E kona ni Kamaoi Ikoaki n Aekaia nako

E riki n Ritembwa 16, 1991—ara kawaniua n ririki ni mare. N te bong anne ara moan nati te mwaane e mate mai imwiin ana mwakrui n tararua te tia taraia ataei. Ai tibwa uoua ao te itera n namwakaina mwaitin ana bong ni maiu.

Namwakaina ma ririki ake imwiina a bon rabunaki ma te nanokaawaki, te un, te aki kukurei, te bwarannano. Te aki rau are e a taonai e a bon aki konaki ni kabwarabwaraaki. Akea te taeka ke te bwai ae karaoia temanna ae na kabebetea marakiu.

I wareki booki ao koroboki aika tabu aika bati, ma bon akea ae karaua nanou man aia kaeka. 

E reke irou te tai ae kaangaanga rekena n reirei ma Unimwaane James E. Faust (1920–2007), ngkanne bon kaain te Kooram n Abotoro are Tengaun ma Uoman, ibukin ana iraorao ma au karo. (E kaitibo ma tinau, Flavia, ao ana utu n ana tai ni mwakuri ni mitinare i Brazil.) I kakoaua bwa Unimwaane Faust e na kona ni karaua nanou.

I titirakinna titiraki aika a bati ao ngaia e karaua ni kakauongo raoi. Unimwaane Faust e kakoaua bwa te bwai are I a tia n rinanona e bon rangi ni kammaraaki ao man rangi ni matoatoa. A mwaiti koroboki aika a tabu ake e tibwauai ma ngai ao n taetae iaon kainanoan te mwakuri n rinanoa au nanokaawaki ao ni kakaea te reitaki ae bwanin nakon ana babaire te Uea bwa I aonga ni manga kaaitiboaki ma natiu riki. E taku, “Sylvia, aio bon ibukim ngkai. I ataia bwa ko raraomaeakina natim te mwaane, ma ni bon koauana, ko riai n raraomaeakina bukin arom ao ni kangaa ni manga katea raoi maium. E naaki beebete, ma ko kona ni kaoka nanom rinanon ana mwakuri ni kamaiu Iesu Kristo.” 

E anganai te kakabwaia are N na kona n ata ana mwakuri ae kakaawaki Iesu Kristo are e na karaoia inanon rikira ao ni kariaia Ngaia bwa e na riki bwa ooi ibukin te korakora are I kainanoia.

I kitana ara boowi ma te aki raunnano, ana reirei e taraa n ae e rangi ni beebete ao ni bon aki kona n reke. Tinau e namakina naba te barannano ibukin te bwai are e a tia n atongnga bwa bon akea ae e taraa n ibuobuoki. I uringa ana taeka, “Taiaoka ma karekea am onimaki ao kantaninga iroun ara Tia Kamaiu, ao kariaia te tai bwa e na kamaoa ikoakim.”

Inanon oin mwanangau ni karekea te kukurei riki, I baireia bwa N na kaawakina inanou te taeka n reirei are I a tia n anganaki ao ni kakaaea bwa terana raoi nanon are kona katikua am onimaki iroun te Tia Kamaiu. Bwaai aki bitaki n te tai ae waekoa. Ma te bong teuana ma te bong teuana ao te ririki teuana ma te ririki teuana, ma ana ibuobuoki te tataro ao am kakoaua ae rikirake, I a roko n ataia n akea te nanououa bwa te Tia Kamaiu e kona ni kamaoi ikoakira. 

I ataia bwa tiaki ni kabane ae a kona ni karekea te tai ni kaitibo ma te Abotoro, n aron are e reke irou. Ma ni kabane a kona—ao e na—reke te tai ae angaraoi n ata te Tia Kamaiu ni karenakoa rawawataia Iaona. Ao eng, rokon Iesu Kristo inanon maiura e kona ni kabebetea aekan nako maraki.

I ataia bwa karekean te Uea inanon maiura e kona ni uota te kukurei nakon maiura. Bon ngaia raraora, ara tia reirei, ao te katoto ibukin te kekeiaki ni karokoa te toki. E koaua bwa e keiakini bwaai ni kabane, ao E atai bwaai aika a karawawataira (tara Aramwa 7:11–12). Ana Mwakuri ni Kamaiu e a tia ni karokoa taekan te kakai ibukin karaoakin bwaai ake a uruaki nakon aekakiia mai imwaaina n te maiu aei ibukin te katauraoi nakon are imwiina.

N na bon kakaaitau n taainako nakon aia taeka Unimwaane Faust ao tinau. A buokai n ataia bwa aekakira au kangaanga are e na riki, Iesu Kristo bon teuana oin te boutoka ao te kantaninga are I karekea.