irouia ae a kona ni kabonakoa?
E a taetae Christiana. “Ko kona ni kaboa nako ana kiaba Sarah ao au kiaba, Papa.”
“Ma ko rangin tangira am kiaba, Christiana. I aki kona ni karaoa anne!”
“E tamaroa, Papa,” e taku Christiana. “Ti kainnanoa riki te amwarake nakon tangiran taian kiaba.”
Te bong are imwiina ao taman Christiana e a kaboa nako te kiaba are e burabura ibukin te buraawa ae bon tau. Te buraawa e katauraoa te amwarake ibukin te utu ae bwanin.
Te tairiki anne, ngke e a tauraoi Christiana nakon ana kainiwene, e tara te koona ma te rawawata n te tabo are e tei iai ana kiaba are mamaten nanona. Ma ngke e a uringa te kariki ae kamimi are e a tia ni kanna ibukin te katairiki, rawawatana e ibitaki nakon te karabwarabwa. Ngke e karaoa ana tataro n te tairiki anne, e karabwa Tamara are i Karawa ibukin ana kiaba ae rangin tataningiria, are e kona ni buokia ni kamwarakeia iai ana utu.