Te Iriba, te Waekium, ao te Raurau ni Kooki

N te tiamwa teuana ao a mwananga ara utu aika uarereke 2,000 te maire (3,200 kirmoita) rinanon te kaawa ibukin ana mwakuri kainabau ae boou. Ti rangin n ingainga ibukin mwanangara ae boou, ma tinamakinna ae ti rangin n raroa nako man mweengara, ara utu, ao bwaai ni kabane ake ti atai. Ma ti a karokoaki nakon mweengara ae boou n tain te karau ae korakora, ao n ara tai ni kamanoa mweengara ae boou ma rabunan ana burooa aika boou, ti karuoi bwaain te turaki n aron bwai ni karau ao rabunan burooa aika a rabunaki n te bokaboka. Ti ataia ae e kaonrakea aontano te karau ae korakora, ao ti katokai matara nakon ara bwai ma te nakonnano imwiin karuoaia ni kabane.

A bane n rau n te tairiki anne, ao ma natira aika uarereke aika teniman ti bane ni matu, ti waekoa ni karaoa ara kainiwene ngai ma Greg. Ti uaia n rootaki n te korakai, ao te matu e tara n tamaroa. Ma bukina tabeua,bwa e namakinna Greg bwa e na manga kauka te baoki riki teuana.

“Taiaoka,” I taku, “ti a bane ni matu. Ti kona ni kaukia n te moaningabong.”

E ioioa atuna ao e nakon te ruu are inano. Imwiin tabeua te tai, I ongo bwa e takarua. I biririkaaki ma te nako n nano nakon te ruu are inano ma te kantaninga bwa n na noora timtimwin te raraa. Ti tei ikekei ni kabooi angara ngke e tabe ni waerake ranin te karau ae mwaitorotoro nakon bubuan waera. N te tai naba anne ti bane ni kamwakuri ao ni moanna n urakin bwaoki teuana imwiin teuana n te kai n tamwarake ni waerake ae rangi ni katati. I namakina te bwarannano ae korakora, ma ranin matau ae irengan ma ranin te karau iaon te timanti.

I wetea kaain te Ekaretia ae ti ngaia ae tikina n ara uoote ae boou, te Tari Lindsay Sewell, n titirakinna ibukin kaetieti ibukin te bwam ni kaikiiki ni kanakoa te ran. E waekoa n anga tabeua reirei te Tari Sewell, ao imwiina I oki rikaaki ni mwakuri ni kataia ni kamanoi ara bwai. N te nukanibong, ao e tang beeron te mataroa. Ngke I kauka te mataroa, I kaiatiboaki ma te Tari Sewell, baina a on ma te iriba, te waekium ae mwaimwai, ma te raurau n tiaokureti ni kuuki.

“E tara n ae ngkami kam kona n anga ami ibuobuoki tabeua,” e taku ma te moangare. N te tai ae aki maan, I aki namakinna ae iraroa nako ma mweengau.

Ni kabanea te tairiki anne, te Tari Sewell e tiku ma ngaira, ni kataia ni katoka te ieka. Ngke e a roko te ran n te ruu are inano nakon ae raka iaon teuana te buuti (30 tientimiita) nanona, e tuangai bwa e na wetea te tabo n tiriai; iai aia bwam aika bubura are e kona ni waekoa ni katoka te kangaanga.

N te moaningabong are imwiina ao a roko Titita Sewell ma kaain ara uoote tabeman aika boou ma amwarake, uaean te iti, ao waekium riki tabeua. Ti rootaki n te kukurei n aron aia tangira. N tokina a bane ni kawakinaki ara bwai n kabane.

I rangi ni kakatonga n riki bwa kaain Ana Ekaretia Iesu Kristo Ibukiia Aika Itiaki Ni Boong Aika Kaitira. I aki tabe bwa I nakea, Iai tariu ao mwaneu aika tataninga ma baaia aika takinaki ni butimwaia au utu ao ni buokiia n taai aika a kainnanoaki iai.