Ko e Meʻatau Fakapulipulí
ʻOku nofo ʻa e tokotaha naʻá ne faʻú ʻi ʻAlesona, USA.
Naʻe taʻetokaʻi ʻe he taha kotoa e meʻa ʻe lava ke fai ʻe ʻAivií.
“[ʻOku ʻi ai ha meʻa ʻe lava ke foaki ʻe he taha kotoa]” (Tohi Hiva ʻa e Fānaú, 116).
“Naʻe fanafana atu ʻa Palaiteni he tuʻa ʻo ʻĀtamá, “Tuku kehe ʻa ʻAivi! Ko e taʻahine ia.”
Ka ko ʻĀtama naʻe kapiteni he timi tolo pulu he ʻaho ko iá, pea kuo ʻosi fai ʻene filí. Naʻá ne toe fakaongo leʻo lahi atu, “ʻOku ou fili ʻa ʻAivi.” Naʻe kata manuki atu ʻa Taila, ʻa e kapiteni ʻo e timi ʻe tahá. Naʻa mo e faiako vaʻinga ko Kāsiá naʻe ʻohovale ʻi he fili fika ua ʻa ʻĀtamá.
Naʻe ʻohovale foki mo ʻAivi pea laka mā atu pē ki muʻa. Ne ngulungulu ʻa Palaiteni.
Naʻe ʻikai ngata pē ʻi he taʻahine ʻa ʻAiví. Ko e taʻahine siʻisiʻi taha ia ʻi he kalasí. Naʻe ʻikai ʻasi fuʻu veʻe oma fēfē, pea naʻe hangē ne fuolahi ange ʻa e foʻi pulú ʻiate iá. Naʻe pehē ʻe Palaiteni ʻi he luelue atu ʻa ʻAivií, “Mahalo he ʻikai ke ne lava ʻo toʻo ʻa e foʻi pulú.”
Pehē ange ʻa ʻAtama, ʻi heʻene feinga ke ongo loto lahí, “Mahalo te ne hoko ko ha meʻatau fakapulipuli.” Ka ʻoku ʻikai ko e ʻuhinga ia naʻá ne fili aí. Naʻe talaange ʻe ʻAivi ʻi ha meʻa ʻe taha kia ʻĀtama naʻe ʻikai ke saiʻia ʻi heʻenau vaʻinga sipotí koeʻuhí he naʻe fili fakamuimui taha maʻu pē ia. Naʻe fakamataliliʻi ʻe he toenga ʻo e tamaiki tangatá ʻa ʻAivi, ka naʻe ʻosi talaange ʻe he fineʻeikí mo e tangataʻeikí kia ʻĀtama ʻoku totonu ke fakaʻapaʻapaʻi ʻe he tamaiki tangatá ʻa e tamaiki fefiné. Ko ia naʻá ne fili leva ʻa ʻAivi. Naʻe fakaʻamu ʻa ʻĀtama naʻá ne fai ʻa e fili totonú ʻi heʻene sio ki he fili ʻe Taila ʻa e tamasiʻi lahi taha ʻi he kalasí.
Naʻe ifiʻi ʻe he faiako ko Kāsiá ʻa e meʻaifí ʻi he hili e kau ʻa e taha kotoa ki ha timí, pea lele leva ʻa e ongo timí ki he ongo muiʻi malaʻé. Naʻe mono ange leva ʻe he faiko ko Kāsiá ʻa e foʻi pulú kia Taila, pea siofi takai ʻe Taila e timi ʻa ʻĀtamá kimuʻa pea toki sio fakamamaʻu kia ʻAivi. Naʻá ne ofa leva hono nimá ʻo ne tolongi ʻa e foʻi pulú.
Bam! Naʻe patō ʻa e foʻi pulú he kelekelé pea puna ʻo ʻikai tau ʻi ha taha. Naʻe kemo ʻa ʻĀtama. Ne taimi tonu e kalo ʻa ʻAiví. Naʻe hangē naʻe ʻohovale ʻa e taha kotoa naʻe ʻi aí, ka naʻe malimali pē ʻa ʻĀtama. Mahalo ta ko e meʻalelei pē hono fili ʻo ʻAivií.
Naʻe hoko atu ʻa e vaʻingá. Kei feinga pē ʻa Taila ke tolongi ʻa ʻAivi ʻaki e foʻi pulú, ka naʻe kei kalo pē mo puna ʻo hao. Naʻe ʻikai ha taha te ne lava ʻo tolongi ʻaki e foʻi pulú. Naʻe fuʻu femoʻuekina ʻa Taila mo ha niʻihi ʻo hono kaungā timí he feinga ke ʻalu ʻa ʻAivi ki tuʻá ʻo ʻikai ke nau maʻu ai ha taimi feʻunga ke tolongi ha toe taha kehe. Naʻe malimali ʻa ʻĀtama—he naʻe hanga ʻe he siʻisiʻi ʻa ʻAiví ʻo ʻai ke lelei ange ʻi he tolo pulú koeʻuhí naʻe hanga ʻe heʻene siʻisiʻi mo vavé ʻo ʻai ke faingataʻa ange hono tolongi ke tau aí.
Faifai pea ikuna ʻe he timi ʻa ʻĀtamá ʻa e vaʻingá. Naʻe pehē ʻe Palaiteni, “Naʻe tonu ʻa e meʻatau fakapulipulí. ʻOku sai ʻaupito ʻa ʻAivi.”
Pehē ange ʻe Taila, “ʻIo, ʻe kau ia he taimi ka hokó heʻeku timí. Kuo pau pē ʻemau ikuná!” Naʻe malimali pē ʻa ʻAivi ʻi heʻene luelue ke foki ki he kalasí, ʻoku ʻātakaiʻi ʻe hono kaungā timí.
Naʻe ʻikai tuku e malimali ʻa ʻĀtamá ʻi heʻene muimui atu he kulupú. Naʻá ne angalelei kia ʻAivi, pea kuó ne tokoniʻi ʻa e toenga ʻo e tamaiki tangatá ke nau kiʻi fakaʻapaʻapaʻi lahi ange ʻa e tamaiki fefiné. Naʻe ʻikai ko ha fakapulipuli ʻa e meʻatau fakapulipuli lelei tahá—ka ko e kiʻi angaʻofa pē.