Founga ʻOku ou ʻIlo Aí
Ko e Uho ʻo ʻEku Moʻuí
ʻOku nofo ʻa e taha naʻá ne faʻú ʻi ʻAlekuipa ʻi Pelū.
Naʻá ku ʻilo kau ki he ngāue ʻa Kalaisí ʻi he Tohi Tapú, ka naʻe ʻaʻahi moʻoni nai ki he Ongo ʻAmeliká?
Naʻe fakangofua au heʻeku tamaí ʻi he hoko hoku taʻu 18, ke u papitaiso ʻi ha faʻahinga siasi pē naʻá ku loto ki ai. Naʻá ku fie kau ki ha siasi faka-Kalisitiane koeʻuhí he naʻá ku ako ʻa e Tohi Tapú ʻi ha ngaahi haʻofanga lotu ʻe niʻihi mo tui kia Sīsū Kalaisi.
Naʻe fakaafeʻi ʻe heʻeku faʻētangatá ʻi ha ʻaho ʻe taha ha ongo faifekau fefine ki homau ʻapí. Naʻá na lea ʻi he loto fakapapau moʻoni fekauʻaki mo ʻena tui ko e Tohi ʻa Molomoná ko e fakamoʻoni ia ʻe taha ʻo Sīsū Kalaisi, mo pehē naʻe ʻaʻahi ki he konitinēniti ʻAmeliká.
Naʻá ku fakahā ange ʻeku fakakaukaú ʻi he taimi ko ʻení, mahalo naʻá na maʻuhala, he kuo teʻeki ai tuʻo taha ke u ako ʻi heʻeku moʻuí fekauʻaki mo ia. Naʻe pehē mai ha taha ʻo e ongo sisitaá kiate au, ʻi he loʻimataʻia mo e angaʻofa, “Misa Lopeto, ʻoku ʻikai ʻuhinga hoʻo taʻe ʻilo ʻoku moʻoni e Tohi ʻa Molomoná ʻokú ma maʻuhala ai. ʻOku ou ʻiloʻi ʻoku ʻofa ʻa Sīsū Kalaisi ʻiate kitautolu pea naʻá Ne ʻi he konitinēniti ko ʻení pea naʻá Ne akoʻi ʻa ʻEne ongoongoleleí ʻo hangē pē ko ia naʻá Ne fai ʻi he Fonua Tapú.”
Naʻá na feinga ke tokoniʻi au ʻi heʻeku hohaʻá mo e veiveiuá ʻi he lolotonga ʻo e ʻuluaki pōtalanoa ko iá, pea mau felotoi te na toe ʻaʻahi mai kiate au he uike hokó.
Naʻá ku kamata ʻi he pō ko iá ke huke ʻa e Tohi ʻa Molomoná. Naʻe maʻu ʻeku tokangá ʻe ha kupuʻi lea ʻi heʻeku lau ʻa e peesi talamuʻakí: “Ko e Sīsū ko e Kalaisí, ko e ʻOtua Taʻengatá, ʻokú Ne fakahaaʻi Ia ʻe Ia ki he ngaahi puleʻanga kotoa pē.” Naʻá ku toe lau foki ʻa e 3 Nīfai 11 fekauʻaki mo e ʻaʻahi ʻa e Fakamoʻuí ki he Ongo ʻAmeliká, pea naʻá ku ongoʻi ha fiefia ʻi hoku lotó. Ko ia, naʻá ku fakahoko leva ʻa e meʻa naʻe talamai ʻe he ongo faifekaú ke u faí: Naʻá ku tūʻulutui ʻo ʻeke ki heʻeku Tamai Hēvaní pe ʻoku moʻoni ʻa e tohí.
Naʻá ku ongoʻi ha nonga ʻi he ʻosi ʻo ʻeku lotú pea mo ha fakapapau ʻoku moʻoni ʻeni. Naʻá ku fakakaukau ʻi ha momeniti ko e loʻimata ʻo e ongo sisitaá naʻá na ueʻi au mo fakatupu ke u tui ki heʻena fakamoʻoní. Ko ia ne hoko atu ʻeku lau e Tohi ʻa Molomoná kae ʻoua kuo ʻosi siʻi ʻa e 4:00 hengihengí. Ko e taimi kotoa pē naʻá ku lotu ai, naʻá ku ongoʻi mālohi ange ʻa e fakamoʻoni naʻe hāʻele mai ʻa Kalaisi ki he Ongo ʻAmeliká pea ʻokú Ne finangalo ke u ʻilo lahi ange ki Heʻene ongoongolelei moʻoní.
Naʻe ʻosi ʻeku lau e Tohi ʻa Molomoná ʻi ha ngaahi uike siʻi pē pea naʻá ku ongoʻi hono fie maʻu ke u papitaiso ki he Siasi moʻoní.
Naʻe tokoni hono lau e Tohi ʻa Molomoná ke u ofi ange ai kia Sīsū Kalaisi mo ʻai Ia ko e uho ʻo ʻeku moʻuí. ʻOku ou fakamālō lahi hono tuku ʻe he Fakamoʻuí ʻa e ongo faifekaú mo Hono Siasí ʻi hoku halá.