Mwaninga Taekara i Sicily

“Arau bon Omar Interdonato,” e moanaki te e-meeri. “Ngai natin Fiorella Italia te mwaane. Au kantaninga bwa ko bon uringa ana bwabetito.”

Tenibwi te ririki imwain, ae ngai ma toau ni mitinare ti tuangaki bwa ti na beku n te aba ae Sicily ao ni beku i Siracusa, te kaawa ae tikiraoi imataniwiin te Mediterranean. N te Tabati koraki ao ti kaaitibo ma tabeman Aika Itiaki Ni Boong Aika Kaitira n te aono anne n te auti n rianna ae uarereke, ni karaoa te bootaki n toa inanon ruun te auti n rianna anne.

E matoatoa te mwakuri ni mitinare, ao ti tabeman aika bwabetitoaki. Tengaun ma onoman mitinare aika bwanin aia tai ni mwakuri n te kaawa ae bubura, are e a tia ni kakawaraki n taainako. Ma toau ma ngai ti kamatebwaia mwaben te kaawa ae bubura n te taina, ti kunea te kaawa ae uarereke ae tei tabeua te kiromita man ara maeka imataniwiin te kaawa ae bubura.

Ti nakonako rinanon te marae nakon te kaawa aei, ni katorobubua imataniwiin te aba n taraa te kamwanono, ma n anga nanora ao tamneira nakon te Atua. Ao ikanne are ti a moana ara kakaae ma auti aika a ireireiti ae booti mwaitin te kaawa.

Ti butimwaeaki n te mataroa iroun te aine n ana ka 40 ae bwainna n te roro—te katei i Italy imwiin maten temanna ae tangiraki. Ti bita aron ara kakawari ni maroroakina aron te baaire ni kamaiu. E butimwaira ni kariniira te aine, ao ti kaitibo ma ngaia, uoman natina aine aika tuai n rang ni iakawai, ao temanna raoraoia. Ti reiakinna bwa ai tibwa bon akea buuna ma iai natina aika tuai n rang ni ikawai ae tararuaia. Ti kaota te tamnei Man’s Search for Happiness (Ana Ukeuke te Aomata Ibukin te Kukurei) ao ti tuangaki bwa ti na manga oki n te wiiki are imwina.

Te tina, n raonaki ma ana moan nati te mwaane ao uoman natina aine aika tuai n rangi n ikawai, tibuia te aine, ao raoraoia iaon kawaia ni bwabetitoaki. Imwiin au mwakuri ni mitinare, I teimatoa ni kaitibo ma te utu, ma n te tai are I karekea iai au imeeri, I miimi bwa tera ae riki nakon Fiorella, natin raoraona ae euarereke te aine.

“E a tia tinau n rangin ni kakaonimaki nakon te euangkerio ni maiuna ni kabane ao n te ririki 1983 e iein ma kaain te Ekaretia ni Mwangan te Messina ao n tia ni kabaeaki n te tembora,” e taku ana koroboki natina te mwaane. “I bungiaki n te 1984 ma mwaneu, Veronica, n te 1987. Ti rangi ni kakaonimaki n te Ekaretia. I karaoa au mitinare n te Italy Rome Mission man 2005 nakon 2007, ma te kantaninga bwa n na kaokii bwaai ni kabane nakon te Uea ibukin aia mwakuri korakora mitinare ake uoman ake a iangoia bwa ana tataekina te euangkerio n te kaawa ae uarereke i Floridia!”

Iai taai n au tai ni mitinare ngke I titiraki inanou ngkana e a tia te mwakuri n anganano ae uoua te ririki ni uaana. Ma e rangin ni kukurei nanou (tara D&C 18:15–16) n noria bwa e a tia ni bitaki maiun Fiorella n aki toki bukina bwa raou ao ngai ti a tia ni karaoa te babaire bwa ti na waaki nako ma ni mwaninga taekara ni beku ibukiia tabeman n te aba ae Sicily.