Lotu ʻi he Pasí

Naʻe mei hoko e taʻu valu ʻo Sōfiá. Naʻá ne teuteu ke papitaiso. Naʻá ne ako ha ngaahi meʻa mahuʻinga lahi. Ko e taha e meʻa naʻe ako ki aí ko e lotú. Naʻá ne ʻilo ʻe lava ke lotu ki he Tamai Hēvaní ʻi ha taimi pē. Naʻá ne ʻiloʻi ʻe lava ke lotu ʻi ha feituʻu pē.

Naʻe fakakaukau ʻa Sōfia mo ʻene faʻeé ʻi ha ʻaho ʻe taha ke na ʻeva ki heʻene tamaí ʻi he ngāué. Naʻe ngāue ʻene tangataʻeikí ʻi ha kolo kehe. Kuo pau ke na heka ʻi ha pasi, pea hoko ai ha loli, pea toki fakaʻosi ʻi ha tekisī.

Ne mohe ʻa Sōfia ia he lolotonga ʻena heka he pasí. Naʻe toki ʻā ʻi heʻene fanongo ki ha tangi ʻa ha kiʻi pēpē. Naʻe heka mai ha tamai mo ha faʻē mo ha kiʻi pēpē ki he pasí. Naʻe puke ʻa e kiʻi pēpeé mo tangi leʻo lahi. Naʻe hohaʻa e ongomātuʻa ʻa e kiʻi pēpeé.

Ne fakaʻofaʻia ʻa Sōfia he kiʻi pēpeé. Naʻe fakaʻofaʻia foki ʻi he ongomātuʻá. Fakafokifā kuó ne maʻu ha foʻi fakakaukau. Naʻe fanafana leva he telinga ʻo ʻene faʻeé. “ʻE lava nai ke u fai ha lotu ʻo kole ki he Tamai Hēvaní ke tāpuakiʻi ʻa e kiʻi pēpeé?”

Talaange ʻe he Fineʻeikí mo malimali, “Lava lelei.”

Ne punou leva e ʻulu ʻo Sōfiá ʻo fai ha lotu fakalongolongo. Naʻe lotu fakamātoato. Naʻá ne kole ki he Tamai Hēvaní ke tāpuakiʻi ʻa e kiʻi pēpeé. Naʻá ne kole ke Ne tokoniʻi ʻa e kiʻi pēpeé ke ne ongoʻi lelei ange mo tuku ʻene tangí.

Naʻe ʻiloʻi ʻe Sōfia ʻoku ʻikai ke tau faʻa maʻu maʻu pē ʻa e meʻa ʻoku tau lotuá. Naʻá ne toe ʻilo foki ʻoku ʻikai faʻa tali vave mai he taimi pē ko iá ʻetau ngaahi lotú. Ka naʻe fiemālie ʻa e kiʻi pēpeé ʻi ha taimi nounou. Hili ia pea tuku ʻene tangí. Naʻe hangē kuó ne ongoʻi fiemālie angé. Naʻe ʻikai toe hohaʻa ʻene ongomātuʻá.

Naʻe ongoʻi loto māfana mo loto fiefia ʻa Sōfia. Naʻá ne fiefia koeʻuhí ko e pēpeé—pea mo e ongomātuʻa ʻa e pēpeé. Naʻá ne ʻilo ne ongona ʻe he Tamai Hēvaní ʻene lotú.