Kamaeua Kathy

N Tianuare 1976, ao I karekea te tareboon mairoun raoraou ae e mwakuri ibukin te ibuobuoki nakoia aomata. E titirakina kaain abau ao ngai ngkana ti kukurei ni kaikawa te ataei. N te tai anne ao bon iai uoman natira, ma ti kukurei ni butimwaea Kathy ae 17 ana ririki ni maiu nakon mweengara.

N te tai ae aki maan imwiin rokora ni mweengara, ao e titiraki Kathy ngkana e kona ni iriira nakon te taromauri. Eng akea te kangaanga, ao n te tai ae aki maan ao e a teimatoa ni irira te taromauri Kathy. Angiia raoraon Kathy man ana aro are imwaina a rangin n ukoukoria, ma aki kukurei n ongo bwa e a ira te LDS Church.

N te taina imwiin te reirei, e tuangira Kathy bwa a iangoia kaain ana aro are ma imwaina bwa ana karaoa aia kamataku n te tairiki iaon “Save Kathy” ibukin aia bootaki n roronrikirake. E titiraki Kathy ngkana I kona n iria nakon te bootaki anne ni buokia ni kamanoa te Ekaretia. I aki kariaia bukina bwa e ngae ngke I aki tangiria ni kauntaeka ma raoraona ibukin kakaokoron taian koaua, I ataia bwa e tuai n tau ana atatai ibukin te Ekaretia bwa e na tei ibukina. Iangoia bwa e na kaira temanna riki ana irua, Richard Jones, ae e a tibwa bane ana tai ni mitinare.

Te bong ibukin ana tairiki “Save Kathy” bon te tai n aki mamatam ao n tataro iroura ni kabane. I tataro bwa e na mena te Tamnei n tain te bootaki ao ana akea te kakauntaeka.

Ngke ti roko n te umantabu n te tairiki anne, ti namakina teutana te un, ma te minita n te roronrikirake e butimwaira ma te tangira man kaoira bwa ti na kabwarabwara nakon te bootaki taekan te Ekaretia ao ara koaua. Ngke e kabwarabwara Richard te moan marooro irouia mitinare ao n reierie taekan Kaokan bwaai, ataein te roronrikirake aika 15 mwaitia inanon te ru a kakauongo raoi. Ao riki te minita n te roronrikirake e rangi n ongora naba.

Ti kabanea angiin te tairiki anne ni kaekai titiraki man karekea te marooro ae tamaroa ibukin te euangkerio. Te namakin n un ngke ti moan roko e oneaki mwiina n te tai ae waekoa ngke ti tabe ni kabwarabwarai ara koaua. Iai te karinerine imarenaia itera aika uoua. Te Tamnei ae Raoiroi e kaona nanon te ru ngke ti tibwaua ara koaua ao ni kaekai titiraki.

N tokin te marooro, e karabwaira te minita ibukin rokora. Ao ngke ti a teirake bwa ti nang nako, ao temanna te ataeinnaine e teirake bwa e kan tuangiira te bwai teuana. E taekinna bwa imwain ae ti roko, e aki kaoaua ae kaain te Moomon bon Kiritian naba, ma ngkai e a kakoaua bwa ngaira bon Kiritian aika tamaroa riki nakoina.

Ti kona n aki karekei kiibu aika tamaroa riki nakon tokin ara marooro. I ataia bwa e na bon aki nakoraoi te bootaki ngke arona bwa tiaki karaoa ara aki mamatam ao n tataro, man on on nakon te Tamnei bwa e na mena irarikira, man bubutia te Uea bwa ana akea te kakauntaeka. Ti man te Tamnei ae Raoiroi ae ti kona n nakoraoi iai n tibwauaan taekan te euangkerio.