E aki rangin raoiroi au kekeiaki iaon au beeba n te taetae ni Malay n tain te ukeuke n te moan tiemetita, ao nneu n au kiraati e rangin ni bwaka. I bon rangin rawawata, bwa I ataia bwa N na bon bukinaki, ibukina ngkai I kabanei aoa aika a mwaiti n takakaro ma raoraou imwiin te reirei n onea mwiin karaoakin au mwakuri n te mweenga ao au kamatebwai. Ngai ma tinau ti karaoa ara babaaire ibukin buokau ni karikirakeai. N na katiai ni kabane au mwakuri n te mweenga n akea te kabwara bae ngkana e titirakinai ni katoa bong, ao ngaira ni kauoman ti na tataro ibukiu bwa n na kona ni karaoa riki ae tamaroa n tain te ukeuke n te kauoua n tiemetita. I mwakuri korakora n te tiemetita ae bwanin. Teuana te wiiki imwaain te ukeuke, tinau e kairaki iroun te tamnei bwa n na riai ni katauraoa atuun te maroro kanga iteran naba te ukeuke. Te tia reirei e baireia bwa tera atuun te maroro, ao e tauaki ara bwii man tamaroan ara konabwai ni koro rongorongo n te boto ni iango are ti anganaki .

N te bong are tain te ukeuke, I rangin mimi ngke I a nooria bwa atuun te reirei are e rineia te te tia reiei bon te bwai are I a kaman kakatauraoi ibukina! Ibukina ngkai I a tia n rangin mwakuri korakora ao ni katauraoi, e ngae ngke I aki ataia ae aio atuun te maroro, e rangin tikiraoi te bwai are I koroia ao I karekea A+! E rangin mimi au tia reirei ngkai e a moanna n nako raoi au kekeiaki.

I karekea au koaua ni kaineti ma te mwakuri. I ataia bwa ngkana ti tataro ao ni mwakuri korakora, tina karekea a na kairi te tamnei bwa e na buokira n tokanikai iaon ara mwakuri.