Ko e Fai ha Meʻa Lelei ʻaki Hoku Taimí

ʻOku faʻa fuʻu momoko mo sinou lahi he taimi ʻe niʻihi ʻi he feituʻu ʻoku mau nofo aí. Ko e taimi ʻe niʻihi ʻoku mau nofo ai he akó ʻo heka ʻi heʻemau saliote fakapaheké ʻi ha foʻi moʻunga māʻolunga hoko mai pē ki homau ʻapí. ʻI he ʻaho ʻe taha, lolotonga ʻemau teuteu ke tui homau teunga sinoú, tataá, mo e ngaahi kofunimá, kuo talamai heʻemau faʻeé naʻe fuʻu momoko mo havili ke mau ō ki tuʻa. Naʻá ku fakafulofula koeʻuhí naʻe pau ke mau nofo ʻi fale. Naʻá ku kamata ke lāunga, pea talamai heʻeku faʻeé, “ʻOku fie maʻu ke ke ʻalu ki ho lokí ʻo kumi ha meʻa lelei ke ke fai ʻaki ho taimí.”

Naʻá ku fakakaukau ʻi he taimi naʻá ku aʻu ai ki hoku lokí fekauʻaki mo e meʻa ʻoku fie maʻu ʻe he Fakamoʻuí ke u faí. Naʻá ku fakakaukau leva ke u ako maʻuloto ʻa e Ngaahi Tefito ʻo e Tuí. Naʻá ku talaange ki heʻeku faʻeé, tokouá, mo e tuofāfiné, ʻi he taimi naʻá ku hifo mai ai ʻi ha ʻosi ha ngaahi houa siʻi, ʻoku ou kole fakamolemole ʻi heʻeku mata fakafulofulá ka kuó u ʻosi ako maʻuloto ʻa e Ngaahi Tefito ʻo e Tuí. Naʻa nau mātuʻaki ʻohovale! Naʻá ku lau maʻuloto taha taha ange leva kinautolu mo u ongoʻi lelei ʻi heʻeku fakaʻaongaʻi lelei hoku taimí.

ʻOku ou tui naʻe fiefia ʻa e Fakamoʻuí ʻi heʻeku fakakaukau ke ako lahi ange kau kiate Ia ʻi he taimi naʻá ku maʻu he pongipongi ko iá. ʻOku ou fakamālō ʻi heʻene foaki mai kiate au ha fāmili pea mo e ngaahi folofolá ke nau tokoniʻi kimautolu ke mau ʻilo lahi ange ki heʻetau Tamai Hēvaní mo Hono ʻAlo ko Sīsū Kalaisí.