Rao Aika Kakaonimaki

Teuana mai ibuakon ana kamoamoa te Tia Kamaiu ae e kona n anga bon aranakira bwa “raraona.” Ti ataia bwa E tangira ma te tangira ae kororaoi nakoia ni kabane natin Tamana are ikarawa. Ni karakoa ngkai ibukiia te koraki ake a tia n rangi ni kakaonimaki n aia mwakuri ma Ngaia, E katauraoa te ara ae onoti aio. Ko uringa taian taeka man te 84 ni mwakoron te Doctrine ao Covenants ike te Uea e taku nakoia aika taan itiaki, raraona—ibukin te tai aio ao are imwina E na weteia bwa raraona—anne are e bon riai bwa E na anganiia te tua aio, bwa ana riki e ngae ngke raraona ngaia inanon boong ngke E mena irarikiia, ni mwananga n tataekina te euangkerio inanon Mwaakana (tara D&C 84:77).

Ti riki bwa raraona ngkai ti beku ibukiia tabeman ibukina. Ngaia bon te banna ae kororaoi ibukin te katooto n aekakin te rao are ti tangiria ni katootonga. E tii tangira are te kabanea n tamaroa ibukin natin Tamana are ikarawa. Kukureia bon Kukureina. E namakina nanokaawakiia n ai aron nanokaawakina ibukina bwa E a tia ni kabooi ni kabane aia bure, e anai ni uoti mamaraia iaona ni kabane, ni uoti ni kabane aia kangaanga, ao n namakinii ni kabane kainanoia. Ana kaantaninga a rangi n itiaki. E aki kakaea kinaakina iboni ibukina ma e na anga ni kabane te mimitong nakon Tamana are Ikarawa. Te rao ae te kabanea n tamaroa, Iesu Kristo, bon akea te tauti irouna n anganakiia tabeman te kukurei.

N tatabemaniira nako ake ti a tia ni karaoa te berita ae tabu n te bwabetito e a tia ni berita bwa e na irii Ana katotoo ni uota rawawatan temanna n aron are E na karaoia (tara Motiaea 18:8).

Inanon tabeua boong imwiina e na reke iroum aangaraoi aika a bati bwa rao ngkoe irouna. Tao ngkana ko nakonako n te kawai ae baareka. Tao ngkana ko tekateka inanon te turein. Tao ngke ko kakaea am tabo n tekateka ibuakoia ana aomata te Ekaretia n taromauri. Ngkana ko mamataku, ko na noora temanna ni uota te bwai ae rawawata.Tao rawawatana n nanokaawaki ke maroaana n tiingaia ke ni kairiribai. Tao kona ti nooria ngkana ko a tia n tataro nakon te Tamnei ae Raoiroi n anganiko maata are kona noora te nano ao n tia ni berita n tabekaarake baai akana a tinetine.

Te kaeka nakon am tataro e bae n ae ubun raraom mai imwaina, temanna are ko tuai man noonoria inanon ririki ma kainanona ake a karina n roko inanon am iango ma nanom ao n namakinna bwa bon kainanom. E a tia n riki anne nakoiu. Raraou ngkoa man taabo aika raroa ao ririki aika bwakanako aanga aia taeka ni kaunganano ngke bon tii te Atua ae e kona n tuangiia rawawatau.

Ana burabeti te Atua aika maiu a tia n tuangiira bwa ti na riki bwa rao ngaira aika a kakaonimaki nakoia te koraki ake a roko n te Ekaretia bwa taan rairaki aika boou ao n nakoia te koraki ake a manga teiteiraroa.Ti kona ni karaoia, ao ti na manga karaoia ngkana ti uringnga n taainako te Tia Kamaiu. Ngkana ti karababa n anga ara ibuobuoki ao man tabekaarake te rawawata, E na raoniira. E na kairiira nakoia ake a kainano. E na kakabwaiaira bwa ti na namakina are a namakinna. Ngkai ti teimatoa n ara mwakuri ni buokiia, ti na anganganaki te bwaintangira ibukin te namakina Ana tangira ibukiia. Anne are e anganiira te ninikoria ao te korakora n anga ngaira riki ao riki inanon te kakaonimaki.

Ao, inanon te tai ao n aki toki, ti na namakina te kukurei ni butimwaea ana bootaki n iraorao aika a kakaonimaki. I tataro ibukin te kakabwaia anne ibukira ngaira ni kabane ao te koraki ake ana manga mwakuri.