Rikirake inanon Te Atatai

Ngke 14 au ririki, tabeman Aomata aika a Itiaki aika mitinare a kawara mweengara ao a reireina tinau ao ngai. Ao n tokina ao a kaoira bwa tina bwabetitoaki. Tinau e aki butimwaia, ma ngai I kaeka ni kangai ngaia. N tanrikaaki, I aki ataia ae I a tia n rairaki. I taku bwa, n aiaroia angiia te roro aika imarenan 13 ao 19 aika a mwaiti, I bon tii taraa te bwai ae n na karaoia ae kaokoro ma are e tataneiai iai te aba.

Te ririki are imwiina ao I a nako n te umantabu n tii ngai. I aki rang namakinna ae I tau inanona, ao I aki rang mataata raoi n te bwai are e reiakinaki. Ma I bon kakaonimaki. Te ririki are imwiina ao I a maeka n ae e raroa ma mweengau ao I a kaea oin ana reirei ae rietata te Ekaretia i Mexico City. E ngae ngke I a tangira te reirei ae rietata inanon moan rokou arei ao I a mwakuri korakora bwa I aonga ni butimweaki nakon te reirei (ao n anai nanoia au karo bwa ana kariaia riniu), I waekoa ni kunea bwa te tiku i bon iroum e bon aki bebete. I teimatoa n aki karekea au kakoaua. I aki rangin mataata raoi bwa antai Iotebwa Timiti ke tera te bwai ae e reiakinaki man Ana Boki Moomon. N riaon ae I namakinna ao e taraa n ae I aki tau inanona.

E koaua, I aki te roko n tuangiia au karo. I kabanea te tai ae mwaiti n anai nanoia bwa ana kariaia rokou n te reirei aei. N na kanga ni kariaia ao tao bon tiaki te tabo ae e tau ibukiu? Ibukin au kainikatonga, I a tii inimaki n akea te karongoa.

Au kanganga ae I rinanona e a moanna ni korakora ngke I a karekea te rongorongo ae a raure au karo. I a namakinna bwa au aonaaba ae e bwanin e akamaunaaki.

Ao man te tai anne ao au bitiobi e a butimwaeai ao n titirakinai bwa I uara. I tuangnga ni kabane taekan kainnanou ma rawawatau. “I namakinna bwa kanga ai bon akea te bwai ae I ataia,” I taetae.

Te bitiobi are e raoiroi arei e a moanna n reireinai taekan te euangkerio. Ti waakinna moa bwa tina kanga n reitaki raoi ni koaua ma Tamara are i Karawa. Ti kabanea ara tai ni maroro iaon te Mwakuri ni Kamaiu. E reireinai taiain koaua ibukin te euangkerio, ao n te moan tai, I namakinna bwa I a karekea au kakoaua. I rangin kukurei ngkai iai te bwai ae N na kamatoaai n nim mangaia inanon taai ni kararaoma. E ngae ngke I namakinna bwa akea korakorau ni buokiia au utuu, I bon kona n namakina te kimwareirei ni kona ni kaan nakon Tamara are i Karawa. I ataia bwa E bon kinaai,ao anne e bitii bwaii ni kabane.

Tao bon te bwai ae e ririki irouia kaain te Ekaretia aika a boou n namakina bwa aki tau n n aron ae I a n namakinna Te bwai ae I reiakinna bwa e aki kakawaki ngkana koaki mataata ni bwaai ni kabane n te euangkerio n te tai ae waekoa. Tera te bwai ae kakawaki riki bon ootam n am reitaki ma Tamara are i Karawa ao iai Ana kantaninga ao ana babaaire ibukin maium. E bon kakawaki bwa kona mataata bwa te Tia Kamaiu e kaboaki ibukin am bure ao E kinako raoi n arom n te aro ae e bwanin, e ngae ngke akea ae e konaa Ngkana I atai taian reirei aikai, bwaai ake tabeua a na kona ni kamatataaki raoi.

Te karabwarabwa nakon ana reirei te bitiobi ae tangira ao e taotaonakinnano, te reirei ae rietata e riki bwa te bwai ae tamaroa inanon maiu. Kaeakin ana reirei ae rietata te Ekaretia e ibita au kantaninga bwa antai Ngai ao e na kanga aron maiu. Ngke e a bane au tai, I tiku i Mexico City. Te moan bwai ae I karaoia ngke I a kunea te tabo ae n na maeka iai bon kakaean te uoote n te tabo arei bwa I aonga n teimato ni karekea te tabo ibukin te kamanoaki, te tabo are I kona n rikirake iai inanon te euangkerio.

Te tai ae uarereke imwiin arei, I karaoa au mwakuri ni mitinare n te Tembora Square i Salt Lake City. I kunea te kimwareirei ae korakora n tibwauakin te koaua ma tabeman are e a kamatoatoa aau inanon taai ni karawawata ni bongin maiura.

I boni kakaitau n riki bwa kaain te Ekaretia. I ataia bwa Tamara are i Karawa e bon kinaira n tatabemanira nako ao iai Ana babaaire ibukin maiura. E riki bwa te kakabwaia ae korakora n Nooria ni kaota Ana babaaire ibukiu.