Te Ke Fie Maʻu ha Matalaʻiʻakau?

ʻĪmisi

illustration of roses for lds voices

Naʻá ku helaʻia mo mata fakafulofula ʻi ha ʻaho ʻe taha, hili ha houa ngāue faingataʻa ʻi he ʻiuniti ʻo e fānaú he falemahakí. Naʻá ku fakatokangaʻi ha ngaahi matalaʻiʻakau fakaʻofoʻofa ʻi heʻeku lue atu ki he tesi ʻo e taha leʻó. Ko e taimi naʻá ku fakamatala ange ai ki he taha he tesí ʻenau fakaʻofoʻofá mo ʻenau namu leleí, naʻá ne talamai te u lava ʻo ʻai ia maʻaku.

Naʻá ku fiefia ʻaupito! Naʻá ku fakakaukau ʻoku pau naʻe finangalo ʻa e Tamai Hēvaní ke u maʻu e ngaahi matalaʻiʻakaú ke fakafiefiaʻi ʻaki hoku ʻahó.

ʻI heʻeku hū ki tuʻa mei he falemahakí, ne u fakatokangaʻi naʻá ku ʻi mui ʻi ha fefine ʻi ha saliote teketeke. Naʻe fakaʻau ke ʻikai ke u faʻa tatali koeʻuhí ko ia ka naʻe faifai pē peá u lava ʻo fakalaka ai ʻi heʻema hū ki tuʻá. Naʻá ne hanga hake ʻi heʻeku fakalaka aí ʻo pehē mai, “ʻOi, ngaahi matalaʻiʻakau fakaʻofoʻofa tama.” Naʻá ku fakamālō ange peá u fakavavevave ki hoku husepānití, naʻe tatali ʻi heʻema kaá. Naʻá ku vēkeveke ke fakaʻaliʻali ange ki ai ʻeku ngaahi matalaʻiʻakaú.

Fakafokifā pē kuó u ongoʻi ʻoku fakahā mai ʻe he Laumālie Māʻoniʻoní naʻe fie maʻu ʻe he fefiné ʻa e ngaahi matalaʻiʻakaú ʻo lahi ange ʻiate au. Naʻá ku ʻāmio ke foaki kinautolu ki ai, ka naʻá ku muimui ʻi he ueʻi ko ʻení. Ko e taimi naʻá ku ʻeke ange ai pe ʻokú ne fie maʻú, naʻá ku ʻamanaki ke ne pehē mai ʻikai.

Naʻá ne tali mai, “ʻOiauē, ʻio! Te u saiʻia ai. ʻOku fakaʻofoʻofa.”

Naʻá ku mono ange ki ai, ka ʻi heʻeku sītuʻa ke ʻalú, naʻe kamata ke halotulotu. Ko e taimi naʻá ku ʻeke ange ai pe naʻe sai peé, naʻá ne talamai ne mālōlō hono husepānití ʻi he ngaahi taʻu siʻi kuo hilí pea kuo laka hake ʻi he taʻu ʻe tahá ʻa e teʻeki ʻaʻahi ange ha taha ʻo ʻene fānaú ki ai. Naʻá ne pehē naʻe kole ki he ʻOtuá ke ʻoange muʻa ha fakaʻilonga ʻo ʻEne ʻofá.

Naʻá ne pehē, “Ko ha ʻāngelo koe ne fekauʻi mai mei he ʻOtuá ke foaki mai e ngaahi matalaʻiʻakau ʻoku ou saiʻia taha aí. ʻOku ou ʻilo ʻeni ʻoku ʻofa ʻa e ʻOtuá ʻiate au.”

Naʻe ongo ki hoku lotó. Naʻá ku siokita. Naʻe fie maʻu ʻe he fefiné ni ha lea ʻofa, ka naʻe ʻikai ke u lava ʻo lea ki ai. Naʻe ʻikai ko ha ʻāngelo au. ʻI heʻema māvaé, ne u kamata tangi foki mo au.

Naʻe ʻeke mai ʻe hoku husepānití ʻi heʻeku aʻu atu ki he kaá pe ko e hā e meʻa naʻe hokó pea mo e ʻuhinga naʻá ku foaki ai ʻeku ngaahi matalaʻiʻakaú. Hangē naʻá ne puputuʻú ka naʻá ne fiemālie ʻi heʻeku fakamatala ange ʻa e meʻa ne hokó.

Naʻá ne pehē, “Naʻá ku ʻomai ha lose maʻá u he ʻahó ni. Naʻá ku ongoʻi naʻá ke fie maʻu kinautolu. Naʻá ku hohaʻa naʻa kuó ke toki foakí ni kinautolu. Kapau naʻe ʻikai ko e ngaahi matalaʻiʻakau ia naʻá ku ʻomaí, ʻoku nau ʻifē?”

Naʻe toki ʻilo naʻe ngalo ʻi he falekoloa matalaʻiʻakaú ke nau ʻomai ʻa e ngaahi matalaʻi losé, ko ia ne ma lele leva ki he falekoloá. Naʻe hū ki loto hoku husepānití ʻo foki mai mo ha haʻinga matalaʻiʻakau fakaʻofoʻofa.

Naʻe ʻikai ke u toe mataʻofi ka u tangi. Kuo kole mai ʻa e Tamai Hēvaní ke u feilaulauʻi ʻa e ngaahi matalaʻiʻakau ko iá, ʻo Ne ʻafioʻi naʻe ʻi ai ha faʻahinga meʻa lelei ange naʻe fakatatali mai maʻaku pea ʻikai ngata aí ka naʻe fie maʻu ʻe Hono ʻofefine liʻekiná ha fakamanatu ʻo ʻEne ʻofá.