Kairirai, Kawakinai

Ngke 10 au ririki ni maiu, au utu a mwaing mai Denmark nako Canada. Ti maeka ikekei n te tai ae aki maan ngke taari aika uoman ake a maeka ni kaitaraira man ni mwengara ae boou n iteran te kawai a kaoai ma mwaaneu ae 12-ana ririki ni maiu, Poul, bwa ti na raun n te bwati mangaiia bwa ti na noora te kaawa.

Poul ao ngai ti bon rangin kukurei ni mwananga. Tinau e aki rangin koaua raoi ibukin te iango arei, ma n tokina ao e a kariaia. Tinau e anganiia aine ake uoman te mwane ibukin ara raun n te bwati. E bubutiia bwa a na tararuaira raoi ibukina bwa ngai ao mwaaneu ti tuai ni bwaati n taetae ni Imatang. A berita ataeinnaine bwa a na tararuaira raoi.

Tia bane n toka iaon te bwati ao tia moana mwanangara. Imwiina teutana ao e a tei te bwati, ao ataeinnaine a mwaing ni kaotia nakoira bwa ti na riai n ruo. Ti rimwiia ngke tia moana nakonakora ni katobibia te kaawa.

Ao akea bwa a ti biri nako naba ataeinnaine ake uoman ni kawai aika a kakaokoro! Ti kataia n rimwiia, ma a ti bua nako naba ni koonan taabo aika tiaki rangin taneiai iai. N te moan tai ao ti taku bwa a bon takakaro ni manibuakaira ao a na manga bon oki. Ma imwiina teutana ao tia ataia bwa tia bon bua ao tia bon tiku i bon iroura.

“Tao ti na butiia temanna bwa e na kaota kawaira?” I titirakina Poul.

“Ti bon aki kona n taetae ni Imatang, ao tiaki naba ataa ara tabo ae ti maeka iai,” e kaekaa.

“Ti na riai n tareboonia tinara,” I karekeiango, ni kotea te tabo n tareboon are e uakaan.

“Bon akea ara mwane, ao tiaki ataa nambwan ara tareboon,” e taku Poul.

I a moanna n tang. E a rabwatai Poul ni katobibiai ni baina. “Karaua nanom, Anne-Mette. Ti na riai n tataro.”

Ti ikotiira ni kabane ao ti butia Tamara are i Karawa bwa e na buokira ni kakaea kawaira n oki nakon mweengara.

Imwiin ara tataro Poul e kotea nanon te kawai. “I namakinna bwa ti na riai n toua te kawai aei,” e taku.

I manga moann naba tang. E na kanga n ataia bwa te kawai raa ae tina toua?

Poul e a manga karaua riki nanou. “Ko na riai ni karekea am onimaki bwa ti na kona ni kairaki,” e taku.

Ngke e taekina arei, e roko irou te namakin ae rau. E reke au iango bwa N na riai ni karekea au onimaki ao ni kariaia mwaaneu bwa e na kawakinai.

Imwiin nakonakora n te tai ae maan, ao tia roko n te nei. “Ko uringa te nei aei?” e titiraki Poul. “Ti buti ni katuaa ni kawaira man te marae ni waanikiba nakon mweengara are e boou!”

I a moanna n namakina ae raoiroi ngke I ongo bwanana ae kakukurei. Tia tekateka irarikin te nei ao tia manga tataro riki.

E waekoa n tara nanon te kawai Poul. “Ko noora te bwai arei?” e takarua. E teirake ao e moanna ni biri, ao I kibarake n rimwiina.

“Tera ae ko nooria?” I wewete.

“Bon te kanikina ibukin te tabon n uaati ae kaan ma ara auti!”

Ti ira te kanikina nakon kawaira, ao imwiina tia kona n noora tinara n tei itinanikun te auti. Ti biri nakoina ao ti koonna.

Ngke tia rin n te auti, e taku Tinara, “Ngke I nooria ataaeinnaine ake uoman n oki nakon mwengaia, I nako n titrakinia bwa kamwa mena ngkai iara. E aki rangin raoiroi tinaia. E taku bwa boni ngaira iruwaa ao ti riai n oki nakon te tabo are ti roko mai iai.”

E uaia n rabwatiira Tinara ni baina. “I tangiria bwa kam na ataia bwa akea temanna ikai ae namakina te aekaki anne. Ti na kaitibo ma aomata aika a mwaiti are a na butimwaaira ao n riki bwa raoraora. Ataeinnaine akanne a tia ni katukui ao ni kitani ngkami n ti ngkami n te bong aei, ma I kukurei bwa kam uringnga bwa Tamara are i Karawa e na bon aki kona ni katikui ngkami ma te maroaa.”

Ao imwiina tia katorobubua ao ti kaitaua Tamara are i Karawa ibukin kawakinara ni karokoa okira nakon mweengara.