Tera ae a Uotia BWAEONIIA?

Ni karekea otara irouia bwaeonia ao aron bwaai ake a kakoroi bukiia, ti riai n tara aron mwaingingia. … A roko ibukin karekean inaomataia ao te rau, n aron are a karoia naba ake tabemwaang. A roko ni karaoi mweengaia, n aron are a karaoia naba ake tabemawang. A roko bwa ana tataroa te Atua ao n reiakina taekan aia aro nakon are raun nanoia, ma are a tangiria, n aron are a karoia naba ake tabemwaang; ma iai teuana te bwai ae a roko ibukina, n aron ae I ataia, bon akea aitaraia ma mwaingingia bwaeonia ake tabeman: a roko ngaia ma te kantaninga ibukin katean aia botanaomata n te aro bwa ana uoti aron maiuia ma kateia man te tabo are a birinako mai iai, eng, mairouia taan bwainikirinia, taian reirei ibukin te maiu ao kairiiri ake ngaia oin kaungan nanoia, te katiteuanaaki, te tokanikai, ao te kukurei. …

Tera imwiia are a uotia bwaeonia? A uoti aron karaobwai n aron baireana ae akea aron kabotauana. A reirei ao n maiuakina mwakurian te euangkerio bwa ngaia aan aia tokanikai ao kukureia. …

A uota te reirei ao tangiran te rabwakau ni korobanna ao te tamaroa. …

A uoti irouia taian kaetieti aika matoatoa ibukin te kakaonimaki ao aia konabwai man aron aia anganano nakon baike a karaoi. …

I a roko ngkai nakon te kabanea n tamaroa mai iaon bwaai nako are a uotia bwaeonia, ao aio are I kabwarabwara bwa te atatai, te wanawana ibukin bwaai aika a kakawaki ibukin te maiu. …

Te moan, iangoa rabwatan te aomata. … Bwaeonia a uota te iango ae boou ibukin karikan te rabwata ma kakawakin bonganana. A reiakinna bwa te rabwata bon te umwa iaon te aba n te aonnaba are e maeka iai tamnein te aomata, are bon natin raoi te Atua, bon te auti ao te rabwata e aki kona n uruakaki ke ni kabarekaki ke n akiakonaki ni karinaki bwaai aika a boitin ao bwaai aika kakamwaku ni kakea karinean te Atua, are Tamneina e mamaeka iai. … A uoti mangaia tua ibukin tuan te kamarurung. …

Te kauoua—anua ke aroaro. … [Taian bwaeonia] a reiakinna bwa tiaki te aomata ti natin te Atua, are e rietata n rikiina ma e a kaman katabuaki naba, ngkana e maiuakinna, man reitaki ma Tamara are I Karawa ni uota karaoan Ana mwakuri ae akea tokina n tai ake ana roko. …

Are imwiina—te utu. … Tera te wanawana are a uotia bwaeonia ibukin te utu? Bukina, a karekea ma te karietaaki ao anua ni karietataki are e roko iai n rongorongon te aonaaba. A reiakinna bwa tiaki ti ngaia aan oin te maiu nakon karekean te rikirake n te aonaaba aei ma e karaoa naba aan te kantaninga ibukin karekean te kamaiuaki n abanuean te Atua are te teretiare. Ni koaua raoi, karawa are ti kakaea e uarereke teutana iaon taraan mweengara n te maiu are akea tokina. E na kanga aron kaokoron reirei man mweenga aika korakora ao te utu n riki bwa bure aika a kananokawaki n te maiu n tai aikai—te raure, mweenga aika uruaki, te ribaki, ataei aika a bure maiuia e rikirake korakorana nakoia ataei ake a bwainikirinaaki ibukin korakoran uruakin te maiu n utu. … O, ngkana te wanawana are a uotia taian bwaeonia aika a nanorinano ngaia are e na ti kona ni buoki utu nako n te aonaaba, ai te kakabwaia terana ma te rauaki ao te kakukurei ao te rikirake n te maiu n aomata.

Te kabanea, … te iraorao ao te reitaki imarenaia aomata. A reirei, n aron te kawai ae eti, aia iango kain aonaaba, kain ara utu, neewe, ao aomata ake kain ana utu te Atua. … A kakoaua … bwa te kantaninga ibukin te rau n te aonaaba e wene n retinako te tua aei n te boatki n iraorao ni kabuta te aonnaba. …

… Bwaai aika a tamaroa aika I taetae iaona ao a mwaiti riki a katikui reirei n ana euangkerio Iesu Kristo are e a tia ni kaokaki rinanon te Burabeti Iotebwa Timiti. … Aio bukina ngkai e korakora aia onimaki bwaeonia iaon rongorongo aika tamaroa aikai ibukin te maiu ao te koaua bwa ana katea umwan te Uea “iaon taubukin maunga” [Itaia 2:2]. Aio te bwai ae tamaroa bwa e na kateaki te tabo ae na tauaki taekana ao n oneaki te karereua nakon te kawa ae bubura, te taaun, ao tabo ma taian mweenga, reirei ao katetei aika ti kukurei ni kamanenai ngkai. E bon bubura aron te tokanikai iaon katean uean aban te Atua ao ni kanakoa man Tion te rongorongo ae ibuobuoki ibukin te kantaninga ao te onimaki ao bwaai aika mimitong, te wanawana ae akea tokina nakoia aomata ni kabane. Aio raoi bon rongorongoia ara bwaeonia aika a rine are a uotia mangaia ao ni katikua iroura ma raoraora. … Aio bon te bwaintangira ae ae kakawaki ni maiura. E buokira te Atua ni karekea kaniwangana, ni maiuakinna, ao ni kabuta nako.