Ko e Ngāue Fakaofó Ni
Ko e taimi ʻokú ke fanongo ai ki he foʻi lea kamata ke ngāué, ko e hā ʻokú ke fakakaukau ki aí? Ko ha vaka ke tukufolau? Kau ki ha ngāue maʻongoʻonga? Ko e kamataʻanga ʻo ha fononga?
Ko e taimi ʻokú ke “kamata ai he ngāue ʻa e ʻOtuá,” ʻokú ke kau ki he fononga maʻongoʻonga taha kuo faifaiangé pea fakahokó. ʻOkú ke tokoni ki he fakavavevaveʻi ʻe he ʻOtuá ʻa ʻEne ngāué, pea ko ha aʻusia maʻongoʻonga, fakafiefia, mo fakaofo moʻoni.
ʻOua te ke falala ʻataʻatā pē ki heʻemau leá. Naʻe hū ʻa e kau talavou ʻi ha kōlomu ʻa e kau akonakí ʻi ha kiʻi kolo ʻi ʻIutā he taʻu kuo ʻosí ki he uepisaiti ʻo e ngaahi ʻekitivitī ʻa e toʻu tupú (lds.org/youth/activities) ke kumi ha ngaahi fakakaukau ki ha ʻekitivitī. Naʻe ʻi ai ha taha naʻá ne maʻu ʻenau tokangá: “ʻAho ʻe Fitu ʻo e Ngāue Tokoní.”
Naʻe fakakaukau ʻa e kau talavoú ni ke nau fai ha meʻa lahi ange: te nau fai ha tokoni ʻi he ʻaho takitaha ʻi he uiké kakato ki ha taha ʻi he uōtí naʻá ne kole. Naʻe kiʻi ʻohovale ʻa e kau talavoú ʻi he taimi naʻe fakamoʻoni ai ha fāmili ʻe 19 pea mahalo naʻa nau kiʻi mafasia. Te nau lava ke fai ha ngāue lahi pehē ʻi ha kiʻi taimi nounou? Ka ne nau ʻosi fai ha tukupā, ko ia ne nau pehē leva ke tokoniʻi kotoa ʻa e ngaahi fāmilí.
Naʻa nau fakahoko fakakātoa ha tokoni houa ʻe 250 ʻi he uike pē ʻe taha, ʻo fakahoko ha ngaahi ngāue hangē ko e fetuku ha ngaahi fokotuʻunga maka lalahi, keli ha puha ʻoneʻone faiʻanga vaʻinga, fakamaʻa ha ngaahi fakatali, mo fokotuʻutuʻu fefie. Pea naʻá ne liliu foki ai mo e kau talavoú.
Naʻa nau ongoʻi māluʻia ʻi he mālohi ne nau ongoʻí pea mo e ngaahi tāpuaki ne nau maʻú. Naʻa nau fakamatalaʻi ʻenau ongoʻi uouangataha ko e kōlomú pea mo ʻenau maʻu e tokoni fakalangi ke fai ʻenau ngāué mo e ngaahi fatongia kehé. Ko e taimi ní, ko e taimi ʻoku fie maʻu ai ʻe he uōtí ha tokoni, ʻoku tali vēkeveke ʻe he kōlomu ʻo e kau akonakí. Naʻe ʻikai ke nau tokoni ʻi ha uike pē ʻe taha—ʻoku nau feinga ke tokoni ʻi he ʻaho kotoa pē.
Ko ha ngāue fakaofo moʻoni ʻa e tokoni mo e langa e puleʻanga ʻo e ʻOtuá. Naʻá ne ʻomi ha fiefia ki he kau talavoú ni, pea te ne ʻomi ha fiefia kiate koe ʻi haʻo hiki hake ha niʻihi kehe mo fakatokangaʻi e liliu ʻenau moʻuí ʻi he ngaahi ngāue haohaoa mo moʻoní. Hangē ko hono fakamatalaʻi ʻe he kau palesitenisī lahi ʻo e Kau Finemuí ʻi he peesi 48, ko ha faingamālie ke ngāue maʻá e ʻOtuá.
Kamata he taimí ni ʻi he ngāue maʻá e ʻOtuá “ʻaki ho lotó, iví, ʻatamaí mo e mālohí kotoa” (T&F 4:2). ʻOku mau fie ʻilo ki hoʻomou ngaahi aʻusia he ngāué! Faitaaʻi ha ngaahi vitiō pea faitaaʻi hoʻomou ngāué, fakahū kinautolu ki he ngaahi uepisaiti fakamītiá, vahevahe kinautolu mo homou ngaahi fāmilí mo e kaungāmeʻá, pea ʻīmeili kinautolu ki he liahona@ldschurch.org. Te mou lava foki ke fakamatalaʻi kinautolu ki ha niʻihi kehe ʻi he uepisaiti ʻo e ngaahi ʻekitivitī ʻa e toʻu tupú. Kātaki ʻo fakaafeʻi ha niʻihi kehe ke nau kau mo koe ʻi he ngāue fakaofó ni, pea tau vakai pe ko e hā hano lahi ʻo ʻetau liliu ʻa e māmaní.