Tokoni ʻaki Hoʻo Moʻuí Kotoa

ʻĪmisi

Official portrait of Bonnie Lee Green Oscarson, Carol Louise Foley McConkie, and Evelyn Neill Foote Marriott, the Young Women general presidency, 2013. Sustained at the April 2013 general conference.

Hangē ko ʻetau ako ʻi he kaveinga ʻo e Mutualé ki he 2015, ko ha faingamālie toputapu ke tokoni ki he ʻOtuá. Ko ʻemau ʻamanakí te tau takitaha ako he taʻú ni ke tokoni, ʻaki ha loto ʻoku mateaki ange ʻo hangē ko e founga kuo ʻosi fakahinohino ʻe he Fakamoʻuí—ʻaki hotau lotó, iví, ʻatamaí, mo e mālohí kotoa. Te tau lava fēfē ke fai ia? Ko ha ngaahi fakakaukau ʻeni ʻe niʻihi.

ʻUluakí, tau tokoni ʻaki e kotoa hotau lotó. ʻOku mahino kiate kitautolu ʻoku ʻuhinga ʻeni ko hoʻo tokoni ki he ʻOtuá kuo pau ke fakatupu ia ʻe hoʻo ʻofa kiate Ia mo ʻEne fānaú. “ʻE puleʻi ʻe heʻetau ʻofa ki he ʻEikí ʻa e ngaahi ʻekea ʻo ʻetau ʻofá, ngaahi fie maʻu ki hotau taimí, ngaahi meʻa ʻoku tau tulifua ki aí, pea mo e fakahokohoko ʻo e ngaahi meʻa ʻoku tau mahuʻingaʻia aí.”¹ ʻOkú ke fakahaaʻi ki he ʻEikí hoʻo ʻofá ʻi he taimi ʻokú ke tauhi ai ʻEne ngaahi fekaú (vakai, T&F 42:29). ʻOkú ke ngāue ʻi ho ʻapí mo fakamālohia ho fāmilí. ʻOkú ke fakahoko totonu ho uiuiʻí mo tokoniʻi ʻa kinautolu ʻoku nau fie maʻu ha kaungāmeʻá. ʻOkú ke kumi ha ngaahi hingoa fakafāmili ke ʻave ki he temipalé.

Uá, tau tokoni ʻaki e kotoa hotau iví. ʻOku fie maʻu ʻa e ngāue fakatuʻasinó mo e ngāue faivelengá. ʻOku fie maʻu ʻe he ngāue fakafaifekaú ʻa e iví mo e kātakí. ʻOkú ke tokoni ʻaki ho iví ʻi he taimi ʻokú ke ngāue ai ki he ngaahi fie maʻu ʻa e niʻihi kehé, “hangē ko e fafanga ʻo e fiekaiá, fakakofuʻi ʻo e telefuá, ʻaʻahi ki he mahakí pea tokoni ki honau fakafiemālié, ʻi he meʻa fakalaumālié mo fakatuʻasinó fakatouʻosi” (Mosaia 4:26).

Hokó, tau tokoni ʻaki e kotoa hotau ʻatamaí. Kuo pau ke maʻa mo haohaoa hoʻo ngaahi fakakaukaú, pea tukutaha ʻi he Fakamoʻuí. Kuó ke ʻosi fuakava ke manatu maʻu ai pē kiate Ia. ʻOkú ke kumia e tataki ʻa e Laumālie Māʻoniʻoní ʻo fou he ako folofolá mo e lotú. Ko e taimi ʻokú ke fakafenāpasi ai hoʻo ngaahi fakakaukaú, leá, mo e ngaahi ngāué pea mo e fakakaukau mo e finangalo ʻo e ʻOtuá, te ke fakatokangaʻi e ngaahi fie maʻu ʻa e niʻihi kehé pea moʻui taau mo mateuteu ke tokoni.

Fakaʻosí, tau tokoni ki he ʻOtuá ʻaki e kotoa hotau mālohí. Ko ha founga ʻe taha ke maʻu ai ha mālohí ke tui ki he Fakalelei ʻa e Fakamoʻuí. Ke ke fakatomala mo fakamāʻoniʻoniʻi koe ʻaki e talangofua ki Heʻene ngaahi fekaú. ʻOkú ke ongoʻi e mālohi fakaivia mo siotonu he ngaahi maná ʻi hoʻo ngāue ʻi he mālohi ʻo e ʻEikí (vakai, ʻAlamā 26:12).

ʻOkú Ne talaʻofa ʻi hoʻo tokoni mo tauhi ki he ʻOtuá ʻaki ho laumālié kotoá, ʻe fakamaʻa koe mei he angahalá mo mateuteu ke tuʻu ʻi Hono ʻaó ʻo maʻu Hono nāunau taʻengatá.