ʻE Lava Ke U Vetehia?

Naʻe kamata tā vave hoku mafú ʻi heʻeku tangutu fehangahangai mo e mēmipa ʻo e kau palesitenisī fakasiteikí. Naʻe talu ʻeku taʻemanonga mei he telefoni ange ʻa e kalake fakasiteikí ke fokotuʻu ha taimi. Te ne ʻiloʻi nai naʻe ʻikai ke u taau ke ngāue?

Naʻá ku fakakaukau ʻe faingofua ange ke ʻave ki he fakamaauʻanga ʻo e ʻOtuá ha ngaahi angahala ʻe niʻihi ʻi hano fakahā ʻi heni ʻi māmani, ʻo u fakakaukau ʻe ngali siokita ke fakahā ha ngaahi meʻa te ne fakatupu ha mamahi pe fakamā ki hoku uaifí. ʻE sai ange ke u ikunaʻi toko taha pē ʻe au mo fuesia hono mamafá. Ko e palopalemá pē he naʻe ʻikai ke u lava ʻo ikunaʻi kinautolu ʻiate au pē.

Naʻá ku tangutu ʻi ai ʻi hono fakahoko mai ʻe he tokoni ʻi he kau palesitenisī fakasiteikí ha uiuiʻi. Naʻá ne fehuʻi mai, “Misa; te ke fie tali ʻa e uiuiʻi ko ʻení?” Naʻá ku loto ke u kaila, “ʻIo!” Ka, naʻe hangē naʻe taʻemapuleʻí, ʻeku fanongo ki heʻeku pehē, “He ʻikai ke u lava; ʻoku fie maʻu ke u fakaleleiʻi ha ngaahi angahala.”

Naʻe hū fakataha mai ʻa e taʻemanongá mo e fiemālié ʻi heʻeku vete ʻa e natula angamaheni ʻo e angahalá. Naʻá ne ʻeke mai pe kuó u ʻosi talanoa mo ʻeku pīsopé. “ʻIkai.” Fēfē hoku uaifí” “ʻIkai.” Naʻá ma lulululu, malimali, peá ne talamai ʻokú ne fiefia heʻeku vetehiá, peá ne fakahinohino au ke u talanoa mo e pīsopé mo hoku uaifí.

Naʻá ku talangofua, ʻo tomuʻa fakahā ki hoku uaifí—ʻo ʻosi ai ʻeku manavasiʻi lahi tahá. Naʻá ne kei ʻofa ʻiate au! ʻIo, naʻá ne loto mamahi, pea naʻe pau ke ma ngāueʻi ha ngaahi meʻa, ka naʻá ne ʻofa ʻiate au mo poupouʻi au ke u ʻalu ki he pīsopé.

Ko e taimi naʻá ku ʻalu ai ke talanoa mo e pīsopé, naʻá ne talitali lelei au he taimi pē ko iá ki hono ʻōfisí. Naʻe faingataʻa ʻa ʻeku feinga ke fakahā mahino e ʻuhinga naʻá ku ʻi ai aí. Naʻe faingataʻa ke u ʻilo e meʻa ke u kamata aí, ʻi he hili ko ʻeni ʻeku fufuuʻi fuoloa ʻeku ngaahi angahalá. Naʻá ku fakamatalaʻi ange e natula fakalūkufua ʻo ʻeku ngaahi angahalá mo kole ha taimi ke u lau fakalautelau ai ʻeku ngaahi fehalaākí. Naʻe loto fiemālie lelei pē ki ai.

Naʻe teʻeki ai pē ke u vetehia kakato, ka naʻá ku ongoʻi e mahuʻi atu e mafasiá mei hoku umá. Fāifai ne u ongoʻi foki ha ʻamanaki lelei foʻou ki ha tauʻatāina, mei he kavenga mafasiá ni.

Naʻá ku fakaʻaongaʻi e ngaahi uike hokó ki he lotu, lau e folofolá, mo fokotuʻu ʻeku lisi ke fakahā ki heʻeku pīsopé mo ʻeku Tamai Hēvaní fakatouʻosi. Naʻá ku fuofua ʻave ʻeku lisí ki he Tamai Hēvaní, ʻi he loto mafesifesi mo e loto fakatomala, ke Ne ʻafioʻi ʻoku ou kole fakamolemole mo loto moʻoni ke liliu. Naʻá ku fokotuʻu ha toe taimi mo e pīsopé pea vahevahe kakato ʻeku lisí. Naʻe ʻikai ke ne mata mamahi, kaila, pe valokiʻi au; ka, naʻá ne fāʻofua kiate au. Naʻá ne fakahā mai ʻene ʻofá pea mo e ʻofa ʻa e ʻEikí, pea mo fakahā mai ʻoku ou ʻi he hala ʻo e fakatomala moʻoní he taimí ni. Naʻá ku ʻilo naʻe moʻoni ia.

Naʻe hoko e vete ʻo ʻeku ngaahi angahalá, ʻa ia ko ʻeku manavasiʻi lahi taha ia kimuʻá, ko e taha ʻo e ngaahi aʻusia fakaʻofoʻofa taha ʻo ʻeku moʻuí. Ko e ʻuluaki sitepu ia ke mahino moʻoni ai kiate au e meʻaʻofa mo e mālohi faifakamoʻui ʻo e Fakalelei ʻa Sīsū Kalaisí.