Poupouʻi ʻe he Fie Maʻú ke Hikiʻi Hake ʻe he Fānau Ako Seminelí ʻEnau Akó
Kuo kamata fakahoko ʻi he Siasí kotoa ha fie maʻu foʻou ki he fakaʻosi ako mei he seminelí ʻe tokoni ki he kau akó ke “hikiʻi hake ʻa e akó.” ʻOku kau ʻi he ngaahi fie maʻú ha ongo meʻa mahuʻinga ʻa ia ʻe fakahoko ʻi he kamataʻanga e taʻu fakaakó, ʻi hono ako ʻo e Tokāteline mo e Ngaahi Fuakavá pea mo e hisitōlia ʻo e Siasí:
-
ʻE fie maʻu ke lau ʻe he fānau ako seminelí ʻa e tohi folofola ʻoku nau ako he taʻu ko iá, ʻo tānaki atu ki hono maʻu ha maaka ʻoku makatuʻunga ʻi heʻenau maʻu kalasí pea mo e fakaongoongolelei ha taki fakalotu mei heʻenau pīsopé pe palesiteni fakakoló. Naʻe fakamamafaʻi hono lau e folofolá ʻi he kuohilí, ka kuo hoko ia ko ha fie maʻu ki he fakaʻosi akó.
-
ʻE fie maʻu ke lavaʻi ʻe he kau akó ha sivi vakaiʻi ʻo e akó ʻe ua lolotonga e taʻú, pea peseti ʻe 75 pe lahi ange e māká. ʻE fakahoko e sivi ʻe taha ʻi he vaeuaʻangamālie ʻo e taʻú pea ko hono uá ʻi he fakaʻosinga ʻo e taʻu fakaakó. ʻE fakatefito ʻa e siví ki he mahino fakatokāteliné pea mo hono moʻui fakaʻaho ʻaki e ngaahi tefitoʻi moʻoni ʻo e ongoongoleleí.
Ko e ngaahi fie maʻu foʻou ʻa e seminelí—fakataha mo e Malangaʻaki ʻEku Ongoongoleleí: Ko Ha Fakahinohino ki he Ngāue Fakafaifekaú pea mo e nāunau fakalēsoni e toʻu tupú ki he Sāpaté, Haʻu ʻo Muimui ʻIate Au—te ne ʻomi ha faingamālie ki he toʻu tupú ke nau fakafalala pē ki heʻenau fakamoʻoní, fakaloloto ʻenau mahino ki he ongoongoleleí, pea fakatupulaki ʻenau malava ke vahevahe ʻa ʻenau ʻiló ʻi heʻenau teuteu ki ha moʻui ngāue tokoni pea mo tuʻunga fakaākongá.
ʻE maʻu ʻe he fānau akó ʻi he fakaʻosinga ʻo e taʻu kotoa pē, ha tohi fakamoʻoni ʻo fakahaaʻi kuo nau fakakakato e ngaahi fie maʻu (kau ai ʻa e laukongá mo e siví) pe ko ha tohi fakamoʻoni ʻoku fakahaaʻi ne nau aʻusia ʻa e fie maʻu ko ia ki he maʻu kalasí.