E Tuangai, “I aki kona ni karaoia”
Ngkana iai mai ibuakomi ae e nima te wain ke mooi aika arekooro, e bon aki raoiroi, ao bon akea kariaiakakina imatan Tamara (tara D&C 89:5).
I taneiai n iangoa raoraou ae tatangiria ae, Chase, bwa e kona ni karaoa te bwai teuana. Ngke I tuangnga bwa e na ewenako man kaintamwaraken au bwaranta ae te kabanea n rietata mai eta, e aki ti karaoia, ma e a manga biri mai iai!
Ngke I tuangnga bwa e na kataia n toka n buti iaon te roller coaster, e aki tii buti iaona, ma e bon tekateka iaon ni kaintekatekana mai imoa!
Ao ngke I tuangnga bwa akea kakoauaan ae e na kona n taekina te taeka ni kamauri nakon Julia—te kabanea ni botonnaine n te reirei ae bwanin—e aki tii kamauri nakoina, ma e tekateka ao e taetae mangaia inanon nimaua te miniti!
I angoia bwa Chase e na kona ni karaoi bwaai ni kabane. Ni karokoa ngkai, bon anne.
Chase e roroko n au auti e kuri ni katoa bong. Ti bon rangi ni kaan ni maeka imarenara. Iai teuana te auti imarenan ara auti. Ma Chase e aki roroko n te Taabati ke n te Moanibong. N te Taabati koraki e nanako n taromauri. N te Moanibong koraki ao iai ana tai ma ana utu n te tairiki. E kaoai uatai te tai. Ti kang buraunii ao ti takakaro n tabeua taian takakaro. E bon rangin kaunga.
Chase e aki toki n roroko bwa e na takakaro n au auti imwiin te reirei. E rangi n tamaroa rorokona ibukina bwa tamau ao tinau a bon tiku ni mwaakuri. Te takakaro ma Chase e bon kaunga. Ti tangiria ni karaoi ara manikangare. Chase e bon iraorao ma aomata ni kabane. E kanganga ongou irouna ae e na taetae n aki akaka ibukiia aomata tabeman—e ngae ngke e bon kakaraoaki irouia aomata.
N te bong aei Chase ao ngai ti bon takakaro n te batiketibooro. E bon rangin kabuebue, ngaiare I a tititrakina Chase ngkana e kan mooi.
“E koaua,” E taku Chase, ngke e karabinoa nako te booro iaon te uteute ao ni biri nakon au bwaranta are mai moa.
Ti nakonako inanona ao n nako n te uma ni kuuka. Ngke I a kauka te aitibaoki, birin maitoron te eea nako aon baira e karika tein buraen baira. Ngke I moan kaninganinga inanon te aitibaoki, I tii noora te mooi te uanikai ao te miriki. Ngkanne, te kaen ae a tia n uki ae mena n te koonaa e katika matau.
Tamau e katuka nikiran ana kaen ni biia ae e uki. E na bon aki ataia ngkana ti nima ti teutana. I katika te kaen ni kaotinakoa.
“Ko tangiria ni kan kataa te biia?” I titiraki.
“Tera te bwai anne?” E titiraki Chase.
“Bon te biia,” I taku. “Tamau e nimma ni katoa tai. E aki ataia ngkana ti tii kabongana teutana.”
E taraai Chase. E katoua ana ari ao e kaaki baina iaon bebeena. Ngkanne ao e a taekina te bwai teuana I aki kantaningaia bwa N na ongo ae e na taekinna.
“I aki kakoaua!” E taku Chase.
“Ko kangai I aki?” I titiraki.
“Te biia e bon aki raoiroi ibukim,” e taku. “Tina riai n aki mooi iai. E karikiko bwa kona karaoi bwaai aika a burababa.”
“E aki ngkana ko kabongana tii teutana,” I taetae. “Taraia, N na kaotia nakoim.”
I tabeka te kaen nakon wiiu, mooi teutana, ao I matangare. E kamwara nimakina, ma I aki tangiria bwa N na nooraki ni burababa.
“Taraia? I taraa n tei ni baba iroum?” I titiraki.
“I angoia bwa N nang oki nakon mweengau,” E taku Chase. “Tai manga mooi riki n te bwai anne. Bon tiaki te iango ae raoiroi.”
Ngke I tabe ni matakuakina Chase n otinako man te mataroa ao ni biri ruaaki n te kawai n oki nakon ana auti, I aki kona ni karaoa te bwai teuana ma I mimi bwa ibukin tera ngkai e kona ni waekoa ni karaoi bwaai ni kabane ma e aki kona ni mooi naba teutana n te biia.
I katoonga teutana imwiin nakon Chase. “Blech! Te bwai aei e aki rangin raoiroi,” I angoia ngke I kaoka te kaen nakon koonan te aitibaoki.
E mena ao Chase e boni koaua n ana iango.