Ko ha Ngāue Tokoni Naʻe Fetongi

ʻĪmisi

illustration for lds voices

Tā fakatātaaʻi ʻe Bradley Clark

Naʻá ku faʻa ʻalu mo hoku kaungā lokí ʻi hoku ʻuluaki taʻu he ʻunivēsití ke ʻaʻahi ki he tokoua ʻo e kui-tangata tolu taʻu 98 ʻo ʻene faʻeé, ʻa ia naʻá ma ui ko e Faʻē-tangata ko Sioó. Naʻe nofo toko taha pē pea naʻe taʻelata, pea naʻá ma feinga ke ʻaʻahi ki ai ʻi he tuʻo lahi taha ʻe lavá. Naʻá ne faʻa fai mai ha ngaahi talanoa ʻi he lolotonga ʻo ʻema ʻaʻahí fekauʻaki mo e taimi naʻe nofo ai ʻi Mekisikoú pea mo ha ngaahi kolo ʻe niʻihi he kauʻāfonua ʻi ʻAlesoná, kau ai ʻa Nokalisi (Nogales).

Naʻá ku ongoʻi naʻe ueʻi au ke u kei ʻaʻahi ki he Faʻētangata ko Sioó, ʻi he taimi naʻe foki fakataimi ai hoku kaungā lokí ki ʻapí. Naʻá ne hoko ko ha kaungāmeʻa mamae, pea naʻá ku ʻaʻahi ki ai ʻo aʻu ki heʻene mālōlō hili ia ha taʻu ʻe taha mo e konga. Ne u loto mamahi he mole hoku kaungāmeʻá ka naʻá ku fakamālō koeʻuhí ko e taimi mahuʻinga ne ma feohi aí.

Naʻá ku lau e tohinoa ʻa ʻeku kui-fefine hono uá ʻi he ʻosi ha taʻu ʻe hongofulu mei he mālōlō ʻa e Faʻētangata ko Sioó. Naʻe fakamatala ʻa e tohinoá ki hano husepāniti naʻe ʻikai ke ne tuku ange ha paʻanga, toe ke totongi ha $30 ki he fale nofoʻangá, pea ʻi ai mo e fānau ʻe toko hiva ke fafanga.

Hili ia peá ne tohi ʻo pehē: “Naʻe angaʻofa moʻoni ʻa e kakai ʻi Pisepeí [ʻAlesona] kiate kimautolu. Neongo naʻa mau nofo mavahe mei he koló he fakatonga ʻo Pisepeí, ka naʻa nau fakafoki mai kimautolu [mei he lotú]. Naʻe tuʻo lahi hano fakafoki mai kimautolu ʻe Misa Siosefa Kilimani ʻa ia naʻá ne nofo ʻi Mekisikou, pea ʻikai ngata ai, ka naʻe ʻave kimautolu kātoa ʻe [hono fāmilí] ke mau maʻu meʻatokoni efiafi mo kinautolu. Naʻa nau ʻomi ha lāpisi naʻe fakapaku mo ha ngaahi meʻakai kehekehe, ʻa ia naʻa mau ifoʻia ʻaupito ai. Naʻa nau hiki ki Nokalisi … pea naʻa nau foaki mai ʻenau fanga lāpisí, lanu hinehina fakaʻofoʻofa, pea naʻa mau maʻu moʻoni ha meʻa feʻunga ke mau kai.”

Ko e taimi naʻá ku lau ai ʻení, naʻá ku ʻiloʻi ko Siosefa Kilimani ko ē naʻá ne tokoniʻi ʻeku kui fefine uá ko e Faʻētangata ia ko Sioó! Naʻá ku ongoʻi e fanafana mai ʻa e Laumālié naʻe ueʻi au ke u kei ʻaʻahi ki he Faʻētangata ko Sioó ko ha kiʻi fakamālō ʻi he angaʻofa naʻá ne fai ki heʻeku kui fefine uá mo hono fāmilí.

Naʻá ku fiefia ke hoko ko ha konga ʻo ha talanoa ʻo e ʻofa mo e ngāue tokoní. ʻOku ou ʻiloʻi ʻoku ʻafioʻi ʻe he ʻEikí ʻEne fānaú. Kapau te tau talangofua ki he ngaahi ueʻi ʻa e Laumālie Māʻoniʻoní, te tau lava ʻo tāpuakiʻi e moʻui ʻa ha niʻihi kehe pea iku tāpuakiʻi ai mo kitautolu.